Mi mi bon long 22 Disemba 1929, long Noville, hemia wan smol vilej we i gat naen fam long hem, we i stap klosap long Bastogne, long Belgian Ardennes. Taem mi pikinini, mi gat wan gudfala laef long fam wetem perens blong mi. Evri dei mi mo smol brata blong mi Raymond, mitufala i stap skwisimaot melek long titi blong ol buluk blong mifala, mo mitufala i givhan long havestem ol kakae. Long vilej blong mifala, mifala evriwan i wok tugeta blong givgivhan long mifala.

Perens blong mi, Emile mo Alice, tufala i strong memba blong katolik. Tufala i go long jos evri Sande. Be samwe long yia 1939, ol paenia blong Inglan oli kam long vilej blong mifala mo oli givim magasin ya Consolation (we naoia hem i Wekap!) long papa blong mi. Kwiktaem nomo papa blong mi i luksave se samting we magasin ya i talem i tru, mo hemia i pulum hem blong i stat blong ridim Baebol. Taem hem i stop blong go long jos, ol neba blong mifala we fastaem mifala i fren gud, naoia oli agensem hem. Oli stap talem strong long papa blong mi se hem i no mas lego katolik, mo oli talem plante nogud tok long hem we i mekem se hem i harem nogud.

Mi mi harem nogud tumas taem mi luk we oli stap agensem papa blong mi olsem. Hemia nao from wanem mi prea blong God i halpem papa blong mi olsem we mi bin talem long stat. Mo taem mi luk se oli no moa agensem papa blong mi, mi harem gud tumas. Mi luksave se Jehova i “Man blong harem ol prea.”

Long 10 Mei 1940, Nasi Jemani i kam faet long Beljiom. From samting ya, plante man oli mas aot long kantri. Mo famle blong mifala i ronwe i go long saot blong Franis. Be long rod, samtaem mifala i pas long ol ples we i denja from ol ami blong Jemani mo Franis oli stap faet agensem olgeta long ol ples ya.

Taem mifala i kambak long fam blong mifala, mifala i luk se ol man oli stilim plante samting blong  mifala. Dog blong mifala Bobbie, hem nomo i kam welkamem mifala. Ol samting ya oli mekem mi stap tingting se, ‘?from wanem i gat wo mo fasin safa?’

Long taem ya mifala i harem gud tumas long tok we brata Emile Schrantz, a wan gudfala paenia we i wan elda i talem blong leftemap tingting blong mifala. Hem i yusum Baebol blong eksplenem from wanem ol man oli safa mo i ansarem plante narafala kwestin we mi gat long saed blong laef. Hemia i mekem mi lavem moa Jehova mo mi stat blong trastem se hem i wan God blong lav.

Be bifo we wo i finis, oltaem ol brata oli kam visitim famle blong mifala. Long Ogis 1943, brata José-Nicolas Minet i kam long fam blong mifala blong givim wan tok. Long taem ya hem i askem se: “?Hu i wantem tekem baptaes?” Ale papa blong mi i pusum han, mo mi tu mi mekem sem mak. Mitufala i baptaes long wan smol reva klosap long fam blong mifala.

Long Disemba 1944, ami blong Jemani i statem laswan bigfala faet blong wol wo tu long wes blong Yurop, we ol man oli singaotem se Battle of the Bulge. Mifala i laef klosap long ples we faet i stap long hem, taswe blong klosap wan manis, mifala i stap nomo insaed long haos blong mifala. Wan dei, taem mi go aotsaed blong fidim ol animol, oli sutum wan bigfala bolet i kam long fam mo i bloemaot ruf blong haos we i stap long fam. Be wan soldia blong Amerika we i stap insaed long haos blong ol animol we i stap klosap long mi, i singaot strong se: “!Yu ledaon!” Nao mi resis i go, mi ledaon klosap long hem, mo hem i putum helmet blong hem long hed blong mi blong protektem mi.

Afta long wo, mifala i save joen oltaem wetem ol brata mo sista blong wan kongregesen long Liège we i stap long not, mo we i samwe 90 kilometa longwe long mifala. Long taem ya, mifala i mekem plan blong gat wan smol grup blong stadi Baebol long Bastogne. Mi stat blong wok long wan bisnes blong takis mo mi gat janis blong stadi long loa. Biaen, mi wok long wan ofis blong gavman. Long 1951, mifala i mekem plan blong gat wan smol asembli long Bastogne. Mo i gat wan handred man oli kam long asembli ya, mo i gat wan sista we i wok strong long wok blong paenia, hem tu i kam, hemia Elly Reuter. Hem i travel 50 kilometa long baskel blong kam long  asembli ya. I no longtaem afta, mitufala i stat blong gat filing long mitufala mo mitufala i plan blong mared. Long taem ya, Elly i kasem wan invetesen blong go long Skul blong Gilead long Yunaeted Stet. Taswe, hem i mas raet i go long wol hedkwota blong eksplenem from wanem hem i mas talem no long invetesen ya. Brata Knorr we i lidim ol man blong Jehova long taem ya, i ansa long kaen fasin se maet wan dei hem i save go long Skul blong Gilead wetem hasban blong hem. Nao mitufala i mared long Februari 1953.

Long sem yia ya, mitufala i go long New World Society Assembly we oli mekem long Yankee Stadium, Niu Yok. Long ples ya, mi mitim wan brata we i givim wan gudfala wok long mi, mo i invaetem mi blong muv i go long Yunaeted Stet. Be afta we mitufala i prea from samting ya, mitufala i mekem desisen blong no akseptem mo mitufala i gobak long Beljiom blong sapotem wan smol grup long Bastogne we i gat samwe ten pablisa nomo. Long nekis yia blong hem, mitufala i glad taem Elly i bonem wan smol boe, hemia Serge. Be sore tumas, seven manis afta, Serge i sik mo i ded. Mitufala i harem nogud tumas mo mitufala i talemaot samting ya long Jehova tru long prea. Mo tu, mitufala i glad se hop blong laef bakegen i mekem bilif blong mitufala i strong.

Long Oktoba 1961, mi faenem wan haftaem wok we i mekem se mi save paenia. Be long sem dei ya, brata we i lukaot long betel long Beljiom i ring long mi. Mo hem i askem sipos mi save stat blong mekem wok blong seket elda (we naoia yumi talem eria elda). Ale mi askem se: “?Mitufala i save mekem wok blong paenia fastaem, bifo we mitufala i mekem wok blong eria elda?” Ol brata oli talem se yes mitufala i save mekem olsem. Taswe afta we mitufala i paenia blong eit manis, long Septemba 1962 mitufala i stat long mekem wok blong eria elda.

Tu yia afta we mitufala i mekem wok blong eria elda, oli invaetem mitufala blong go wok long Betel long Brussels. Mo mitufala i stat blong wok long Oktoba 1964. Long niufala wok ya, mitufala i kasem plante blesing. Smoltaem afta we brata Knorr i visitim Betel blong mifala long 1965, mi sapraes se oli putumap mi blong lukaot long Betel. Biaen, oli invaetem mi mo Elly blong go long skul blong namba 41 klas blong Gilead. !Ol tok we brata Knorr i talem 13 yia bifo, oli kamtru! Afta we mitufala i graduet, oli sanem mitufala i gobak long Betel blong Beljiom.

Long ol yia we i pas, mi gat nambawan janis ya blong yusum save we mi gat long saed blong loa, blong difendem raet blong ol man blong Jehova long Yurop mo long ol narafala ples tu, blong oli fri blong mekem wosip. (Fil. 1:7) Hemia i mekem se mi toktok wetem ol haeman blong bitim 55 kantri we oli putum tabu long wok blong yumi. Taem mi talemaot mi long ol haeman ya, mi no talem se mi gat plante ekspiriens long saed blong loa, be mi talem se mi mi “wan man blong God.” Oltaem mi prea blong Jehova i lidim mi, from mi luksave se “hat blong king [o jaj] i olsem ol reva long han blong Jehova.  Hem i lidim hat blong king olsem we Hem i wantem.”—Prov. 21:1.

Mi gat wan ekspiriens we bambae mi neva fogetem, hemia taem mi storian wetem wan memba blong palemen blong Yurop. Mi bin askem hem plante taem blong toktok long hem, mo wan taem hem i agri blong mitufala i storian. Be long taem ya, hem i talem se: “Bae mi letem yu toktok blong faef minit nomo, yu no mas bitim taem ya.” Ale, mi benem hed blong mi mo mi stat blong prea. Nao, hem i askem se mi stap mekem wanem ya. Ale, mi leftemap hed blong mi, mo mi talem se: “Mi talem tangkiu long God from we yu yu wan long ol minista blong hem.” Ale, hem i se: “?Yu minim wanem?” Nao mi soem Rom 13:4 long hem. Hem i wan protestan, taswe vas ya i pulum tingting blong hem. ?Wanem i kamaot from? Hem i toktok wetem mi wan aoa haf, mo mitufala i gat wan gudfala storian. Mo hem i talem tu se hem i respektem wok blong yumi ol Witnes.

Long ol yia we i pas, ol man blong Jehova long Yurop oli dil wetem plante problem olsem, fasin blong stap nutrol, fasin blong spolem pikinini, pem takis, mo plante moa. Mi glad tumas joen long wok ya, mo blong luk olsem wanem Jehova i mekem se mifala i winim ol kes ya. !Ol Witnes blong Jehova oli winim bitim 140 kot kes long Kot Blong Yurop We i Lukaot Long Raet Blong Ol Man!

Long ol yia 1990, mi wok wetem Brata Philip Brumley, blong wol hedkwota, mo Brata Valter Farneti blong Itali, blong halpem ol brata mo sista blong yumi long Kuba blong oli fri blong wosipim Jehova, from we long ples ya wok blong yumi i tabu. Mi raet i go long wan ambasada blong Kuba we i stap long Beljiom, mo biaen mi mit wetem wan man we oli putumap hem blong i lukluk long ol samting we mifala i askem. Long ol faswan miting blong mifala, mifala i no naf blong stretem ol rong tingting we ol man oli gat we i mekem se gavman i putum tabu long wok long yumi.

Afta we mifala i prea blong Jehova i lidim mifala, mifala i askem sipos mifala i save sanem sam Baebol i go long Kuba, mo taem oli givim raet long mifala, mifala i sanem 5,000 Baebol i go. Ol Baebol ya oli kasem long Kuba sef nomo, mo oli givimaot long ol brata mo sista. Taswe, mifala i sua se Jehova i stap blesem ol traehad blong mifala. Biaen mifala i askem blong sanem 27,500 Baebol bakegen, mo oli agri. Taem mifala i halpem ol brata mo sista blong oli gat wanwan kopi blong Baebol, hemia i mekem mi glad tumas.

Mi go long Kuba plante taem from ol samting we i joen wetem loa, blong traem mekem se wok blong  yumi i kam gud moa. Mo hemia i mekem se mi fren gud wetem plante haeman blong gavman.

Long 1994, i gat bitim 1,000,000 man we oli ded long taem ya we i gat faet long Ruwanda, blong kilimaot wan ful laen blong man. Sore tumas, sam brata mo sista blong yumi tu oli ded. Smoltaem afta, oli jusum wan grup blong ol brata blong givimaot ol samting we oli brata mo sista oli nidim.

Taem mifala i kamtru long Kigali we hem i kapital, mifala i luk se i gat plante hol blong bolet long wol blong bilding blong translesen ofis mo long ol buk. Mo mifala i harem plante stori blong ol brata mo sista we oli katem olgeta long naef. Be mifala i harem tu plante stori blong ol brata mo sista we oli stap givgivhan long olgeta. Eksampol, mifala i mitim wan brata we hem i wan Tutsi we wan famle blong Hutu we oli Witnes oli haedem hem long wan hol aninit long graon blong 28 dei. Long taem blong wan miting long Kigali, mifala i traehad blong leftemap tingting blong bitim 900 brata mo sista.

Sam taem biaen, mifala i krosem boda i go long Zaire (we naoia hem i Demokratik Ripablik Blong Kongo), blong lukaotem wan bigfala grup blong ol Witnes we oli ronwe i go long ol refuji kamp klosap long taon blong Goma. Mifala i no save faenem olgeta, so mifala i prea blong Jehova i lidim mifala i go long olgeta. Biaen mifala i luk we wan man i stap wokbaot i kam stret long mifala, mo mifala i askem hem sipos hem i save sam Witnes blong Jehova. Ale, hem i talem se: “Yes, mi mi wan Witnes. Mi glad blong tekem yufala i go long rilif komiti.” Afta we mifala i leftemap tingting blong ol brata long rilif komiti, mifala i storian wetem samwe 1,600 refuji blong leftemap tingting blong olgeta. Mo tu, mifala i ridim wan leta we i kam long Hed Kampani long olgeta. Ol brata mo sista oli glad tumas taem oli harem ol tok ya we i se: “Mifala i tingbaot yufala oltaem long ol prea blong mifala. Mifala i save se Jehova bambae i no save lego yufala.” Ol tok ya blong Hed Kampani i tru nomo. !Tede, i gat bitim 30,000 Witnes we oli stap gohed blong mekem wok blong Jehova long Ruwanda!

Afta we mitufala i mared blong klosap 58 yia, waef blong mi Elly i ded long 2011. Jehova i mekem mi harem gud taem mi talemaot ol wari blong mi long hem. Mo tu, mi glad taem mi serem gud nius blong Kingdom long ol neba blong mi.

Nating se mi gat 90 yia finis, mi gohed yet blong prij evri wik. Mi glad tu blong givhan long Ligol Dipatmen long branj blong Beljiom, mo tokbaot ol ekspiriens blong mi long ol narafala, mo leftemap tingting blong ol yangfala blong Betel.

Fastaem taem we mi prea long Jehova, hemia samwe 84 bifo. Mo hemia nao stat blong wan niufala laef we i mekem se mi kam klosap moa long Jehova. Mi mi glad tumas we long ful laef blong mi, Jehova i stap lesin gud long ol prea blong mi.—Sam 66:19. b