1. ?Wanem ol traem we maet ol man blong Jehova oli fesem?

?YU YU stap fesem wan bigfala traem? Maet wan long kongregesen i spolem yu. (Jem. 3:2) O maet ol fren long wok o long skul oli stap jikim yu, from we yu mekem wok blong Jehova. (1 Pita 4:3, 4) O maet ol famle oli traem blong stopem yu blong go long ol miting mo tokbaot bilif blong yu. (Mat. 10:35, 36) Maet yu wantem givap from we yu harem nogud tumas. Be yu save trastem se Jehova bambae i givim waes mo paoa blong yu stanap strong mo dil wetem eni trabol.

2. Folem Rom 15:4, ?fasin blong ridim Baebol i save mekem wanem long yumi?

² Long Baebol, Jehova i soem olsem wanem ol man we oli no stret gud, oli stap dil wetem ol trabol we oli had tumas. ?From wanem? Blong yumi lanem lesen long eksampol blong olgeta. Hemia nao samting we Jehova i pulum aposol Pol blong raetem. (Ridim Rom 15:4.) Taem yumi ridim ol stori ya, oli save givim kamfot mo hop long yumi. Be blong ol stori ya oli givhan long yumi, yumi no mas ridim Baebol nomo. Yumi mas letem Baebol i jenisim tingting blong yumi mo i tajem hat blong yumi. ?Yumi save mekem wanem sipos yumi wantem faenem advaes blong dil wetem wan trabol? Yumi save yusum ol fo step ya: (1) Prea, (2) Pijarem, (3) Tingting dip, mo (4) Mekem i wok. Naoia bambae yumi tokbaot ol samting we yumi nidim blong mekem long ol fo step ya. * Nao bambae yumi yusum rod ya blong stadi, blong lanem lesen long stori blong King Deved mo aposol Pol.

3. Bifo we yu stat blong ridim Baebol, ?yu mas mekem wanem, mo from wanem?

 ³ (1) Prea. Bifo we yu stat blong ridim Baebol, askem Jehova blong i halpem yu blong faenem gudfala samting long riding ya. Eksampol, sipos yu stap lukaot advaes blong dil wetem wan problem, askem Jehova blong i halpem yu blong faenem ol rul long Baebol blong lidim yu.—Fil. 4:6, 7; Jem. 1:5.

4. ?Wanem i save givhan long yu blong mekem stori long Baebol i laef?

⁴ (2) Pijarem. Jehova i wokem yumi wetem nambawan fasin ya blong pijarem samting long tingting blong yumi. Blong halpem yu blong mekem stori blong Baebol i laef, traem pijarem yu long ples blong man long stori ya. Traem blong luk ol samting we man long stori ya i luk mo traem blong gat sem filing olsem hem.

5. ?Tingting dip i minim wanem, mo olsem wanem blong mekem?

⁵ (3) Tingting dip. Tingting dip i minim se yu tingting gud long samting we yu ridim, mo yu tingbaot olsem wanem infomesen ya i save givhan long yu. Hem i givhan long yu blong joenem ol save we yu gat finis, mo kasem moa save long topik ya. Taem yu ridim Baebol we yu no tingting dip, hemia i olsem we yu luk ol smosmol pis blong gem ya pasel, be yu no joenem tugeta. Tingting dip i olsem we yu joenem ol smosmol pis ya tugeta, blong yu luk ful pija. Blong halpem yu blong tingting dip, yu save askem mo ansa long ol kwestin olsem: ‘?Man long stori ya i mekem wanem blong givhan long hem wan? ?Olsem wanem Jehova i givhan long hem? ?Olsem wanem mi save yusum ol lesen ya blong mi stanap strong?’

6. ?From wanem yumi mas mekem ol samting we yumi lanem i wok?

⁶ (4) Mekem i wok. Jisas i talem se sipos yumi no mekem ol samting we yumi lanem, yumi olsem wan man we i wokem haos blong hem long sanbij. Hem i wok had be i westem taem nomo. ?From wanem? From we taem wan strong win mo bigfala wota i kilim haos ya, bambae i foldaon. (Mat. 7:24-27) Long sem fasin, sipos yumi prea, pijarem, mo tingting dip be yumi no mekem i wok, yumi stap westem paoa blong yumi nomo. Sipos yumi kasem traem o ol man oli agensem yumi, bilif blong yumi bambae i foldaon. Be, taem yumi stadi mo yumi mekem lesen we yumi lanem i wok, yumi save mekem ol desisen we i gud moa, yumi gat moa pis, mo bilif blong yumi i kam strong moa. (Aes. 48:17, 18) Naoia bambae yumi lanem wan samting long laef blong King Deved, folem ol fo step we yumi jes tokbaot.

7. ?Bambae yumi tokbaot wanem stori?

⁷ ?I bin gat wan fren o famle we i spolem yu? Sipos yes, stori blong Absalom we i boe blong King Deved bambae i givhan long yu. Hem i agensem papa blong hem mo i traem blong tekemaot kingdom long hem.—2 Saml. 15:5-14, 31; 18:6-14.

8. ?Yu save mekem wanem blong Jehova i halpem yu?

⁸ (1) Prea. Bifo we yu ridim stori ya, talem long Jehova olsem wanem yu harem nogud from we narafala i spolem yu. (Sam 6:6-9) Talemaot stret filing blong yu. Afta, askem Jehova blong i halpem yu blong faenem ol rul we i save lidim yu blong dil wetem jalens ya.

9. Tokbaot situesen bitwin Deved mo Absalom long sot tok nomo.

 ⁹ (2) Pijarem. Tingbaot ol samting we i kamaot long stori ya, mo pijarem filing blong King Deved. Absalom i wok plante yia finis blong pulum ol man blong oli lavem hem. (2 Saml. 15:7) Long stret taem we Absalom i wantem, hem i sanem ol spae oli go long olgeta ples long Isrel, blong rerem ol man blong oli akseptem hem olsem king blong olgeta. Hem i pulum Ahitofel tu we i wan gudfala fren mo advaesa blong Deved, blong i rebel agensem Deved. Absalom i mekem hem wan i kam king, mo i traem blong holem mo kilim Deved, we maet long taem ya i sik bigwan. (Sam 41:1-9) Deved i faenemaot plan ya nao i ronwe long Jerusalem. Biaen, ami blong Absalom i faet agensem ami blong Deved. Ol rebel ya oli lus mo Absalom i ded.

10. ?Wanem riaksen we King Deved i save gat?

¹⁰ Mo tu, pijarem olsem wanem Deved i mas harem nogud from ol samting ya. Hem i lavem Absalom mo i trastem Ahitofel. Be yet, tufala fren ya blong hem oli spolem hem. Tufala i mekem hem i harem nogud bigwan, mo tufala i wantem kilim hem i ded tu. Deved i save lusum tras blong hem long ol nara fren blong hem, i save ting se olgeta tu oli joenem Absalom. Sipos Deved i wantem, hem i save tingbaot hem nomo mo ronwe hem wan. O hem i save givap. Be Deved i no mekem olsem. Hem i winim hadtaem ya. ?From wanem hem i naf blong mekem olsem?

11. ?Deved i mekem wanem long hadtaem ya?

¹¹ (3) Tingting dip. ?Yu save lanem wanem rul long stori ya? Yu ansa long kwestin ya: “?Deved i mekem wanem blong givhan long hem wan?” Hem i no panik mo hariap blong mekem ol desisen we oli no waes. Mo hem i no slodaon, olsem se fraet i winim hem. Be hem i prea long Jehova blong i halpem hem. Mo i askem ol fren blong oli halpem hem. Mo hem i kwik blong folem ol desisen we hem i mekem. Nating se hem i harem nogud, hem i no letem tingting blong hem i kam konkon mo kros long ol narafala. Hem i gohed blong trastem Jehova mo ol fren blong hem.

12. ?Jehova i mekem wanem blong halpem Deved?

¹² ?Olsem wanem Jehova i halpem Deved? Sipos yu mekem risej, bambae yu lanem se Jehova i givim paoa we Deved i nidim, blong stanap strong. (Sam 3:1-8; supaskripsen) Jehova i blesem ol desisen we Deved i mekem. Mo i sapotem ol gudfala fren blong Deved taem oli stap faet blong protektem king blong olgeta.

13. ?Olsem wanem yu save mekem olsem Deved sipos wan narafala i spolem yu? (Matiu 18:15-17)

¹³ (4) Mekem i wok. Askem se: ‘?Olsem wanem mi save mekem olsem Deved?’ Yu mas kwik blong stretem problem ya. Yu save folem advaes blong Jisas long Matiu japta 18. Maet situesen blong yu i mekem se yu folem advaes ya stret, o maet yu folem rul we i stap long advaes ya. (Ridim Matiu 18:15-17.) Be yu no mas mekem ol kwik desisen we i kamaot from filing blong yu nomo. Yu mas prea long Jehova blong i kwaetem hat blong yu, mo i givim waes we yu nidim blong dil wetem problem ya. Yu mas gohed blong trastem ol fren blong yu, mo akseptem help blong olgeta. (Prov. 17:17) Impoten moa, yu folem advaes blong Jehova we i stap long Tok blong hem.—Prov. 3:5, 6.

14. ?Wanem trabol i save mekem se yu ridim 2 Timoti 1:12-16; 4:6-11, 17-22?

¹⁴ ?Yu yu stap fesem ol famle we oli agensem yu? ?O yu stap long wan kantri we yu no save mekem wok blong Jehova, o wok ya i tabu? Sipos yes, maet ol vas ya bambae oli leftemap tingting blong yu, hemia 2 Timoti 1:12-16 mo 4:6-11, 17-22. * Pol i raetem ol tok ya taem hem i stap long kalabus.

15. ?Yu save askem wanem long Jehova?

¹⁵ (1) Prea. Bifo we yu ridim ol vas ya, talemaot problem blong yu long Jehova mo olsem wanem yu harem nogud from. Biaen, askem Jehova blong i halpem yu blong luksave ol rul we i stap long stori blong ol trabol we Pol i kasem. Ol rul ya bambae i halpem yu blong save wanem blong mekem.

16. Tokbaot situesen blong Pol long sot tok nomo.

¹⁶ (2) Pijarem. Pijarem yu long ples blong Pol. Hem i stap long kalabus long Rom mo ol jen oli fasem hem. Hem i bin stap long kalabus bifo, be naoia hem i sua se bambae oli kilim hem i ded. Sam long ol fren blong hem oli lego hem, mo hem tu i taed tumas.—2 Tim. 1:15.

17. ?Wanem riaksen we Pol i save gat?

¹⁷ Sipos Pol i wantem, hem i save fokas long laef blong hem bifo, mo tingting se sipos hem i bin jusum wan defren wok, bambae oli no arestem hem. Maet hem i save kros long ol man long distrik blong Esia we oli lego hem, mo i save gat nogud tingting long ol fren blong hem. Be Pol i no mekem olsem. ?From wanem hem i no fraet mo i gat hop?

18. ?Pol i mekem wanem long hadtaem we hem i fesem?

¹⁸ (3) Tingting dip. Yu ansa long kwestin ya: “?Pol i mekem wanem blong givhan long hem wan?” Nating se Pol i fesem ded, be hem i no fogetem impoten samting, hemia blong givim glori long Jehova. Mo hem i gohed blong faenem ol rod blong enkarejem ol narafala. Hem i prea oltaem blong dipen long Jehova. (2 Tim. 1:3) Hem i no fokas tumas long olgeta ya we oli lego hem, be hem i glad tumas long ol fren blong hem we oli stap givhan long hem. Mo tu, Pol i gohed blong stadi long Tok blong God. (2 Tim. 3:16, 17; 4:13) Impoten moa, hem i trastem fulwan se Jehova mo Jisas i lavem hem. Tufala i no lego hem, mo bambae tufala i givim presen from gudfala wok blong hem.

19. ?Jehova i mekem wanem blong halpem Pol?

¹⁹ Jehova i givim woning long Pol se bambae ol enemi oli agensem hem from we hem i wan Kristin. (Wok 21:11-13) ?Olsem wanem Jehova i halpem Pol? Hem i ansa long prea blong Pol mo biaen i givim paoa long hem. (2 Tim. 4:17) Mo hem i talem long Pol se bambae hem i kasem presen we hem i stap wok had from. Jehova i pulum ol gudfala fren blong Pol tu, blong oli givhan long hem.

20. Taem yu tingbaot Rom 8:38, 39, ?olsem wanem yu save gat bilif olsem Pol?

²⁰ (4) Mekem i wok. Askem se: ‘?Olsem wanem mi save mekem olsem Pol?’ Olsem Pol, yumi mas ekspektem se ol narafala bambae oli agensem yumi from bilif blong yumi. (Mak 10:29, 30) Blong holemstrong bilif taem yumi kasem traem, yumi mas prea blong dipen long Jehova, mo gat wan gudfala program blong stadi  oltaem. Mo yumi mas tingbaot oltaem se impoten samting we yumi save mekem, hemia blong givim glori long Jehova. Yumi save sua se Jehova bambae i neva lego yumi, mo i no gat wan samting i save stopem hem blong i lavem yumi.—Ridim Rom 8:38, 39; Hib. 13:5, 6.

21. ?Wanem i halpem Aya mo Hector blong winim ol trabol we oli fesem?

²¹ Nomata situesen blong yumi, yumi save kasem paoa from ol stori long Baebol. Eksampol, Aya we i wan paenia long Japan, i talem se stori blong Jona i halpem hem blong i no fraet blong prij long pablik ples. Hector i wan yangfala long Indonesia mo ol perens blong hem oli no Witnes. Be stori blong Rut i halpem hem blong i save Jehova mo i lanem blong mekem wok blong Hem.

22. ?Olsem wanem haf ya “Folem Fasin Blong Bilif Blong Olgeta,” oli save givhan long yu?

²² ?Weples yu save faenem ol stori blong Baebol we i save givim paoa long yu? Ol video mo odio drama, mo ol stori long haf ya we i stap kamaot oltaem “Folem Fasin Blong Bilif Blong Olgeta,” oli givhan blong mekem ol stori blong Baebol i laef. * Bifo we yu wajem, lesin, o ridim ol stori ya, askem Jehova blong i halpem yu blong faenem ol stret poen we yu save folem. Pijarem yu wan long ples blong man long stori ya. Tingting dip long samting we ol gudfala man blong Jehova oli mekem, mo olsem wanem Hem i givhan long olgeta blong oli winim ol hadtaem ya. Biaen yu mekem ol lesen we yu lanem i wok long prapa situesen blong yu. Talem tangkiu long Jehova from help we hem i givim finis long yu. Mo soem se yu glad long help ya taem yu lukaotem janis blong enkarejem mo sapotem ol narafala.

23. Folem Aesea 41:10, 13, ?Jehova i promes blong mekem wanem long yumi?

²³ Laef long wol ya we Setan i bos long hem, i had, mo samtaem i save mekem yumi harem nogud. (2 Tim. 3:1) Be i no nid blong wari mo fraet. Jehova i save problem we yumi stap fesem. Taem yumi foldaon, hem i promes blong holemstrong yumi long raethan blong hem. (Ridim Aesea 41:10, 13.) Yumi sua se wetem help blong hem, yumi save kasem paoa long Baebol mo winim eni trabol.