1. ?Yumi mas mekem wanem blong laef tru long dei blong Jehova?

 TAEM Baebol i tokbaot “dei blong Jehova,” hem i minim taem ya we Jehova bambae i distroem ol enemi blong hem mo i sevem ol man blong hem. Long taem bifo, i bin gat sam nesen we Jehova i panisim olgeta. (Aes. 13:1, 6; Esik. 13:5; Sef. 1:8) Long taem blong yumi, “dei blong Jehova” bambae i stat taem ol lida blong politik oli distroem Bigfala Babilon, mo bambae oli lus fulwan long faet blong Amagedon. Taswe blong laef tru long “dei” ya, yumi mas rere naoia. Jisas i no talem nomo se yumi mas stap rere from “bigfala trabol,” be hem i talem tu se yumi mas “rere oltaem.”—Mat. 24:21; Luk 12:40.

2. ?Olsem wanem 1 Tesalonaeka i save givhan long yumi?

² Long faswan leta we aposol Pol i raetem i go long ol man Tesalonaeka, hem i yusum plante pijatok blong halpem ol Kristin blong oli rere oltaem from bigfala dei blong Jehova blong jajem ol man. Pol i save se dei blong Jehova bambae i no kam stret long taem ya. (2 Tes. 2:1-3) Nating se i olsem, hem i talem long ol brata mo sista ya blong oli rere from dei ya, olsem we bambae i kam tumoro, mo yumi tu, yumi save folem advaes ya. Naoia bambae yumi luk ol tok we Pol i talem blong eksplenem: (1) dei blong Jehova bambae i kamtru olsem wanem, (2) hu bambae i no laef tru long dei ya, mo (3) olsem wanem yumi save rere blong laef tru long dei ya.

3. ?Olsem wanem dei blong Jehova bambae i kam olsem man blong stil long naet? (Yu luk pija tu.)

³ “Olsem man blong stil i kam long naet.” (1 Tes. 5:2) Hemia faswan pijatok we oli yusum blong tokbaot olsem wanem dei blong Jehova bambae i kamtru. Plante taem, ol stilman oli tekem aksen kwiktaem mo oli kam long naet, long taem we ol  man oli no ekspektem. Long sem fasin, dei blong Jehova bambae i kam wantaem nomo we ol man oli sapraes from. Ol tru Kristin tu, maet bambae oli sapraes blong luk olsem wanem ol samting oli hapen kwiktaem nomo. Be bambae oli no lus olsem ol rabis man.

4. ?Olsem wanem dei blong Jehova i olsem soa we wan woman i harem taem i rere blong bonem pikinini?

⁴ “Olsem soa we wan woman i harem taem hem i rere blong bonem pikinini.” (1 Tes. 5:3) Wan woman we i rere blong bonem pikinini, i no save stret taem we pikinini ya bambae i bon. Be hem i sua se bambae i hapen. Mo taem stret taem ya i kamtru, bambae i hapen kwiktaem nomo, hem i harem i soa, mo hem i no save blokem. Long sem fasin, yumi no save stret dei mo aoa we dei blong Jehova bambae i stat. Be yumi sua se dei ya bambae i kamtru, mo se jajmen blong Jehova we bambae i kasem ol rabis man, bambae i hapen kwiktaem nomo, mo oli no save ronwe long hem.

5. ?Olsem wanem bigfala trabol i sem mak olsem we i brok delaet?

⁵ Olsem we i brok delaet. Long nambatri pijatok ya, Pol i tokbaot bakegen man blong stil long naet, be naoia hem i komperem dei blong Jehova se i olsem we i brok delaet. (1 Tes. 5:4) Ol man blong stil long naet, oli no makem nating se taem i stap pas kwik. Nao taem delaet i kamtru, wantaem nomo oli sek nogud nao oli kasem olgeta. Long sem fasin, bigfala trabol bambae i soemaot klia ol man we oli olsem ol man blong stil long naet, from oli gohed blong mekem ol samting we God i no laekem nating. Be yumi no olsem olgeta, yumi save stap rere taem yumi sakemaot ol nogud fasin we Jehova i no laekem, mo yumi traehad blong gat ol ‘gudfala fasin, gat stret fasin, mo yumi folem trutok.’ (Efes. 5:8-12) Biaen, Pol i tokbaot tu narafala pijatok blong tokbaot ol man we bambae oli no laef tru long dei ya.

6. ?I minim wanem se plante man tede oli stap slip? (1 Tesalonaeka 5:6, 7)

⁶ “Olgeta we oli slip.” (Ridim 1 Tesalonaeka 5:6, 7.) Pol i komperem ol man we bambae oli no laef tru long dei blong Jehova, se oli olsem ol man we oli slip. Oli no luksave ol samting we oli stap hapen raonabaot long olgeta, o se taem i stap pas. Taswe oli no luksave taem wan impoten samting i hapen, blong oli save tekem aksen folem. Plante man tede oli stap slip long saed blong spirit. (Rom 11:8) Oli no bilivim ol saen we i soemaot se yumi stap laef long “ol las dei,” mo se bigfala trabol bambae i kam i no longtaem. Taem i gat ol bigfala jenis long wol, maet sam man bambae oli intres long mesej blong Kingdom. Nating se i olsem, plante bambae oli no wantem stap wekap, nao oli go slip bakegen. Mo samfala we oli bilif long dei blong jajmen blong Jehova, maet oli gat tingting ya se dei ya i longwe yet. (2 Pita 3:3, 4) Be yumi luksave se i impoten tumas we evri dei, yumi stap wekap.

7. ?Olsem wanem ol man we God bambae i distroem olgeta, oli olsem ol drong man?

⁷ “Olgeta we oli drong.” Pol i komperem ol man we God bambae i distroem olgeta, se oli olsem ol drong man. Ol man we oli drong, oli slo blong tekem aksen folem samting we i hapen raonabaot long olgeta, mo oli no save mekem ol gudfala desisen. Long sem fasin, ol rabis man oli no save lesin nating long ol woning blong God. Oli jusum rod ya blong laef we i lidim olgeta blong go lus. Be ol Kristin, oli kasem woning ya blong mekem tingting blong olgeta i stap klia gud oltaem. (1 Tes. 5:6) Wan Baebol skola i talem se taem “tingting blong yumi i klia gud, yumi gat kwaet tingting, yumi tingting gud, mo skelem gud ol samting, nao yumi mekem gudfala desisen.” ?From wanem tingting blong yumi i mas kwaet mo yumi tingting gud? Hemia blong mekem se yumi no joen long ol bisnes blong politik o long ol trabol we oli stap hapen long wol tede. Taem dei blong Jehova i stap kam klosap moa, bambae ol man oli traem pulum yumi moa blong joen long ol samting ya. Be yumi no nid blong wari bitim mak se bambae yumi mekem wanem. Tabu spirit blong God i save halpem yumi blong mekem tingting blong yumi i kwaet, yumi tingting gud, mo mekem ol waes desisen.—Luk 12:11, 12.

8. ?Olsem wanem ol fasin ya long 1 Tesalonaeka 5:8, bambae oli halpem yumi blong stap wekap mo gat klia tingting? (Yu luk pija tu.)

⁸ ‘Werem aean klos mo hat blong faet.’ Pol i komperem yumi olsem ol soldia we oli lukaot gud mo oli werem evri klos blong faet. (Ridim 1 Tesalonaeka 5:8.) Wan soldia we i stap long faet, i mas rere blong faet enitaem nomo. Hemia i sem mak long yumi. Yumi stap rere from dei blong Jehova, taem yumi werem bilif mo lav olsem aean klos blong yumi, mo yumi werem hop olsem hat blong faet blong yumi. Ol fasin ya oli save halpem yumi bigwan.

9. ?Olsem wanem bilif i protektem yumi?

⁹ Aean klos we wan soldia i werem i protektem hat blong hem. Long sem fasin, bilif mo lav i protektem hat blong yumi long saed blong spirit. Mo oli halpem yumi blong gohed blong mekem wok blong God mo folem Jisas. Bilif i mekem yumi sua se Jehova bambae i givim pei long yumi from we yumi stap traehad long fulhat blong yumi blong faenem hem. (Hib. 11:6) Mo tu, bilif bambae i pulum yumi blong holemstrong long Lida blong yumi Jisas, nating sipos yumi fesem sam hadtaem. Sipos yumi traehad blong tingbaot eksampol blong ol man blong Jehova tede we oli holemstrong long hem, nating se ol man oli ronem mo kilim olgeta, o oli fesem hadtaem long saed blong mane, hemia  bambae i mekem bilif blong yumi i strong, nao yumi naf blong stanap strong taem yumi fesem ol trabol. Mo tu, sipos yumi folem eksampol blong olgeta we oli mekem laef blong olgeta i simpol mo putum Kingdom fasples, bambae yumi naf blong stap longwe long denja ya blong laekem mane tumas mo ol sas samting. b

10. ?Olsem wanem lav we yumi gat long God mo ol man i halpem yumi blong stanap strong?

¹⁰ Lav tu i impoten, from i save givhan long yumi blong stap wekap mo gat klia tingting. (Mat. 22:37-39) Lav we yumi gat long God i save halpem yumi blong gohed blong prij, nating se yumi save kasem trabol from. (2 Tim. 1:7, 8) Yumi lavem ol man we oli no wosipim Jehova, taswe yumi gohed nomo blong prij, nating se hem i tru long telefon o leta. Yumi gat hop yet se wan dei, ol man ya bambae oli jenis mo oli stat blong mekem samting we i stret.—Esik. 18:27, 28.

11. ?Olsem wanem lav we yumi gat long ol Kristin brata mo sista i halpem yumi? (1 Tesalonaeka 5:11)

¹¹ Yumi lavem ol Kristin brata mo sista blong yumi tu. Yumi soemaot lav ya taem yumi ‘leftemap tingting blong yumi, mo yumi givgivhan long yumi blong mekem yumi strong.’ (Ridim 1 Tesalonaeka 5:11.) Olsem ol soldia we oli joen tugeta blong go faet, yumi lefleftemap tingting blong yumi. I tru, maet i save hapen se wan soldia i givim kil long wan narafala soldia long taem blong faet, be bambae hem i neva minim blong mekem olsem. Long sem fasin, yumi neva wantem minim blong mekem ol brata mo sista oli harem nogud o givimbak nogud fasin we oli mekem long yumi. (1 Tes. 5:13, 15) Mo tu, yumi soemaot lav taem yumi respektem ol brata we oli lukaot long kongregesen. (1 Tes. 5:12) Taem Pol i raetem leta ya, kongregesen long Tesalonaeka i jes stat nomo, i no bitim wan yia yet. Ol man we oli putumap olgeta blong lukaot long kongregesen ya, oli no gat plante ekspiriens mo maet oli mekem sam mastik. Be yet, i impoten we ol narafala oli respektem olgeta. Taem bigfala trabol i stap kam moa klosap, bambae yumi nidim blong dipen moa long ol elda blong oli lidim yumi i bitim ol taem naoia. Maet long taem ya, bambae yumi no moa kasem ol daereksen we i kam long hedkwota mo branj ofis.  Taswe, i impoten we yumi lanem naoia blong lavem mo respektem ol elda. Nomata wanem i hapen, i gud yumi gohed blong gat klia tingting mo yumi no tingbaot ol mastik blong olgeta. Be i gud we yumi tingbaot se Jehova nao i yusum Jisas blong givim daereksen long ol elda blong oli lidim yumi.

12. ?Olsem wanem hop i protektem tingting blong yumi?

¹² Olsem we hat blong faet i protektem hed blong wan soldia, hop ya se God bambae i sevem yumi, i save protektem tingting blong yumi. Strong hop ya we yumi gat, i mekem yumi luksave se ol samting we wol ya i givim oli blong nating nomo. (Fil. 3:8) Hop blong yumi i halpem yumi blong gat wan tingting we i kwaet mo yumi tingting gud. Wallace mo Laurinda, we tufala i wok long betel long Afrika, tufala i luksave se samting ya i tru. Long tri wik nomo, mama blong Laurinda i ded, mo papa blong Wallace tu i ded. Be from we i gat COVID-19, tufala i no save gohom blong stap wetem ol famle blong tufala. Wallace i talem se: “Hop blong laef bakegen i halpem mi blong tingbaot tufala, i no long ol laswan dei blong tufala long rabis wol ya, be ol faswan dei we bambae tufala i gat long niufala wol. Hop ya i mekem tingting blong mi i kwaet, taem mi stap harem nogud.”

13. ?Yumi save mekem wanem blong kasem tabu spirit?

¹³ “Yufala i no mas kilim i ded faea blong spirit.” (1 Tes. 5:19) Pol i talem se tabu spirit i olsem wan faea we i stap insaed long yumi. Taem spirit blong God i stap wetem yumi, bambae yumi wantem tumas blong mekem samting we i stret, mo yumi gat strong tingting blong mekem wok blong Jehova olsem we faea i laet. (Rom 12:11) ?Yumi save mekem wanem blong kasem tabu spirit? Yumi save prea from, stadi long Tok blong God, mo joen wetem oganaesesen blong hem we tabu spirit i lidim. Taem yumi mekem olsem, hemia bambae i halpem yumi blong wokem “frut blong tabu spirit.”—Gal. 5:22, 23.

14. ?Yumi mas blokem wanem sipos yumi wantem gohed blong kasem tabu spirit blong God? (Yu luk pija tu.)

¹⁴ Afta we God i givim tabu spirit blong hem long yumi, yumi mas lukaot gud blong ‘no kilim i ded faea blong spirit.’ God i givim spirit blong hem long ol man nomo we tingting mo  fasin blong olgeta i klin. Bambae hem i no gohed blong givim spirit blong hem long yumi, sipos yumi gat ol tingting we oli no stret mo mekem ol samting we i no stret. (1 Tes. 4:7, 8) Sipos yumi wantem gohed blong kasem tabu spirit, yumi mas lukaot tu blong ‘no daonem tok we ol profet oli talem.’ (1 Tes. 5:20) “Tok we ol profet oli talem,” i minim ol mesej we Jehova i givim long yumi tru long tabu spirit, we hemia i inkludum tu ol save we i tokbaot wil blong Jehova, mo taem ya we yumi stap long hem naoia. Yumi no mas ting se Amagedon bambae i no kamtru long taem blong yumi. Be yumi mas gohed blong tingbaot se dei ya bambae i kam i no longtaem. Mo yumi mekem olsem, taem yumi gohed blong stap bisi mo evri dei yumi ‘soemaot long ol wok blong yumi se yumi fasgud long God,’ mo mekem ol fasin we oli stret.—2 Pita 3:11, 12.

15. ?Yumi save mekem wanem blong ol giaman tok blong ol dimon i no lidim yumi i go krangke? (1 Tesalonaeka 5:21)

¹⁵ I no longtaem, ol man we oli agensem God bambae oli talemaot se: “!I gat pis mo seftaem!” (1 Tes. 5:3) Wol ya bambae i fulap wetem ol giaman tok blong ol dimon we oli lidim plante man oli go krangke. (Rev. 16:13, 14) ?Be olsem wanem long yumi? Sipos yumi “traem olgeta samting fastaem,” ol giaman tok ya bambae oli no save lidim yumi i go krangke. (Ridim 1 Tesalonaeka 5:21.) Grik tok we oli tanem i kam “traem olgeta samting” oli yusum blong diskraebem fasin blong man blong testem gol mo silva blong luk sipos oli tru o nogat. Taswe yumi tu, yumi mas traem ol samting we yumi harem mo ridim, blong luk sipos oli tru o nogat. Hemia i impoten long ol man Tesalonaeka, be i impoten moa long yumi naoia from we yumi kam klosap moa long bigfala trabol. Bitim we yumi bilivim evri samting we yumi ridim o harem, i gud yumi yusum tingting blong yumi blong skelem olgeta wetem samting we Baebol mo oganaesesen i talem. Long rod ya, bambae ol giaman tok blong ol dimon oli no save lidim yumi i go krangke.—Prov. 14:15; 1 Tim. 4:1.

16. ?Yumi sua long wanem mo yumi gat strong tingting blong mekem wanem?

¹⁶ Yumi save se ol man blong Jehova bambae oli laef tru long bigfala trabol. Nating se i olsem, yumi wanwan i no save wanem bambae i hapen tumoro. (Jem. 4:14) Nomata se yumi laef tru long bigfala trabol o yumi ded bifo, be bambae yumi kasem blesing ya blong laef olwe, sipos yumi gohed blong holemstrong long Jehova. Ol tabu Kristin bambae oli laef wetem Kraes long heven. Mo ol narafala sipsip bambae oli laef long paradaes long wol ya. !I gud yumi evriwan i gohed blong tingbaot nambawan hop ya mo stap rere oltaem from dei blong Jehova!