Kwestin
Tok ya long Ol Sam 12:7 we i se: “Yu bambae yu lukaot gud long olgeta,” i stap minim “olgeta we oli harem nogud” (vas 5) o “ol tok blong Jehova” (vas 6)?
Ol vas raonabaot oli soemaot klia se tok ya “olgeta” long vas ya i stap minim ol man.
Long Ol Sam 12:1-4, yumi ridim se “olgeta we oli stap tru long yu oli lus finis long medel blong ol man.” Mo long Ol Sam 12:5-7, hem i talem se:
“Jehova i talem se: ‘From we ol man oli spolem olgeta we oli harem nogud,
Mo from we ol puaman oli stap pulum nogud win blong olgeta,
Bambae mi girap blong tekem aksen,
‘Bambae mi sevem olgeta, mi tekemaot olgeta long han blong ol man we oli stap tritim nogud olgeta.’
Ol tok blong Jehova oli klin gud,
Oli olsem silva we oli bonem insaed long graonpot seven taem blong mekem i klin gud.
O Jehova, yu bambae yu lukaot gud long olgeta.
Bambae yu protektem olgeta wanwan olwe, blong jeneresen ya i no spolem olgeta.”
Vas 5 i tokbaot samting we God bambae i mekem long ol man we oli “harem nogud.” Hemia se bambae hem i sevem olgeta.
Vas 6 i talem tu se “ol tok blong Jehova oli klin gud,” “olsem silva we oli bonem.” Tok ya i soemaot filing we yumi gat long tok blong Jehova.—Sam 18:30; 119:140.
Naoia traem luk nekis vas. Ol Sam 12:7 i talem se: “O Jehova, yu bambae yu lukaot gud long olgeta. Bambae yu protektem olgeta wanwan olwe, blong jeneresen ya i no spolem olgeta.” ?Tok ya “olgeta” i minim hu?
From we vas 7 i kam afta long vas 6 we i tokbaot “ol tok blong Jehova,” maet sam man oli ting se tok ya “olgeta” i stap minim ol tok blong God. I tru, yumi save se God i bin lukaot gud long Baebol, nating se ol man blong agens oli traem blong blokem mo spolem.—Aes. 40:8; 1 Pita 1:25.
Be tok we i stap long vas 5 tu i tru. Jehova i bin lukaot gud long ‘ol man we oli harem nogud’ mo ‘ol man we narafala i spolem olgeta,’ mo bambae hem i gohed blong halpem olgeta mo sevem olgeta.—Job 36:15; Sam 6:4; 31:1, 2; 54:7; 145:20.
?Taswe, tok ya “olgeta” long vas 7 i minim hu?
Taem yumi tingting gud long ol tok blong sam ya, yumi luksave klia se tok ya “olgeta” i minim ol man.
Long Ol Sam 12:1, Deved i tokbaot ‘olgeta ya we oli stap tru long Jehova’ we ol man nogud oli bin giaman long olgeta. Be biaen, yumi luk i talem se Jehova bambae i girap agensem ol man ya we oli stap talem ol nogud samting ya. Ol tok blong sam ya oli mekem yumi trastem se God bambae i tekem aksen long bihaf blong ol man blong hem, from we ol tok blong hem oli klin gud.
Taswe, vas 7 i talem se Jehova bambae i lukaot gud mo i protektem “olgeta,” hemia ol man ya we oli harem nogud from ol man nogud oli stap spolem olgeta.
Tok ya “olgeta” we oli yusum long vas ya, i kamaot stret long ol kopi blong Hibru haf blong Baebol, mo yumi save trastem. Grik Baebol ya Septuagin i yusum tok ya “mifala” tu taem long vas 7, blong tokbaot bakegen ol man we oli harem nogud mo ol man we narafala i stap spolem olgeta. Taswe, vas 7 i talem se Jehova bambae i protektem “olgeta wanwan” hemia ol man we oli stap tru long hem, “blong jeneresen ya i no spolem olgeta” hemia ol rabis man ya we oli stap “leftemap ol kruked fasin.” (Sam 12:7, 8) Long Arameik Targum Baebol, vas 7 i rid olsem se: “Yu, O MASTA, bambae yu protektem ol stret man, bambae yu lukaot gud long olgeta olwe, blong rabis jeneresen ya i no spolem olgeta. Ol rabis man ya oli stap go long evri saed olsem wom ya leech, blong dring blad blong ol pikinini blong man.” Ol tok ya oli olsem ol narafala pruf blong soemaot se Ol Sam 12:7 i no stap tokbaot ol tok blong God.
From samting ya, vas ya i givim wan hop long ‘ol man we oli stap tru long Jehova,’ hemia se Jehova bambae i tekem aksen long bihaf blong olgeta.
