1. Folem Matiu 24:9, ?from wanem yumi no sapraes taem wol i no laekem yumi nating?

JEHOVA i wokem yumi blong soemaot lav mo blong kasem lav. Taswe taem man i no laekem yumi nating, yumi harem nogud mo maet yumi fraet. Eksampol, Sista Georgina long Yurop, i se: “Taem mi gat 14 yia, mama blong mi i no laekem mi from we mi mekem wok blong Jehova. Mi filim se hem i no moa wantem mi, mo mi no sua sipos mi wan gudfala gel.” * Brata Danylo i se: “Mi mi fraet mo mi sem taem ol soldia oli kilim mi, tok nogud long mi, mo mekem mi fraet from we mi mi Witnes.” Yumi harem nogud taem narafala i no laekem yumi nating, be yumi no sapraes from. Jisas i talem finis se wol bambae i no laekem yumi nating.—Ridim Matiu 24:9.

2-3. ?From wanem wol i no laekem nating ol man blong Jisas?

² Wol i no laekem nating ol man blong Jisas. ?From wanem? From we yumi “no blong wol ya.” (Jon 15:17-19) Yumi respektem ol gavman blong man, be yumi no wosipim olgeta o ol samting we i representem olgeta. Yumi wosipim Jehova nomo. Yumi sapotem rul blong God, hemia wan rul we Setan mo ol “pikinini” blong hem oli agensem fulwan. (Jen. 3:1-5, 15) Yumi stap prij se Kingdom blong God nomo i hop blong ol man, mo se i no longtaem Kingdom ya bambae i smasem olgeta we oli agensem hem. (Dan. 2:44; Rev. 19:19-21) Mesej ya i wan gud nius long ol man we tingting blong olgeta i stap daon, be i wan rabis nius long ol man nogud.—Sam 37:10, 11.

³ Wol i no laekem yumi nating from we yumi obei long ol  stret rul blong God. Ol rul ya oli defren olgeta long ol fasin blong wol we i nogud we i nogud. Eksampol, !plante man oli no fraet blong talem se oli laekem ol rabis fasin we oli sem mak long hemia blong Sodom mo Gomora! (Jud 7) From we yumi folem ol rul blong Baebol long saed blong ol fasin ya, plante man oli jikim yumi mo oli talem se yumi strong tumas.—1 Pita 4:3, 4.

4. ?Wanem ol gudfala fasin we oli save mekem yumi stanap strong?

⁴ ?Wanem i save halpem yumi blong stanap strong, taem ol man oli no laekem yumi nating, mo oli tok nogud long yumi? Yumi mas bilif strong se Jehova bambae i halpem yumi. Bilif blong yumi i olsem wan sil we i save “kilim faea we i laet long olgeta ara blong man ya we i rabis.” (Efes. 6:16) Be bilif nomo i no naf. Yumi nidim lav tu. ?From wanem? From we man we i gat lav, hem “i no kros kwik.” Hem i no letem rabis samting i daonem tingting blong hem mo hem i stanap strong. (1 Kor. 13:4-7, 13) Naoia bambae yumi luk olsem wanem lav we yumi gat long Jehova, ol brata sista, mo tu long ol enemi blong yumi, i save halpem yumi blong stanap strong.

5. ?Olsem wanem lav we Jisas i gat long Papa blong hem, i givim paoa long hem?

⁵ Long naet bifo we ol enemi oli kilim Jisas i ded, hem i talem long ol man blong hem se: “Mi mi lavem Papa, [so] mi mas mekem ol samting we Papa i talem long mi blong mi mekem.” (Jon 14:31) Lav we Jisas i gat long Jehova, i givim paoa long hem blong fesem ol traem. Lav we yumi gat long Jehova i save mekem sem samting long yumi.

6. Folem Rom 5:3-5, ?wanem filing blong ol man blong Jehova taem wol i no laekem olgeta nating?

⁶ Oltaem lav we ol man blong Jehova oli gat long hem, i mekem olgeta oli stanap strong taem ol man oli ronem mo kilim olgeta. Eksampol, taem saprim kot blong ol man Jiu i blokem ol aposol blong oli no moa prij, lav ya i pulum olgeta blong “obei long God we i rula blong [olgeta], i bitim we [oli] obei long ol man.” (Wok 5:29; 1 Jon 5:3) Tede strong lav ya long God i givim paoa long ol brata blong yumi, we plante oli stap fesem ol strong gavman we oli mekem i nogud long olgeta. Be tingting blong yumi i no foldaon, yumi luk se i wan privilej blong stanap strong taem wol i no laekem yumi nating.—Wok 5:41; ridim Rom 5:3-5.

7. ?Yumi mas mekem wanem taem ol famle oli agensem yumi?

⁷ Ating bigfala traem, hemia taem stret famle blong yumi i agensem yumi. Taem yumi stat blong intres long trutok, maet sam famle oli ting se yumi lusum rod. Maet sam narafala oli ting se yumi kam krangke. (Skelem Mak 3:21.) Maet oli tritim nogud yumi tu. Yumi no mas sapraes long samting ya. Jisas i talem se: “Bambae man i gat ol enemi blong hem, we olgeta oli famle blong hem nomo.” (Mat. 10:36) I tru, nating se ol famle blong yumi oli gat nogud tingting long yumi, yumi no wantem tritim olgeta olsem se oli enemi blong yumi. Defren olgeta, taem yumi lavem Jehova moa, bambae yumi lavem moa ol man. (Mat. 22:37-39) Be bambae yumi neva brekem ol loa mo rul blong Baebol jes blong mekem narafala i glad.

8-9. ?Wanem i halpem Georgina blong i stanap strong?

⁸ Georgina we yumi tokbaot finis, i stanap strong nating se mama blong  hem i agensem hem bigwan. Georgina i eksplenem se: “Mi mo Mama i stat stadi Baebol wetem ol Witnes. Be sikis manis afta, taem mi wantem go long ol miting, fasin blong Mama i jenis bigwan. Mi faenemaot se hem i stap toktok wetem ol man blong apostasi, mo hem i yusum toktok blong olgeta blong agiu wetem mi. Mo tu, hem i tok nogud long mi, i pulum hea blong mi, i jokem mi, mo i sakemaot ol buk blong mi. Afta we mi gat 15 yia, mi baptaes. Mama i traem blong stopem mi blong mekem wok blong Jehova, ale hem i putum mi long wan hom blong ol yangfala gel, we sam long olgeta oli stap tekem drag mo brekem loa. I had blong stanap strong taem wan man we i sud lavem yu mo kea long yu, i stap agensem yu.”

⁹ ?Wanem i halpem Georgina? Hem i talem se: “Long dei ya we Mama i agensem mi, mi jes finis blong ridim ful Baebol. Long taem ya, mi sua fulwan se mi faenem trutok, mo mi filim se mi stap klosap long Jehova. Plante taem mi prea long hem, mo hem i lesin long mi. Taem mi stap long hom ya, wan sista i invaetem mi long haos blong hem, mo mitufala i stadi Baebol. Long olgeta taem ya, ol brata sista oli stap mekem mi mi strong. Oli mekem mi mi kam pat blong famle blong olgeta. Mi luksave se Jehova i strong moa i bitim ol man we oli agensem yumi, nomata se oli hu.”

10. ?Yumi trastem se oltaem Jehova bambae i mekem wanem?

¹⁰ Aposol Pol i raetem se i no gat wan samting “i save tekemaot yumi long lav ya blong God, we Masta blong yumi Kraes Jisas i soemaot.” (Rom 8:38, 39) Nating se maet yumi stap safa, be oltaem Jehova bambae i stap wetem yumi blong kamfotem mo mekem yumi strong. Mo tu, olsem stori blong Georgina i soem, Jehova bambae i yusum ol gudfala famle blong yumi long spirit, blong halpem yumi.

11. ?Olsem wanem lav we Jisas i tokbaot long Jon 15:12, 13 i halpem ol disaepol blong hem? Talem wan eksampol.

¹¹ Long naet bifo we Jisas i ded, hem i talem long ol disaepol blong hem se oli mas lavlavem olgeta. (Ridim Jon 15:12, 13.) Hem i save se lav ya we i tingbaot narafala fastaem bambae i halpem olgeta blong joengud mo stanap strong, taem wol i agensem olgeta. Tingbaot eksampol blong kongregesen long Tesalonaeka.  Stat we hem i fom, ol man oli stap ronem mo kilim ol memba blong hem. Nating se i olsem, ol brata sista long ples ya oli soem gudfala eksampol blong bilif mo lav. (1 Tes. 1:3, 6, 7) Pol i enkarejem olgeta blong oli gohed blong soem lav mo “gohed moa yet long fasin ya.” (1 Tes. 4:9, 10) Lav bambae i pulum olgeta blong kamfotem man we tingting blong hem i foldaon mo halpem man we i no strong. (1 Tes. 5:14) Oli bin folem instraksen blong Pol, from we wan yia afta, hem i talem long olgeta long seken leta blong hem, se: “Fasin blong yufala evriwan blong lavlavem yufala, i stap kam bigwan moa.” (2 Tes. 1:3-5) Lav i givhan long olgeta blong stanap strong taem oli stap fesem hadtaem mo fasin agens.

12. ?Olsem wanem ol brata sista long wan kantri we i gat faet, oli lavlavem olgeta?

¹² Tingbaot ekspiriens blong Danylo we yumi tokbaot finis, wetem waef blong hem. Taem faet i kamaot long taon blong tufala, oli gohed blong go long ol miting, prij olsem we tufala i naf blong mekem, mo serem kakae blong tufala long ol brata sista. Nao wan dei, ol soldia oli karem masket mo oli kam luk Danylo. Hem i se: “Oli talem se mi mas lego bilif blong mi. Taem mi no wantem, oli kilim mi mo giaman se oli sutum mi, be oli stap sut ova long hed blong mi. Bifo we oli aot, oli se bae oli kambak blong repem waef blong mi. Be kwiktaem ol brata oli putum mitufala long tren blong go long wan nara taon. Bambae mi neva fogetem lav blong ol gudfala brata ya. Mo taem mitufala i kamtru long niufala taon ya, !ol brata oli givim kakae mo oli halpem mi blong faenem wan wok mo wan haos! From samting ya, mitufala i save tekem ol nara Witnes we oli ronwe from faet.” Ol ekspiriens olsem oli soem se Kristin lav i save halpem yumi taem ol narafala oli agensem yumi.

13. ?Olsem wanem tabu spirit i halpem yumi blong gohed?

¹³ Jisas i talem long ol man blong hem blong oli lavem ol enemi blong olgeta. (Mat. 5:44, 45) ?I isi blong mekem olsem? !Nogat! Be i posibol sipos tabu spirit blong God i givhan. Sam long ol frut blong tabu spirit hemia lav, wetem kaen fasin, kwaet fasin, mo bos long tingting. (Gal. 5:22, 23) Ol fasin ya oli halpem yumi blong stanap strong, taem man i no  laekem yumi nating. Plante enemi oli jenisim fasin blong olgeta from wan hasban we i bilif, o waef, pikinini, o neba, i soem ol gudfala fasin ya. Mo plante enemi oli kam ol gudfala brata sista blong yumi. So sipos i had blong lavem olgeta we oli no laekem yu nating, i gud yu prea from tabu spirit. (Luk 11:13) Mo yu mas sua fulwan se rod blong Jehova, oltaem i beswan.—Prov. 3:5-7.

14-15. ?Olsem wanem Rom 12:17-21 i halpem Yasmeen blong lavem hasban blong hem?

¹⁴ Tingbaot eksampol blong Sista Yasmeen long Medel Is. Taem hem i kam Witnes, hasban blong hem i ting se oli trikim waef blong hem, nao hem i traem stopem hem blong i no mekem wok blong God. Hem i tok nogud long hem, mo i askem ol famle wetem wan pris mo wan kleva, blong oli mekem hem i fraet mo talem se hem i stap spolem famle blong tufala. !Mo hasban ya i swea long ol brata long taem blong miting! Plante taem Yasmeen i krae from we man ya i tritim nogud hem.

¹⁵ Long Haos Kingdom, ol famle blong Yasmeen long spirit oli kamfotem hem mo mekem hem i strong. Ol elda oli talem long hem blong i folem ol tok long Rom 12:17-21. (Ridim.) Yasmeen i se: “Hemia i had. Be mi askem Jehova blong i halpem mi mo mi traem bes blong mi blong folem ol tok ya. Nao taem hasban blong mi i sakem doti long kijin blong mekem mi kros, mi klinim nomo. Taem hem i tok nogud long mi, mi ansa long kwaet fasin nomo. Mo taem hem i sik, mi lukaot long hem.”

16-17. ?Yu yu lanem wanem long eksampol blong Yasmeen?

¹⁶ Yasmeen i kasem gudfala frut from we hem i lavem hasban blong hem. Hem i se: “Hasban blong mi i trastem mi moa from hem i save se bae mi neva giaman. Hem i stat blong lesin long mi wetem respek taem mitufala i tokbaot relijen, mo hem i agri blong mekem pis long haos. Naoia hem i talem long mi blong enjoem ol miting. Famle laef blong mitufala i kamgud bigwan, mo i gat pis long hom. Mi hop se wan dei, hem i akseptem trutok mo joen wetem mi long wok blong Jehova.”

¹⁷ Eksampol blong Yasmeen i soem se lav “i no letem wan samting i daonem tingting blong hem, . . . hem i gat hop long olgeta samting, mo hem i stanap strong long olgeta samting.” (1 Kor. 13:4, 7) Fasin blong no laekem narafala i strong mo i save spolem man, be lav i strong moa. I save jenisim hat blong  man. Mo i save mekem Jehova i glad. Be nating sipos ol enemi oli gohed blong no laekem yumi nating, yumi save glad yet. ?Olsem wanem i posibol?

18. ?From wanem yumi save glad taem man i no laekem yumi?

¹⁸ Jisas i talem se: “Sipos ol man oli no laekem yufala nating . . . yufala i glad.” (Luk 6:22) Yumi no jusum blong ol man oli agensem yumi. Yumi no traem blong mekem ol man oli kilim yumi i ded from bilif blong yumi. Taswe, ?from wanem yumi save glad taem man i no laekem yumi? Tingbaot tri risen. Faswan, taem yumi stanap strong, God i glad long yumi. (1 Pita 4:13, 14) Seken, bilif blong yumi i kamgud moa mo i kam strong moa. (1 Pita 1:7) Mo namba 3, bambae yumi kasem sas presen ya, laef we i no save finis.—Rom 2:6, 7.

19. ?From wanem ol aposol oli glad afta we oli kasem wip?

¹⁹ Smoltaem afta we Jisas i laef bakegen long ded, ol aposol blong hem oli ekspiriensem glad ya we hem i tokbaot. Afta we oli wipim olgeta mo stopem olgeta blong oli no moa prij, oli glad. ?From wanem? “From we God i luk olgeta se oli naf blong kasem sem long fes blong ol man from nem blong Jisas.” (Wok 5:40-42) Oli lavem Masta blong olgeta moa i bitim we oli fraet long ol enemi. Mo oli soemaot lav ya taem oli “gohed yet” blong talemaot gud nius. Tede, plante long ol brata blong yumi oli gohed blong mekem wok blong God, nomata se oli fesem hadtaem. Oli save se Jehova bambae i no fogetem wok blong olgeta mo lav we oli gat long nem blong Hem.—Hib. 6:10.

20. ?Bambae yumi tokbaot wanem long nekis stadi?

²⁰ Go kasem en blong sistem ya, wol bambae i gohed blong no laekem yumi nating. (Jon 15:19) Be i no nid blong fraet. Olsem we bambae yumi luk long nekis stadi, Jehova bambae i mekem ol gudfala man blong hem oli strong, mo i protektem olgeta. (2 Tes. 3:3) Taswe i gud yumi gohed blong lavem Jehova, lavem ol brata sista, mo lavem ol enemi blong yumi. Olsemia, bambae yumi gohed blong joengud mo stap strong long spirit, yumi ona long Jehova, mo yumi pruvum se lav i strong moa i bitim fasin ya blong no laekem narafala nating.