1. ?Wanem i halpem ol man blong Jehova blong oli gohed blong wosipim hem, nating se oli fesem ol defren problem?

 BAEBOL i talem se yumi stap laef naoia long wan taem we “laef bambae i strong tumas mo bambae i had blong winim ol trabol.” (2 Tim. 3:1) Nating se yumi stap fesem ol trabol we i kamaot from rabis sistem blong wol ya, be yumi stap fesem fasin agens tu from we yumi stap wosipim Jehova. ?Be wanem i halpem yumi blong yumi gohed blong wosipim Jehova nating se yumi fesem ol problem ya? Wan impoten risen hemia from we yumi save se Jehova i “God ya we i laef.”—Jer. 10:10; 2 Tim. 1:12.

2. ?From wanem yumi talem se Jehova i laef i stap?

² Jehova i luk evri problem we yumi stap fesem mo oltaem hem i wantem halpem yumi. (2 Kron. 16:9; Sam 23:4) Taem yumi tingbaot se Jehova i luk ol problem blong yumi mo i rere oltaem blong halpem yumi, bambae yumi gat paoa blong stanap strong long eni trabol we yumi fesem. Mo hemia nao samting we i givhan long King Deved.

3. ?Deved i minim wanem taem hem i talem se “Jehova i laef i stap”?

³ Deved i save Jehova mo i dipen long hem. Taem King Sol wetem ol narafala enemi oli stap ronem Deved blong kilim hem, Deved i prea long Jehova blong i givhan long hem. (Sam 18:6) Afta we God i ansarem prea blong Deved mo i sevem hem, hem i talem se: “!Jehova i laef i stap!” (Sam 18:46) ?Deved i minim wanem? Wan buk i talem se Deved i wantem makem gud se Jehova hem i tru God mo “oltaem bambae hem i halpem ol man blong hem.” Yes, tru long ekspiriens blong Deved, hem i save se Jehova i laef i stap mo hemia i mekem hem i gat strong tingting blong i gohed blong wosipim Jehova mo presem hem.—Sam 18:​28, 29, 49.

4. ?Taem yumi luk Jehova olsem God ya we i laef, hemia i mekem i gud long yumi olsem wanem?

 ⁴ Taem yumi trastem se Jehova i God ya we i laef i stap, bambae yumi gat strong tingting blong wosipim hem. Bambae yumi gat paoa blong stanap strong long eni trabol mo yumi mekem bes blong yumi long wok blong hem. Mo tu, bambae yumi gat strong tingting blong stap klosap long Jehova.

GOD YA WE I LAEF BAMBAE I GIVIM PAOA LONG YU

5. ?From wanem yumi sua se yumi save stanap strong taem yumi fesem ol trabol? (Filipae 4:13)

⁵ Sipos yumi tingbaot se Jehova i laef i stap mo i stap blong sapotem yumi, bambae yumi naf blong stanap strong long eni trabol nating se i bigwan o i smol. Jehova i naf blong givhan long yumi from we i no gat wan problem we i bigwan tumas we hem i no save stretem. Hem i gat olgeta paoa, mo hem i save givim paoa long yumi blong stanap strong. (Ridim Filipae 4:13.) Yes, yumi gat plante risen blong trastem hem taem yumi fesem ol problem. Taem yumi luk olsem wanem Jehova i givhan long yumi blong stanap strong long ol smosmol trabol, yumi save sua fulwan se bambae hem i naf blong halpem yumi tu blong stanap strong long ol trabol we oli bigwan moa.

6. ?Deved i fesem wanem trabol we i mekem se hem i trastem moa Jehova?

⁶ Deved i fesem tu trabol we i mekem se hem i trastem moa Jehova. Taem hem i stap lukaot long ol sipsip blong papa blong hem, wan taem wan bea i kam stilim wan long ol sipsip ya. Mo long wan narafala taem, wan laeon i mekem sem samting. Be long tufala taem ya, Deved i ronem tufala animol ya mo i sevem sipsip ya. Nating se i olsem, hem i no leftemap hem wan from samting ya. Hem i save se Jehova nao i givim paoa long hem blong mekem olsem. (1 Saml. 17:​34-37) Deved i neva fogetem samting ya. Taem hem i tingting dip long ol samting ya, hem i sua fulwan se God ya we i laef bambae i givim paoa long hem tu long fiuja.

7. ?Deved i tingbaot wanem moa, mo olsem wanem hemia i givhan long hem?

⁷ Biaen, taem Deved i wan yangfala hem i go visitim kamp blong ol ami blong Isrel. Nao hem i luk we ol soldia blong Isrel oli fraet tumas long bigfala man Filistia ya we nem blong hem Golaeat we i kam mo stap singaot bigwan se: “Ol soldia blong Isrel, yufala i no naf long mi.” (1 Saml. 17:​10, 11) Ol soldia ya oli fraet from we oli tingbaot nomo saes blong Golaeat mo samting we hem i talem. (1 Saml. 17:​24, 25) Be Deved, i tingbaot wan narafala samting. Hem i save se taem Golaeat i stap jikim ol ami blong Isrel, i olsem we hem i stap “jikim ol soldia blong tru God we i laef.” (1 Saml. 17:26) Deved i tingbaot moa Jehova. Hem i trastem se God ya we i bin halpem hem taem hem i stap lukaot long ol sipsip blong papa blong hem, bambae i naf blong givhan long hem tu long taem ya. !Wetem help blong Jehova, Deved i faet agensem Golaeat mo hem i win!—1 Saml. 17:​45-51.

8. ?Yumi save mekem wanem blong trastem Jehova se bambae hem i halpem yumi taem yumi fesem ol trabol? (Mo tu, yu luk pija.)

⁸ Yumi save stanap strong long ol trabol sipos yumi tingbaot se God ya we i laef, i rere oltaem blong givhan long yumi. (Sam 118:6) Be blong trastem Jehova, yumi mas tingbaot ol samting we hem i mekem finis blong givhan long yumi. Mo ridim ol stori long Baebol we i soemaot olsem wanem Jehova i bin sevem ol man we oli wosipim hem. (Aes. 37:​17, 33-37) Mo tu, i gud yumi ridim ol ripot long websaet blong yumi jw.org, we i soemaot olsem wanem Jehova i stap sapotem ol brata mo sista tede. Antap long hemia, i gud yu tingbaot  bakegen ol taem we Jehova i bin givhan long yu. Taem yu stap tingbaot ol samting ya, maet yu luk se Jehova i neva mekem wan spesel samting olsem long yu, olsem blong tekemaot yu long wan laen o wan bea. !Be blong talem stret, Jehova i bin mekem plante samting blong givhan long yu! Hem i pulum yu yu kam, blong yu save fren wetem hem. (Jon 6:44) Mo naoia, hem i stap givhan long yu blong yu stap yet long trutok. Taswe, i gud yu askem Jehova blong i halpem yu blong tingbaot ol taem ya we hem i bin ansarem ol prea blong yu, i givim samting we yu nidim long stret taem, o i lukaot gud long yu taem yu fesem wan hadtaem. Sipos yu tingting bak long ol taem ya, hemia bambae i mekem yu sua fulwan se Jehova bambae i gohed blong mekem samting blong givhan long yu.

9. ?Yumi mas tingbaot wanem taem yumi fesem ol trabol? (Ol Proveb 27:11)

⁹ Sipos yumi luk Jehova olsem God ya we i laef, bambae yumi gat stret tingting long ol problem we yumi fesem. Bambae yumi stat blong tingbaot se ol problem ya oli joen insaed long bisnes ya bitwin Jehova mo Setan. Setan i bin talem se sipos yumi fesem hadtaem, bambae yumi lego Jehova. (Job 1:​10, 11; ridim Ol Proveb 27:11.) Be sipos yumi stanap strong, yumi soemaot se yumi lavem Jehova mo pruvum se Setan i wan man blong giaman. ?Olsem wanem? ?Yu yu stap fesem fasin agens we i kam long gavman, problem blong mane, ol man oli no lesin taem yu prij, o sam narafala trabol bakegen? Sipos yes, tingbaot se hemia i wan gudfala janis blong yu mekem Jehova i glad. Mo tu, tingbaot se Jehova bambae i neva letem yu yu fesem wan trabol we i strong tumas we yu no naf blong stanap strong long hem. (1 Kor. 10:13) Oltaem bambae hem i givim paoa long yu blong stanap strong.

GOD YA WE I LAEF BAMBAE I BLESEM YU

10. ?God ya we i laef bambae i mekem wanem long olgeta we oli wosipim hem?

¹⁰ Oltaem Jehova i blesem olgeta we oli wosipim hem. (Hib. 11:6) Hem i givim pis mo i mekem oli glad naoia, mo bambae i givim laef  we i no save finis long olgeta long fiuja. Yumi save putum hop blong yumi long Jehova mo trastem se hem i wantem tumas, mo i gat paoa blong blesem yumi. Mo hemia bambae i pulum yumi blong gohed blong mekem bes blong yumi blong wosipim hem, olsem ol man blong hem bifo oli mekem. Hemia nao samting we Timoti i mekem.—Hib. 6:​10-12.

11. ?Wanem i pulum Timoti blong i wok strong long kongregesen? (1 Timoti 4:10)

¹¹ Ridim 1 Timoti 4:10. Timoti i putum hop blong hem long God ya we i laef. Taswe, hem i wok strong long wok blong Jehova mo i givhan long ol narafala. ?Hem i mekem samting ya olsem wanem? Aposol Pol i leftemap tingting blong hem blong i kam wan gudfala tija we i naf blong tijim gud ol man long wok blong prij mo long kongregesen. Mo tu, Pol i talem long Timoti blong i kam wan gudfala eksampol long ol narafala Kristin nating se oli yangfala o olfala. Mo hem i kasem sam wok we i had blong mekem, olsem blong givim strong advaes long olgeta we oli nidim be long wan fasin we i soemaot lav. (1 Tim. 4:​11-16; 2 Tim. 4:​1-5) Samtaem, ol narafala oli no luk ol wok we hem i mekem o talem tangkiu long hem from, be Jehova bambae i blesem hem from.—Rom 2:​6, 7.

12. ?Wanem i pulum ol elda blong wok strong long kongregesen? (Mo tu, yu luk pija.)

¹² Tede, ol elda tu oli save trastem se Jehova i luk mo i tinghae long ol wok we oli mekem. Antap long wok we ol elda oli mekem blong tij, prij, mo visitim ol brata mo sista blong leftemap tingting, plante long olgeta oli joen long ol konstraksen projek, mo long disasta rilif. Sam narafala oli stap long Grup Blong Visitim Ol Sik man o long Komiti Blong Toktok Wetem Dokta. Ol elda we oli glad blong mekem ol wok ya, oli save se Jehova nao i stanemap kongregesen be i no man. From samting ya, oli traem bes blong olgeta blong mekem gud ol wok we oli kasem, mo oli trastem fulwan se Jehova bambae i blesem olgeta from ol wok we oli mekem.—Kol. 3:​23, 24.

13. ?Wanem tingting blong Jehova long ol samting we yumi mekem?

¹³ I no yumi evriwan we i save kam ol elda. Be yumi evriwan i save givim samting long Jehova. Hem i glad taem yumi mekem bes blong yumi long wok blong hem. Mo hem i luk taem  yumi givim samting blong sapotem wok blong prij long fulwol, nating se i smol nomo. Hem i glad taem hem i luk we yumi traehad blong winim sem, mo yumi leftemap han blong yumi blong givim wan ansa long ol miting. Mo tu, hem i glad tumas taem i luk we yumi no tingbaot rong we narafala i mekem long yumi, mo yumi traehad blong fogivim olgeta. Mo nating sipos yu harem se yu no naf blong mekem plante samting olsem we yu wantem, be yu save trastem se Jehova i tinghae long samting we yu naf blong mekem. Hem i lavem yu mo bambae hem i blesem yu from.—Luk 21:​1-4.

GOHED BLONG STAP KLOSAP LONG GOD YA WE I LAEF

14. ?Taem yumi gohed blong stap klosap long Jehova, hemia i halpem yumi olsem wanem? (Mo tu, yu luk pija.)

¹⁴ Sipos yumi tingbaot se Jehova i laef i stap, bambae i moa isi long yumi blong holemstrong long hem. Hemia nao samting we Josef i mekem. Hem i no wantem slip wetem waef blong Potifa. Long lukluk blong hem, Jehova i laef i stap, mo hem i no wantem mekem Jehova i harem nogud. (Jen. 39:9) Blong luk Jehova olsem wan God we i laef i stap, yumi mas prea long hem oltaem mo stadi long Tok blong hem. Olsem nao, yumi save fren gud moa wetem hem. Olsem Josef, taem yumi fren gud wetem Jehova, bambae yumi no wantem mekem eni samting we Hem i no glad long hem.—Jem. 4:8.

15. ?Samting we i hapen long ol man Isrel long draeples i tijim yumi long wanem? (Hibru 3:12)

¹⁵ Olgeta we oli fogetem se Jehova i laef i stap, i isi nomo blong oli gowe long hem. Tingbaot samting we i hapen long ol man Isrel taem oli stap long draeples. Oli save se Jehova i stap, be oli stat blong gat tu tingting se Jehova bambae i givim samting we oli nidim o nogat. Nao oli stap askem se: “?Jehova i stap wetem yumi o no?” (Eks. 17:​2, 7) Biaen, oli rebel agensem God. I sua se yumi no wantem folem rabis eksampol blong olgeta.—Ridim Hibru 3:12.

16. ?Wanem i save traem bilif blong yumi?

¹⁶ Laef long wol ya i save mekem se i had  blong yumi gohed blong stap klosap long Jehova. Plante man oli sakemaot tingting ya se i gat wan God. Plante taem, olgeta we oli gat tingting olsem, laef blong olgeta i rongud nomo. Mo taem yumi luk samting ya, hemia i save traem bilif blong yumi. Nomata we yumi save se God i stap, be maet yumi stat blong gat tu tingting se bambae hem i halpem yumi o nogat. Hemia filing blong man we i raetem Ol Sam 73. Taem hem i luk se laef blong ol man we oli no folem ol loa blong God, i rongud nomo, hem i stat blong gat tingting ya se i blong nating nomo we hem i stap wosipim God.—Sam 73:​11-13.

17. ?Wanem bambae i halpem yumi blong yumi gohed blong stap klosap long Jehova?

¹⁷ ?Wanem i halpem man blong raetem sam ya blong i jenisim tingting blong hem? Hem i tingting dip long samting we bambae i hapen long ol man we oli fogetem Jehova. (Sam 73:​18, 19, 27) Mo tu, hem i tingbaot ol blesing we ol man we oli wosipim God bambae oli kasem. (Sam 73:24) Yumi tu, yumi save tingbaot ol blesing we Jehova i bin givim long yumi. I gud yumi traem tingbaot se laef blong yumi bambae i olsem wanem sipos yumi no wosipim Jehova. Sipos yumi tingbaot samting ya, hemia bambae i halpem yumi blong yumi gohed blong holemstrong long Jehova, mo talem olsem man blong raetem sam, we i se: “Be mi, taem mi kam klosap long God, hemia i gud tumas long mi.”—Sam 73:28.

18. ?From wanem yumi no nid blong fraet long ol samting we yumi save fesem long fiuja?

¹⁸ Yumi save stanap strong long ol defren trabol we yumi fesem long ol las dei ya, from we yumi ‘folem God ya we i laef mo i tru, mo yumi slef blong hem.’ (1 Tes. 1:9) God blong yumi i laef i stap, mo oltaem bambae hem i halpem ol man we oli wosipim hem. Hem i pruvum finis se hem i bin givhan long ol man blong hem bifo, mo tede hem i stap givhan long yumi tu. I no longtaem bambae yumi fesem wan bigfala trabol long wol, be Jehova bambae i stap wetem yumi. (Aes. 41:10) I gud yumi evriwan i mekem ‘tingting blong yumi i strong, mo talem se: “Jehova nao i stap halpem mi. Bambae mi no fraet.”’—Hib. 13:​5, 6.