1, 2. (1) ?Sam papa mo mama oli gat wanem tingting taem pikinini i wantem baptaes? (2) ?From wanem brata i askem long olgeta we oli wantem baptaes sipos oli givim laef long Jehova finis? (Yu luk pija long stat blong stadi.)

PAPA mo mama blong Maria i stap lukluk smol gel blong tufala, we i stanap rere blong baptaes wetem sam narafala. Brata we i givim tok i askem tu kwestin long olgeta. Maria i ansa long bigfala voes we i klia gud. Smoltaem afta, hem i baptaes.

² Papa mo mama blong Maria i glad tumas se gel blong tufala i givim laef blong hem long Jehova mo baptaes. Be bifo we Maria i baptaes, mama blong hem i stap wari smol. Hem i stap tingbaot se: ‘?Maria i yang tumas blong tekem baptaes? ?Hem i kasem save se desisen ya blong givim laef long Jehova, i impoten tumas? ?I gud hem i wet smol moa blong baptaes?’ Plante papa mo mama we oli lavem pikinini blong olgeta, oli askem ol kwestin olsem, taem pikinini i wantem baptaes. (Prija 5:5) I tru, desisen blong givim laef i go long Jehova mo baptaes i moa  impoten i bitim ol narafala desisen long laef blong yumi.—Yu luk bokis ya “ ?Yu Givim Laef Blong Yu Finis Long Jehova?”

3, 4. (1) ?Olsem wanem aposol Pita i soemaot se baptaes i impoten tumas? (2) ?From wanem Pita i skelem baptaes wetem sip blong Noa?

³ Aposol Pita i skelem baptaes wetem sip we Noa i wokem, i se: “Samting ya i sem mak long baptaes we naoia i stap sevem yufala.” (Ridim 1 Pita 3:20, 21.) Sip ya i soemaot klia long ol man se Noa i wantem mekem samting we God i talem, wetem fulhat blong hem. Hem i mekem wok we Jehova i givim long hem wetem strong bilif. From we Noa i bilif olsem, Jehova i sevem hem mo famle blong hem taem bigfala wota i ron. ?Pita i wantem tijim yumi long wanem?

⁴ Taem ol man oli luk sip we Noa i wokem, oli luksave se Noa i bilif long God. Long sem fasin, taem ol man oli luk se narafala i baptaes, oli save se hem i bilif long Kraes we i laef bakegen, taswe hem i givim laef blong hem i go long God. Hem i obei, mo i mekem wok blong God olsem Noa. Taem Jehova i spolem rabis wol ya, bambae hem i sevem olgeta we oli baptaes mo oli holemstrong long hem, olsem we i sevem Noa taem bigfala wota i ron. (Mak 13:10; Revelesen 7:9, 10) I klia se i impoten tumas blong givim laef long Jehova mo baptaes. Sipos wan man i wet longtaem tumas blong baptaes, hem i save lusum janis blong kasem laef olwe.

5. ?Bambae yumi tokbaot wanem long stadi ya?

⁵ Naoia we yumi kasem save se baptaes i impoten tumas, bambae yumi  tokbaot trifala kwestin ya: ?Baebol i talem wanem long saed blong baptaes? ?Bifo we man i baptaes, hem i mas mekem wanem? ?From wanem yumi mas tingbaot se baptaes i impoten tumas, taem yumi tijim pikinini o Baebol stadi?

6, 7. (1) ?Baptaes we Jon i mekem, i minim wanem? (2) ?Baptaes blong hu i defren, mo from wanem?

⁶ Jon Baptaes i faswan we Baebol i tokbaot se i baptaesem ol man. (Matiu 3:1-6) ?From wanem ol man oli kam long hem blong baptaes? Oli wantem soemaot se oli sore tumas we oli no obei long Loa blong Moses, mo oli tanem tingting blong olgeta. Be Jon i gat bigfala blesing blong baptaesem wan man we i impoten tumas, mo baptaes blong hem i gat narafala mining. Hemia Jisas we i Pikinini blong God. (Matiu 3:13-17) Jisas i no wan sinman, taswe i no nid blong hem i tanem tingting blong hem. (1 Pita 2:22) Sipos i olsem, ?from wanem Jisas i baptaes? Hemia blong soemaot se hem i rere blong yusum laef blong hem blong mekem samting we God i wantem.—Hibrus 10:7.

⁷ Taem Jisas i stat blong prij, ol disaepol blong hem tu oli baptaesem ol man. (Jon 3:22; 4:1, 2) Ol man ya oli baptaes from sem risen olsem ol man we Jon i baptaesem olgeta. Oli sore we oli no obei long Loa blong Moses, mo oli tanem tingting blong olgeta. Be afta we Jisas i laef bakegen, olgeta we oli wantem kam disaepol blong hem, oli mas baptaes from wan narafala risen.

8. (1) ?Taem Jisas i laef bakegen, hem i talem se ol man blong hem oli mas mekem wanem? (2) ?From wanem ol Kristin oli mas baptaes?

⁸ Taem Jisas i laef bakegen long yia 33, hem i toktok long bitim 500 man, woman, mo maet ol pikinini tu. Ating long taem ya nao hem i talem se: “Yufala i mas go long ol man blong olgeta neson, yufala i pulum olgeta oli kam disaepol blong mi, mo yufala i baptaesem olgeta long nem blong Papa mo long nem blong Pikinini mo long nem blong tabu spirit. Mo yufala i tijim olgeta blong oli folem olgeta tok ya we mi mi talem finis long yufala.” (Matiu 28:19, 20; 1 Korin 15:6) Jisas i talem long ol man blong hem se oli mas mekem disaepol. Olgeta we oli wantem kam disaepol, o karem “yok” blong hem, oli mas baptaes. (Matiu 11:29, 30) Sipos wan man i wantem mekem wosip we God i glad long hem, hem i mas bilif se God i stap yusum Jisas blong mekem wil blong hem i kamtru. Biaen hem i save baptaes, nao God bambae i glad long hem. I gat plante pruf long Baebol we i soemaot se ol disaepol blong Jisas bifo, oli save se i impoten blong baptaes. Oli no gat tingting blong wet longtaem tumas blong baptaes.—Ol Wok 2:41; 9:18; 16:14, 15, 32, 33.

9, 10. ?Stori blong man Itiopia mo Sol i tijim yumi long wanem?

⁹ Ridim Ol Wok 8:35, 36. Wan man Itiopia we i joen long skul blong ol man  Jiu, i mekem wosip long tempol long Jerusalem, nao i stap gobak long haos blong hem. Enjel blong Jehova i sanem Filip blong i go talemaot “gud nius blong Jisas” long hem. ?Man Itiopia i mekem wanem? Hem i kasem save se i impoten tumas blong bilif se Jisas i Masta, mo i wantem mekem samting we Jehova i glad long hem. Ale hem i girap, i baptaes.

¹⁰ Wan narafala eksampol, hemia man Jiu ya Sol. Nating se ol man Jiu oli blong Jehova, be hem i sakemaot neson ya from we oli no obei long hem. Sol i ting se ol man Jiu nao oli stap mekem wosip long God long fasin we i stret, taswe hem i stap spolem ol Kristin. Sol i ting se Jisas i ded finis, be hem i laef bakegen mo i stap long heven. Wan dei hem i toktok long Sol. ?Sol i mekem wanem? Hem i glad blong letem Kristin man ya Ananaeas i givhan long hem. Baebol i talem se: “Hem i girap mo i baptaes.” (Ol Wok 9:17, 18; Galesia 1:14) Biaen hem i kam aposol Pol. Makem se taem Sol i kasem save se God i stap yusum Jisas blong mekem wil blong hem i kamtru, hem i girap, i baptaes.—Ridim Ol Wok 22:12-16.

11. (1) ?From wanem plante man we oli stadi Baebol oli wantem baptaes? (2) ?Yumi harem olsem wanem taem man i baptaes?

¹¹ Sem mak long plante yangfala mo olfala we oli stadi Baebol tede. Oli laekem tumas mo oli trastem ol tok blong Baebol, nao oli wantem givim laef blong olgeta long Jehova mo baptaes. Long evri asembli, tok blong baptaes i wan spesel taem. Ol Witnes blong Jehova oli glad, taem ol man we oli stadi Baebol oli bilif long trutok, nao oli wantem baptaes. Ol papa mo mama tu oli glad taem ol pikinini blong olgeta i baptaes. Long seves yia 2017, bitim 284,000 niuwan oli baptaes blong soemaot se oli givim laef blong olgeta finis long Jehova. (Ol Wok 13:48) Oli kasem save se olgeta Kristin oli mas baptaes. ?Be bifo we oli baptaes, oli mekem wanem?

12. ?Ol Baebol stadi oli mas mekem wanem blong kam naf blong baptaes?

¹² Blong kam naf blong baptaes, fastaem ol Baebol stadi oli mas lanem trutok long saed blong God, stamba tingting blong hem long saed blong wol mo ol man, mo samting we hem i mekem blong sevem ol man. (1 Timoti 2:3-6) Oli mas wokem bilif, nao bambae oli wantem obei long ol loa blong God mo agensem ol rabis fasin. (Ol Wok 3:19) Hemia i impoten tumas, from we Jehova i no save glad long man we i givim laef blong hem, be i gohed blong mekem samting we Jehova i agensem. (1 Korin 6:9, 10) Mo tu, oli mas go long ol miting, prij oltaem, mo tijim ol man. Eniman we i stadi Baebol mo i wantem folem Kraes, i mas mekem ol  samting ya fastaem. (Ol Wok 1:8) Nao biaen, hem i save prea blong givim laef long Jehova, mo i save baptaes.

13. Taem yumi tijim narafala, ?yumi mas tingbaot wanem?

¹³ Taem yumi tijim ol pikinini blong yumi mo ol Baebol stadi, yumi mas tingbaot se man we i wantem kam disaepol blong Jisas i mas baptaes. Olsem nao, bambae yumi no fraet blong tokbaot baptaes mo from wanem i impoten tumas blong givim laef long God mo baptaes. !Yumi wantem se ol pikinini blong yumi mo ol Baebol stadi oli gohed gud mo oli baptaes!

14. ?From wanem yumi no fosem man blong i baptaes?

¹⁴ I tru, yumi no fosem pikinini o Baebol stadi blong i baptaes. Jehova i no fosem yumi blong mekem wok blong hem. (1 Jon 4:8) Taswe taem yumi tijim narafala, hem i mas kasem save se i impoten we hem wan i fren gud wetem Jehova. Nao sipos hem i glad blong save trutok long saed blong God, mo blong mekem evri samting we ol tru Kristin oli mas mekem, bambae hem i wantem baptaes.—2 Korin 5:14, 15.

15, 16. (1) ?I gat wan stret yia blong man i baptaes? Yu eksplenem. (2) ?From wanem man we i baptaes long nara jos, i mas baptaes bakegen blong kam wan Witnes?

¹⁵ Evri man i defren, samfala oli gohed kwik i bitim ol narafala. Taswe, i no gat wan stret yia blong baptaes. Plante we oli baptaes oli yangfala, mo oli gohed blong holemstrong long Jehova. Sam narafala oli bigman finis taem oli  lanem trutok mo baptaes. !Mo samfala oli baptaes taem oli gat 100 yia finis!

¹⁶ Wan woman we i baptaes finis long sam narafala jos, i stadi Baebol. Nao hem i askem long tija blong hem sipos i mas baptaes bakegen. Tija i soem sam vas blong Baebol blong ansa long kwestin blong hem. Woman ya i kasem save long samting we hem i mas mekem, nao hem i baptaes nating se hem i gat klosap 80 yia. ?Yumi lanem wanem long stori ya? Yumi lanem se, sipos yumi wantem we Jehova i glad long baptaes blong yumi, yumi mas save fastaem, trutok long saed blong samting we hem i wantem. Taswe nating se yumi baptaes finis long wan nara jos, be yumi mas baptaes bakegen blong kam Witnes blong Jehova.—Ridim Ol Wok 19:3-5.

17. ?I gud blong tingbaot wanem long dei blong baptaes?

¹⁷ Dei blong baptaes i wan taem blong bigfala glad. Mo i wan taem blong tingting dip tu long ol wok we i joen wetem desisen ya blong givim laef long God mo baptaes. I had blong mekem evri samting we wan tru Kristin i mas mekem. Ol disaepol blong Jisas “oli no moa laef blong mekem samting we olgeta nomo oli wantem, be blong mekem samting we man ya we i ded mo i laef bakegen, i wantem.”—2 Korin 5:15; Matiu 16:24.

18. ?Bambae yumi tokbaot wanem long nekis stadi?

¹⁸ Long stadi ya, yumi lanem se desisen blong kam wan tru Kristin i impoten tumas. Taswe mama blong Maria i stap tingbaot ol kwestin long stat blong stadi. Sipos yu yu wan papa o mama, i gud yu askem se: ‘?Pikinini blong mi i rere blong baptaes? ?Hem i gat naf save long Jehova blong i givim laef blong hem mo baptaes? ?Hem i mas skul gud mo kasem wan gudfala wok bifo we i baptaes? ?Olsem wanem sipos hem i mekem wan bigfala sin afta we hem i baptaes?’ Bambae yumi tokbaot ol kwestin ya long nekis stadi, mo olsem wanem ol Kristin papa mo mama oli save gat stret tingting long saed blong baptaes.