1. Folem Prija 7:20, ?wanem trutok we King Solomon i talem?

 KING Solomon i raetem se: “I no gat wan stret man long wol we i stap mekem samting we i gud oltaem mo i neva mekem sin.” (Pri. 7:20) !Hemia i tru! Yumi evriwan i sinman. (1 Jon 1:8) Taswe, yumi evriwan i nidim we God mo ol man oli fogivim yumi.

2. ?Yu yu harem olsem wanem taem wan gudfala fren i fogivim yu?

² ?Yu yu tingbaot wan taem we yu bin mekem wan gudfala fren blong yu i harem nogud? Long taem olsem, ating yu wantem tumas blong stretem samting ya mo mekem yutufala i fren gud bakegen. Ale yu go talem sore long hem we i rili kamaot long hat blong yu. ?Yu yu harem olsem wanem taem fren blong yu i glad blong fogivim yu? !I sua se yu harem gud mo yu glad tu!

3. ?Bambae yumi tokbaot wanem long stadi ya?

³ Yumi wantem se Jehova i kam bes Fren blong yumi, be samtaem yumi save mekem o talem wan samting we i mekem hem i harem nogud. ?From wanem yumi sua se Jehova i wantem fogivim yumi? ?Olsem wanem fasin blong Jehova blong fogif, i defren long fasin blong man blong fogif? Mo laswan, ?God i save fogivim wanem kaen man?

4. ?From wanem yumi sua se Jehova i rere blong fogif?

⁴ Baebol i talem long yumi se Jehova i rere blong fogif. Taem Jehova i tokbaot hem wan long Moses long Hil Ya Sinae, hem i sanem wan enjel blong talem se: “Jehova, Jehova, wan God we i gat sore mo i kaen, i no save kros kwik, mo fasin blong  hem blong lavem man oltaem i bigwan tumas, mo hem i tok tru. Oltaem hem i soemaot se hem i lavem plante taosen man, hem i fogivim man we i mekem rong, no i brekem loa, no i mekem sin.” (Eks. 34:6, 7) Jehova i wan God we i kaen mo i gat sore, mo oltaem hem i rere blong fogivim man we i tanem tingting from sin blong hem.—Neh. 9:17; Sam 86:15.

5. Folem Ol Sam 103:13, 14, ?Jehova i mekem wanem nating se hem i save gud se yumi wanem kaen man?

⁵ Jehova we i Krieta blong yumi i save gud evri samting long saed blong yumi. !Traem tingbaot! Hem i save gud evri ditel long saed blong evri man long wol. (Sam 139:15-17) Taswe, hem i save luk evri nogud fasin we yumi kasem long ol perens blong yumi. Antap moa, hem i save samting we i hapen long laef blong yumi we i mekem se yumi kam wanem kaen man. From we Jehova i save gud yumi, ?hemia i pulum hem blong mekem wanem? Hem i wantem tumas blong sore long yumi.—Sam 78:39; ridim Ol Sam 103:13, 14.

6. ?Wanem i pruvum se Jehova i wantem tumas blong fogif?

⁶ Jehova i pruvum se hem i wantem tumas blong fogif. Hem i kasemsave se from aksen blong faswan man ya Adam, yumi evriwan i sinman mo bambae yumi ded. (Rom 5:12) I no gat rod blong mekem se yumi wan mo ol narafala i kam fri long panis ya. (Sam 49:7-9) Be from we God i lavem yumi, hem i gat sore mo i mekem samting blong yumi save kam fri. ?Hem i mekem wanem? Jon 3:16 i talem se, Jehova i sanem stret Pikinini blong hem, wan nomo we hem i gat, blong ded long bihaf blong yumi. (Mat. 20:28; Rom 5:19) Jisas i safa mo i ded long bihaf blong yumi, blong mekem se eni man we i soemaot se i bilif long hem, i save kam fri. (Hib. 2:9) !I sua se Jehova i mas harem nogud tumas taem i luk Boe blong hem we hem i lavem tumas, i ded long wan fasin we i nogud olgeta mo i blong sem nomo! Traem tingbaot, Jehova i no save letem Boe blong hem i ded olsem, sipos hem i no wantem fogivim yumi.

7. ?Wanem sam eksampol long Baebol we i soemaot se Jehova i rere blong fogif?

⁷ Baebol i tokbaot eksampol blong plante man we Jehova i rere blong fogivim olgeta. (Efes. 4:32) ?I gat wan we yu yu tingbaot? Maet yu tingbaot King Manase. Rabis man ya i mekem plante nogud samting agensem Jehova.  Hem i lidim ol man blong wosipim ol giaman god. Hem i kilim ol pikinini blong hem mo sakrefaesem olgeta i go long ol giaman god, mo antap moa hem i putum pija blong wan giaman god insaed long tabu tempol blong Jehova. Baebol i tokbaot hem se: “Hem i mekem ol samting we oli nogud long ae blong Jehova we i bitim mak olgeta, blong mekem hem i kros.” (2 Kron. 33:2-7) Be taem Manase i soemaot se hem i rili tanem tingting blong hem, Jehova i rere blong fogivim hem. Antap long hemia, Jehova i letem hem i kam king bakegen. (2 Kron. 33:12, 13) Maet yu tingbaot King Deved tu we i mekem bigfala sin agensem Jehova, hemia taem i mekem adaltri mo i kilim narafala i ded. Be taem Deved i talemaot sin blong hem mo i soemaot se hem i rili tanem tingting blong hem, Jehova i fogivim hem tu. (2 Saml. 12:9, 10, 13, 14) Yes, yumi save sua se Jehova i wantem tumas blong fogif. Mo olsem we bambae yumi luk, fasin blong Jehova blong fogif, i defren long fasin blong man blong fogif.

8. From we Jehova i beswan Jaj, ?olsem wanem hemia i gat paoa long fasin blong hem blong fogif?

⁸ Jehova i “Jaj blong olgeta man long wol.” (Jen. 18:25) Wan gudfala jaj i mas kasemsave gud long loa. Jehova i Jaj blong yumi mo hem i kasemsave gud long loa from we hem nao i Man Blong Givim Loa long yumi. (Aes. 33:22) I no gat wan narafala man we i save gud samting we i stret mo samting we i rong olsem we Jehova i save. ?Wan gudfala jaj i mas save gud wanem moa? Hem i mas save gud evri samting long saed blong wan situesen, bifo we hem i mekem desisen. Taswe Jehova nao i beswan Jaj from we hem i save gud evri samting.

9. ?Jehova i save wanem, we i mekem se hem i save disaed blong fogivim man o nogat?

⁹ Jehova i no olsem ol jaj blong wol. Oltaem hem i save gud evri samting long saed blong eni situesen. (Jen. 18:20, 21; Sam 90:8) Hem i save moa samting i bitim samting we ol man oli luk o harem. Hem i kasemsave se ol fasin we man i kasem long perens blong hem, edukesen blong hem, ples we i laef long hem, mo tu ol filing mo tingting blong hem oli save gat paoa long ol aksen blong hem. Mo tu Jehova i save gud samting we i stap long hat blong man. Hem i kasemsave fulwan from wanem wan man i mekem wan samting. I no gat wan samting i save haed long fes blong Jehova. (Hib. 4:13) Taswe, taem Jehova i fogivim wan man, hemia from we hem i save gud evri samting long saed blong wan situesen.

10. ?From wanem yumi talem se ol jajmen blong Jehova, oltaem oli gud mo oli stret? (Dutronome 32:4)

¹⁰ Ol jajmen blong Jehova, oltaem oli gud mo oli stret. Hem i mekem i sem mak long evri man. Jehova i neva fogivim wan man jes from we hem i luk naes, i rij, i impoten, o i gat gudhan long plante samting. (1 Saml. 16:7; Jem. 2:1-4) I no gat wan man i save fosem o switim Jehova blong i mekem wan samting. (2 Kron. 19:7) Hem i neva letem ol filing blong hem oli gat paoa long ol desisen blong hem. (Eks. 34:7) Jehova i beswan Jaj, from we hem i kasemsave gud evri samting long saed blong yumi mo situesen blong yumi.—Ridim Dutronome 32:4.

11. ?Wanem i spesel long fasin blong Jehova blong fogivim man?

¹¹ Man we i raetem Hibru haf blong Baebol, i luksave se fasin blong Jehova blong fogivim man i spesel. Long sam situesen, oli yusum wan Hibru tok we wan buk i talem se, “oli yusum Hibru tok ya nomo blong tokbaot fasin blong God blong fogivim ol sinman. Be oli neva yusum tok ya blong diskraebem fasin blong man blong fogivim narafala man.” Jehova nomo i gat paoa blong fogivim fulwan, man  we i tanem tingting from sin blong hem. ?Wanem i kamaot taem Jehova i fogivim yumi?

12-13. (1) ?Wan man i kasem wanem taem Jehova i fogivim hem? (2) Taem Jehova i fogivim man, ?hemia i blong smoltaem nomo?

¹² Taem yumi akseptem se Jehova i fogivim yumi, hemia i ‘mekem yumi gat niufala paoa,’ mo yumi gat pis long tingting mo wan tingting we i klin. Yumi save gat filing ya nomo sipos “Jehova” i fogivim yumi. (Ol Wok 3:19) Taem Jehova i fogivim yumi, hem i letem yumi blong yumi kam fren blong hem bakegen, mo hemia i olsem we yumi no bin mekem sin.

¹³ Afta we Jehova i fogivim yumi, bambae hem i neva panisim yumi bakegen from sin ya we yumi mekem. (Aes. 43:25; Jer. 31:34) Jehova i putum ol sin ya blong yumi “oli stap longwe we longwe . . . olsem we is i stap longwe we longwe long wes.” * (Sam 103:12) Taem yumi tingbaot olsem wanem fasin blong Jehova blong fogif i bigwan tumas, yumi wantem talem tangkiu mo respektem hem. (Sam 130:4) ?Be Jehova i fogivim wanem kaen man?

14. ?Yumi bin lanem wanem long saed blong desisen blong Jehova blong fogivim man?

¹⁴ Olsem we yumi bin luk, desisen we Jehova i mekem blong fogivim man o nogat, i no dipen long sin blong man se i bigwan o i smol. Mo tu, yumi lanem se Jehova i yusum save blong hem olsem Krieta blong yumi, Man Blong Givim Loa, mo Jaj, taem hem i mekem desisen se bambae i fogivim wan man o nogat. ?Be wanem samting we Jehova i tingbaot, bifo we hem i mekem desisen blong fogivim wan man?

15. Folem Luk 12:47, 48, ?wanem samting we Jehova i tingbaot fastaem?

¹⁵ Wan samting we Jehova i tingbaot, hemia se man we i mekem sin i luksave rong blong hem o nogat. Jisas i makem klia samting ya long Luk 12:47, 48. (Ridim.) Taem wan man i plan blong mekem wan samting we hem i save se God i no glad long hem, mo hem i gohed nomo blong mekem, hem i mekem wan bigfala sin. Wan man olsem, maet Jehova i save disaed blong no fogivim hem. (Mak 3:29; Jon 9:41) Yumi mas talemaot sin  blong yumi, mo samtaem yumi mas luksave se samting we yumi mekem i rong. ?Olsem wanem? ?I gat hop se Jehova i save fogivim yumi from wan sin olsem? !Yes! Be i gat wan narafala samting tu we Jehova i tingbaot bifo we hem i disaed se bambae hem i fogivim yumi o nogat.

16. ?Tanem tingting i minim wanem, mo from wanem yumi mas tanem tingting sipos yumi wantem se Jehova i fogivim yumi?

¹⁶ Wan narafala samting we Jehova i tingbaot, hemia se man we i mekem sin, i rili tanem tingting blong hem o nogat. ?Tanem tingting i minim wanem? Tanem tingting i min se wan man i “jenisim tingting, fasin, mo plan blong hem.” Mo tu, i givim tingting se wan man i rigret o i harem nogud bitim mak from nogud samting we hem i bin mekem, o from we hem i no mekem stret samting we hem i sud mekem. Wan man we i tanem tingting blong hem, i no harem nogud nomo from rong blong hem, be i harem nogud tu from we hem i no moa frengud wetem Jehova, nao i mekem wan nogud samting. Tingbaot bakegen King Manase mo King Deved. Tufala tugeta i mekem ol bigfala sin, be yet, Jehova i fogivim tufala from we tufala tugeta i tanem tingting from sin blong tufala. (1 King 14:8) Yes, Jehova i save fogivim yumi nomo sipos hem i luk se yumi tanem tingting blong yumi. Be i no naf blong sore from nogud samting we yumi mekem, yumi mas rere blong tekem aksen. * Mo hemia nao wan narafala samting we Jehova i tingbaot.

17. ?Jenis fulwan i minim wanem, mo from wanem i impoten blong mekem olsem? (Aesea 55:7)

¹⁷ Wan narafala impoten samting we Jehova i tingbaot, hemia se man we i mekem sin i jenis fulwan. Jenis fulwan i minim “tanemraon,” o yumi save talem se wan man i stop blong mekem ol nogud samting mo i stat blong mekem ol samting we Jehova i wantem. (Ridim Aesea 55:7.) Man ya i mas jenisim tingting blong hem fulwan, blong hem i save folem ol tingting blong Jehova. (Rom 12:2; Efes. 4:23) Hem i mas gat strong tingting blong lego ol rabis tingting mo aksen blong hem. (Kol. 3:7-10) Yes, bilif we yumi gat long sakrefaes blong  Kraes, hemia nao i save mekem se Jehova i save fogivim yumi mo mekem yumi klin. Jehova bambae i yusum sakrefaes blong Kraes blong fogivim yumi, taem hem i luk se yumi rili traehad blong jenisim ol fasin blong yumi.—1 Jon 1:7.

18. ?Yumi bin tokbaot wanem long saed blong fasin blong Jehova blong fogif?

¹⁸ I gud yumi tingtingbak long ol impoten poen we yumi bin tokbaot. I tru, long ful yunives, Jehova i beswan Man Blong Fogif. ?From wanem yumi talem olsem? Faswan risen, hemia se oltaem hem i rere blong fogif. Nambatu, hem i save gud evri samting long saed blong yumi, mo hem nao i beswan man blong talem sipos yumi rili tanem tingting blong yumi o nogat. Mo nambatri, taem Jehova i fogivim yumi, hem i fogif fulwan, mo long ae blong hem i olsem we yumi no bin mekem sin. Hemia i mekem se tingting blong yumi i no stikim yumi, mo yumi save se Jehova i glad long yumi.

19. Nating se yumi no stret gud mo bambae yumi gohed blong mekem sin, ?from wanem yumi save harem gud?

¹⁹ From we yumi no stret gud olgeta, bambae yumi gohed blong mekem sin. Be ol tok we i stap long Insight on the Scriptures, Volium 2 pej 771, i save leftemap tingting blong yumi: “Jehova i gat sore mo hem i save gud se ol man blong hem oli gat ol slak fasin. Taswe oli no nid blong harem nogud oltaem from we oli sinman mo oli mekem mastik. (Sam 103:8-14; 130:3) Sipos oli mekem bes blong olgeta blong folem ol samting we Jehova i wantem, oli save harem gud. (Fil. 4:4-6; 1 Jon 3:19-22).” !I sua se tok ya i leftemap tingting!

20. ?Bambae yumi tokbaot wanem long nekis stadi?

²⁰ Yumi glad tumas se Jehova i rere blong fogivim yumi, taem yumi rili sore from sin we yumi bin mekem. ?Be olsem wanem yumi save folem fasin blong Jehova blong fogif? ?Olsem wanem fasin blong yumi blong fogif i sem mak long fasin blong Jehova blong fogif, mo olsem wanem i defren? ?From wanem i impoten blong save samting ya? Long nekis stadi bambae yumi tokbaot ansa blong ol kwestin ya.