1. ?Yumi lanem wanem long Prija 3:1, 7?

SAM long yumi oli laekem blong toktok, mo sam oli laekem blong stap kwaet. Olsem stamba vas blong stadi ya i soemaot, i gat stret taem blong toktok mo stret taem blong stap kwaet. (Ridim Prija 3:1, 7, NW. *) Maet yumi wantem se sam brata mo sista oli toktok moa, mo sam narafala oli no toktok tumas.

2. ?Hu i gat raet blong talem stret taem mo stret fasin blong toktok?

² Fasin blong toktok i wan presen we Jehova i givim. (Eks. 4:10, 11; Rev. 4:11) Long Baebol, hem i eksplenem olsem wanem blong yusum gud presen ya. Long stadi ya, bambae yumi tokbaot sam man mo woman long Baebol, we oli halpem yumi blong save stret taem blong toktok mo stret taem blong stap kwaet. Mo tu, bambae yumi tokbaot wanem tingting blong Jehova long ol toktok we yumi talem long narafala. Fastaem, traem tingbaot wetaem i stret blong toktok.

3. Folem Rom 10:14, ?wetaem yumi mas toktok?

³ Yumi mas rere oltaem blong tokbaot Jehova mo Kingdom blong hem. (Mat. 24:14; ridim Rom 10:14.) Taem yumi mekem olsem, yumi folem fasin blong Jisas. Wan bigfala risen from wanem Jisas i kam long wol, i blong talemaot trutok long saed blong Papa blong hem. (Jon 18:37) Be i impoten blong tingbaot tu, olsem wanem yumi toktok. Taswe taem yumi tokbaot Jehova long ol narafala, yumi mas mekem “long kwaet  fasin mo bigfala respek,” mo yumi mas respektem tingting mo bilif blong olgeta. (1 Pita 3:15) Sipos yumi mekem olsem, bambae yumi no toktok nomo, be bambae yumi tijim olgeta, mo maet ol tok blong yumi i tajem hat blong olgeta.

4. Folem Ol Proveb 9:9, ?toktok blong ol elda i save mekem wanem long narafala?

⁴ Ol elda oli no mas fraet blong toktok taem oli luk se wan brata o sista i nidim advaes. I tru, oli mas jusum stret taem blong toktok, blong oli no mekem brata o sista ya i sem. I gud oli wet kasem taem we i no gat ol narafala man raonabaot long hem. Oltaem ol elda oli traehad blong toktok long fasin we i soemaot respek. Be oli no mas fraet blong yusum ol advaes blong Baebol blong givhan long ol narafala. (Ridim Ol Proveb 9:9.) ?From wanem i impoten blong no fraet blong toktok? Traem tingbaot wan man mo wan woman long Baebol we tufala i gat defdefren fasin. Man ya i mas toktok blong stretem ol pikinini blong hem, mo woman ya i mas toktok long wan man we bambae i kam king, blong i jenisim desisen blong hem.

5. ?Wetaem Hae Pris Ilae i fraet blong toktok?

⁵ Hae Pris Ilae i gat tu boe we hem i lavem tufala. Be tufala i no gat respek long Jehova. Tufala i mekem impoten wok olsem ol pris long haos blong God. Be tufala i yusum paoa blong tufala long fasin we i nogud. Tufala i no soemaot respek long ol sakrefaes we oli go long Jehova, mo tufala i no sem blong mekem ol rabis fasin long saed blong seks. (1 Saml. 2:12-17, 22) Folem Loa we God i givim long Moses, tufala boe ya i mas ded. Be Ilae i slak blong stretem tufala. Hem i talem smol toktok nomo, mo i letem tufala i gohed blong mekem wok long haos blong Jehova. (Dut. 21:18-21) ?Wanem tingting blong Jehova? Hem i talem long Ilae se: “?Yu wantem leftemap tufala i hae moa long mi?” Nao Jehova i mekem desisen blong kilim tufala boe ya i ded, from rabis fasin blong tufala.—1 Saml. 2:29, 34.

6. ?Yumi lanem wanem long stori blong Ilae?

⁶ Yumi lanem wan impoten samting long stori blong Ilae. Sipos yumi faenemaot se wan fren o famle i brekem loa blong God, yumi mas toktok long hem, mo mekem hem i tingbaot loa blong Jehova. Afta, yumi mas meksua se hem i go luk olgeta we Jehova i stap yusum, blong kasem help we hem i nidim. (Jem. 5:14) Yumi no wantem kam olsem Ilae, nao  yumi ona moa long wan fren o famle i bitim we yumi ona long Jehova. Yumi no mas fraet blong toktok wetem man we i mestem rod, from we plante taem gudfala frut i kamaot. Makem olsem wanem Ilae i defren long woman Isrel ya Abigel.

7. ?From wanem Abigel i go toktok long Deved?

⁷ Abigel i mared long Nabal, wan rijman we i gat plante graon. Taem Deved mo ol man blong hem oli stap ronwe long King Sol, oli givhan long ol man blong lukaot long sipsip blong Nabal, blong protektem olgeta long ol stilman. ?Olsem wanem? ?Nabal i glad long help blong olgeta? Nogat. Taem Deved i askem smol kakae mo wota blong ol man blong hem, Nabal i kros we i kros mo i tok nogud long Deved. (1 Saml. 25:5-8, 10-12, 14) From samting ya, Deved i mekem desisen blong go kilim i ded evri man long haos blong Nabal. (1 Saml. 25:13, 22) ?Wanem i blokem bigfala trabol ya? Abigel i luksave stret taem blong toktok, ale hem i no fraet blong go mitim Deved mo ol 400 man blong hem we oli hanggri, oli kros, mo oli rere blong faet.

8. ?Yumi lanem wanem long stori blong Abigel?

⁸ Taem Abigel i mitim Deved, hem i no fraet blong toktok, hem i gat respek, mo i mekem Deved i tingting gud. Nating se i no fol blong Abigel we samting ya i hapen, be hem i talem sore long Deved. Hem i talem se hem i save we Deved bambae i mekem i stret from we hem i wan gudfala man. Abigel i dipen long Jehova blong i givhan long hem. (1 Saml. 25:24, 26, 28, 33, 34) Yumi mas gat sem fasin. Yumi no mas fraet blong toktok sipos yumi luk se narafala i stap long rod blong mekem wan bigfala sin. (Sam 141:5) Yumi mas toktok wetem respek, be yumi no mas fraet. Taem yumi givim ol gudfala advaes long narafala blong  stretem hem, yumi soemaot se yumi trufala fren blong hem.—Prov. 27:17.

9-10. ?Ol elda oli mas tingbaot wanem taem oli stretem narafala?

⁹ Ol elda oli no mas fraet blong toktok long olgeta long kongregesen we oli mestem rod. (Gal. 6:1) Ol elda we oli gat tingting daon oli save se olgeta tu oli sinman, taswe samtaem maet narafala i mas stretem olgeta. Be samting ya i no mas blokem olgeta blong stretem narafala. (2 Tim. 4:2; Taet. 1:9) Taem oli stretem wan brata o sista, oli mas gat longfala tingting, mo oli toktok gud blong tijim hem. Oli lavem hem taswe oli wantem givhan long hem. (Prov. 13:24) Be bigfala tingting blong olgeta i blong leftemap ol stret fasin blong Jehova mo protektem kongregesen. Long rod ya, oli ona gud long Jehova.—Wok 20:28.

¹⁰ Yumi tokbaot finis wetaem i stret blong toktok. Be samtaem i moa gud yumi stap kwaet. ?From wanem i had blong mekem olsem?

11. ?Jemes i talem wanem pijatok, mo olsem wanem pijatok ya i stret long yumi?

¹¹ I no isi blong kontrolem tang blong yumi. Jemes i soemaot samting ya long pijatok we hem i raetem long Baebol. Hem i se: “Sipos wan man i no mekem mastik samtaem long tok blong hem, man ya i stret gud olgeta, mo hem i naf blong kontrolem ful bodi blong hem. Sipos yumi putum rop long maot blong hos, blong mekem hem i obei long yumi, yumi stap lidim ful bodi blong hem.” (Jem. 3:2, 3) Man i putum rop long hed mo maot blong hos blong kontrolem hem. Taem hem i pulum rop ya, hem i save mekem hos i folem stret rod, o i save stopem hem. Sipos man ya i no pulum rop ya, hos i save ronron olbaot mo givim kil long hem wan o long man ya.  Long sem fasin, sipos yumi no kontrolem tang blong yumi, yumi save mekem bigfala trabol. Bambae yumi tokbaot wetaem yumi mas “pulum rop” mo stap kwaet.

12. ?Wetaem yumi mas “pulum rop” mo stap kwaet?

¹² ?Olsem wanem taem wan brata o sista i save samting we hem i no mas talemaot? Maet hem i stap long wan kantri we i tabu blong prij. ?Yu yu askem sam kwestin long hem long saed blong wok blong prij long kantri ya? I sua se yu no wantem mekem wan trabol i kamaot, be from we yu lavem ol brata mo sista ya, yu wantem save wanem i stap hapen long olgeta. Mo tu, long ol prea blong yu, yu wantem tokbaot trabol we oli fesem. Be hemia wan taem we yu mas “pulum rop” mo stap kwaet. Sipos yu fosem wan brata o sista blong talemaot ol save olsem, yu no soemaot lav long hem mo long ol brata mo sista we oli trastem hem. Yumi no wantem mekem i had moa long ol brata mo sista long ol kantri we oli putum tabu long wok blong yumi. Long sem fasin, wan brata o sista we i stap long wan kantri olsem, bambae i no tokbaot olsem wanem ol Witnes long kantri ya oli mekem wosip blong olgeta.

13. Folem Ol Proveb 11:13, ?ol elda oli mas mekem wanem? ?From wanem?

¹³ Ol elda oli mas folem gud rul we i stap long Ol Proveb 11:13. (Ridim.) Oli mekem olsem taem oli no talem ol tok olbaot long saed blong ol narafala. Hemia i no isi speseli taem elda i mared. Man mo woman we i mared i tokbaot evri samting tugeta, hemia ol tingting, ol filing, mo ol wari blong tufala, blong mekem mared blong tufala i stap gud. Be wan elda i save se hem i mas “haedem” sam save long saed blong olgeta long kongregesen. Sipos hem i no mekem olsem, bambae ol brata mo sista oli no moa trastem hem, mo tu, hem i spolem gudnem blong hem. Olgeta we oli gat wok long kongregesen oli no mas gat “tu tang.” (1 Tim. 3:8, futnot) Hemia i min se oli no mas giaman o tokbaot narafala. Sipos wan elda i lavem waef blong hem, bambae hem i no putum wan baden long hem taem i talem samting we waef i no nid blong save.

14. ?Olsem wanem waef blong wan elda i save givhan long hem blong i holem gudnem?

¹⁴ Waef tu i save givhan long hasban blong i holem gudnem blong hem. Hem i mekem olsem taem hem i no fosem hasban blong i tokbaot ol samting we hem i mas haedem. Taem waef i folem advaes ya, hem i sapotem hasban blong hem, mo tu, hem i soemaot lav long olgeta we oli trastem hasban blong hem. Samting we i moa impoten, se Jehova i glad long hem, from we hem i givhan blong holemtaet pis mo fasin joengud long kongregesen.—Rom 14:19.

15. ?Wanem tingting blong Jehova long Elifas, Bildad, mo Jofara, mo from wanem?

¹⁵ Buk blong Job i tijim yumi olsem wanem mo wetaem i stret blong toktok. Taem Job i kasem bigfala trabol mo i stap safa, fo man oli kam blong leftemap tingting mo givim advaes long hem. Oli stap kwaet longtaem. Be Elifas, Bildad, mo Jofara oli no stap kwaet blong tingbaot olsem wanem oli save givhan long Job, oli tingbaot nomo blong pruvum se Job i mekem wan sin. Biaen trifala i toktok. Sam toktok blong trifala i stret, be plante samting we trifala i talem long saed blong Job mo Jehova i no kaen mo i no tru. Trifala i jajem Job se hem i wan man nogud. (Job 32:1-3) ?Wanem tingting blong Jehova? Hem i kros we i kros long trifala. Hem i talem se trifala i toktok olbaot, mo se trifala i mas askem long Job blong i prea from trifala.—Job 42:7-9.

16. ?Yumi lanem wanem long stori blong Elifas, Bildad, mo Jofara?

 ¹⁶ Yumi lanem plante samting long stori blong Elifas, Bildad, mo Jofara. Faswan se, yumi no mas jajem ol brata mo sista. (Mat. 7:1-5) Be yumi mas lesin gud bifo we yumi toktok. Olsem nao, bambae yumi kasem save gud long trabol blong olgeta. (1 Pita 3:8) Seken samting se, yumi mas toktok kaen mo meksua se ol tok blong yumi oli tru. (Efes. 4:25) Namba tri samting se, Jehova i stap lesin gud long ol samting we yumi talem long narafala.

17. ?Yumi lanem wanem long Elihu?

¹⁷ Namba fo man we i go luk Job, hemia Elihu, wan famle blong Ebraham. Hem i lesin nomo taem Job mo tri narafala man oli toktok. I klia se hem i lesin gud, from we biaen hem i givim gudfala advaes long kaen fasin, blong stretem tingting blong Job. (Job 33:1, 6, 17) Bigfala tingting blong Elihu i blong leftemap nem blong Jehova, i no hem wan o narafala. (Job 32:21, 22; 37:23, 24) Elihu i tijim yumi se i gat wan stret taem blong stap kwaet mo lesin. (Jem. 1:19) Yumi lanem tu se taem yumi stretem narafala, yumi mas gat tingting blong leftemap Jehova, be i no yumi.

18. ?Olsem wanem yumi soemaot se yumi tinghae long fasin blong toktok we God i givim olsem wan presen?

¹⁸ Taem yumi folem advaes blong Baebol blong jusum stret taem mo stret fasin blong toktok, yumi soemaot se yumi tinghae long fasin blong toktok we God i givim olsem wan presen. Tabu spirit i pulum waes King Solomon blong raetem se: “Tok we wan man i talem long prapa taem blong hem, i olsem sam gol apol long wan plet silva.” (Prov. 25:11, NW) Taem yumi lesin gud long narafala mo yumi tingting gud bifo we yumi toktok, ol tok blong yumi i olsem ol apol we oli wokem long gol, from we i sas mo i naes tumas. Nating se yumi talem plante toktok o smol nomo, bambae Jehova i glad long yumi. (Prov. 23:15; Efes. 4:29) !Hemia wan gudfala rod blong talem tangkiu long God from presen ya we hem i givim!