1. ?God i gat wanem fasin blong wok? ?Ol man blong hem bifo oli folem fasin blong hem olsem wanem?

BIFO we Jehova i wokem olgeta samting, hem mo Jisas tufala i joen gud tugeta. Jehova i wokem Jisas fastaem long olgeta samting. Mo Jisas i wok gud wetem hem, mo i ‘stap stanap long saed blong hem, olsem man we i mekem ol plan.’ (Ol Proveb 8:30) Mo tu, ol man blong Jehova bifo oli wok gud wanples, blong mekem samting we Jehova i talem long olgeta. Eksampol, Noa mo famle blong hem oli wok wanples blong bildim wan bigfala sip. Mo tu, ol man Isrel oli wok wanples blong stanemap haos tapolen, tektekemaot, mo muvum i go long wan narafala ples. Long haos tempol, oli joen wanples blong plei mo singsing long ol naesfala miusik blong presem Jehova. Ol man blong Jehova oli mekem olgeta samting ya, from we oli wok gud wanples.—Jenesis 6:14-16, 22; Namba 4:4-32; 1 Kronikel 25:1-8.

2. (1) ?Wanem gudfala fasin we ol Kristin bifo oli mekem? (2) ?Wanem ol kwestin we bambae yumi tokbaot?

 ² Ol Kristin long taem bifo oli wok gud wanples. Aposol Pol i eksplenem se, nating we oli gat ol defren save mo oli mekem ol defren wok, be evriwan oli joen gud tugeta. Oli folemgud Lida blong olgeta, hemia Jisas Kraes. Pol i tokbaot olgeta olsem wan bodi we i gat ol defdefren haf, be oli joen gud blong wok wanples. (Ridim 1 Korin 12:4-6, 12.) ?Be olsem wanem long yumi tede? ?Olsem wanem yumi save wok gud wetem narafala long wok blong prij, long kongregesen, mo long famle?

3. ?Aposol Jon i luk wanem vison?

³ Aposol Jon i luk wan vison. Hem i luk seven enjel we oli stap blu long ol pupu, mo taem namba faef enjel i blu long pupu blong hem, “wan sta we i aot long skae, i foldaon long graon.” Sta ya i yusum wan ki blong openem doa blong bigfala hol ya we i godaon we i godaon olgeta. Fastaem, wan bigfala smok i kamaot long hol ya, mo afta i gat plante lokis oli flae i kamaot long smok ya. Ol lokis ya oli no spolem ol tri, be oli spolem ol man we “mak blong God i no stap long fored blong olgeta.” (Revelesen 9:1-4) Jon i save se ol lokis oli save mekem bigfala trabol long wan ples, olsem we oli bin mekem long ol man Ijip long taem blong Moses. (Eksodas 10:12-15) Ol lokis we Jon i luk, i minim ol tabu Kristin we oli stap prij mo talemaot wan strong mesej agensem ol giaman skul. Mo tu, plante milian man we oli gat hop blong laef olwe long wol ya, oli joen wetem ol tabu Kristin blong talemaot mesej ya. Olgeta evriwan oli joen gud blong prij. Wok ya i givhan long plante man blong oli kamaot long ol giaman skul, mo oli fri long paoa blong Setan.

4. ?Wanem wok we ol man blong God oli mas mekem, mo olsem wanem oli save mekemgud wok ya?

⁴ Yumi gat wok ya blong talemaot “gud nius” long olgeta man, bifo we en i kam. !Hemia wan bigfala wok blong mekem! (Matiu 24:14; 28:19, 20) Yumi singaot ol man ‘we oli tosta,’ blong oli kam dring long “wota ya blong laef.” Hemia i min se yumi mas tijim ol man, we oli wantem kasemsave long ol trutok blong Baebol. (Revelesen 22:17) Blong mekemgud wok ya, yumi mas ‘joen olsem wan bodi nomo,’ mo wok gud wetem ol narafala long kongregesen.—Efesas 4:16.

5, 6. ?Olsem wanem yumi wok gud wanples taem yumi talemaot gud nius?

⁵ Yumi mas mekem wan gudfala plan long wok blong prij, blong yumi save kasem plante moa man. Ol advaes we yumi kasem long ol miting, oli givhan long yumi blong mekem olsem. Afta long miting blong prij, yumi go talemaot gud nius blong Kingdom long ol man. Yumi givimaot plante buk mo magasin we oli tokbaot Baebol. Samtaem oli askem yumi blong mekem sam spesel wok. Taem yumi mekem wok ya, yumi stap  joen wetem plante milian brata mo sista long fulwol. Mo tu, yumi wok wetem ol enjel we oli stap givhan long ol man blong God, blong oli talemaot gud nius.—Revelesen 14:6.

⁶ I gud tumas blong ridim ol stori blong prij we oli stap long Yearbook blong yumi. Mo tu long fulwol, yumi joen gud blong singaot ol man oli kam long ol asembli blong yumi. Long ples ya, yumi evriwan i kasem ol semfala advaes. I gat ol tok, ol stori we oli aktem, mo ol pleplei we oli givhan long yumi blong mekem bes blong yumi long wok blong Jehova. Mo tu, yumi joen gud wetem ol brata mo sista blong yumi, taem yumi go long miting blong Memoriol evri yia. (1 Korin 11:23-26) Yumi talem tangkiu long Jehova mo yumi obei long tok blong Jisas, taem yumi evriwan long fulwol i joen wanples long dei blong Memoriol, hemia long Nisan 14, afta we san i godaon. Long ol wik bifo long Memoriol, yumi wok tugeta blong singaot plante man blong oli kam joen wetem yumi long impoten miting ya.

7. ?Yumi save mekem wanem taem yumi wok gud wanples?

⁷ Wan lokis nomo, i no naf blong mekem wan bigfala trabol. Long sem fasin, yumi wanwan yumi no naf blong prij long olgeta man. Be from we yumi joen gud blong prij, hemia i mekem se yumi naf blong tokbaot Jehova long plante milian man, mo yumi givhan long samfala blong oli wosipim Jehova.

8, 9. (1) ?Wanem pijatok we Pol i yusum blong tijim ol Kristin blong oli joen gud oltaem? (2) ?Olsem wanem yumi save wok gud wetem ol elda long kongregesen?

⁸ Pol i tokbaot samting we ol Kristin long Efesas oli mas mekem, blong kongregesen i save wok gud. Hem i talem se, evriwan long kongregesen oli mas “gru blong kam bigman” long ol Kristin fasin. (Ridim Efesas 4:15, 16.) Pol i yusum eksampol blong wan bodi, blong eksplenem olsem wanem ol Kristin oli save mekem kongregesen i joen gud, mo oli obei long Jisas we i Hed blong kongregesen. Hem i talem se, “ol joen blong bodi ya oli stap holem wan bodi blong i stap strong oltaem.” Taswe, ?wanem samting we yumi wanwan i save mekem blong kongregesen i joen gud?

⁹ Jisas i putumap ol elda blong oli lukaot long kongregesen, mo hem i wantem se yumi respektem olgeta mo yumi folem ol advaes we oli givim. (Hibrus 13:7, 17) I no isi blong mekem olsem, be yumi save askem Jehova blong i givhan long yumi. Tabu spirit blong hem i save givhan long yumi blong obei long ol advaes we ol elda oli givim. Mo tu, i gud blong tingbaot se sipos yumi gat tingting daon mo yumi wok gud wetem ol elda, hemia i save givhan bigwan long kongregesen blong yumi. Mo lav we yumi gat insaed long kongregesen, bambae i kam strong moa, mo oltaem yumi joen gud.

10. ?Ol man blong givhan oli mekem wanem blong kongregesen i joen gud? (Yu Luk pija long stat blong stadi.)

 ¹⁰ Ol man blong givhan tu, oli save mekem we kongregesen i joen gud. Oli wok had blong givhan long ol elda, mo yumi glad long ol wok we oli stap mekem. Ol man blong givhan, oli meksua se i gat ol buk mo magasin we yumi save yusum long wok blong prij, mo oli welkamem ol man we oli kam long ol miting. Mo tu, oli wok had blong fiksimap ol samting long Haos Kingdom mo mekem i klin oltaem. Taem yumi wok gud wetem ol brata ya, bambae yumi joen gud mo yumi mekem wok blong Jehova long rod we i stret.—Skelem wetem Ol Wok 6:3-6.

11. ?Ol yangfala brata oli save mekem kongregesen i joen gud olsem wanem?

¹¹ Sam elda oli mekem ol wok long kongregesen blong plante yia. Be from we oli stap kam olfala, maet oli no moa save mekem plante wok olsem bifo. Ol yangfala brata oli save givhan long olgeta. Sipos oli kasem trening, bambae oli mekem plante wok long kongregesen. Mo taem ol man blong givhan oli wok had, bambae oli save kam wan elda long fiuja. (1 Timoti 3:1, 10) Sam elda oli yang nomo, mo oli gohed gud blong mekem ol gudfala wok. Samfala oli mekem wok blong eria elda mo oli stap givhan long ol brata mo sista long plante kongregesen. Yumi glad tumas blong luk we ol yangfala brata, oli rere nomo blong givhan long ol brata mo sista.—Ridim Ol Sam 110:3; Prija 12:1.

12, 13. ?Wanem i save givhan long evriwan long famle blong oli wok gud wanples?

¹² ?Olsem wanem yumi save givhan blong mekem evriwan long famle oli wok gud wanples? Famle wosip we yumi mekem evri wik, i save givhan long yumi blong mekem olsem. Taem ol papa mo mama oli tekem taem blong tijim ol pikinini blong oli save Jehova, bambae lav we oli gat insaed long famle i kam strong moa. Oli save mekem ol pleplei blong givhan long olgeta long wok blong prij. Mo taem evriwan long famle oli tokbaot bilif blong olgeta mo oli soemaot se oli lavem Jehova, hemia i save mekem famle i joen gud.

¹³ ?Olsem wanem wan hasban mo waef, tufala i save wok gud tugeta? (Matiu 19:6) Taem tufala i lavem Jehova mo mekem wok blong hem, bambae tufala i harem gud mo joen gud long mared blong tufala. Tufala i mas soemaot se tufala i lavlavem tufala, olsem we Ebraham mo Sera, Aesak mo Rebeka, Elkana mo Hana, oli mekem. (Jenesis 26:8; 1 Samuel 1:5, 8; 1 Pita 3:5, 6) Sipos wan hasban mo waef tufala i mekem olsem, bambae tufala i joen gud tugeta mo tufala i kam klosap moa long Jehova.—Ridim Prija 4:12.

14. ?Yu save mekem wanem blong lukaotgud long mared blong yu, sipos hasban no waef blong yu i no wosipim Jehova?

¹⁴ Baebol i talem klia nomo se yumi no  mas mared long wan man we i no wosipim Jehova. (2 Korin 6:14) Be i gat sam brata mo sista we oli mared long ol man blong wol. Samfala oli lanem trutok afta we oli mared, mo man no woman blong olgeta i no kam wan Witnes. Sam narafala maet oli mared wetem wan Witnes, be afta man no woman blong olgeta i no moa gohed gud. Long taem olsem, ol Kristin oli mas gohed blong lukaotgud long mared blong olgeta. Oli mekem olsem taem oli gohed blong folemgud ol advaes blong Baebol. Be samtaem i no isi blong mekem. Yu traem tingbaot Meri mo man blong hem Deved. Tufala i mekem wok blong Jehova tugeta, be afta Deved i stop blong go long ol miting. Meri i traehad oltaem blong givhan long man blong hem mo blong soemaot ol gudfala fasin. Hem tijim ol sikis pikinini blong tufala blong oli save Jehova, mo oltaem hem i go long ol miting mo asembli. Afta we plante yia i pas, ol pikinini blong tufala oli kam bigwan mo oli aot long haos, be Meri i gohed nomo blong mekem wok blong Jehova nating se i no isi long hem. Hem i stap putum sam magasin blong Deved i ridim, mo Deved i ridim ol magasin ya, biaen hem i stat blong go long sam miting bakegen. Deved i gat wan smol abu we i gat 6 yia. Long taem blong miting, hem i blokem wan jea blong Deved. Be sipos Deved i no kam long miting, bambae hem i talem long Deved se: “Bubu mi harem nogud from mi no luk yu.” Afta we 25 yia i pas, Deved i kambak long Jehova mo hem wetem woman blong hem, tufala i glad blong mekem wok blong Jehova bakegen.

15. ?Olsem wanem ol hasban mo waef we oli mared longtaem finis, oli save givhan long ol yangfala we oli jes mared?

¹⁵ Tede Setan i traehad blong spolem ol famle. Taswe, wan hasban mo waef we i mekem wok blong Jehova, tufala i nidim blong wok gud tugeta. Nating se yu jes mared no yu mared longtaem finis, i gud yu tingbaot wanem we yu save talem no mekem, blong mared blong yu i stap strong oltaem. Ol  hasban mo waef we oli mared longtaem finis, oli save soemaot wan gudfala eksampol long ol yangfala we oli jes mared. Maet oli save joen wanples blong mekem famle wosip. Olsem nao, ol yangfala we oli jes mared bambae oli luksave se, nomata we yu mared longtaem finis no yu jes mared, be oltaem yu mas joen gud wetem man no woman blong yu, mo yutufala i mas lavlavem yutufala.—Taetas 2:3-7.

16, 17. ?Ol man blong God we oli joen gud wanples, oli stap wet long wanem blesing?

¹⁶ Ol man Isrel oli wok gud wanples, taem oli go mekem wosip long haos tempol blong Jehova long Jerusalem. Oli rerem evri samting we oli nidim blong karem wetem olgeta. Mo afta, oli aot tugeta mo oli givgivhan long olgeta. Oli joen wanples long haos tempol, blong presem mo wosipim Jehova. (Luk 2:41-44) Tede, taem yumi stap rere blong laef long niufala wol, yumi mas joen gud mo mekem ol samting we yumi naf blong mekem, blong wok gud wetem ol narafala. ?Yu yu tingbaot sam rod we yu save mekem olsem?

¹⁷ Ol man blong wol, oli stap faet from plante samting we oli no agri long hem. Be yumi glad tumas from we Jehova i givhan long yumi blong yumi save trutok mo yumi gat pis wetem ol narafala. Ol man blong hem long fulwol, oli stap wosipim hem long fasin we hem i glad long hem. Long ol lasdei ya, ol man blong Jehova oli joen gud moa, i bitim ol taem bifo. Olsem profet tok blong Aesea mo Maeka i talem, yumi evriwan i go antap long ‘hil ya blong Hae God.’ (Aesea 2:2-4; ridim Maeka 4:2-4.) Long fiuja, bambae yumi evriwan i harem gud long blesing ya blong ‘joen olsem wan bodi nomo,’ mo wok gud wanples blong wosipim Jehova.