1, 2. (1) Yu tokbaot from wanem baptaes i impoten. (2) Bifo we wan man i baptaes, ?hem i mas sua long wanem samting, mo from wanem?

?YU YU wan yangfala we yu wantem baptaes? Sipos yes, hemia wan bigfala blesing we yu save kasem. Olsem we yumi tokbaot finis long stadi blong las wik, baptaes i wan samting we i rili impoten. From we taem yu baptaes, yu soemaot long ol narafala se yu givim laef blong yu finis long Jehova. Hemia i min se, yu promes blong mekem wok blong hem olwe, mo wok ya i mas stap fasples long laef blong yu. Baptaes i wan impoten promes we yu mekem long God. Taswe, yu save baptaes nomo taem yu kam bigman long tingting, taem yu wan yu wantem tekem desisen ya, mo yu kasemsave mining blong givim laef long God.

² Be, maet yu harem se yu no rere yet blong baptaes. No maet yu harem se yu wantem baptaes, be papa mo mama blong yu tufala i ting se i gud yu wet kasem taem we yu kam bigwan mo gat plante ekspiriens long laef. ?Bambae yu mekem wanem? Yu no harem nogud. Be, i gud yu yusum taem ya blong gohed gud, nao  bambae yu save kasem mak ya blong baptaes. Yu save putum ol mak we oli save givhan long yu blong: (1) yu mekem bilif blong yu i strong, (2) yu wokem ol gudfala fasin, mo (3) yu gohed blong lavem Jehova.

3, 4. ?Ol yangfala oli save lanem wanem long eksampol blong Timoti?

³ Yu traem tingbaot olsem wanem bambae yu ansa long ol kwestin ya: ?From wanem mi bilif se God i stap? ?From wanem mi bilif se Baebol i kamaot long God? ?From wanem mi mas laef folem ol loa blong God be i no folem ol fasin blong laef blong wol? Ol kwestin ya, bambae oli givhan long yu blong folem advaes blong Pol se: ‘Bambae yufala i save jusumaot ol samting we God i wantem, wanem i gud, mo wanem hem i glad long hem.’ (Rom 12:2) ?From wanem yu mas mekem olsem?

⁴ Eksampol blong Timoti i save givhan long yu. Hem i save gud Baebol from we mama mo abu woman blong hem tufala i tijim hem long Baebol. Be nating se i olsem, Pol i talem long Timoti se: “Yu mas holemstrong ol samting ya we mifala i tijim yu long hem bifo, mo we yu bilif gud long hem finis.” (2 Timoti 3:14, 15) Tok ya “bilif gud” i min se, “man i bilif strong mo i sua fulwan se wan samting i tru.” From samting ya, Timoti i bilif strong se trutok i stap long Baebol. I no from we mama mo abu woman blong hem, tufala i talem long hem blong i bilif. Be hem i traem luk sipos ol samting we hem i stap lanem oli tru no nogat, mo samting ya nao i pulum hem blong i bilif.—Ridim 1 Tesalonaeka 5:21.

5, 6. ?From wanem i impoten we yu tingting gud long ol samting we yu bilif long hem, taem yu yangfala yet?

⁵ ?Olsem wanem long yu? Maet yu save trutok longtaem finis. Sipos i olsem, i gud yu traem tingting gud long ol risen we oli pulum yu blong bilif long trutok. Hemia bambae i mekem bilif blong yu i strong. Mo i givhan long yu blong yu no letem ol fren, ol tingting blong wol, mo ol filing blong yu oli lidim yu blong mekem ol nogud desisen.

⁶ Taem yu yangfala yet, i gud yu tingting gud long ol samting we yu bilif long hem, olsem nao yu save ansa long ol kwestin blong ol fren blong yu. Maet oli askem se: ‘?Wanem i mekem we yu sua fulwan se i gat wan God i stap? Sipos God i lavem yumi, ?from wanem hem i letem ol nogud samting oli kasem yumi? ?Yu save olsem wanem se God i stap oltaem nomo?’ Sipos yu rere gud, ol kwestin olsem bambae oli no save mekem yu gat tu tingting, be bambae oli pulum yu blong stadi gud long Baebol.

7-9. Yu tokbaot olsem wanem haf ya long Intenet “What Does the Bible Really Teach?,” i save givhan long yu.

⁷ Taem yu mekemgud prapa stadi blong yu, hemia i save givhan long yu blong ansa long ol impoten kwestin, blong yu no moa gat tu tingting, mo blong mekem bilif blong yu i strong. (Ol Wok 17:11) Yumi gat sam buk we oli save givhan long yumi blong mekem olsem. Plante yangfala oli laekem blong stadi  long buklet ya, The Origin of Life—Five Questions Worth Asking, mo long buk ya, Is There a Creator Who Cares About You? Ol buk ya oli givhan bigwan long olgeta. Mo tu, i gat plante yangfala we oli laekem blong stadi long ol save we oli kamaot long haf ya, “What Does the Bible Really Teach?,” we i stap long jw.org. Yu save faenem haf ya aninit long BIBLE TEACHINGS. Haf ya oli stap kamaot oltaem mo oli wokem blong givhan long yu blong mekem yu bilif strong long ol save we oli stap long Baebol.

⁸ Maet yu yu stap stadi finis long Baebol, taswe yu save ansa blong sam kwestin we oli stap long ol haf ya long Intenet. ?Be yu yu sua se ol ansa blong yu oli tru? Ol haf ya bambae oli givhan long yu blong tingting gud long sam vas mo biaen yu save raetemdaon ol risen from wanem yu bilif olsem. Nao bambae yu save olsem wanem blong eksplenem bilif blong yu long ol narafala. Sipos yu gat Intenet, yu save yusum ol defren haf aninit long, “What Does the Bible Really Teach?” long prapa stadi blong yu, blong mekem bilif blong yu i strong.

⁹ Yu mas pruvum long yu wan se hemia nao trutok. Olsem nao bambae yu yu rere blong baptaes. Wan yangfala sista i talem se: “Bifo we mi baptaes, mi stadi long Baebol mo mi luk se hemia nao trufala skul. Mo evri dei long laef blong mi, bilif blong mi i stap kam strong moa.”

10. ?From wanem wan Kristin we i baptaes i mas wok folem bilif blong hem?

¹⁰ Baebol i talem se: “Sipos bilif blong man i stanap hem wan, we i no gat ol gudfala wok i go wetem, bilif blong hem i ded nomo.” (Jemes 2:17) Sipos yu gat strong bilif, bambae yu soemaot long ol fasin blong yu. Nao bambae ‘yu tabu, yu man blong God, mo yu stap mekem ol fasin we hem i wantem.’—Ridim 2 Pita 3:11.

11. ?Tok ya ‘yu mas tabu,’ i minim wanem? Yu eksplenem.

¹¹ Tok ya ?‘yu mas tabu,’ i minim wanem? Hemia i min se yu soemaot ol gudfala fasin. Yu traem tingbaot wan traem we yu kasem long ol sikis manis we oli pas. Long taem ya,  ?yu yu tingting gud fastaem long samting we i gud blong mekem, mo samting we i nogud blong mekem? (Hibrus 5:14) ?Yu tingbaot wan taem we yu stanap strong taem yu kasem wan traem? Long skul, ?yu yu soemaot gudfala eksampol long ol narafala? ?Yu yu holemstrong long Jehova, no yu traem mekem olsem ol fren blong yu, blong oli no jikim yu? (1 Pita 4:3, 4) I tru, yumi evriwan i sinman. Samtaem, olgeta we oli mekem wok blong Jehova blong plante yia, olgeta tu oli fraet mo oli faenem i had blong prij long ol narafala. Be man we i givim laef blong hem long God, hem i praod blong stap olsem wan Witnes blong Jehova, mo hem i soemaot long ol gudfala fasin blong hem.

12. ?Wanem ‘ol fasin we God i wantaem’ yumi blong mekem, mo yumi mas gat wanem tingting long olgeta?

¹² ?Wanem ya ‘ol fasin we God i wantaem’ yumi blong mekem? Hemia blong mekem ol wok long kongregesen olsem, wok blong prij mo go long ol miting. Be i gat ol narafala samting tu we yumi mekem we ol man oli no luk olsem, ol prea we yumi mekem long Jehova mo prapa stadi blong yumi. Wan man we i givim laef blong hem long Jehova, bambae i luk se ol samting we Jehova i askem hem blong mekem, oli no strong tumas. Bambae hem i gat sem tingting olsem King Deved, we i talem se: “God blong mi. Mi ya, mi kam. Ol tok blong yu blong tijim mi oli stap long buk blong Loa blong yu. Mi mi wantem tumas blong mekem ol samting we yu yu wantem. Oltaem mi mi holem tok blong yu long tingting blong mi.”—Ol Sam 40:8.

13, 14. ?Wanem i save givhan long yu blong mekem ‘ol fasin we God i wantem’? ?Olsem wanem samting ya i givhan long sam yangfala?

¹³ Long buk ya, Questions Young People Ask—Answers That Work, Volume 2 i gat sam kwestin we oli stap long pej 308 mo 309 we oli save givhan long yu blong putum ol mak blong yu save baptaes. Long tufala pej ya, yu save raetemdaon ansa blong ol kwestin olsem: “?Yu yu tokbaot wanem samting long ol prea blong yu? ?Mo samting ya i soemaot wanem long fasin blong yu blong lavem Jehova?” “Taem yu mekem prapa stadi blong yu, ?yu stadi long wanem?” “?Yu yu go prij nating se papa mo mama blong yu tufala i no go?” Mo tu i gat sam spes we yu save raetemdaon ol mak we yu wantem kasem long ol prea, prapa stadi blong yu, mo wok blong prij.

¹⁴ Plante yangfala we oli wantem baptaes, oli luk se ol kwestin we oli stap long tufala pej ya, oli givhan bigwan long olgeta blong kasem mak ya. Tilda wan yangfala sista i talem se: “Ol kwestin we oli stap long tufala pej ya oli givhan long mi blong putum ol mak blong mi. Sloslo mi kasem ol mak ya, mo klosap wan yia biaen mi rere blong baptaes.” Patrick wan yangfala brata, hem tu i mekem olsem. Hem i talem se: “Mi mi save finis ol mak we mi wantem kasem. Be taem mi raetemdaon olgeta, hemia i givhan long mi blong mi traehad moa blong kasem olgeta.”

15. Yu eksplenem from wanem, desisen ya blong givim laef long Jehova hem i prapa desisen blong yu.

¹⁵ I gat wan kwestin long pej 309 we i se:  “?Bambae yu yu gohed blong mekem wok blong Jehova, nating se papa mo mama blong yu mo ol fren blong yu oli no moa mekem?” Taem yu givim laef blong yu long Jehova mo yu baptaes, bambae yu fren gud moa wetem hem. Taswe, i no papa mo mama blong yu, no ol narafala we bambae oli talem wanem samting blong mekem long wok blong Jehova. Taem yu stap tabu mo yu mekem wanem we God i wantem, hemia i soemaot se yu bilif strong se yu faenem trutok. Mo yu wantem folem ol rul blong Jehova. Biaen, bambae yu yu rere blong baptaes.

16, 17. (1) ?Wanem i pulum wan man blong i kam Kristin? (2) Yu tokbaot from wanem yu glad long sakrefaes blong Jisas.

¹⁶ Wan dei, wan man we i save gud loa blong Moses i askem long Jisas se: “?Wanem loa blong God we i hae moa long ol narafala loa, i winim olgeta evriwan?” Nao Jisas i talem long hem se, “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.” (Matiu 22:35-37) Jisas i soemaot se taem wan man i lavem Jehova,  samting ya nao i pulum hem blong baptaes mo i kam wan Kristin. Taswe, wan rod blong mekem se lav we yu gat long Jehova i kam strong moa, hemia blong tingting dip long sakrefaes blong Jisas, we i wan nambawan presen we God i givim long yumi. (Ridim 2 Korin 5:14, 15; 1 Jon 4:9, 19.) Taem yu mekem olsem, bambae yu wantem tumas blong soemaot se yu glad from nambawan presen ya.

¹⁷ Maet yu save soemaot filing we yu gat long sakrefaes blong Jisas. Yu traem tingbaot se, yu stap draon long solwota, nao wan man i kam sevem yu. ?Olsem wanem? ?Bambae yu yu gobak long haos mo yu no wantem save long man ya we i givhan long yu? !Nogat! Bambae yu harem se oltaem yu wantem talem tangkiu long hem from we hem i sevem laef blong yu. Long sem fasin, yumi wantem tumas blong talem tangkiu long Jehova mo Jisas, from we tufala i sevem yumi long sin mo ded. Taswe, i stret nomo we yumi yusum laef blong yumi blong mekem samting we tufala i wantem. From we tufala i lavem yumi tumas, yumi save kasem blesing ya blong laef olwe long paradaes long wol.

18, 19. (1) ?From wanem yu no mas fraet blong kam wan man blong Jehova? (2) Taem yu mekem wok blong Jehova, ?samting ya i mekem laef blong yu i gud olsem wanem?

¹⁸ ?Yu yu glad long samting we Jehova i mekem blong yu? Sipos yes, i stret nomo blong yu givim laef blong yu long hem mo yu baptaes. Taem yu givim laef blong yu long God, yu promes long hem se bambae yu mekem wok blong hem blong olwe. ?Olsem wanem? ?Bambae yu yu fraet blong mekem wan promes olsem? !Nogat! Jehova i save samting we bambae i mekem yu harem gud mo bambae hem i givim pei long olgeta we oli mekem wok blong hem. (Hibrus 11:6) Taem yu givim laef blong yu long God mo yu baptaes, laef blong yu bambae i kam gud moa. Wan brata we i baptaes taem hem i yangfala mo naoia hem i gat 24 yia i talem se: “Maet mi gat plante moa save sipos mi kam bigwan, be from we mi mekem desisen ya blong givim laef blong mi long Jehova, hemia i protektem mi blong mi no traehad blong kasem ol samting blong wol.”

¹⁹ Jehova i save samting we bambae i mekem yu harem gud. Be Setan i tingbaot hem wan nomo mo i no kea nating long yu. Hem i no gat wan gudfala samting nating blong givim long yu, sipos yu biaenem hem. Hem i no gat gud nius mo hem i no gat hop. Fiuja blong hem i nogud olgeta, mo hem i wantem se fiuja blong yu tu i olsem.—Revelesen 20:10.

20. ?Wan yangfala i save mekem wanem blong kasem mak ya blong givim laef blong hem long Jehova mo baptaes? (Yu luk bokis ya “Ol Advaes We Oli Save Givhan Long Yu Blong Gohed Gud.”)

²⁰ Beswan desisen we yu save mekem, hemia blong givim laef blong yu long Jehova. ?Yu yu rere blong mekem samting ya? Sipos yes, yu no mas fraet blong mekem promes ya. Be sipos yu harem se yu no rere yet, yu save yusum ol advaes we oli kamaot long stadi ya blong givhan long yu blong gohed blong putum ol mak. Pol i talem long ol brata long Filipae se oli mas gohed long rod ya we oli stap folem. (Filipae 3:16) Sipos yu folem advaes ya, i no long taem bambae yu wantem givim laef blong yu long Jehova mo baptaes.