1, 2. (1) ?Wanem i mekem se ol man blong Jehova tede oli glad? (2) ?Olsem wanem ol papa mo mama mo ol elda oli save givhan long ol yangfala blong oli kasemsave mining blong baptaes?

WAN elda i talem long Christopher, wan yangfala we i gat 12 yia, se: “Mi mi save yu taem yu smol boe nomo, mo mi glad blong harem se yu wantem baptaes. Be mi wantem askem wan kwestin long yu, ‘?From wanem yu yu wantem baptaes?’” Kwestin we elda ya i askem i impoten tumas. Yumi glad blong luk we plante taosen yangfala oli stap tekem baptaes evri yia. (Prija 12:1) Be ol papa mo mama, mo ol elda long kongregesen, oli wantem se ol yangfala oli mekem prapa desisen blong olgeta, mo oli kasemsave mining blong baptaes.

² Baebol i soemaot se, wan Kristin i statem wan niufala laef taem hem i givim laef blong hem i go long Jehova mo i tekem baptaes. Long niufala laef ya, bambae hem i kasem plante blesing blong Jehova, be bambae Setan tu i agensem hem.  (Ol Proveb 10:22; 1 Pita 5:8) Taswe, ol Kristin papa mo mama oli mas spenem taem blong tijim ol pikinini blong olgeta blong oli save se i minim wanem blong kam wan disaepol blong Kraes. Be sipos i gat sam yangfala we papa mo mama blong olgeta i no stap long trutok, ol elda long kongregesen bambae oli givhan long olgeta blong oli kasemsave se, i minim wanem blong givim laef long God mo baptaes. (Ridim Luk 14:27-30.) Sipos wan man i wantem bildim wan haos, hem i mas rere gud fastaem. Long sem fasin, wan yangfala i mas rere gud fastaem bifo we hem i baptaes. Olsem nao, hem i save gat strong tingting blong mekem wok blong Jehova go kasem en. (Matiu 24:13) ?Wanem i save givhan long ol yangfala blong oli gat strong tingting blong mekem wok blong Jehova blong olwe? Bambae yumi luk.

3. (1) ?Ol toktok blong Jisas mo Pita i soemaot olsem wanem se baptaes i impoten? (Matiu 28:19, 20; 1 Pita 3:21) (2) ?Wanem ol kwestin we bambae yumi tokbaot, mo from wanem?

³ ?Yu yu wan yangfala we yu wantem baptaes? !Sipos yes, hemia wan nambawan mak! I wan bigfala blesing blong baptaes mo kam wan Witnes blong Jehova. Mo tu, hemia wan samting we wan Kristin i mas mekem, mo i wan impoten mak blong olgeta we oli wantem laef tru long taem blong bigfala trabol. (Matiu 28:19, 20; 1 Pita 3:21) Taem yu baptaes, yu soemaot se yu promes long Jehova blong mekem wok blong hem blong olwe. I sua se yu wantem tumas blong holemtaet promes ya, taswe hemia sam kwestin we oli save givhan long yu blong luk sipos yu rere blong baptaes: (1) ?Mi mi naf blong tekem desisen ya? (2) ?Hemia prapa desisen blong mi? (3) ?Mi mi kasemsave se i minim wanem blong givim laef blong mi long Jehova? I gud yumi tokbaot ol kwestin ya.

4, 5. (1) ?From wanem ol yangfala tu oli save baptaes? (2)  ?I minim wanem blong kam bigman long tingting?

⁴ Baebol i no talem se ol bigfala man nomo oli save baptaes, no i givim wan stret yia we man i mas gat blong hem i naf blong baptaes. Ol Proveb 20:11, i talem se: “Nating we smol pikinini nomo, be ol samting we hem i mekem i stap soemaot fasin blong hem. Sipos hem i no save giaman, mo fasin blong hem i stret, bambae yu save wantaem nomo.” Taswe, wan pikinini tu i naf blong kasemsave se i minim wanem blong mekem samting we i stret mo blong givim laef long God. Taem wan yangfala i soemaot se hem i bigman long tingting blong hem mo hem i givim laef blong hem finis long Jehova, i stret nomo we hem i tekem impoten desisen ya blong baptaes.—Ol Proveb 20:7.

⁵ ?I minim wanem blong kam bigman long tingting? Hemia i no min se man i gru i kam bigman long bodi. Baebol i talem se wan  man we i bigman long tingting, hem i “naf blong jusumaot” samting we i stret mo samting we i no stret. (Hibrus 5:14) Man olsem i luksave wanem samting i stret mo hem i gat strong tingting blong mekem. Taswe, bambae hem i naf blong stanap strong taem wan samting i pulum hem blong mekem i no stret. Mo tu, i no evri taem we hem i nidim blong narafala i talem long hem, samting we i stret blong hem i mekem. I stret nomo blong gat tingting ya se, ol yangfala we oli baptaes oli save mekem samting we i stret, nating se papa mo mama blong olgeta, no ol narafala oli no stap wetem olgeta.—Skelem wetem Filipae 2:12.

6, 7. (1) Yu tokbaot sam samting we oli traem Daniel taem hem i stap long Babilon. (2) ?Daniel i soemaot olsem wanem se hem i bigman long tingting?

⁶ ?Olsem wanem? ?Wan yangfala i save soemaot se hem i kam bigman long tingting? Yu traem tingbaot Daniel. Maet hem i wan yangfala nomo taem haeman blong king i tekemaot hem long papa mo mama blong hem, blong go long Babilon. Long ples ya, hem i stap wetem ol man we oli no obei long ol loa blong God. Be i gud yumi lukluk gud long stori blong Daniel. Ol man Babilon oli tinghae long hem, from we hem i wan long ol yangfala we oli jusumaot olgeta blong wok blong king. (Daniel 1:3-5, 13) I luk olsem se Daniel i gat wan gudfala laef long Babilon, i bitim taem we hem i stap long Isrel.

⁷ ?Daniel i mekem wanem? ?Hem i letem ol man Babilon oli jenisim fasin blong hem no oli spolem bilif blong hem? !Nogat! Baebol i talem se, taem Daniel i stap long Babilon, hem i mekem tingting blong hem i strong se bambae hem i no mekem wan samting we i mekem hem i doti long fes blong  God. (Daniel 1:8) !Hemia i soemaot se hem i bigman long tingting!

8. ?Yu save lanem wanem long eksampol blong Daniel?

⁸ ?Yu save lanem wanem long eksampol blong Daniel? Wan yangfala we i bigman long tingting, bambae i holemstrong long bilif blong hem nating se hem i fesem sam hadtaem. Bambae hem i no olsem wan nawita we i save jenisim kala blong hem folem ples we i stap long hem. Long sem fasin, hem i no mas mekem olsem se hem i fren blong Jehova long Haos Kingdom, mo hem i fren blong wol taem hem i stap long skul. Be bambae hem i stanap strong, nating se ol samting oli traem bilif blong hem.—Ridim Efesas 4:14, 15.

9, 10. (1) Sipos wan yangfala i tingbaot samting we i traem bilif blong hem, ?samting ya bambae i givhan long hem olsem wanem? (2) ?Taem yu baptaes, hemia i minim wanem?

⁹ I tru, i no gat wan man we i stret gud olgeta. Ol yangfala mo ol olfala tu oli mestem samtaem. (Prija 7:20) Be sipos yu wantem baptaes, i gud yu traem faenemaot fastaem sipos yu gat strong tingting blong obei long ol loa blong Jehova. Maet yu save askem se, ‘?Mi mi obei long Jehova longtaem finis i kam?’ I gud yu tingbaot samting we i traem bilif blong yu i no longtaem, mo wanem yu mekem long taem ya. ?Olsem wanem? ?Yu yu naf blong jusumaot wanem i stret blong mekem long taem ya? ?I gat wan man i pulum yu blong yusum save blong yu, long ol samting blong wol, olsem Daniel? Taem wan samting i traem yu, ?yu yu naf blong kasemsave samting we Jehova i wantem yu blong mekem?—Efesas 5:17.

¹⁰ ?From wanem i impoten blong save ansa blong ol kwestin ya? Hemia from we ol ansa ya, bambae oli givhan long yu blong luksave se baptaes i wan impoten samting. Taem yu baptaes, yu soemaot long ol narafala se yu bin mekem wan strong promes finis long Jehova. Yu promes se bambae yu lavem hem mo yu mekem wok blong hem olwe. (Mak 12:30) Olgeta we oli baptaes, oli mas holemstrong long promes we oli mekem long Jehova.—Ridim Prija 5:4, 5.

11, 12. (1) ?Man we i wantem baptaes i mas sua long wanem samting? (2) ?Olsem wanem yu save gat tingting blong Jehova long baptaes?

¹¹ Baebol i talem se olgeta man blong Jehova, bambae oli “glad” blong mekem wok blong hem, hemia i minim ol yangfala tu. (Ol Sam 110:3) Taswe, wan man we i wantem baptaes i mas mekem sua se hemia prapa desisen blong hem. Sipos yu gruap long trutok, i impoten tumas we yu faenemaot risen we i pusum yu blong yu wantem mekem desisen ya.

¹² Taem yu stap gruap, yu luk se plante man oli stap baptaes. Maet sam oli ol fren blong yu no ol brata mo sista blong yu. Be yu no mas gat tingting ya se yu mas baptaes from we yu bigwan finis, no from we ol narafala we yu save olgeta oli baptaes finis. ?Olsem wanem yu save gat tingting olsem  Jehova long baptaes? I gud yu tekem taem blong tingbaot from wanem i impoten tumas blong baptaes. Bambae yu faenem plante gudfala risen long stadi ya mo long nekis stadi.

13. ?Wanem i mekem yu luksave se desisen ya blong baptaes i kamaot long hat blong yu?

¹³ Wan rod blong luksave sipos desisen ya blong baptaes i kamaot long hat blong yu, hemia blong tingting gud long fasin blong yu blong prea. ?Yu yu prea oltaem long Jehova? ?Yu yu stap tokbaot wanem long prea blong yu? Ansa blong ol kwestin ya bambae i givhan long yu blong luk sipos yu stap fren gud wetem Jehova no nogat. (Ol Sam 25:4) Plante taem Jehova i yusum Baebol blong ansa long ol prea blong yumi. Taswe, wan narafala rod blong soemaot se yu wantem kam klosap long Jehova, mo mekem wok blong hem wetem fulhat blong yu, hemia blong lukluk gud long program blong yu blong stadi yu wan. (Josua 1:8) I gud yu askem ol kwestin ya se: ‘?Mi mi mekem prapa stadi blong mi oltaem? ?Mi mi glad blong joen long famle wosip?’ Ansa blong ol kwestin ya bambae i givhan long yu blong luk sipos desisen ya blong baptaes i prapa desisen blong yu.

14. Yu tokbaot from wanem tok ya, givim laef long Jehova i no sem mak long baptaes.

¹⁴ Maet sam yangfala oli no save se taem wan man i givim laef blong hem long Jehova, hemia i defren long taem we hem i baptaes. Sam oli talem se oli givim laef blong olgeta long Jehova finis, be oli no rere yet blong baptaes. ?Olsem wanem? ?I stret blong talem olsem? Yu givim laef blong yu long Jehova, taem yu mekem wan prea mo yu promes blong mekem wok blong hem olwe. Mo yu soemaot samting ya, taem yu tekem baptaes long fored blong ol narafala. Taswe, bifo we yu baptaes, yu mas kasemsave fastaem se i minim wanem blong givim laef blong yu long God.

15. ?I minim wanem se man i givim laef blong hem long Jehova?

¹⁵ Taem yu givim laef blong yu long Jehova, i olsem we yu talem long Jehova se, naoia laef blong yu i blong hem. Mo yu promes long hem se, bambae yu mekem samting we hem i wantem, fasples long laef blong yu. (Ridim Matiu 16:24.) !Promes ya i impoten tumas! (Matiu 5:33) Taswe, ?olsem wanem yu soemaot se laef blong yu, i blong Jehova?—Rom 14:8.

16, 17. (1) Yu tokbaot wan eksampol olsem wanem blong blokem samting we yu nomo yu wantem. (2) ?Taem wan man i givim laef blong hem long Jehova, i olsem se hem i talem wanem long Jehova?

¹⁶ I gud yumi tokbaot wan eksampol. Yu traem tingbaot se yu gat wan fren we i wantem givim wan trak long yu, olsem wan presen. Ale, hem i givim ol pepa blong trak ya long yu mo i talem se: “Trak ya i blong yu.” Be afta hem i talem long yu se: “Mi bambae mi holem ki mo bambae mi draevem trak ya, i no yu.” ?Bambae yu yu glad long presen ya? ?Wanem tingting blong yu long fren ya?

¹⁷ Taem wan man i givim laef blong hem long Jehova, i olsem we hem i talem long Jehova se: “Mi mi givim laef blong mi long yu. Mo mi mi man blong wok blong yu.” I stret nomo we Jehova i wantem se man ya i mas holemtaet promes blong hem. ?Be olsem wanem sipos man ya i no moa obei long Jehova, nao i stap frenem wan we i no wosipim  Jehova? ?No hem i akseptem wan wok we i kakae taem blong hem, blong go prij mo go long ol miting oltaem? Man olsem, i no holemtaet promes we hem i mekem long Jehova. I olsem se hem i holemtaet ki blong trak. Taem yumi givim laef blong yumi long Jehova, yumi talem long hem se, “Laef blong mi i blong yu, i no moa blong mi.” Taswe, bambae yumi traehad oltaem blong mekem samting we Jehova i wantem, nating se samtaem yumi wantem mekem samting we yumi nomo i wantem. I gud yumi mekem olsem Jisas, we i talem se: “Mi mi no kamaot long heven blong mekem ol samting we mi nomo mi wantem. Mi kam blong mekem ol samting we Papa blong mi we i sanem mi mi kam, hem i wantem.”—Jon 6:38.

18, 19. (1) ?Stori blong Rose mo Christopher i soemaot wanem? (2) ?Wanem tingting blong yu long nambawan blesing ya blong baptaes?

¹⁸ I tru nomo se baptaes i wan impoten desisen. I wan bigfala blesing blong givim laef blong yu long Jehova, mo baptaes. Ol yangfala we oli lavem Jehova mo oli kasemsave se i minim wanem blong givim laef blong olgeta long hem, oli no fraet blong mekem desisen ya mo baptaes. Mo tu, oli glad long desisen we oli mekem. Rose, wan yangfala sista we i baptaes finis, i talem se: “Mi mi lavem Jehova, mo mi harem gud tumas taem mi mekem wok blong hem. Desisen we mi mekem blong baptaes, i wan desisen we mi sua fulwan long hem mo mi gat strong tingting blong mekem.”

¹⁹ ?Olsem wanem long Christopher we yumi tokbaot hem long stat blong stadi ya? ?Hem i harem olsem wanem long desisen we hem i mekem blong baptaes, taem hem i gat 12 yia nomo? Hem i talem se, hem i glad tumas long desisen ya. Hem i stat blong mekem wok blong fultaem paenia taem hem i gat 17 yia, mo taem hem i gat 18 yia, hem i kam man blong givhan, mo naoia hem i wok long Betel. Hem i talem se: “Baptaes i wan nambawan desisen. Mo mi glad tumas blong mekem wok blong Jehova mo ogenaesesen blong hem.” ?Olsem wanem yu save rere gud sipos yu wantem baptaes? Nekis stadi bambae i ansa long kwestin ya.