1-2. ?Hu i save halpem wan Baebol studen blong i progres kasem baptaes?

AMY we i stap long Fiji, i talem se: “Mi laekem tumas ol samting we mi lanem long Baebol stadi. Mi save se hemia trutok. Be taem mi joen wetem ol brata sista, long taem ya nao mi jenisim sam samting long laef blong mi, mo mi progres kasem baptaes.” Stori blong Amy i soem impoten trutok ya se: Wan Baebol studen bambae i gohed gud kasem baptaes taem olgeta long kongregesen oli halpem hem.

² Evri pablisa wanwan i save givhan blong mekem kongregesen i gru. (Efes. 4:16) Leilani we i wan paenia long Vanuatu, i talem se: “I gat wan toktok we i talem se i nidim wan vilej blong tijim wan pikinini. Mi ting se hemia i tru tu long wok ya blong mekem disaepol, plante taem i nidim wan kongregesen blong pulum wan man i kam long trutok.” Ol memba blong famle, ol fren, mo ol tija oli givhan long wan pikinini blong i kam bigman. Oli mekem olsem taem oli enkarejem pikinini, mo oli tijim ol impoten lesen long hem. Long sem fasin, ol pablisa oli save givim advaes, enkarejem, mo soem wan gudfala eksampol long Baebol studen, blong halpem hem blong i progres kasem baptaes.—Prov. 15:22.

3. ?Yu lanem wanem long komen blong Ana, Dorin, mo Leilani?

³ ?Sipos yu gat wan Baebol stadi, from wanem yu mas akseptem se ol narafala pablisa tu oli save halpem studen blong yu? Makem samting we spesel paenia ya Ana long Moldova, i talem: “I had tumas blong wan pablisa nomo i givim evri samting we wan Baebol studen i nidim, taem  hem i stap progres.” Brata Dorin we i wan spesel paenia long sem kantri ya, i se: “Plante taem, ol narafala pablisa oli talem sam samting we i tajem hat blong studen, ol samting we mi neva tingbaot.” Leilani i tokbaot wan narafala risen: “Lav mo kaen fasin we ol brata sista oli soem long studen, i save givhan long hem blong luksave ol man blong Jehova.”—Jon 13:35.

4. ?Bambae yumi tokbaot wanem long stadi ya?

⁴ Be maet yu stap askem se: ‘?Olsem wanem mi save halpem wan Baebol studen blong i progres, taem i no mi we i lidim stadi ya?’ Bambae yumi tokbaot samting we yumi save mekem taem narafala i invaetem yumi blong joen long wan Baebol stadi, mo samting we yumi save mekem taem wan Baebol studen i stat blong kam long ol miting. Mo tu, bambae yumi tokbaot olsem wanem ol elda oli save halpem ol Baebol studen blong progres kasem baptaes.

5. ?Wanem wok blong yu sipos narafala i invaetem yu long wan Baebol stadi?

⁵ Long taem blong stadi, tija nao i gat responsabiliti blong halpem studen blong i kasemsave long Baebol. Sipos hem i invaetem yu blong joen long stadi, yu mas tingbaot se yu patna blong hem. Wok blong yu i blong sapotem hem. (Pri. 4:9, 10) ?Taswe olsem wanem yu save sapotem hem blong mekem se stadi ya i karem frut?

6. Taem yu joen long wan Baebol stadi, ?olsem wanem yu save folem rul long Ol Proveb 20:18?

⁶ Rerem Baebol Stadi. Fastaem, askem tija blong i talem sam samting long saed blong studen. (Ridim Ol Proveb 20:18.) Yu save askem long hem se: “?Wanem bakgraon blong studen ya? ?Bambae yutufala i stadi long wanem topik? ?Tede yu wantem se studen i lanem wanem? ?I gat sam samting we mi no mas talem o mekem long taem blong stadi? ?Wanem i save enkarejem studen blong i progres?” I klia se tija bambae i no talemaot ol sikret blong studen ya, be wanem we hem i save talemaot, i naf blong givhan long yu. Joy we i wan misinari, i tokbaot ol save olsem long olgeta we oli joen wetem hem long ol Baebol stadi. Hem i talem se: “Samting ya i halpem patna blong mi blong i intres long studen, mo blong i givhan long taem blong stadi.”

7. ?From wanem yu yu mas rerem gud stadi ya?

⁷ Sipos yu mas joen long wan Baebol stadi, i gud sipos yu rerem topik we bambae yufala i stadi long hem. (Esra 7:10) Brata Dorin we yumi tokbaot finis, i  talem se: “Mi mi glad taem patna blong mi i rerem stadi we bae mifala i tokbaot. Olsemia hem i save givim ol gudfala komen.” Mo tu, studen bambae i luk se yutufala tugeta i reregud mo hemia i wan gudfala eksampol long hem. Nating sipos yu no naf blong rerem gud stadi ya, i gud blong tekem smol taem blong faenem ol impoten poen long stadi ya.

8. ?Olsem wanem yu save mekem se prea blong yu long taem blong stadi i gat paoa?

⁸ Prea i wan impoten haf long taem blong stadi, taswe i gud we bifo long stadi, yu tingting gud long samting we bambae yu tokbaot sipos tija i askem yu blong prea. Olsemia prea blong yu bambae i gat paoa. (Sam 141:2) Hanae long Japan, i tingbaot yet ol prea blong wan sista we i kam wetem tija blong hem, blong stadi wetem hem. Hem i se: “Mi haremsave se hem i frengud wetem Jehova, mo mi wantem kam olsem hem. Mo taem hem i talem nem blong mi long ol prea, mi haremsave lav blong hem.”

9. Folem Jemes 1:19, ?yu save mekem wanem blong givhan long taem blong stadi?

⁹ Sapotem tija long taem blong stadi. Omamuyovbi we i wan spesel paenia long Naejeria, i talem se: “Wan patna i givhan taem hem i folemgud stadi. Hem i talem ol gudfala komen be i no toktok tumas, hem i kasemsave se tija nao i lidim stadi.” ?Olsem wanem blong save wetaem blong givim komen mo wanem blong talem? (Prov. 25:11) Yu lesingud taem tija mo studen i stap toktok. (Ridim Jemes 1:19.) Long rod ya nomo bambae yu rere blong toktok long taem we i stret. Be i tru se yu mas skelemgud tu. Eksampol, yu no wantem toktok tumas, o katem toktok blong tija, o jenisim topik. Be sipos yu givim wan sot komen, pijatok, o kwestin, yu save givhan blong mekem poen i kam klia moa. Samtaem maet yu filim se yu no save talem plante samting blong givhan long stadi. Be sipos yu talem ol gudfala toktok long studen, mo yu intres long hem, yu stap givhan bigwan long hem blong i progres.

10. ?Ekspiriens blong yu i save givhan olsem wanem long wan Baebol studen?

¹⁰ Talemaot ekspiriens blong yu. Sipos i stret, yu tokbaot smol olsem wanem yu lanem trutok, yu winim wan jalens, o yu luk Jehova i givhan long yu. (Sam 78:4, 7) Maet ekspiriens blong yu i save givhan long studen. I save mekem bilif blong hem i kam strong, o i enkarejem hem blong progres kasem baptaes. Mo maet i soem olsem wanem blong winim wan traem we hem i stap fesem. (1 Pita 5:9) Gabriel we i wan paenia long Brasil,  i tingbaot wanem i bin givhan long hem taem hem i stap stadi. Hem i se: “Taem mi harem ol ekspiriens blong ol brata, mi lanem se Jehova i luk ol hadtaem we yumi stap fesem. Mo sipos olgeta oli save winim, mi tu mi save winim.”

11-12. ?From wanem yumi mas welkamem ol Baebol studen we oli kam long miting?

¹¹ Blong wan Baebol studen i progres kasem baptaes, hem i mas kam oltaem long ol miting mo kasem gudfala samting from. (Hib. 10:24, 25) I sua se, tija nao i invaetem hem long faswan miting blong hem. Be taem hem i kam, yumi evriwan i save enkarejem hem blong i gohed blong kam long Haos Kingdom. ?Hao nao yumi mekem olsem?

¹² Welkamem ol studen. (Rom 15:7) Sipos studen i harem se ol narafala oli welkamem hem long ol miting, bambae hem i laekem blong kam oltaem long Haos Kingdom. Yu no mekem hem i fraet, be yu talem halo long hem mo yu soem hem long ol narafala. Yu no mas ting se tija blong hem i stap lukaot long hem, from we maet tija ya i no kam yet o i gat sam wok blong mekem. Yu lesin gud long samting we studen i talem mo yu intres long hem. ?Wanem frut i save kamaot from? Makem ekspiriens blong Dmitrii we i baptaes sam yia bifo mo naoia i wan man blong givhan. Hem i tingbaot faswan miting blong hem mo i se: “Mi mi fraet mo mi stap wet aotsaed long Haos Kingdom, be wan brata i luk mi, nao i tekem mi mi go insaed. Plante oli kam talem halo long mi. Mi mi sapraes tumas. Mi laekem tumas mo mi wis se yumi gat miting evri dei nomo. Mi mi neva harem olsem bifo.”

13. ?Fasin blong yu i save mekem wanem long wan Baebol studen?

¹³ Soemaot gudfala eksampol. Fasin blong yu i save halpem studen blong i bilif se hem i faenem trutok. (Mat. 5:16) Vitalii we i wan paenia long Moldova i talem se: “Mi stap wajem fasin blong laef, tingting, mo aksen blong ol brata sista. Hemia i mekem mi bilif se i tru nomo we ol Witnes Blong Jehova oli man blong God.”

14. ?Eksampol blong yu i save halpem narafala olsem wanem?

¹⁴ Blong studen i kasem mak blong baptaes, hem i mas folem samting we hem i lanem. Hemia i no isi oltaem. Be taem studen i luk we yu haremgud taem yu folem ol rul blong Baebol, hemia bambae i pulum hem blong folem eksampol blong yu. (1 Kor. 11:1)  Tingbaot ekspiriens blong Hanae we yumi tokbaot finis. Hem i se: “Mi luk ol brata sista oli stap mekem ol samting we mi stap lanem. Oli soem olsem wanem blong enkarejem, fogivim, mo lavem narafala. Oltaem oli talem ol gudfala samting long saed blong ol narafala. Mi wantem folem fasin blong olgeta.”

15. ?Olsem wanem Ol Proveb 27:17 i halpem yumi blong fren wetem wan studen long miting?

¹⁵ Kam fren blong studen. Gohed blong soem intres long studen taem hem i stap kam long ol miting. (Fil. 2:4) I gud blong go toktok long hem. Yu save talem long hem se yu glad long progres blong hem, mo yu save askem kwestin long saed blong stadi blong hem, famle blong hem, mo wok blong hem, be yu no mekem hem i sem. Storian olsem i save mekem yutufala i fren. Taem yu kam fren blong studen, yu stap halpem hem blong progres kasem baptaes. (Ridim Ol Proveb 27:17.) Naoia Hanae i wan fultaem paenia. Hem i tokbaot faswan taem we hem i kam long miting, i se: “Taem mi gat ol fren long kongregesen, mi laekem tumas blong kam long ol miting, mo mi kam nating se mi taed. Mi laekem blong joen wetem ol niufala fren blong mi, mo hemia i halpem mi blong mi no moa joen wetem olgeta we oli no bilif. Mi wantem stap klosap long Jehova mo ol brata sista. Taswe mi mekem desisen blong baptaes.”

16. ?Yu save mekem wanem blong studen i filim se hem i pat blong kongregesen?

¹⁶ Taem studen i stap gohed blong mekem progres, halpem hem blong hem i filim se hem i pat blong kongregesen. (Hib. 13:2) Denis long Moldova i tingbaot taem hem i stap stadi, mo i se: “Plante taem, ol brata oli invaetem mi mo waef blong mi blong joen wetem olgeta. Oli tokbaot olsem wanem Jehova i givhan long olgeta. Samting ya i enkarejem mitufala. Fasin joen olsem, i mekem mitufala i tingting strong blong mekem wok blong Jehova mo mitufala i bilif se bae mitufala i gat wan gudfala laef.” Taem Baebol studen i kasem mak blong pablisa, yu save invaetem hem tu blong i prij wetem yu. Diego we i wan pablisa long Brasil, i talem se: “Plante brata oli invaetem mi blong prij wetem olgeta. Hemia beswan rod blong savegud olgeta. Taem mi mekem olsem, mi lanem plante samting mo mi kam klosap moa long Jehova mo Jisas.”

17. ?Olsem wanem elda i save halpem ol studen?

¹⁷ Tekem taem blong toktok long ol studen. Elda, lav mo intres we yu soem long  ol studen i save halpem olgeta blong oli progres kasem baptaes. I gud yu toktok wetem ol studen taem oli kam long miting. Bambae oli haremsave se yu intres long olgeta sipos yu tingbaot nem blong olgeta, speseli taem oli stat blong ansa. ?Yu save jenisim program blong yu, blong yu save joen wetem wan pablisa long stadi blong hem? Ating yu no kasemsave, be samting ya bambae i givhan bigwan long studen. Jackie we i paenia long Naejeria, i talem se: “Plante studen oli sek taem oli save se brata we i kam wetem mi blong mekem stadi, i wan elda. Wan Baebol studen i talem se: ‘Pasta blong mi bae i neva mekem olsem. !Hem i stap visitim ol rijman nomo sipos oli pem hem!’” Naoia, studen ya i stap kam long ol miting.

18. ?Olsem wanem ol elda oli save mekemgud responsabiliti blong olgeta we Ol Wok 20:28 i talem?

¹⁸ Trenem mo enkarejem ol Baebol tija. Elda, yu gat bigfala responsabiliti ya blong halpem ol pablisa blong oli kamgud long wok blong prij, wetem wok ya blong mekem Baebol stadi. (Ridim Ol Wok 20:28.) Sipos wan long olgeta i sem blong mekem Baebol stadi long fored blong yu, talem long hem se bambae yu lidim stadi ya. Jackie we yumi tokbaot finis, i talem se: “Plante taem ol elda oli stap askem long saed blong ol studen blong mi.” Ol elda oli save mekem plante samting blong enkarejem ol tija blong oli gohed. (1 Tes. 5:11) Jackie i gohed i se: “Mi laekem taem ol elda oli enkarejem mi mo oli talem se oli glad long ol traehad blong mi. Ol kaen toktok ya oli olsem kolwota long wan hot dei. Gudfala toktok blong olgeta i mekem se mi no fraet, mo mi glad moa long wok ya blong mekem ol Baebol stadi.”—Prov. 25:25.

19. ?Yumi evriwan i save glad long wanem?

¹⁹ Nating sipos yumi no gat wan Baebol stadi, be yumi save givhan yet long wan man blong i progres kasem baptaes. Long taem blong stadi, yumi no tekova long tija, be yumi save givim ol komen we yumi rerem gud, blong sapotem tija. Yumi save kam fren blong ol studen we oli kam long Haos Kingdom, mo yumi save kam ol gudfala eksampol long olgeta. Ol elda oli save enkarejem ol studen sipos oli tekem taem blong toktok wetem olgeta. Mo oli save enkarejem ol tija taem oli trenem olgeta mo oli talem ol gudfala toktok long olgeta. !Yumi glad tumas se yumi save mekem wan smol samting, blong halpem wan man blong i lavem Jehova mo mekem wok blong Hem!