PLANTE man oli save stori blong Jisas we i hang long medel blong tu kriminol mo i ded long wan pos. (Mat. 27:35-38) Be sam man oli bilif se samting we Baebol i talem i no rili stret, taem i se oli rerem bodi blong Jisas mo oli putum hem long wan tomb.—Mak 15:42-46.

Sam man we oli agensem ol gospel oli ting se man we i hang long pos i no nid blong oli berem gud hem, olsem insaed long wan tomb. Ariel Sabar, wan man blong raetem niuspepa, i eksplenem long magasin ya Smithsonian, from wanem samfala oli gat tingting ya, hem i se: “Fasin blong hangem man long pos i wan panis we oli givim long ol man we oli ting se oli nogud olgeta long sosaeti. Mo sam man blong stadi oli talem se i krangke nomo blong ting se ol man Rom bambae oli respektem ol man ya mo berem gud olgeta.” Ol man Rom oli wantem mekem ol kriminol we oli kasem panis blong ded, oli sem, taswe plante taem oli letem bodi blong olgeta i hang long pos blong ol wael animol oli kakae. Biaen, ol haf bodi we i stap bambae oli sakem i go long wan gref.

Be ol man blong digim graon oli faenem wan defren samting long saed blong dedbodi blong sam man Jiu we oli kilim ded olgeta. Long 1968, oli faenem ol bun blong wan man we oli kilim hem i ded long taem long Jisas. Oli faenem ol bun ya long wan tomb blong wan famle we oli man Jiu, klosap long Jerusalem. Mo oli stap insaed long wan ossuary, o boks blong bun. Long ol bun ya, i gat wan bun blong leg we oli yusum wan nil blong 11.5 sentimita, blong nilim i gotru long wan wud. Sabar i talem se: “Bun ya i blong wan man we nem blong hem Yehochanan, mo hemia i olsem wan pruf we i soemaot se maet stori ya long gospel long saed blong Jisas, we oli berem hem long wan tomb, i tru. Bun blong leg blong Yehochanan i stap olsem wan eksampol blong wan man, we ol man Rom oli kilim ded hem long taem blong Jisas, mo oli letem blong oli berem gud hem folem kastom blong man Jiu.”

Nating se i olsem, bun blong leg blong Yehochanan i mekem ol man oli gat defren tingting long saed blong posisen blong Jisas taem i hang long pos. Be samting we i klia se sam kriminol we oli hang long pos, oli berem gud olgeta be oli no jes sakem olgeta nomo i go long wan gref. Taswe, yumi save trastem tok ya blong Baebol we i tokbaot se oli putum bodi blong Jisas insaed long wan tomb. Mo ol pruf oli sapotem samting we Baebol i talem.

Antap moa, Jehova i bin talemaot se bambae oli berem Jisas long tomb blong wan rijman, mo i no gat wan samting i save blokem tok blong God blong i kamtru.—Aes. 53:9; 55:11.