1. ?Jehova i mekem wanem long yumi wanwan?

JEHOVA i pulum yumi wanwan i kam long hem. (Jon 6:44) ?Hemia i minim wanem? Taem Jehova i lukluk gud long plante bilian man long wol ya, hem i luk wan nambawan samting insaed long yu, hemia wan hat we i save lavem hem. (1 Kron. 28:9) Jehova i save yu, i kasemsave long yu, mo i lavem yu. !Hemia i rili nambawan!

2. ?Olsem wanem yumi save se Jehova i kea long yumi?

² Jehova i kea bigwan long yu mo i kea tu long evri Kristin brata mo sista blong yu. Blong kasem save samting ya, Jisas i tokbaot Jehova olsem wan man blong lukaot long sipsip. Sipos i gat 100 sipsip mo wan i lus, ?bambae man blong lukaot long sipsip i mekem wanem? Bambae hem “i livim ol 99 sipsip ya long bigfala hil, nao i go lukaot hemia we i lus.” Mo taem hem i faenem hem, bambae hem i no kros long hem, be bambae hem i glad bigwan. Men poen se, Jehova i luk evri sipsip se oli impoten. Jisas i talem se: “Papa blong mi long heven i no wantem se wan long ol smolwan ya i lus.”—Mat. 18:12-14.

3. ?Bambae yumi tokbaot wanem long stadi ya?

³ Yumi no wantem nating blong mekem eni brata o sista blong yumi i harem nogud. ?Olsem wanem blong no mekem narafala i stambol? ?Yumi save mekem wanem sipos narafala i mekem yumi harem nogud? Bambae yumi tokbaot ansa blong ol kwestin ya long stadi ya. Be fastaem bambae yumi faenemaot hu ya “ol smolwan ya” we Matiu japta 18 i tokbaot.

4. ?Hu ya “ol smolwan ya”?

⁴ “Ol smolwan ya” hemia ol disaepol blong Jisas we oli gat ol defdefren yia. Olgeta ya oli “olsem ol smol pikinini” from we oli rere blong lesin long ol tijing blong Jisas. (Mat. 18:3) Nating se oli gat defren bakgraon, kalja, tingting, mo fasin, be evriwan oli bilif long Kraes. Mo hem tu i lavem olgeta tumas.—Mat. 18:6; Jon 1:12.

5. ?Jehova i harem olsem wanem taem wan man i mekem yumi stambol o spolem yumi?

⁵ Long lukluk blong Jehova “ol smolwan ya” oli sas. Blong kasemsave filing blong Jehova long saed ya, tingbaot filing we yumi gat long ol pikinini. Yumi laekem olgeta tumas, mo yumi wantem protektem olgeta from we oli no strong, oli no gat ekspiriens o waes. Yumi no laekem luk taem man i mekem narafala i safa, be taem wan man i mekem i nogud long wan pikinini, yumi harem nogud mo yumi kam kros. Long sem fasin, Jehova i wantem protektem yumi. Taswe sipos wan man i mekem yumi stambol o spolem yumi, Jehova i harem nogud mo i kros.—Aes. 63:9; Mak 9:42.

6. Folem 1 Korin 1:26-29, ?ol man blong wol oli luk ol disaepol blong Jisas olsem wanem?

⁶ ?Wanem moa i soemaot se ol disaepol blong Jisas oli olsem “ol smolwan ya”? Ol man blong wol oli tinghae long ol man we oli rij, oli popiula mo oli gat haenem. Be ol disaepol blong Jisas oli no olsem. Taswe ol man blong wol oli luk olgeta se oli se oli no impoten, oli olsem “ol smolwan ya.” (Ridim 1 Korin 1:26-29.) Be Jehova i no luk olgeta olsem.

7. ?Jehova i wantem se yumi gat wanem tingting long ol brata sista blong yumi?

⁷ Jehova i lavem olgeta man blong hem, nating se oli mekem wok blong hem plante yia finis o oli niu long trutok. Jehova i luk olgeta se oli impoten, taswe yumi tu yumi mas mekem sem mak. Yumi wantem “lavem olgeta brata,” blong yumi, be i no jes samfala nomo. (1 Pita 2:17) Yumi mas rere blong mekem evri samting we yumi naf blong mekem blong protektem mo kea long olgeta. Sipos yumi save se yumi mekem narafala i harem nogud, yumi no mas lego nomo olsem mo gat tingting se man ya i kwik tumas blong harem nogud, mo se hem i sud fogivim yumi. ?From wanem maet samfala oli kwik tumas blong harem nogud? Maet hemia from bakgraon blong olgeta. Mo samfala oli ting nating long olgeta wan. Sam narafala oli niu long trutok mo oli no lanem yet olsem wanem blong dil wetem ol slak fasin blong narafala. Nomata wanem risen, yumi mas traehad blong holemtaet pis. Mo tu, man we i kwik blong harem nogud, hem i mas luksave se hem i mas kam gud moa long fasin ya. Olsem nao, bambae hem i gat pis long tingting mo i joen gud wetem ol narafala.

8. ?Ol disaepol oli askem wanem long Jisas, mo from wanem?

⁸ ?From wanem Jisas i tokbaot “ol smolwan ya”? Ol disaepol blong hem oli askem hem se: “?Long Kingdom blong heven, hu i hae moa?” (Mat. 18:1) Plante man Jiu long taem ya oli wantem se ol narafala oli luk olgeta se oli impoten. Wan man blong stadi i talem se: “Samting we i moa impoten long laef blong olgeta, hemia blong mekem ol narafala oli ona long olgeta mo mekem oli kam popiula.”

9. ?Ol disaepol blong Jisas oli mas mekem wanem?

⁹ Jisas i save se ol disaepol blong hem oli mas wok had blong rutumaot long hat blong olgeta, tingting ya se oli hae moa long ol narafala, from hemia nao tingting we plante man Jiu oli gat long taem ya. Mo hem i talem long olgeta se: “Man we i hae moa long yufala, hem  i mas kam olsem we i yang moa long yufala, mo man we i lidim yufala, hem i mas kam olsem man blong wok nomo.” (Luk 22:26) Yumi kam olsem man we i “yang moa” taem yumi “luk ol narafala man se oli hae moa” long yumi. (Fil. 2:3) Sipos yumi traehad blong wokem fasin ya, bambae yumi no mekem narafala i stambol.

10. ?Wanem advaes blong Pol we yumi mas folem?

¹⁰ Yumi mas luk ol brata mo sista se oli hae moa long yumi long plante defren wei. Bambae i isi nomo blong luksave samting ya, sipos yumi luk ol gudfala fasin blong olgeta. Yumi mas tingbaot tok we aposol Pol i givim long ol Kristin long Korin we i se: “?Wanem i mekem se yu yu defren long ol narafala man? ?Wanem samting we i blong yu we yu no bin kasem long narafala? Sipos narafala i givim long yu, ?from wanem yu stap tok flas?” (1 Kor. 4:7) Yumi mas lukaot gud se yumi no pulum ol narafala blong oli luk se yumi hae moa long olgeta. Nating sipos wan brata i stap givim ol naesfala tok, mo wan sista i gat gudhan blong statem ol Baebol stadi, be oltaem oli mas presem Jehova nomo.

11. ?Yumi lanem wanem long pijatok blong Jisas?

¹¹ Afta we Jisas i givim woning long ol disaepol blong hem long fasin ya blong mekem narafala i stambol, hem i tokbaot eksampol blong wan king mo slef blong hem. King ya i kanselem bigfala kaon we slef ya i no save pembak. Be biaen slef ya i no wantem kanselem smol kaon we wan narafala slef i gat long hem. Long en, king i sakem rabis slef ya i go long kalabus. ?Yumi lanem wanem? Jisas i talem se: “Papa blong mi long heven bambae i mekem sem fasin long yufala evriwan, sipos yufala i no fogivim ol brata blong yufala long hat blong yufala.”—Mat. 18:21-35.

12. Sipos yumi no wantem fogif, ?olsem wanem hemia i spolem narafala?

¹² Fasin blong slef ya, i no spolem hem wan nomo be ol narafala tu. Faswan, hem i no kaen long narafala slef ya, taem hem i “sakem slef ya long kalabus, blong hem i stap gogo i pembak kaon ya.” Namba tu, hem i spolem filing blong ol narafala slef. Taem “oli luk samting ya, oli harem nogud tumas.” Long sem fasin, ol aksen blong yumi oli save afektem ol narafala. Sipos narafala i mekem i nogud long yumi mo yumi no wantem fogivim hem, ?wanem bambae i hapen? Faswan, yumi spolem hem from yumi no wantem fogivim hem, yumi no wantem save long hem, mo yumi no wantem soem lav long hem. Namba tu, yumi mekem ol narafala long kongregesen oli harem nogud, from oli luksave se yumi no gat pis wetem narafala ya.

13. ?Yu yu lanem wanem long ekspiriens blong wan paenia?

¹³ Taem yumi fogivim ol brata mo sista blong yumi, yumi mekem i gud long yumi wan mo ol narafala tu. Mo hemia nao samting we wan paenia sista we bambae yumi singaot hem se Crystal i mekem. Wan sista long kongregesen i mekem hem i harem nogud. Crystal i talem se: “Samtaem mi harem se ol toktok blong hem oli olsem naef we i katem mi. Long wok blong prij, mi no wantem nating se bae oli putum mi wetem hem. Sloslo mi no moa gat strong tingting blong prij mo mi no moa glad.” Crystal i harem se i stret nomo blong hem i kros. Be hem i no holemtaet kros mo i no tingbaot hem wan nomo. Hem i gat tingting daon mo i folem advaes we i kamaot long Wajtaoa blong 15 Oktoba 1999, long stadi ya “Fogivim Evriwan Wetem Ful Hat Blong Yu.” Crystal i fogivim sista ya mo i talem se: “Naoia mi luksave se yumi evriwan i stap traehad blong wokem ol niufala fasin, mo Jehova i  rere blong fogivim yumi evri dei. Naoia mi harem se tingting blong mi i kam kwaet mo mi kasem glad bakegen.”

14. Folem Matiu 18:21, 22, ?aposol Pita i faenem i had blong mekem wanem, mo yumi lanem wanem long ansa we Jisas i talem?

¹⁴ Yumi save se samting we i stret blong mekem, hemia blong fogivim narafala. Be maet i had blong mekem olsem. Maet samtaem aposol Pita tu i harem se i had blong fogivim narafala. (Ridim Matiu 18:21, 22.) ?Wanem i save givhan? Fastaem, tingting dip long fasin blong Jehova blong fogivim yu. (Mat. 18:32, 33) Jehova i glad nomo blong fogivim yumi nating se yumi sinman. (Sam 103:8-10) Mo long semtaem, “yumi tu yumi mas lavlavem yumi.” Taswe fasin fogivim i wan fasin we yumi mas mekem. Hemia i olsem wan kaen we yumi gat long ol brata sista blong yumi. (1 Jon 4:11) Namba tu, yumi mas tingting dip long samting we i kamaot taem yumi fogivim ol narafala. Maet yumi halpem man we i mekem i no stret long yumi, yumi mekem kongregesen i joen, yumi protektem frensip blong yumi wetem Jehova mo yumi harem gud bakegen. (2 Kor. 2:7; Kol. 3:14) Mo laswan, prea long Man we i askem yumi blong fogif. No letem Setan i spolem frensip blong yumi wetem ol brata sista. (Efes. 4:26, 27) Yumi nidim help blong Jehova blong yumi save ronwe long ol trap blong Setan.

15. Folem Kolosi 3:13, ?yumi mas mekem wanem sipos narafala i mekem yumi harem nogud?

¹⁵ Sipos aksen blong wan brata o sista i mekem yu harem nogud, ?bambae yu mekem wanem? Traehad long evri rod blong holemtaet pis. Talemaot ol filing blong yu long Jehova. Askem hem blong i blesem man ya we i mekem yu harem nogud, mo i halpem yu blong luk ol gudfala fasin blong man ya, hemia ol fasin we Jehova i laekem long hem. (Luk 6:28) Sipos  yu no save fogetem samting we narafala i mekem long yu, i gud yu tingbaot olsem wanem blong go toktok wetem hem. I gud blong tingbaot oltaem se maet narafala ya i no minim blong mekem yu harem nogud. (Mat. 5:23, 24; 1 Kor. 13:7) Taem yu toktok wetem hem, yu no mas givim tingting se hem i rong. ?Olsem wanem sipos hem i no wantem mekem pis? Yu “no mas hariap blong kros” long hem, be yu mas gat longfala tingting. (Ridim Kolosi 3:13.) Impoten samting se, yu no mas gohed blong kros long hem, from hemia i save spolem frensip blong yu wetem Jehova. No letem eni samting i mekem yu stambol. Sipos yu mekem olsem, yu stap pruvum se yu lavem Jehova moa i bitim eni narafala samting.—Sam 119:165.

16. ?Yumi wanwan i gat wanem wok blong mekem?

¹⁶ Yumi glad tumas blong mekem wok blong Jehova wetem ol brata sista blong yumi we yumi olsem “wan grup nomo” we ‘wan man nomo we i lukaot long yumi.’ (Jon 10:16) Buk ya Oganaesesen We i Mekem Wok Blong Jehova, pej 165, i talem se: “Yu harem gud blong stap wetem ol man we oli joen gud, taswe yu tu yu mas givhan blong mekem fasin ya i stap strong.” Taswe “yumi mas gat sem tingting olsem Jehova long ol brata mo sista blong yumi.” Jehova i luk yumi “ol smolwan ya” se yumi evriwan i sas. ?Yumi gat sem lukluk olsem Jehova? Jehova i luk mo i tinghae long evri samting we yu mekem blong halpem olgeta mo kea long olgeta.—Mat. 10:42.

17. ?Yumi mas gat strong tingting blong mekem wanem?

¹⁷ Yumi lavem ol brata sista blong yumi. Taswe “yumi no mas putum wan ston o wan narafala samting long fored blong wan brata, blong mekem hem i stambol.” (Rom 14:13) Yumi luk ol brata sista blong yumi se oli hae moa long yumi, mo yumi wantem fogivim olgeta long hat blong yumi. Yumi no mas stambol from samting we narafala i mekem. Taswe yumi mas “traehad long evri rod blong gat pis wetem ol narafala, mo blong yumi givgivhan long yumi blong yumi kam strong.”—Rom 14:19.