1. ?From wanem Jisas i askem Jehova blong i protektem ol disaepol?

LONG laswan naet blong Jisas long wol ya, hem i stap tingbaot ol jalens we ol disaepol blong hem bambae oli fesem. Hem i lavem ol fren blong hem, taswe i askem Papa blong hem blong i “protektem olgeta long man ya we i rabis.” (Jon 17:14, 15) Jisas i save se afta we i gobak long heven, Devel Setan bambae i gohed blong faet agensem eni man we i wantem wosipim Jehova. I klia se ol man blong Jehova bambae oli nidim proteksen.

2. ?Olsem wanem yumi sua se Jehova bambae i ansa long ol prea blong yumi?

² Jehova i ansarem prea ya from we hem i lavem Pikinini blong hem. Sipos yumi traem bes blong mekem Jehova i glad, bambae hem i lavem yumi tu, mo i lesin taem yumi prea from help mo proteksen. Olsem wan Hed blong famle, Jehova bambae i gohed blong kea long ol pikinini blong hem wetem lav. Sipos hem i no mekem, !hemia i save sakem doti long nem blong hem mo i spolem gudnem blong hem!

3. ?From wanem yumi nidim proteksen blong Jehova tede?

³ Tede yumi nidim proteksen blong Jehova moa i bitim bifo. Oli sakemaot Setan finis long heven, mo “hem i kros tumas.” (Rev. 12:12) Hem i mekem ol narafala we oli stap ronem mo kilim yumi, oli bilif se oli stap “mekem tabu wok blong God.” (Jon 16:2) Ol man we oli no bilif long God, oli ronem mo kilim yumi from we yumi no folem fasin blong wol. Nomata se oli mekem from wanem risen, i no nid blong fraet. ?From wanem? From we Baebol i talem se: “Masta i stap holem tok blong hem, mo hem  bambae i mekem yufala i strong, mo i protektem yufala long man ya we i rabis.” (2 Tes. 3:3) ?Olsem wanem Jehova i protektem yumi? Bambae yumi tokbaot tu rod.

4. Folem Efesas 6:13-17, ?Jehova i givim wanem blong protektem yumi?

⁴ Jehova i givim wan klos blong faet we i save protektem yumi long ol atak blong Setan. (Ridim Efesas 6:13-17.) !Klos ya i strong mo i protektem gud man! Be i save protektem yumi nomo sipos yumi werem evriwan—mo kipim i stap. ?Ol wanwan pat blong klos ya i representem wanem? I gud yumi luk.

5. ?Wanem ya strap blong trutok, mo from wanem yumi mas werem?

⁵ Strap blong trutok i representem trutok blong Baebol. ?From wanem yumi mas werem strap ya? From we Setan i “papa blong ol giaman toktok.” (Jon 8:44) !Hem i stap giaman blong plante taosen yia finis, mo i “lidim olgeta man long wol oli go krangke”! (Rev. 12:9) Be trutok blong Baebol i protektem yumi, blong hem i no giaman long yumi. ?Olsem wanem yumi werem strap ya? Yumi mekem olsem taem yumi lanem trutok long saed blong Jehova, yumi wosipim hem “long spirit mo long trutok,” mo yumi mekem i stret long olgeta samting.—Jon 4:24; Efes. 4:25; Hib. 13:18.

6. ?Wanem ya aean klos blong stret fasin, mo from wanem yumi mas werem?

⁶ Aean klos blong stret fasin i representem ol stret rul blong Jehova. ?From wanem yumi mas werem aean klos ya? Wan aean klos i protektem hat blong wan soldia, blong ara i no kasem. Sem mak, long saed blong spirit, aean klos i protektem hat blong man, blong ol rabis fasin blong wol i no spolem. (Prov. 4:23) Jehova i ekspektem se yumi lavem hem mo wosipim hem long fulhat blong yumi. (Mat. 22:36, 37) Be Setan i traem mekem se hat blong yumi i no fulwan long Jehova, hem i wantem pulum yumi blong lavem ol samting blong wol ya we Jehova i no laekem nating. (Jem. 4:4; 1 Jon 2:15, 16) Mo sipos hemia i no wok, bambae hem i mekem i strong long yumi, blong yumi mekem samting we i agensem ol rul blong Jehova.

7. ?Olsem wanem yumi werem aean klos blong stret fasin?

⁷ Yumi werem aean klos blong stret fasin, taem yumi akseptem ol rul blong Jehova long ol samting we i stret mo i no stret, mo yumi folem ol rul ya long laef blong yumi. (Sam 97:10) Sam man oli filim se ol rul blong Jehova oli strong tumas. Be sipos yumi stop blong folem ol rul blong Baebol, hemia i olsem wan soldia we i karemaot aean klos blong hem long medel blong faet, from i harem se i hevi tumas. !Be hemia i krangke! Olgeta we oli lavem Jehova, oli ting se ol loa blong hem oli “no had tumas blong folem,” mo oli sevem laef.—1 Jon 5:3.

8. ?I minim wanem blong werem sandel mo rere blong talemaot gud nius?

⁸ Mo tu, Pol i talem se yumi mas werem sandel, blong yumi rere blong talemaot gud nius blong pis. Hemia i min se, yumi mas rere oltaem blong talemaot gud nius blong Kingdom. Taem yumi serem mesej blong Baebol long ol man, bilif blong yumi i kam strong moa. I leftemap tingting blong yumi blong luk olsem wanem ol man blong Jehova long fulwol, oli stap lukaotem janis blong talemaot gud nius.  Oli mekem olsem long wok, skul, ol bisnes teritori, ol haos wanwan, ol stoa, ol famle we oli no bilif, ol man we oli save, mo taem oli stap nomo long haos. Sipos yumi stop from yumi fraet, hemia i olsem wan soldia we i tekemaot sandel blong hem long medel blong faet. Bambae i isi blong hem i kasem kil long leg. Nao bambae i isi blong enemi i atakem hem, mo bambae hem i no save obei long ol oda blong komanda blong hem.

9. ?From wanem yumi mas karem bigfala sil blong bilif?

⁹ Bigfala sil blong bilif, hem i bilif we yumi gat long Jehova. Yumi trastem se bambae hem i mekem olgeta promes blong hem oli kamtru. Bilif ya bambae i halpem yumi “blong kilim faea we i laet long olgeta ara blong man ya we i rabis.” ?From wanem yumi mas karem bigfala sil ya? From we hem i protektem yumi blong ol tijing blong apostasi i no pulum yumi, o blong yumi no fraet long toktok blong ol man we oli wantem daonem yumi. Sipos yumi no gat bilif, bambae yumi no gat paoa blong stanap strong taem man i pulum yumi blong brekem ol rul blong Jehova. Be evri taem we yumi stanap strong from bilif blong yumi long wok o long skul, yumi stap karem sil blong  yumi. (1 Pita 3:15) Evri taem we yumi no akseptem wan wok we pei blong hem i gud, from we i save spolem program blong wosip, yumi stap karem sil blong yumi. (Hib. 13:5, 6) Mo evri taem we yumi wosipim Jehova nating se man i agens, sil ya i stap protektem yumi.—1 Tes. 2:2.

10. ?Wanem ya hat blong faet blong sevem man, mo from wanem yumi mas werem?

¹⁰ Hat blong faet blong sevem man i minim hop we Jehova i givim, hemia hop ya se bambae hem i sevem yumi long ded mo bambae i givim pei long olgeta we oli mekem wil blong hem. (1 Tes. 5:8; 1 Tim. 4:10; Taet. 1:1, 2) Hat blong faet i protektem hed blong soldia, sem mak, hop i protektem tingting blong yumi. ?I protektem olsem wanem? Hop ya i pulum yumi blong fokas long ol promes blong God, mo i halpem yumi blong gat stret tingting long ol problem. ?Olsem wanem yumi werem hat ya? Yumi mekem olsem taem tingting blong yumi i laenap wetem tingting blong God. Eksampol, yumi putum hop blong yumi long God, be i no long ol rij samting.—Sam 26:2; 104:34; 1 Tim. 6:17.

11. ?Wanem ya naef blong faet long spirit, mo from wanem yumi mas yusum?

¹¹ Naef blong faet we tabu spirit i givim hem i Baebol. Naef ya i gat paoa blong katem olgeta giaman tok, mo mekem ol man oli fri long ol giaman tijing mo ol rabis fasin. (2 Kor. 10:4, 5; 2 Tim. 3:16, 17; Hib. 4:12) Yumi lanem blong yusum gud naef ya taem yumi mekem prapa stadi blong yumi, mo yumi yusum trening we oganaesesen blong God i givim. (2 Tim. 2:15) Antap long klos blong faet, Jehova i givim wan nara samting we i gat paoa blong protektem yumi. ?Wanem samting ya?

12. ?Wanem samting yumi nidim moa, mo from wanem?

¹² Wan soldia we i gat ekspiriens, i save se hem i no save winim wan bigfala ami hem wan, hem i nidim help blong ol nara soldia. Sem mak, yumi wan yumi no naf blong winim Setan mo ol man blong hem, yumi nidim help blong ol brata sista blong yumi. Long fulwol, i gat “olgeta brata we oli bilif.” Jehova i givim olgeta ya blong oli halpem yumi.—1 Pita 2:17.

13. Folem Hibru 10:24, 25, ?ol miting oli save givhan long yumi olsem wanem?

¹³ Wan rod blong kasem help, hemia blong go long ol miting. (Ridim Hibru 10:24, 25.) Sipos tingting blong yumi i foldaon, ol miting oli save leftemap tingting blong yumi. Ol gudfala ansa blong ol brata sista, oli enkarejem yumi. Ol tok we oli kamaot long Baebol, wetem ol pleplei, oli mekem se yumi gat strong tingting blong mekem wok blong Jehova. Mo ol gudfala storian blong yumi bifo mo afta long miting, oli enkarejem yumi. (1 Tes. 5:14) Mo tu, ol miting oli givim janis long yumi blong kasem glad taem yumi halpem ol narafala. (Wok 20:35; Rom 1:11, 12) Ol miting oli halpem yumi long sam narafala rod tu. I olsem we oli mekem yumi kamgud moa blong faet, nao yumi reregud blong mekem minista wok. Eksampol, yumi lanem blong yusumgud ol tul long Tijing Tulboks. Taswe, yu rerem gud ol miting blong yu. Mo long taem blong miting, yu lesingud. Afta long miting, yusum trening we yu kasem. Sipos yu mekem olsem, bambae yu kam “wan gudfala soldia blong Kraes Jisas.”—2 Tim. 2:3.

14. ?Yumi gat wanem narafala help?

¹⁴ Mo tu, i gat plante milian strong  enjel we oli givhan long yumi. !Tingbaot samting we wan enjel nomo i save mekem! (Aes. 37:36) Naoia tingbaot wanem we wan strong ami blong ol enjel i save mekem. I no gat man o dimon we i naf blong fesem ami blong Jehova. I gat wan toktok we i talem se wan Witnes nomo plas Jehova i sem mak long plante man. (Jaj. 6:16) !Tok ya i tru tumas! Rimemba tok ya oltaem, taem wan man long wok, long skul, o wan famle we i no bilif, i talem o mekem wan samting blong daonem yu. Tingbaot se yu no stap yu wan long faet ya. Yu stap folem daereksen blong Jehova.

15. Folem Aesea 54:15, 17, ?from wanem i no gat man i naf blong stopem ol man blong God?

¹⁵ Wol ya we Setan i bos long hem, i no laekem yumi nating from plante risen. Yumi no joen long politik mo long faet. Yumi talemaot nem blong God, leftemap Kingdom blong hem se i hop ya nomo blong putum pis, mo yumi promotem ol stret rul blong God. Yumi talemaot long klia ples se rula blong wol ya i wan man blong giaman mo blong kilim man i ded. (Jon 8:44) Mo yumi talemaot se i no longtaem wol blong Setan bambae i lus. Be yet, Setan wetem ol man blong hem bambae oli neva stopem yumi. !Defren olgeta, bambae yumi gohed blong yusum evri rod we yumi gat, blong presem Jehova! Setan i gat paoa, be hem i no naf blong stopem mesej blong Kingdom blong i kasem olgeta man long fulwol. Proteksen blong Jehova nomo i mekem se samting ya i hapen.—Ridim Aesea 54:15, 17.

16. ?Olsem wanem Jehova bambae i sevem ol man blong hem?

¹⁶ ?Wanem bambae i hapen? Long taem blong bigfala trabol, Jehova bambae i yusum tu nambawan rod blong sevem yumi. Faswan, taem hem i pulum ol king blong wol blong oli distroem Bigfala Babilon, hemia olgeta giaman skul. (Rev. 17:16-18; 18:2, 4) Sekenwan, taem hem i distroem laswan haf blong wol blong Setan long Amagedon.—Rev. 7:9, 10; 16:14, 16.

17. ?Taem yumi stap klosap long Jehova, yumi kasem wanem blesing?

¹⁷ Taem yumi stap klosap long Jehova, Setan i no save spolem yumi blong olwe. Blong talem stret, Setan nao bambae oli distroem hem blong olwe. (Rom 16:20) !Taswe werem ful klos blong faet, mo no karemaot! No traem blong faet yu wan. Halpem ol brata sista blong yu. Mo folem daereksen blong Jehova. Sipos yu mekem olsem, yu save sua se gudfala Papa blong yu we i lavem yu, bambae i mekem yu strong mo i protektem yu.—Aes. 41:10.