1. ?Jisas i givim wanem loa long ol disaepol blong hem? (Yu luk pija long fran pej.)

LONG naet bifo we Jisas i ded, hem i givim wan loa long ol disaepol blong hem, i se: “Olsem we mi lavem yufala, ale long sem fasin, yufala tu i mas lavlavem yufala.” Mo hem i gohed, i se: “Sipos yufala i lavlavem yufala, bambae olgeta man oli save se yufala i disaepol blong mi.”—Jon 13:34, 35.

2. ?From wanem i impoten tumas blong lavlavem yumi?

² Jisas i talem se sipos ol disaepol oli soemaot sem lav we hem i soemaot, ol man bambae oli luksave se oli trufala disaepol blong hem. Ol tok ya i tru long taem bifo, mo i tru tede tu. !I impoten tumas blong winim eni samting we i save blokem yumi blong lavlavem yumi!

3. ?Bambae yumi tokbaot wanem long stadi ya?

³ From we yumi sinman, i no isi blong yumi lavlavem yumi long ful hat blong yumi. Nating se i olsem, yumi mas traehad blong folem fasin ya blong Kraes. Long stadi ya, bambae yumi tokbaot olsem wanem lav i givhan long yumi blong mekem pis wetem narafala, mekem i sem mak long evriwan, mo tekem narafala i kam long haos blong yumi. Taem yu stadi long ol save ya, traem tingbaot se: ‘?Mi mi lanem wanem long ol brata mo sista we oli gohed blong soemaot lav, nating se samtaem i had?’

4. Folem Matiu 5:23, 24, ?from wanem yumi mas mekem pis wetem wan brata o sista we i gat poen long yumi?

⁴ Jisas i talem se i impoten blong mekem pis wetem wan  brata o sista we i gat poen long yumi. (Ridim Matiu 5:23, 24.) Hem i makem se yumi mas fren gud wetem ol narafala blong mekem God i glad. Jehova i glad taem yumi traehad blong mekem pis wetem ol brata mo sista. Sipos yumi stap kros long olgeta mo yumi no wantem mekem pis, hem i no save glad long wosip blong yumi.—1 Jon 4:20.

5. ?From wanem i had blong Mak i mekem pis?

⁵ Samtaem i had blong mekem pis. ?From wanem? Traem tingbaot samting we i hapen long Mak. * Mak i harem nogud taem wan brata i tok nogud long hem, mo i tokbaot hem long samfala long kongregesen. ?Mak i mekem wanem? Hem i talem se: “Mi kam kros mo mi faerap long hem.” Afta, Mak i harem nogud from samting we hem i mekem, mo i traem blong talem sore mo mekem pis wetem brata ya. Be brata ya i no wantem. Fastaem Mak i tingting se: ‘?From wanem mi mas gohed blong traehad, sipos hem i no wantem mekem pis?’ Be eria elda i leftemap tingting blong hem, i talem se i gud hem i gohed nomo. ?Mak i mekem wanem?

6. (1) Olsem wanem Mak i traehad blong mekem pis? (2) ?Olsem wanem Mak i folem ol tok blong Kolosi 3:13, 14?

⁶ Mak i tingting gud long fasin blong hem, nao hem i luksave se samtaem hem i ting se hem i gud moa i bitim ol narafala, mo i no mekem tingting blong hem i stap daon. Hem i luksave se hem i mas jenis. (Kol. 3:8, 9, 12) Ale, hem i mekem tingting blong hem i stap daon nao i go luk brata ya bakegen, blong talem sore long hem. Hem i raetem sam leta tu long hem, i talem se hem i sore tumas mo i wantem fren gud wetem hem bakegen. Mak i givim sam smol presen long hem tu. Be sore tumas, brata ya i holem kros blong hem mo i no wantem fogivim Mak. Nating se i olsem, Mak i gohed blong obei long loa blong Jisas blong lavem mo fogivim brata blong hem. (Ridim Kolosi 3:13, 14.) Nating sipos narafala i no wantem mekem pis wetem yumi, be  lav bambae i pulum yumi blong gohed blong fogivim hem, mo yumi prea blong gat pis wetem hem bakegen.—Mat. 18:21, 22; Gal. 6:9.

7. (1) ?Jisas i talem se yumi mas mekem wanem? (2) ?Wanem i hapen long Lara?

⁷ Jisas i talem se yumi mas mekem long ol narafala olsem we yumi wantem se oli mekem long yumi. Hem i talem tu se yumi no mas lavem olgeta nomo we oli lavem yumi. (Luk 6:31-33) ?Olsem wanem sipos wan long kongregesen i no wantem talem halo long yu? I no plante taem we samting ya i hapen, be hemia nao samting we Lara i fesem. Hem i talem se: “Wan sista i no wantem talem halo long mi, mo mi no save from wanem. Mi harem nogud mo mi no glad blong go long miting.” Fastaem, Lara i ting se: ‘Mi no mekem wan rong. Mo plante narafala long kongregesen tu oli stap luk se fasin blong sista ya i narakaen.’

8. ?Olsem wanem Lara i traehad blong mekem pis, mo yumi lanem wanem long stori ya?

⁸ Lara i traehad blong mekem pis. Hem i prea long Jehova nao i go luk sista ya. Tufala i tokbaot problem ya, putum han blong tufala i goraon long tufala, mo mekem pis. I luk olsem se problem i finis. Lara i talem se: “Be biaen, sista i mekem sem samting bakegen. Tingting blong mi i foldaon.” Fastaem, Lara i harem se hem i save glad nomo taem sista i jenisim fasin blong hem. Be sloslo hem i kasem save se hem i mas gohed nomo blong lavem sista ya mo ‘glad blong fogivim’ hem. (Efes. 4:32–5:2) Lara i tingbaot se man we i gat trufala lav “i no tingbaot rong we ol narafala oli mekem long hem. Hem i no letem wan samting i daonem tingting blong hem, mo hem i bilif long olgeta samting, hem i gat hop long olgeta samting, mo hem i stanap strong long olgeta samting.” (1 Kor. 13:5, 7) Ale Lara i no moa wari long problem ya. Sloslo, sista ya i fren moa wetem hem. Taem yu traehad blong mekem pis wetem ol brata mo sista mo yu gohed blong lavem olgeta, yu save sua se ‘God blong lav mo pis, bambae i stap wetem yu.’—2 Kor. 13:11.

9. Folem Ol Wok 10:34, 35, ?from wanem yu mas mekem i sem mak long olgeta man?

⁹ Jehova i mekem i sem mak nomo long olgeta man. (Ridim Ol Wok 10:34, 35.) Taem yu mekem i sem mak long olgeta man, yu soemaot se yu pikinini blong God. Yu obei long loa ya blong lavem ol man raonabaot long yu olsem we yu lavem yu wan, mo yu givhan blong holemtaet pis long bigfala famle blong ol brata mo sista.—Rom 12:9, 10; Jem. 2:8, 9.

10-11. ?Olsem wanem Rut i jenisim nogud tingting blong hem?

¹⁰ I no isi blong samfala oli mekem i sem mak long olgeta man. Traem tingbaot samting we i hapen long wan sista, nem blong hem Rut. Taem Rut i yangfala, wan woman blong narafala kantri i mekem i nogud long famle blong hem. Rut i talem se: “Mi no laekem nating ol man blong kantri ya. Mi ting se evri man blong kantri ya, wetem ol brata mo sista tu, oli sem mak olsem woman ya.” ?Olsem wanem Rut i jenisim nogud tingting ya?

¹¹ Rut i save se hem i mas faet agensem nogud tingting ya. Hem i ridim ol stori long Yearbook long saed blong kantri ya. Hem i talem se: “Mi traehad blong gat gudfala tingting long ol man blong kantri ya. Mi luk se ol brata mo sista long ples ya oli gat strong tingting blong mekem wok blong Jehova. Mi luksave se olgeta tu oli pat blong bigfala famle blong ol brata mo sista long fulwol.” Rut i luksave se hem i mas mekem moa blong soemaot lav. Hem i talem se: “Taem mi mitim sam brata mo sista blong kantri ya, mi traehad blong fren gud wetem olgeta. Mi toktok long olgeta blong traem save gud olgeta.” ?Wanem i kamaot from? Rut i talem se: “Sloslo, ol nogud tingting blong mi oli lus.”

12. ?Wanem problem we Sera i gat?

¹² Maet samfala oli no luksave se oli stap mekem i moa gud long sam man i bitim ol narawan. Sera i ting se hem i mekem i sem mak long olgeta man from we hem i no jajem olgeta from kala blong skin blong olgeta, from we oli rij o pua, o from wok we oli gat insaed long oganaesesen. Be hem i talem se: “Mi luksave yet se mi stap mekem i gud moa long samfala i bitim ol narafala.” ?Long wanem fasin? Sera i kamaot long wan famle we oli skul gud, mo hem i laekem blong joen wetem olgeta we oli sem mak long hem. Hem i talem long wan fren se: “Mi stap joen nomo wetem ol brata mo sista we oli skul gud. Be mi no joen wetem ol narafala.” I klia se Sera i mas jenisim fasin blong hem. ?Hem i mekem wanem?

13. ?Yumi lanem wanem long stori blong Sera?

¹³ Wan eria elda i givhan long Sera blong i tingting gud long fasin blong hem. Sera i se: “Brata ya i talem se mi stap mekem gudfala wok, ol ansa blong mi long miting oli gud, mo mi gat plante save long Baebol. Be hem i eksplenem se taem save blong yumi i kam antap, yumi mas wokem ol gudfala fasin tu, olsem tingting daon, sore, mo luksave samting we yumi wanwan i naf blong mekem.” Sera i folem advaes blong eria elda, nao i talem se: “Mi kasem save se samting we i moa impoten, i blong soemaot kaen fasin mo lav.” From samting ya, hem i jenisim tingting we hem i gat long ol brata mo sista. Hem i talem se: “Mi traem blong luksave ol fasin we oli mekem se Jehova i lavem olgeta.” ?Yumi lanem wanem? !Neva yumi mas ting se yumi hae moa long sam narafala from we yumi skul gud! Sipos yumi “lavem olgeta brata,” bambae yumi mekem i sem mak long evriwan.—1 Pita 2:17.

14. Folem Hibrus 13:16, ?wanem tingting blong Jehova taem yumi tekem narafala i kam long haos blong yumi?

¹⁴ Jehova i glad taem yumi tekem narafala i kam long haos blong yumi. (Ridim Hibrus 13:16.) Hem i luk fasin ya olsem haf blong wosip blong yumi, antap moa taem yumi halpem olgeta we oli pua. (Jem. 1:27; 2:14-17) Taswe Baebol i talem se yumi mas “tekem ol narafala oli kam long haos” blong yumi. (Rom 12:13) Taem yumi mekem olsem, yumi soemaot se yumi rili kea long olgeta, lavem olgeta, mo yumi wantem fren gud wetem olgeta. Jehova i glad, nating se yumi serem smol kakae, dring ti nomo, o yumi jes spenem taem wetem olgeta. (1 Pita 4:8-10) Be maet i gat sam samting we oli mekem i had blong yu tekem narafala i kam long haos blong yu.

15-16. (1) ?From wanem samfala oli fraet blong tekem narafala i kam long haos? (2) ?Olsem wanem Edit i winim fraet ya?

¹⁵ Maet sam samting long laef blong yumi naoia o bifo, i mekem se yumi fraet blong tekem narafala i kam long haos. Traem tingbaot wido ya Edit. Bifo we hem i kam wan Witnes, hem i no joen wetem ol narafala man. Hem i harem se i moa gud we ol narafala oli tekem ol man oli go long haos blong olgeta, from we oli save mekem i gud moa long olgeta.

¹⁶ Taem Edit i kam wan Witnes, hem i jenisim tingting blong hem, nao hem i traehad blong tekem samfala oli kam long haos blong hem. Hem i se: “Taem oli stap wokem niufala Haos Kingdom blong mifala, wan elda i tokbaot wan brata mo waef blong hem, we tufala bambae i kam givhan long wok ya. Hem i askem long mi sipos tufala i save slip long haos blong mi, blong tu wik. Mi tingbaot olsem wanem Jehova i blesem wido blong Jarefat.” (1 King 17:12-16) Nao Edit i agri blong tekem tufala i kam long haos blong hem. ?Olsem wanem? ?Hem i kasem blesing? Hem i talem se: “Tufala i no stap tu wik, be tu manis. Long taem ya, mifala i fren gud.” Mo tu, Edit i gat ol gudfala fren long kongregesen. Naoia hem i wan paenia, mo hem i harem gud blong  singaot olgeta we oli prij wetem hem, oli kam kakae smol long haos blong hem. Hem i talem se: “!Taem mi givim samting long narafala, mi harem gud! Blong talem stret, mi kasem plante blesing tu.”—Hib. 13:1, 2.

17. ?Luk mo waef blong hem i luksave wanem?

¹⁷ Maet yu stap tekem samfala oli kam long haos, ?be yu ting se yu save kam gud moa? Traem tingbaot Luk mo waef blong hem we tufala i stap singaot ol famle, ol gudfala fren, mo eria elda, oli kam long haos. Be Luk i talem se: “Mi luksave se mitufala i stap singaot olgeta nomo we mitufala i save gud olgeta.” ?Olsem wanem Luk mo waef blong hem i kam gud moa?

18. ?Olsem wanem Luk mo waef blong hem i kam gud moa?

¹⁸ Luk mo waef blong hem i tingting gud long tok blong Jisas, se: “Sipos yufala i stap lavem olgeta ya nomo we oli lavem yufala, ?yufala i ting se bambae yufala i kasem wan gudfala samting from?” (Mat. 5:45-47) Nao tufala i kasem save se tufala i mas folem fasin blong Jehova, blong givim samting long olgeta man. Ale, tufala i stat blong singaot ol brata mo sista we oli neva kam long haos blong tufala bifo. Luk i talem se: “Naoia mifala evriwan i harem gud blong joen wanples. Fasin joen ya i leftemap tingting blong mifala, mo i mekem mifala i kam klosap moa long Jehova.”

19. ?Olsem wanem blong soemaot se yumi disaepol blong Jisas? ?Yu yu gat strong tingting blong mekem wanem?

¹⁹ Yumi lanem finis olsem wanem bigfala lav we yumi gat long ol narafala i givhan long yumi, blong yumi mekem i sem mak long evriwan, mo yumi tekem olgeta oli kam long haos. Yumi mas sakemaot ol nogud tingting we yumi gat long ol brata mo sista, mo yumi mas strong blong lavlavem yumi wetem ful hat. Sipos yumi mekem olsem, bambae yumi harem gud, mo yumi soemaot se yumi ol trufala disaepol blong Kraes.—Jon 13:17, 35.