STADI 23
SINGSING 28 Man We i Fren Blong Jehova
Jehova i Wantem Se Yumi Kam Ol Gest Blong Hem
“Tent blong mi bambae i stap wetem olgeta, mo mi bambae mi God blong olgeta.”—ESIK. 37:27.
BIGFALA TINGTING
Stadi ya bambae i halpem yumi blong kasem save se i minim wanem blong stap olsem ol gest blong Jehova long tent blong hem mo olsem wanem hem i lukaot gud long yumi olsem ol gest blong hem.
1-2. ?Jehova i wantem se ol gudfala man we oli wosipim hem oli mekem wanem?
SIPOS wan man i askem long yu se, ?Jehova i wanem blong yu? Maet yu ansa se, ‘Jehova i Papa blong mi, God blong mi, mo Fren blong mi.’ Mo tu, maet yu tingbaot sam narafala taetel we i stret blong tokbaot Jehova. ?Be samtaem, yu tingbaot Jehova olsem man we i singaot yu blong yu stap long tent blong hem?
2 King Deved i tokbaot frensip we Jehova i gat wetem ol gudfala man blong hem, se i olsem wan man wetem ol gest blong hem. Taswe, hem i askem long Jehova se: “O Jehova, ?hu i save stap olsem gest long tent blong yu? ?Hu i save stap long bigfala hil blong yu we i tabu?” (Sam 15:1) Folem vas ya, yumi lanem se yumi save kam ol gest o ol fren blong Jehova. !Mo hemia i wan bigfala ona!
JEHOVA I WANTEM SE YUMI KAM OL GEST BLONG HEM
3. ?Hu i faswan gest long tent blong Jehova? ?Jehova mo gest blong hem tufala i harem olsem wanem?
3 Bifo we Jehova i wokem ol samting, hem i stap hem wan nomo. Be biaen, hem i wokem faswan Boe blong hem, mo i singaot hem i kam long tent blong hem olsem faswan gest blong hem. Mo Jehova i glad tumas blong mekem olsem. Baebol i talem se, Jehova “i glad moa long” Boe blong hem. “Long fes blong [Jehova,]” faswan gest blong hem i glad oltaem.”—Prov. 8:30.
4. ?Jehova i singaot hu moa blong oli kam ol gest blong hem?
4 Biaen, Jehova i wokem ol narafala enjel mo i singaot olgeta blong oli kam ol gest blong hem tu. Baebol i singaot ol enjel ya se, ‘ol pikinini blong God’ mo i talem se oli glad tumas blong stap wetem Jehova. (Job 38:7; Dan. 7:10) Blong plante yia, ol gest blong God, hemia olgeta ya nomo we oli stap wetem hem long heven. Be biaen, taem hem i wokem ol man long wol, hem i singaot olgeta tu blong oli kam ol gest blong hem. Sam long olgeta hemia Inok, Noa, Ebraham, mo Job. Baebol i tokbaot olgeta se oli ol fren blong God o oli wokbaot “wetem tru God.”—Jen. 5:24; 6:9; Job 29:4; Aes. 41:8.
5. ?Yumi lanem wanem long profet tok we i stap long Esikel 37:26, 27?
5 Long ol handred yia we i pas, Jehova i gohed blong singaot ol fren blong hem blong oli kam ol gest blong hem. (Ridim Esikel 37:26, 27.) Eksampol, long profet tok blong Esikel, yumi lanem se God i wantem tumas se ol man we oli wosipim hem oli kam ol gudfala fren blong hem. Hem i promes blong mekem “wan kontrak blong pis wetem olgeta.” Profet tok ya i stap tokbaot taem ya we olgeta we oli gat hop blong laef long heven mo olgeta we oli gat hop blong laef long wol ya, bambae oli joen gud tugeta olsem “wan grup nomo” blong sipsip long tent blong Jehova. (Jon 10:16) !Hemia i stap hapen tede!
GOD LUKAOT GUD LONG YUMI NOMATA WEPLES YUMI STAP LONG HEM
6. ?Olsem wanem wan man i save kam wan gest long tent blong Jehova? ?Weples yumi save faenem tent blong Jehova?
6 Long Baebol, wan tent hem i ples blong spel mo i save protektem man long san mo ren. Wan gest we i stap insaed long tent blong wan man, bambae i wantem se man ya i mas lukaot gud long hem. Taem yumi givim laef blong yumi long Jehova, yumi kam olsem ol gest long tent blong hem. (Sam 61:4) Yumi gat evri samting we yumi nidim blong mekem frensip blong yumi wetem Jehova i kam strong, mo yumi fren gud wetem ol narafala we olgeta tu oli kam ol gest blong Jehova. Be tent we Hem i singaot yumi i kam insaed long hem, i no wan prapa tent mo i no stap long wan spesel ples. Maet yu travel i go long wan narafala kantri from wan spesel asembli, nao yu mitim ol narafala tu we oli glad blong stap long tent blong Jehova. Sipos yumi gohed blong wosipim Jehova, yumi save stap olsem ol gest long tent blong hem nomata weples yumi stap long hem.—Rev. 21:3.
7. ?From wanem yumi talem se ol gudfala man we oli ded finis, oli stap yet olsem ol gest long tent blong Jehova? (Mo tu, yu luk pija.)
7 ?Olsem wanem long ol gudfala man we oli ded finis? ?Yumi save talem se olgeta oli stap yet olsem ol gest long tent blong Jehova? !Yes! ?From wanem yumi talem olsem? Hemia from we long tingting blong Jehova i olsem we oli laef yet. Jisas i eksplenem se: “Long buk blong Moses we i tokbaot smol tri we faea i laet long hem, Moses tu i soemaot se ol dedman oli save laef bakegen, taem hem i singaot Jehova se, hem i ‘God blong Ebraham, God blong Aesak, mo God blong Jekob.’ Hem i God blong man we i laef, i no God blong man we i ded, from we long tingting blong hem, olgeta evriwan oli laef nomo.”—Luk 20:37, 38.
Nating se ol gudfala man oli ded finis, be Jehova i luk olgeta yet olsem ol gest long tent blong hem (Haf 7)
FRUT WE I KAMAOT MO SAMTING WE YUMI MAS MEKEM
8. ?Wanem i kamaot taem ol gest blong Jehova oli stap insaed long tent blong hem?
8 Wan prapa tent, hem i wan ples blong spel mo i save protektem man long san mo ren. Long sem fasin, tent blong Jehova i protektem ol gest blong hem blong i no gat wan samting i save spolem frensip blong olgeta wetem hem, mo i givim wan gudfala hop long fiuja long olgeta. Taem yumi gohed blong stap klosap long Jehova, Setan i no save spolem yumi blong olwe. (Sam 31:23; 1 Jon 3:8) Mo long niufala wol, Jehova bambae i gohed blong protektem ol gudfala fren blong hem blong oli no ded, mo blong i no gat wan samting i spolem frensip blong olgeta wetem hem.—Rev. 21:4.
9. ?Jehova i wantem se ol gest blong hem oli mekem wanem?
9 I wan bigfala ona blong stap olsem wan gest long tent blong Jehova, mo blong fren gud wetem hem blong olwe. ?Be yumi mas mekem wanem sipos yumi wantem gohed blong stap olsem ol gest blong hem? Sipos wan man i singaot yu yu go long haos blong hem, i sua se bambae yu wantem mekem man ya i glad. Eksampol, sipos hem i wantem se yu tekemaot sus bifo we yu go insaed, i sua se bambae yu mekem olsem. Long sem fasin, yumi mas save samting we Jehova i wantem yumi blong mekem, blong yumi save gohed blong stap olsem ol gest long tent blong hem. Sipos yumi lavem Jehova, bambae yumi wantem mekem evri samting we yumi naf blong mekem “blong mekem hem i glad.” (Kol. 1:10) I tru se Jehova i fren blong yumi. Be tu, hem i God mo Papa blong yumi, we i stret nomo blong yumi respektem hem. (Sam 25:14) Sipos yumi tingbaot samting ya, oltaem bambae yumi respektem hem. Mo fasin ya bambae i halpem yumi blong blokem ol fasin we i save mekem hem i harem nogud. Yes, oltaem yumi wantem ‘wokbaot wetem God we tingting blong yumi i stap daon.’—Maeka 6:8.
JEHOVA I MEKEM I SEM MAK NOMO LONG OLGETA MAN ISREL
10-11. ?Olsem wanem Jehova i tritim ol man Isrel taem oli stap long draeples ya Sinae?
10 Jehova i tritim evri gest blong hem sem mak nomo. (Rom 2:11) Yumi save lanem lesen long fasin blong Jehova blong mekem i sem mak nomo long olgeta man Isrel, taem oli stap long draeples ya Sinae.
11 Afta we Jehova i tekemaot ol man blong hem long Ijip, hem i putumap ol pris blong oli wok long tabenakel. Mo tu, hem i givim wok long ol Livaet blong oli lukaot long ol narafala wok long tabenakel. ?Olsem wanem? ?Jehova i mekem i gud moa long olgeta we oli wok long tabenakel, o olgeta we oli stap klosap long tabenakel, i bitim ol narafala? !Nogat! Jehova i mekem i sem mak long evri man.
12. ?Wanem i soemaot se Jehova i mekem i sem mak nomo long olgeta man Isrel? (Eksodas 40:38) (Mo tu, yu luk pija.)
12 Evri man Isrel oli save fren gud wetem Jehova, nating se oli wok o oli stap klosap long tabenakel o nogat. Eksampol, Jehova i meksua se ful nesen blong Isrel i save luk bigfala klaod mo bigfala faea ya we i stanap stret antap long tabenakel. (Ridim Eksodas 40:38.) Taem bigfala klaod ya i stat blong muv i go long wan narafala ples, ol man Isrel we oli stap longwe long tabenakel tu oli naf blong luk. Nao oli save tekemaot ol tent blong olgeta, hivimap ol ting blong olgeta, mo aot wetem ol narafala man Isrel. (Nam. 9:15-23) Olgeta evriwan oli naf blong harem bigfala noes blong tufala trampet ya we oli wokem long silva, we i givim woning long olgeta evriwan se oli mas stat blong muvaot. (Nam. 10:2) Taswe, i klia se olgeta man Isrel oli save kam ol gudfala fren blong Jehova, nating se oli stap klosap o longwe long tabenakel. Mo Jehova bambae i lidim mo protektem olgeta. Long sem fasin, tede nomata weples yumi laef long hem, Jehova i lavem yumi evriwan, i stap lukaot gud long yumi, mo protektem yumi.
Tabenakel we i stap long medel blong kamp blong ol man Isrel, i wan pruf se Jehova i mekem i sem mak long olgeta man (Haf 12)
TEDE JEHOVA I MEKEM I SEM MAK TU LONG OLGETA MAN
13. ?Jehova i soemaot olsem wanem se hem i mekem i sem mak long olgeta man tede?
13 Sam man blong God tede oli laef klosap long wol hedkwota o long wan branj ofis blong ol Witnes blong Jehova. Samfala oli wok long ol ples ya. From samting ya, oli joen blong mekem plante defren wok mo oli joen wetem olgeta we oli stap lidim yumi. Be ol narafala, maet oli mekem wok blong eria elda o wan narafala spesel wok blong Jehova fultaem. Nating sipos yu no mekem wan long ol wok ya, be yu save sua se Jehova i luk yu yet olsem wan gest blong hem, i lavem yu, mo bambae i givim samting we yu nidim. (1 Pita 5:7) Yes, Jehova i givim kakae long saed blong spirit long olgeta man we oli wosipim hem, i stap lidim olgeta mo protektem olgeta.
14. ?Jehova i mekem wanem moa blong soemaot se hem i mekem i sem mak long olgeta man?
14 Wan narafala rod we Jehova i soemaot se hem i mekem i sem mak long olgeta man, hemia taem hem i meksua se olgeta man raon long wol oli gat wan Baebol. Bifo, oli raetem Baebol long tri lanwis nomo, hemia Hibru, Arameik, mo Grik. ?Hemia i min se olgeta nomo we oli save ridim trifala lanwis ya, oli save kam ol gudfala fren blong Jehova? Nogat. I no olsem.—Mat. 11:25.
15. ?Wanem i pruvum se Jehova i mekem i sem mak long olgeta man? (Mo tu, yu luk pija.)
15 Jehova i glad long yumi, i no from we yumi gat hae edukesen o yumi naf blong ridim trifala lanwis ya. Be hem i givim waes blong hem long olgeta man raon long wol, nating se oli gat hae edukesen o nogat. Mo tu, hem i pulum ol man blong transletem Tok blong Hem Baebol, i go long plante taosen lanwis, mekem se olgeta man raon long wol oli save harem gud long ol tijing blong hem, mo lanem olsem wanem blong kam fren blong hem.—2 Tim. 3:16, 17.
?From wanem yumi save talem se Baebol i wan pruf se God i mekem i sem mak long olgeta man? (Haf 15)
GOHED BLONG MEKEM JEHOVA I “GLAD”
16. Folem Ol Wok 10:34, 35, ?yumi mas mekem wanem blong Jehova i gohed blong glad long yumi?
16 I wan bigfala ona we Jehova i singaot yumi blong kam long tent blong hem olsem ol gest blong hem. Hem i kaen tumas, i lavem ol man, mo hem i wan gudfala fren. Antap long hemia, hem i mekem i sem mak long olgeta man, i welkamem gud yumi evriwan nating se yumi man o woman, yumi kamaot long wanem kantri, yumi gat defren bakgraon, edukesen, kala blong skin, traeb, mo yia. Nating se i olsem, Jehova i save welkamem olgeta ya nomo we oli obei long ol rul blong hem, blong oli kam olsem ol gest blong hem.—Ridim Wok 10:34, 35.
17. ?Weples yumi save faenem sam moa samting we i save givhan long yumi blong stap olsem ol gest long tent blong Jehova?
17 Long Ol Sam 15:1, Deved i askem long Jehova se: “O Jehova, ?hu i save stap olsem gest long tent blong yu? ?Hu i save stap long bigfala hil blong yu we i tabu?” Biaen man blong raetem sam i ansa long ol kwestin ya. Long nekis stadi, bambae yumi tokbaot sam samting we yumi mas mekem blong Jehova i gohed blong glad long yumi.
SINGSING 32 !Yu Stanap Long Saed Blong Jehova!
