Long 2012, ol man blong digim graon oli faenem ol smosmol pis blong graonpot we i blong 3,000 yia bifo. Ol man blong stadi oli intres tumas long graonpot ya. ?From wanem? From nem blong wan man we i stap long hem.

Taem oli joejoenem ol pis blong graonpot ya, oli luk wan raeting blong ol man Kenan, se: “Eshba’al Ben Beda,” we i min se “Esbal, pikinini blong Beda.” Hemia fastaem we oli faenem nem ya long wan samting blong bifo.

Baebol i tokbaot wan narafala man we nem blong hem Esbal, hemia pikinini blong King Sol. (1 Kronikel 8:33; 9:39) Yosef Kafinkel, wan long ol man we oli faenem graonpot ya, i talem se: “Nem ya Esbal i stap long Baebol long taem blong rul blong King Deved, mo naoia oli raetem tu long ol buk blong ol man ya we oli digim graon.” !Hemia wan moa samting bakegen we i soemaot se plante samting blong bifo, oli sapotem ol tok blong Baebol!

Baebol i yusum nem ya Isboset tu, blong tokbaot Esbal, pikinini blong Sol. (2 Samuel 2:10) ?From wanem oli jenisim “bal” we i stap long Esbal, i kam “boset” long nem ya Isboset? Ol man blong stadi oli eksplenem se, maet buk blong Seken Samuel i no talem nem ya Esbal, from we hem i save mekem ol man Isrel oli tingbaot wan god we ol man Kenan oli wosipim, hemia god blong hariken, nem blong hem Bal. Be long buk blong Fas Kronikel, yumi faenem yet nem ya Esbal.