1. Folem 1 Pita 5:2, ?wanem impoten wok we ol elda oli mas mekem?

 OL ELDA oli gat wok ya blong lukaot gud long ol sipsip blong Jehova. Ol gudfala brata ya oli glad from we Jehova i trastem olgeta blong oli lukaot gud long ol brata mo sista, mo oli wok had olsem ‘ol man blong lukaot long sipsip we oli lukaot gud long olgeta.’ (Jer. 23:4; ridim 1 Pita 5:2.) !Yumi glad tumas blong gat ol man olsem long ol kongregesen blong yumi!

2. ?Wanem traem we sam elda oli fesem?

² Blong mekem wok ya, ol elda oli fesem plante problem, from i wan bigfala wok blong lukaot long wan kongregesen. Tony, wan elda long Yunaeted Stet, i luksave se hem i mas gat tingting daon mo talem no long sam wok. Hem i se: “Long stat blong COVID-19, mi traem blong mekem plante wok blong oganaesem ol miting mo wok blong prij. Be yet, oltaem i gat plante moa wok blong mekem. Mo from we mi bisi tumas, mi no moa gat taem blong ridim Baebol, stadi, mo prea.” Ilir, wan elda long Kosovo, i fesem wan narafala problem. Taem i gat faet long ples blong hem, i had blong hem i obei long ol daereksen blong oganaesesen. Hem i talem se: “Taem branj ofis i askem mi blong halpem ol brata mo sista we oli stap long ol eria we i denja, hemia i traem strong tingting blong mi. Mi fraet mo i luk olsem se daereksen ya i no rili stret.” Tim, wan misinari long Esia, i luk se i had blong hem i mekem ol samting we hem i mas mekem evri dei. Hem i se: “Samtaem, mi harem se mi taed tumas blong lukaot long ol brata mo sista.” ?Wanem i save halpem ol elda we oli fesem ol semfala problem olsem?

3. ?Yumi save kasem wanem gudfala samting from eksampol blong Jaj Gideon?

³ Ol elda oli save lanem samting from eksampol blong Jaj Gideon.  (Hib. 6:12; 11:32) Hem i mekem wok ya blong protektem mo lidim ol man blong God. (Jaj. 2:16; 1 Kron. 17:6) Olsem Gideon, Jehova i putumap ol elda blong oli lukaot gud long ol man blong Hem, taem oli stap gotru long ol hadtaem. (Wok 20:28; 2 Tim. 3:1) Yumi save lanem samting long fasin blong Gideon taem hem i luksave limit blong hem, i gat tingting daon, mo i obei. Taem hem i stap mekem ol wok blong hem, hem i fesem sam samting we i traem fasin blong hem blong holemstrong. Nating se yumi mekem wok olsem elda o nogat, be yumi save lanem blong glad long wok blong ol elda, mo sapotem olgeta, from we oli wok had blong lukaot gud long kongregesen.—Hib. 13:17.

4. ?Gideon i soemaot olsem wanem se hem i gat tingting daon?

⁴ Gideon i wan man we i gat tingting daon. b Taem enjel blong Jehova i talem long Gideon se Jehova i jusumaot hem blong i sevem ol man Isrel long han blong ol strong man Midian, Gideon i talem se: “Long laen blong Manase, famle blong mi i smol moa long evriwan, mo long famle blong papa blong mi, mi mi no impoten nating.” (Jaj. 6:15) Gideon i harem se hem i no naf blong mekem wok ya, be Jehova i luk se hem i naf. Mo wetem help blong Jehova, Gideon i finisim gud wok ya.

5. ?Wanem i save mekem se i had blong wan elda i gat tingting daon?

⁵ Ol elda oli traehad blong gat tingting daon long olgeta samting we oli mekem. (Maeka 6:8; Wok 20:18, 19) Oli no praod from ol samting we oli save mekem, o oli mekem finis. Mo oli no ting se oli nogud from oli bin mekem sam mastik. Be maet samtaem, i had blong wan elda i gat tingting daon. Eksampol, maet hem i akseptem plante wok mo biaen hem i faenem i had blong mekem evriwan. O maet, ol narafala oli daonem hem from wan wok, o leftemap hem from sam narafala wok we hem i mekem gud. ?Olsem wanem eksampol blong Gideon i save halpem ol elda, taem oli fesem ol situesen olsem?

6. ?Ol elda oli save lanem wanem long fasin blong Gideon blong gat tingting daon? (Yu luk pija tu.)

⁶ Askem help. Wan man we i gat tingting daon, i luksave se i gat sam samting we hem i no naf blong mekem. Gideon i soemaot se hem i gat tingting daon from hem i askem help blong ol narafala. (Jaj. 6:27, 35; 7:24) Wan  elda we i waes i mekem sem mak. Tony, we yumi tokbaot hem finis, i talem se: “Laef we mi gruap long hem i mekem se mi akseptem plante moa wok, be mi no save mekem evriwan. So mi jusum blong tokbaot fasin blong gat tingting daon long famle wosip, mo mi askem waef blong mi blong i talemaot tingting blong hem. Mo tu, mi lukluk bakegen video ya, Trenem, Trastem, Mo Givim Wok Long Ol Narafala, Olsem We Jisas i Mekem, we i stap long jw.org.” Tony i stat blong askem ol narafala blong oli givhan long hem blong mekem sam wok. ?Wanem i kamaot from? Tony i talem se: “Ol wok long kongregesen oli gohed gud, mo mi gat moa taem blong mekem frensip blong mi wetem Jehova i kam strong moa.”

7. ?Olsem wanem ol elda oli save folem fasin blong Gideon taem narafala i daonem olgeta? (Jemes 3:13)

⁷ Yu no mas kros sipos wan man i daonem yu. Wan narafala traem we ol elda oli fesem, hemia taem ol narafala oli daonem olgeta. Be eksampol blong Gideon i save halpem olgeta. Gideon i save se hem i sinman, taswe hem i stap kwaet nomo taem ol laen blong Efrem oli daonem hem. (Jaj. 8:1-3) Gideon i no tok kros long olgeta, be hem i soemaot tingting daon, taem i lesin gud mo i toktok kaen long olgeta. Mo hemia i mekem se tingting blong olgeta i kam kwaet. Ol elda we oli waes, oli folem fasin blong Gideon taem oli lesin gud mo toktok kaen long man we i daonem olgeta. (Ridim Jemes 3:13.) Taem oli mekem olsem, hemia i mekem se i gat pis long kongregesen.

8. ?Ol elda oli mas mekem wanem sipos narafala i leftemap olgeta? Talem wan eksampol.

⁸ Pulum ol narafala blong oli presem Jehova. Taem ol narafala oli leftemap Gideon from i winim ol man Midian, hem i pulum tingting blong olgeta i go long Jehova. (Jaj. 8:22, 23) ?Olsem wanem ol elda oli save folem fasin blong Gideon? Oli mekem olsem, taem oli pulum ol narafala blong presem Jehova from ol wok we oli mekem. (1 Kor. 4:6, 7) Eksampol, sipos ol narafala oli talem gudfala toktok long wan elda from we hem i gat gudhan blong tij, hem i save talem long olgeta se, ol save ya oli kamaot long Tok blong God, mo se oganaesesen blong Jehova i stap trenem yumi evriwan. I gud we wanwan taem ol elda oli jekem olgeta wan, blong luk sipos oli tij long fasin we i givim ona long Jehova, o oli stap pulum ol man blong leftemap olgeta wan. Tingbaot ekspiriens blong wan elda we nem blong hem Timothy. Taem hem i jes kam elda, hem i glad tumas blong givim ol pablik tok. Hem i talem se: “Mi yusum ol fastok we oli longfala, mo ol had pijatok we man i neva tingbaot blong yusum. Mo plante taem, hemia i pulum ol man blong talem ol gudfala tok long mi from. Be hemia i mekem ol man oli leftemap mi, i bitim we oli presem Jehova o Baebol.” Sloslo, Timothy i luksave se hem i mas jenisim fasin blong hem blong tij, blong ol man oli no leftemap hem wan. (Prov. 27:21) ?Wanem i kamaot from? Hem i eksplenem se: “Naoia ol brata mo sista oli talem olsem wanem tok blong mi i givhan long olgeta blong winim wan problem, blong stanap strong long wan traem, o i pulum olgeta blong oli kam klosap long Jehova. Mi mi glad moa taem oli talem ol tok olsem, i bitim we oli leftemap mi.”

9. ?From wanem maet i had blong Gideon i obei mo gat strong tingting? (Yu luk pija long fran pej.)

⁹ Afta we Gideon i kasem wok ya blong lidim ol man Isrel, hem i nidim blong obei mo gat strong tingting. Jehova i askem hem blong distroem ol olta blong Bal we i blong papa blong hem. (Jaj. 6:25, 26) Samtaem biaen, afta we Gideon i hivimap ami blong hem, Jehova i askem hem tu taem blong i katemdaon namba  blong ami blong hem. (Jaj. 7:2-7) Mo biaen, Jehova i talem long hem blong atakem kamp blong ol enemi blong hem long medel naet.—Jaj. 7:9-11.

10. ?Wanem i save traem fasin blong wan elda blong obei?

¹⁰ Ol elda oli mas “rere blong obei.” (Jem. 3:17) Wan elda we i obei, i rere blong folem ol samting we Baebol i talem mo daereksen we i kam long oganaesesen blong God. Mo tu, hem i soem wan gudfala eksampol long ol narafala. Be maet samtaem i had blong hem i obei. Eksampol, maet hem i kasem plante instraksen o ol instraksen oli jenis kwiktaem nomo, mo i had blong hem i folem olgeta. Mo samtaem, maet hem i save gat tingting ya se sam long ol daereksen ya oli no rili stret o waes. O maet oli askem hem blong mekem wan wok we oli save arestem hem from. ?Be olsem wanem ol elda oli save folem fasin blong Gideon blong obei, long ol situesen olsem?

11. ?Wanem i save halpem ol elda blong oli obei?

¹¹ Lesin gud long daereksen mo folem. God i talem long Gideon olsem wanem blong distroem olta blong papa blong hem, weples blong bildim niufala olta blong Jehova, mo wanem kaen animol blong givim olsem sakrefaes. Gideon i no gat tu tingting long daereksen ya, hem i mekem stret olsem we Jehova i talem. Tede, ol elda oli kasem instraksen blong Jehova tru long ol leta, ol anaonsmen, mo ol narafala samting we i halpem yumi blong stap sef, mo stap klosap long Jehova. Yumi lavem ol elda from oli folem gud ol tiokratik daereksen ya. Mo hemia i mekem i gud long ful kongregesen.—Sam 119:112.

12. ?Olsem wanem ol elda oli save folem ol tok blong Hibru 13:17, sipos i gat wan niufala jenis long oganaesesen?

¹² Rere blong mekem jenis. Tingbaot se Jehova i talem long Gideon blong i katemdaon namba blong ol soldia blong hem. (Jaj. 7:8) Maet hem i save gat tingting ya se: ‘?I rili nidim blong mekem jenis ya? ?Bambae mifala i win?’ Nating se i olsem, Gideon i obei. Tede, ol elda oli folem fasin blong Gideon taem oli folem ol niufala daereksen we i kamaot long oganaesesen. (Ridim Hibru 13:17.) Eksampol, long 2014, Hed Kampani i jenisim rod we oli folem blong kasem mane blong bildim ol niufala Haos Kingdom mo ol Haos Asembli. (2 Kor. 8:12-14) Bifo, oganaesesen nao i givim mane blong bildim ol Haos Kingdom mo ol Haos Asembli, biaen ol kongregesen oli mas pembak. Be naoia, oganaesesen i yusum ol mane we olgeta kongregesen long fulwol oli givim blong bildim ol Haos Kingdom mo ol Haos Asembli long ol ples we i nidim, nating sipos wan lokol kongregesen i givim smol mane nomo. Taem José i harem niufala jenis ya, hem i no sua sipos i save wok. Hem i stap tingting se: ‘Bambae oli neva bildim wan Haos Kingdom. Long kantri blong mi, oli neva mekem wan samting olsem.’ ?Wanem i halpem José blong i sapotem niufala jenis ya? Hem i talem se: “Ol tok blong Ol Proveb 3:5, 6 i rimaenem  mi blong trastem Jehova. !Mo frut we i kamaot i nambawan! Mifala i no bildim nomo plante moa Haos Kingdom, be mifala i lanem se mifala i save givim samting long plante defren rod, blong mekem se evriwan oli gat naf samting.”

13. (1) ?Gideon i sua long wanem? (2) ?Olsem wanem ol elda oli save folem fasin blong Gideon? (Yu luk pija tu.)

¹³ Gat strong tingting blong mekem wil blong Jehova. Gideon i obei long Jehova nating se hem i fraet mo wok we hem i mas mekem i denja. (Jaj. 9:17) Afta we Jehova i toktok long Gideon, Gideon i sua fulwan se Jehova bambae i sapotem hem blong protektem ol man blong Hem. Ol elda we oli laef long ol kantri we oli putum tabu long wok blong yumi, oli folem fasin blong Gideon. Oli gat strong tingting blong lidim ol miting mo wok blong prij, nating se oli save arestem, kwestinim olgeta, lusum wok blong olgeta, o kilim nogud olgeta from. c Long taem blong bigfala trabol, ol elda bambae oli nidim strong tingting blong obei long ol instraksen we oli kasem, nating se hemia i putum laef blong olgeta long denja. Eksampol, maet yumi kasem instraksen we i talem olsem wanem blong talemaot strong mesej blong jajmen, mo samting we yumi mas mekem blong stap laef taem Gog Blong Magog i atakem yumi.—Esik. 38:18; Rev. 16:21.

14. ?From wanem i had blong Gideon i stanap strong?

¹⁴ Gideon i wok had taem hem i mekem wok olsem wan jaj. Taem ol man Midian oli ronwe long faet long medel naet, Gideon i ronem olgeta stat long Vali Blong Jisrehel go kasem Jodan Reva, hemia wan ples we i luk olsem se i gat plante bus. (Jaj. 7:22) ?Olsem wanem? ?Gideon i stap nomo long Jodan Reva? !Nogat! Nating se hem i taed, be hem wetem ol 300 man blong hem oli go kros mo oli gohed blong ronem olgeta. Biaen oli kasem ol man Midian mo oli winim olgeta.—Jaj. 8:4-12.

15. ?From wanem maet samtaem i had blong wan elda i stanap strong?

¹⁵ Samtaem, maet wan elda i harem se hem i taed tumas from hem i stap lukaot long kongregesen mo famle blong hem. Long taem olsem,  ?olsem wanem ol elda oli save folem fasin blong Gideon?

16-17. ?Wanem i halpem Gideon blong i stanap strong, mo ol elda oli save sua long wanem? (Aesea 40:28-31) (Yu luk pija tu.)

¹⁶ Trastem se Jehova bambae i givim paoa long yu. Gideon i trastem se Jehova bambae i givim paoa long hem, mo hemia nao samting we Jehova i mekem. (Jaj. 6:14, 34) Wan taem, Gideon mo ol man blong hem oli ronem tu king blong ol man Midian we tufala i stap ron long ol kamel. (Jaj. 8:12, 21) Be wetem help blong Jehova, ol man Isrel oli kasem tufala mo winim tufala. Long sem fasin, ol elda oli save trastem Jehova, man ya we “i neva kam taed mo i neva kam slak.” Bambae hem i givim paoa long olgeta taem oli nidim.—Ridim Aesea 40:28-31.

¹⁷ Tingbaot ekspiriens blong Matthew, we i wan memba blong Komiti Blong Toktok Wetem Dokta. ?Wanem i halpem hem blong i stanap strong? Hem i talem se: “Mi harem save paoa blong Jehova we Filipae 4:13 i tokbaot. Plante taem, taem mi taed mo mi harem se mi no moa gat paoa blong gohed, mi prea strong long Jehova, mi askem hem blong i givim paoa we mi nidim blong sapotem ol brata blong mi. Long ol taem olsem, mi harem save se spirit blong Jehova i mekem mi kam strong, mo i halpem mi blong stanap strong.” Olsem Gideon, ol elda oli wok strong blong lukaot gud long ol man blong Jehova, nating se plante taem i no isi. I tru, ol elda oli mas gat tingting daon mo luksave se plante taem oli no naf blong mekem evri samting we oli wantem mekem. Be oli save trastem se Jehova bambae i harem olgeta taem oli askem help blong hem, mo bambae hem i givim paoa long olgeta blong oli stanap strong.—Sam 116:1; Fil. 2:13.

18. ?Olsem wanem ol elda oli save folem fasin blong Gideon?

¹⁸ Ol elda oli save lanem plante samting long eksampol blong Gideon. Ol elda oli mas soemaot se oli gat tingting daon, taem oli akseptem hamas wok we oli mas mekem, mo tu taem ol narafala oli daonem o leftemap olgeta. Oli mas soemaot se oli obei mo gat strong tingting, speseli naoia we en blong sistem blong wol ya i kam klosap tumas. Mo tu, oli mas trastem se nomata wanem problem oli fesem, Jehova i save givim paoa long olgeta. Yes, yumi glad tumas long ol man ya blong lukaot long ol sipsip we oli wok had, mo yumi “mas gohed blong tinghae long ol man olsem.”—Fil. 2:29.