MI TINGBAOT plante yia bifo, long Brookings, saotis Dakota, long Amerika. Wan moning, ples i kolkol, mo mi haremsave se i no longtaem bambae i gat sno. Mi wetem sam narafala, mifala i stap long wan haos blong ol anamol long wan fam. !Mifala i stap klosap long wan bigfala tang blong wota, mo mifala i stap seksek tumas from we wota ya i kolkol bitim mak! ?From wanem mi stap long ples ya? Bambae mi tokbaot laef blong mi.

Mi mi bon long 7 Maj 1936. Long famle i gat fo pikinini, mo mi mi lasbon. Mifala i stap long wan smol fam long saotis Dakota. Wok long fam ya i impoten long laef blong mifala, be i gat wan samting we i impoten moa. Long 1934, papa mo mama blong mi, tufala i baptaes blong kam Witnes blong Jehova. Tufala i givim laef blong tufala long Jehova, taswe long tingting blong tufala, wok blong Jehova i moa impoten. Papa blong mi, Klarens, mo biaen, angkel blong mi, Alfred, tufala i mekem sem wok olsem kodineta blong ol elda tede, long smol kongregesen long Conde, Saot Dakota.

Oltaem famle i go long miting, mo long wok blong prij blong tokbaot nambawan fiuja we Baebol i talemaot. Gudfala eksampol mo tijing blong papa mo mama, i givhan long mifala blong lavem Jehova. Mi mo sista blong mi Doroti, mitufala i kam pablisa taem mitufala i gat sikis yia. Taem Tiokratik Skul i stat long 1943, mi mi joen.

Ol asembli oli impoten long laef blong mifala. Mi tingbaot wan asembli long 1949  long Sioux Falls, Saot Dakota. Brata Grant Suta i givim tok ya “!En i Klosap, Bitim We Yu Tingbaot!” Hem i talem se ol Kristin we oli givim laef blong olgeta i go long Jehova, oli mas yusum laef blong olgeta blong talemaot gud nius blong Kingdom blong God. Afta we mi lesin long tok ya, mi givim laef blong mi i go long Jehova. Long 12 Novemba 1949, mi mi baptaes long asembli long Brookings. Hemia nao from wanem mi stap long haos blong ol anamol ya, olsem mi tokbaot finis. Mifala fo i stap wet blong baptaes long wan tang wota we oli wokem long aean.

Mi stat long wok blong paenia long 1 Jenuware 1952, taem mi gat 15 yia. Baebol i talem se: “Sipos man i go joen long ol waes man, bambae hem i save kam waes.” I gat plante waes man long famle blong mi, we oli glad se mi mekem wok blong paenia. (Ol Proveb 13:20) Plante taem, mi go prij wetem Angkel Julias, we i gat 60 yia. Nating se hem i olfala, be mitufala i laekem blong prij tugeta. From we hem i laef longtaem mo i gat plante save, hem i tijim mi long plante samting. I no longtaem, Doroti tu i mekem wok blong paenia.

Taem mi mi pikinini, plante taem Papa mo Mama i tekem eria elda mo woman blong hem, i kam stap long haos. Wan long olgeta, Jesi Kantwel mo woman blong hem Lin, tufala i givhan bigwan long mi. Tufala i intres long mi mo leftemap tingting blong mi. Taem tufala i visitim ol kongregesen klosap, samtaem tufala i singaot mi blong mi go prij wetem tufala. !Mi mi laekem tumas! Mi glad blong stap bisi long wok blong Jehova, olsem tufala.

Nekis eria elda, hemia Bad Mila. Taem mi gat 18 yia, hem mo woman blong hem Joan, tufala i visitim kongregesen blong mifala. Long taem ya, mi mas go luk ol man we oli stap mekem desisen se hu i mas joen long ami. Wok we oli wantem se mi mekem i agensem tok blong Jisas, we i talem se yumi no mas joen long politik. Mi mi wantem mekem wok blong talemaot gud nius blong Kingdom. (Jon 15:19) Ale, mi askem long  olgeta blong oli luksave mi olsem wan man blong God.

Mi mi glad tumas taem Brata Mila i talem se bambae hem i kam wetem mi blong luk ol man ya. Hem i no wan man blong sem, mo hem i no fraet long ol narafala man. Mo hem i savegud Baebol. !Hem i mekem se mi mi no moa fraet! Long hot taem long 1954, ol man ya oli sanem toktok i kam, se oli luksave mi olsem wan man blong God. Ale, naoia mi save mekem moa long wok blong Jehova.

I no longtaem, oli singaot mi blong mi go wok long Betel. Mi wok tri yia long Wajtaoa Fam, long Staten Aelan, New York. Mi glad tumas from we mi mitim plante brata mo sista we oli waes, mo mi wok wetem olgeta.

Radio stesen WBBR i stap long fam ya long Staten Aelan. Ol Witnes blong Jehova oli yusum stesen ya long ol yia 1924 kasem 1957. Samwe long 15 kasem 20 brata mo sista long Betel oli wok long fam ya. Bighaf blong mifala i yang, mo mifala i no gat plante save. Be wan olfala tabu brata, Eldon Wudwot, i wok wetem mifala. Hem i olsem wan papa mo i tijim mifala long plante samting. Taem mifala i raorao smol, hem i talem se: “Yumi sapraes long bigfala wok we Masta i save mekem wetem yumi ol sinman.”

Brata Fredrik Frans i stap wetem mifala, mo hem tu i givhan bigwan. Hem i waes mo i save gud Baebol. Hem i intres long mifala wanwan. Brata we i kuk, hemia Hari Peteson. Mifala i singaot hem olsem from we prapa nem blong hem, Papargyropoulos, i had tumas. Hem tu i wan tabu brata mo hem i laekem blong prij. Hem i gat plante wok long Betel, be neva hem i mestem blong prij. Hem i seremaot plante handred magasin evri manis. From we hem i save gud Baebol, hem i ansarem ol kwestin blong mifala.

Long fam, mifala i mekem rere ol frut mo ligim mo putum olgeta long ol tin, blong oli stap longtaem. Evri yia, mifala i mekem 42,600 tin, blong olgeta long Betel oli save kakae. Mi mi wok wetem Eta Hut, wan sista we i waes. Hem i save gud olsem wanem blong  rerem ol frut mo ligim. Plante sista long ol kongregesen raonabaot oli kam wok wetem mifala, mo Eta i givhan blong mekem gudfala plan blong wok ya. Nating se Eta i save gud wok ya, be hem i obei oltaem long ol brata we oli lukaot long fam. Hem i soemaot gudfala eksampol.

Wan long ol yangfala sista we i kam blong givhan long fam, hemia Anjela Romano. Taem hem i jes stat blong kasem save long trutok, Eta i givhan bigwan long hem. Long Eprel 1958, mi mo Anjela i mared, mo mitufala i mekem wok blong Jehova tugeta 58 yia finis. Long olgeta yia ya, Anjela i holemstrong long Jehova, mo hemia i mekem se mitufala i gat wan gudfala mared. Hem i waes, mo mi save trastem hem fulwan, nomata wanem trabol i kasem mitufala.

Long 1957, ol brata oli salem WBBR long Staten Aelan, mo mi mi go wok smol long Betel long Brooklyn. Taem mi mo Anjela i mared, mi mi aot long Betel, mo mitufala i mekem wok blong paenia blong tri yia long Staten Aelan. Mi wok blong smoltaem long ol man we oli pemaot radio stesen ya, mo oli putum niufala nem blong hem se WPOW.

Mi mo Anjela i no wantem gat plante samting from we mitufala i wantem go long eni ples we i nidim moa man blong prij. Ale, long 1961, oli askem long mitufala blong mekem wok blong spesel paenia long Falls Siti, Nebraska. Be smoltaem afta we mitufala i kasem ples ya, oli singaot mitufala i go long Kingdom Ministri Skul long Saot Lansing, New York, blong wan manis. Mitufala i harem gud tumas long trening ya, mo mitufala i rere blong gobak long Nebraska. !Be mitufala i sapraes taem oli talem se bambae mitufala i go mekem wok blong misinari long Kambodia! Kantri ya long Saotis Esia i naes tumas, mo mitufala i luk, harem, mo testem, plante niufala samting. Mitufala i wantem tumas blong talemaot gud nius blong Kingdom long ples ya.

Be i no longtaem, politik i kam strong long Kambodia, nao mitufala i go long Saot Vietnam. Afta we mitufala i stap tu yia long ples ya, mi mi sik bigwan, mo mitufala i kambak long Amerika. I tekem taem blong mi kam gud bakegen. Taem sik ya i finis, mitufala i mekem wok blong paenia bakegen.

Long Maj 1965, mitufala i statem wok blong eria elda. Blong 33 yia, mitufala i harem gud blong mekem wok ya mo wok blong distrik elda, mo mitufala i givhan blong mekem rere ol asembli. Mi laekem tumas wok ya, from we long laef blong mi, ol asembli oli taem blong bigfala glad. Mitufala i gohed long wok ya plante yia long ol kongregesen long New York, mo i gat plante asembli long Yankee Stadium.

Mi mo Anjela i kasem plante defdefren wok long ol yia we i pas, mo sam long ol wok ya oli no isi. Long 1995, oli askem long mi blong tijim ol studen long Ministeriol  Trening Skul. Tri yia biaen, oli singaot mitufala blong go long Betel. Foti yia bifo, mi bin wok fultaem long Betel, mo mi glad blong gobak. Fastaem, mi wok long ofis we i lukaot long wok blong prij, mo mi tijim plante studen long ol defdefren skul. Long 2007, Hed Kampani i statem ofis blong lukaot long ol skul long Betel, mo mi mi lukaot long ofis ya blong plante yia.

Long ol yia we oli jes pas, i gat plante jenis long ol skul long Betel. Long 2008, Skul Blong Ol Elda i stat. Long tu yia, bitim 12,000 elda oli joen long skul ya long Patterson mo Brooklyn. Skul ya i gohed naoia long plante narafala ples tu. Long 2010, Ministeriol Trening Skul i jenis i kam Baebol Skul Blong Ol Brata We Oli No Mared. Mo tu, wan niufala skul i stat, hemia Baebol Skul Blong Ol Kristin Man Mo Woman Blong Olgeta.

Long Septemba 2014, tufala skul ya i kam Skul Blong Ol Man Blong Talemaot Kingdom. Ol brata wetem woman blong olgeta oli save joen long skul ya, mo ol brata mo sista we oli no mared tu oli save joen. Plante brata mo sista oli glad tumas taem oli harem nius se skul ya bambae i stap long kantri blong olgeta. I gud tumas se plante moa brata mo sista bambae oli gat janis blong joen long ol skul ya. Mo mi glad blong mitim plante we oli mekem bigfala jenis long laef blong olgeta blong oli save joen.

Taem mi tingbaot laef blong mi, stat bifo we mi baptaes long wota we i kolkol bitim mak long haos blong ol anamol, kam kasem naoia, mi talem tangkiu long Jehova from ol waes brata mo sista we mi save olgeta. Olgeta ya oli givhan long mi blong mi save gud Jehova mo mi mekem wok blong hem. Sam long olgeta oli yang moa long mi mo sam oli olfala moa. Plante oli kam long narafala kantri. Be ol fasin mo wok blong olgeta i soemaot se oli lavem Jehova. Mi mi glad tumas we mi gat plante waes fren we oli wosipim Jehova, mo oli tijim mi long plante samting.