1. Folem Ol Sam 18:​46, ?olsem wanem Deved i singaot Jehova?

 LONG wol ya, yumi save fesem ol trabol we yumi no tingbaot, mo oli save jenisim laef blong yumi fulwan. !Be yumi glad tumas se yumi save lukluk i go long Jehova blong i halpem yumi! Long las stadi, yumi lanem se Jehova, hem i God ya we i laef i stap, mo oltaem hem i rere blong halpem yumi. Taem yumi luk se hem i stap givhan long yumi, yumi sua fulwan se “!Jehova i laef i stap!” (Ridim Ol Sam 18:46.) Afta we Deved i talem se Jehova i laef i stap, hem i singaot God se “Bigfala Ston blong mi.” ?From wanem Deved i skelem Jehova wetem wan bigfala ston we i no laef?

2. ?Bambae yumi lanem wanem long stadi ya?

² Long stadi ya, bambae yumi luk from wanem Baebol i tokbaot Jehova olsem wan bigfala ston, mo olsem wanem pijatok ya i tijim yumi long saed blong hem. Mo tu, bambae yumi lanem olsem wanem yumi save dipen long hem olsem Bigfala Ston blong yumi. Biaen bambae yumi tokbaot ol samting we yumi mas mekem blong folem ol fasin blong Jehova.

?FROM WANEM JEHOVA I OLSEM WAN BIGFALA STON?

3. ?From wanem plante taem Baebol i yusum tok ya “bigfala ston”? (Yu luk pija long .)

³ Baebol i yusum tok ya “bigfala ston” olsem wan pijatok blong halpem yumi blong kasem save long ol fasin blong Jehova. Taem ol man blong Jehova oli presem God from ol nambawan fasin blong hem, plante taem oli tokbaot hem olsem wan bigfala ston. Faswan taem we Baebol i tokbaot Jehova olsem wan “Bigfala Ston,” hemia long Dutronome 32:4. Long prea blong Hana, hem i talem se “i no gat wan bigfala ston we i strong olsem God blong mifala.” (1 Saml. 2:2) Habakuk i singaot Jehova se “Bigfala Ston blong mi.” (Hab. 1:12) Man blong raetem Ol Sam 73 i singaot God se “bigfala ston blong hat blong mi.”  (Sam 73:26) Mo Jehova tu i tokbaot hem wan olsem wan bigfala ston. (Aes. 44:8) Naoia, i gud yumi tokbaot tri fasin blong Jehova we i sem mak olsem wan bigfala ston, mo lanem olsem wanem blong mekem hem i kam olsem “Bigfala Ston blong yumi.”—Dut. 32:31.

4. ?Olsem wanem Jehova i stap protektem yumi? (Ol Sam 94:22)

⁴ Jehova i stap protektem yumi. Wan bigfala ston i save protektem ol man taem i gat wan strong win. Long sem fasin, Jehova i save protektem yumi taem yumi fesem ol hadtaem. (Ridim Ol Sam 94:22.) Hem i protektem yumi long saed blong spirit, mo i lukaot gud long yumi blong i no gat wan samting i spolem yumi blong olwe. Mo tu, hem i promes se long fiuja, bambae hem i finisim olgeta samting we i mekem yumi wari o safa.—Esik. 34:​25, 26.

5. ?Olsem wanem Jehova i save kam olsem sefples blong haed blong yumi?

⁵ Yumi save mekem Jehova i kam olsem wan sefples blong haed blong yumi, taem yumi prea long hem. Taem yumi prea, Jehova bambae i givim “pis ya blong God” blong i lukaot gud long hat mo tingting blong yumi. (Fil. 4:​6, 7) Traem tingbaot ekspiriens blong Artem, wan brata we i go long kalabus from bilif blong hem. Long kalabus, plante taem wan polis i kam kwestinim hem, tritim nogud hem, mo traem blong mekem hem i fraet. Artem i talem se: “Mi wari tumas taem hem i stap kwestinim mi. . . . Be oltaem mi prea long Jehova. Mi askem hem blong i mekem se mi gat pis long hat blong mi, mo i givim waes long mi. Nating se oli mekem i nogud long mi, be mi stap kwaet nomo. . . . Wetem help blong Jehova, i olsem we mi stap stanap biaen long wan stonwol.”

6. ?From wanem yumi save dipen long Jehova oltaem? (Aesea 26:​3, 4)

⁶ Jehova i stap oltaem mo yumi save trastem hem. Wan bigfala ston i no save muv. Long sem fasin, Jehova i stap oltaem blong givhan long yumi. Yumi save trastem hem from we hem i “Bigfala Ston ya we i stap olwe.” (Ridim Aesea 26:​3, 4.) Hem i laef i stap oltaem, taswe bambae hem i holem ol promes blong hem, i harem ol prea blong yumi, mo i halpem yumi. Mo tu, yumi save dipen long Jehova from we hem i holemstrong long olgeta we oli wosipim hem. (2 Saml. 22:26) Bambae hem i neva fogetem samting we yumi mekem, mo oltaem bambae hem i blesem yumi.—Hib. 6:10; 11:6.

7. ?Wanem gudfala samting i kamaot taem yumi dipen long Jehova? (Mo tu, yu luk pija.)

⁷ Yumi mekem Jehova i kam olsem wan Bigfala Ston blong yumi, taem yumi dipen fulwan long hem. Yumi sua se sipos yumi obei long hem taem yumi fesem ol hadtaem, hemia i save mekem i gud long yumi. (Aes. 48:​17, 18) Taem yumi luk se Jehova i stap halpem yumi, bambae yumi trastem hem moa. Nao bambae yumi naf blong stanap strong long ol trabol we i had tumas. Taem yumi fesem wan hadtaem we i no gat man blong givhan long yumi, yumi luksave se oltaem yumi save dipen long Jehova. Vladimir i talem se: “Mi mi kam klosap moa long Jehova taem mi stap long kalabus, mi lanem blong trastem moa Jehova from mi stap mi  wan nomo, mo mi no save kontrolem ol samting we i hapen long mi.”

8. (1) ?From wanem yumi talem se Jehova i no save jenis? (2) ?From we Jehova i bigfala ston blong yumi, hemia i mekem i gud long yumi olsem wanem? (Ol Sam 62:​6, 7)

⁸ Jehova i no save jenis. Jehova i olsem wan bigfala ston we i stap strong mo i no save jenis. Ol fasin blong hem mo stamba tingting blong hem i no save jenis. (Mal. 3:6) Taem Adam mo Iv i rebel agensem Jehova, hem i no jenisim stamba tingting we hem i gat long saed blong ol man. Olsem we aposol Pol i raetem, Jehova “i no save mekem samting we i go agensem fasin blong hem.” (2 Tim. 2:13) Hemia i min se nomata wanem i hapen o wanem samting we ol narafala oli mekem, Jehova bambae i neva jenisim fasin blong hem, stamba tingting blong hem, o ol rul blong hem. From we Jehova i neva jenis, yumi save se bambae hem i halpem yumi long ol hadtaem, mo bambae i holem ol promes blong hem blong fiuja.—Ridim Ol Sam 62:​6, 7.

9. ?Yu lanem wanem long ekspiriens blong Tatyana?

⁹ Yumi mekem Jehova i kam olsem bigfala ston blong yumi, taem yumi tingting dip long ol fasin blong hem mo stamba tingting blong hem. Sipos yumi mekem olsem, bambae yumi naf blong stap kwaet mo holemstrong long hem taem yumi fesem trabol. (Sam 16:8) Mo hemia nao samting we i hapen long sista Tatyana we oli putum hem long kalabus from bilif blong hem. Hem i talem se: “Mi stap mi wan nomo. Long stat, i had long mi, mo plante taem mi harem nogud tumas.” Taem Tatyana i luksave se ol trabol blong hem oli joen wetem stamba tingting blong Jehova, hemia i mekem se hem i naf blong stanap strong mo i kasembak paoa. Hem i talem se: “Taem mi kasemsave se ol samting ya oli hapen long mi from we mi mi wan man blong Jehova, hemia i halpem mi blong mi stop blong tingbaot mi wan nomo.”

10. ?Olsem wanem yumi save mekem Jehova i kam Bigfala Ston blong yumi?

¹⁰ Long ol dei we i kam, yumi save fesem ol trabol we bambae yumi nid blong dipen moa long Jehova i bitim bifo. Taswe, naoia i impoten we yumi mekem bilif blong yumi i strong se Jehova bambae i givim samting we yumi nidim blong stanap strong. ?Yumi mekem samting ya olsem wanem? Yumi save ridim ol stori long Baebol mo ol ekspiriens blong ol Witnes long taem blong yumi, mo traem makem olsem wanem God i sapotem ol man blong hem. I gud yu tingting dip long ol stori ya, olsem nao yu save mekem Jehova i kam Bigfala Ston blong yu.

FOLEM OL FASIN BLONG JEHOVA

11. ?From wanem yumi wantem folem ol fasin blong Jehova? (Mo tu yu luk bokis ya “ Wan Mak Blong Ol Yangfala Brata.”)

¹¹ Yumi bin tokbaot finis sam fasin blong Jehova we i soemaot se hem i olsem wan bigfala ston. Be naoia i gud yumi luk olsem wanem yumi save folem ol fasin blong hem. Sipos yumi traehad blong folem ol fasin blong Jehova, yumi save mekem ol brata mo sista oli strong. Eksampol, Jisas i givim nem ya Kefas long Saemon (we oli transletem i kam “Pita”),  we i minim “Wan Smol Ston.” (Jon 1:42) Hemia i soemaot se bambae hem i kam wan man blong leftemap tingting blong kongregesen, mo mekem bilif blong olgeta i strong. Ol elda long kongregesen oli olsem “sado blong wan bigfala ston.” Hemia i soemaot se bambae oli protektem olgeta long kongregesen. (Aes. 32:2) Yes, kongregesen i save kam strong, sipos yumi evriwan i folem ol fasin blong Jehova.—Efes. 5:1.

12. ?Olsem wanem yumi save protektem mo lukaot gud long ol brata mo sista?

¹² Protektem mo lukaot gud long ol brata mo sista. Taem ol brata mo sista oli lusum haos blong olgeta o oli mas ronwe from wan naturol disasta o wo, yumi save tekem olgeta oli kam stap long haos blong yumi. Taem laef long “ol las dei” i stap kam mowas, bambae yumi gat moa janis blong givim samting we ol brata mo sista oli nidim. (2 Tim. 3:1) Mo tu, yumi save leftemap tingting mo soem lav long olgeta. Wan rod blong mekem olsem, hemia taem yumi welkamem gud olgeta long haos Kingdom mo yumi mekem oli harem gud. Plante man tede oli tritim nogud narafala, mo hemia i save mekem ol brata mo sista oli wari mo harem se narafala i no lavem olgeta. Taswe, taem ol brata mo sista oli kam long ol miting, yumi wantem mekem olgeta oli glad, oli haremsave se yumi lavem olgeta, mo se oli sef.

13. ?Olsem wanem ol elda oli save kam olsem wan sefples blong haed blong ol narafala? (Mo tu, yu luk pija.)

¹³ Ol elda oli save kam olsem wan sefples blong haed blong olgeta long kongregesen we oli stap fesem ol hadtaem. Taem i gat wan naturol disasta o wan brata o sista i mas go kwiktaem long hospital, ol elda oli kwik blong mekem plan blong halpem olgeta. Mo tu, oli givim samting we oli nidim long saed blong spirit. Ol brata mo sista bambae oli no fraet blong askem help long wan elda sipos oli save se hem i kaen, i gat sore, mo i rere blong lesin. Sipos ol elda oli  gat ol fasin ya, bambae ol narafala oli haremsave se ol elda oli lavem olgeta, nao bambae i isi blong oli folem ol advaes we oli givim.—1 Tes. 2:​7, 8, 11.

14. ?Yumi save mekem wanem blong ol brata mo sista oli trastem yumi?

¹⁴ Mekem ol brata mo sista oli trastem yu. Yumi wantem we ol narafala oli trastem yumi speseli taem oli fesem ol hadtaem. (Prov. 17:17) ?Yumi save mekem wanem blong ol brata mo sista oli trastem yumi? Yumi save folem fasin blong Jehova evri dei, taem yumi traehad blong holem ol promes blong yumi mo stap long stret taem. (Mat. 5:37) Mo tu, sipos yumi save se wan brata o sista i nidim help, yumi save givhan long hem. Antap long hemia, yumi mas meksua se yumi folem gud ol advaes we yumi kasem blong finisim gud ol wok blong yumi.

15. ?Wanem i save kamaot taem olgeta long kongregesen oli trastem ol elda?

¹⁵ ?Wanem i save kamaot taem olgeta long kongregesen oli trastem ol elda? Ol brata mo sista oli no fraet blong ring long ol elda taem oli nidim help. Mo tu, oli haremsave se ol elda oli lavem olgeta taem oli luk we ol elda oli rere blong givhan long olgeta. Taem ol elda oli yusum Baebol mo ol buk blong yumi blong givim advaes long ol brata mo sista be oli no talem prapa tingting blong olgeta, bambae ol brata mo sista oli trastem olgeta moa. Mo tu, ol brata mo sista bambae oli trastem wan elda sipos hem i no talemaot prapa bisnes blong olgeta long narafala mo hem i holem ol promes blong hem.

16. Sipos yumi no letem eni samting i jenisim tingting blong yumi, ?olsem wanem hemia i givhan long yumi wan mo ol narafala?

¹⁶ No letem eni samting i jenisim tingting blong  yumi. Sipos yumi obei long Jehova long olgeta samting mo yumi mekem ol desisen folem Baebol, bambae yumi stap olsem wan gudfala eksampol blong ol narafala. Taem yumi stadi long tok blong God mo yumi mekem bilif blong yumi long Jehova i kam strong, bambae yumi holemstrong long hem mo folem gud ol rul blong hem. Mo tu, bambae yumi naf blong luksave ol giaman tingting mo tijing we oli no laenap wetem tingting blong Jehova, mo bambae yumi no letem oli gat paoa long tingting blong yumi. (Efes. 4:14; Jem. 1:​6-8) Sipos yumi bilif long Jehova mo ol promes blong hem, bambae yumi no wari tumas taem yumi harem ol rabis nius. (Sam 112:​7, 8) Mo tu, bambae yumi naf blong givhan long olgeta we oli stap fesem ol trabol.—1 Tes. 3:​2, 3.

17. ?Wanem i givhan long ol elda blong oli mekem olgeta long kongregesen oli no wari tumas mo mekem bilif blong olgeta i strong?

¹⁷ Ol elda oli mas kontrolem ol fasin blong olgeta, oli mas gat stret tingting, laef blong olgeta i no mas olbaot, mo oli mas rere blong lego prapa tingting blong olgeta. Taem ol elda oli “folem gud ol tok ya we i tru” hemia i givhan long olgeta long kongregesen blong oli no wari tumas, oli bilif strong long Jehova, mo oli mekem kongregesen i kam strong. (Taet. 1:9; 1 Tim. 3:​1-3) Taem ol elda oli soem gudfala eksampol mo oli visitim ol pablisa blong leftemap tingting blong olgeta, oli stap givhan long ol pablisa blong oli kam oltaem long miting, wok blong prij, mo mekem prapa stadi blong olgeta. Taem ol brata mo sista oli fesem ol problem, ol elda oli rimaenem olgeta blong dipen long Jehova mo tingbaot ol promes blong hem.

18. ?From wanem yumi wantem presem Jehova mo kam klosap moa long hem? (Mo tu, yu luk bokis ya “ Wan Rod Blong Kam Klosap Long Jehova.”)

¹⁸ Naoia we yumi save ol nambawan fasin ya blong Jehova, yumi save talem olsem King Deved we i se: “I gud yumi presem Jehova, Bigfala Ston blong mi.” (Sam 144:1) Oltaem yumi save dipen long Jehova. Mo long ful laef blong yumi go kasem we yumi kam olfala, yumi gat gudfala risen blong talem se: Jehova “i Bigfala Ston blong mi,” mo yumi trastem se bambae hem i gohed blong halpem yumi blong stap klosap long hem.—Sam 92:​14, 15.