1. ?Wanem samting we ol man oli makem long faswan taem we oli joen long wan miting? (Yu luk pija tu.)

 TRAEM tingbaot wan kapol we hemia i faswan taem blong tufala blong joen long wan miting long Haos Kingdom Blong Ol Witnes Blong Jehova. Tufala i sapraes tumas taem ol brata mo sista oli welkamem gud tufala, mo luk lav we oli gat bitwin olgeta. Taem tufala i stap gobak long haos, waef ya i talem long hasban blong hem se: ‘I gat wan samting we i defren long saed blong ol Witnes blong Jehova, mo mi rili laekem blong stap wetem olgeta.’

2. ?From wanem samfala oli stambol?

² Lav we ol man blong Jehova oli gat insaed long kongregesen i rili spesel. I tru, ol Witnes blong Jehova oli no stret gud olgeta. (1 Jon 1:8) Taswe, taem yumi save gud olgeta long kongregesen, bambae i isi blong yumi luk ol slak fasin blong olgeta. (Rom 3:23) Sore tumas, samfala oli letem ol slak fasin blong ol narafala i mekem oli stambol.

3. ?Wanem i makemaot ol trufala disaepol blong Kraes? (Jon 13:34, 35)

³ Traem luk bakegen stamba vas blong stadi ya. (Ridim Jon 13:34, 35.) ?Wanem nao i makemaot ol trufala disaepol blong Kraes? Hemia lav, be i no talem se oli mas stret gud olgeta. Mo tu, makem se Jisas i no talem se: ‘Bambae yufala i save se yufala i disaepol blong mi.’ Be hem i se: “Bambae olgeta man oli save se yufala i disaepol blong mi.” Jisas i soemaot se i no ol man blong hem nomo we bambae oli luksave lav ya, be ol man aotsaed long kongregesen tu bambae oli  luksave lav ya we i makemaot ol trufala disaepol blong Kraes.

4. ?Maet sam man oli wantem save wanem long saed blong ol tru Kristin?

⁴ Sam man we oli no ol Witnes blong Jehova maet oli gat tingting se: ‘?Olsem wanem lav i makemaot ol trufala disaepol blong Kraes? ?Olsem wanem Jisas i soemaot lav long ol aposol blong hem? ?Mo i posibol blong folem eksampol blong Jisas tede?’ Yumi tu ol Witnes we i baptaes finis, yumi mas tingting gud long ansa blong ol kwestin ya. Taem yumi mekem olsem, hemia bambae i halpem yumi blong soemaot moa lav, speseli taem yumi stap dil wetem ol mastik blong ol narafala.—Efes. 5:2.

5. Eksplenem ol tok ya blong Jisas long Jon 15:12, 13.

⁵ Jisas i talem klia se i gat wan spesel kaen lav we bambae i makemaot ol man blong hem. (Ridim Jon 15:12, 13.) Jisas i talem long ol man blong hem se: “Yufala i mas lavlavem yufala olsem we mi mi lavem yufala.” ?Hemia i minim wanem? Jisas i gohed blong eksplenem se, hemia wan lav we i save pulum wan Kristin blong lego samting we hem nomo i wantem, mo samtaem i save rere blong lusum laef blong hem blong sevem narafala. b

6. ?Olsem wanem Tok blong God i soemaot se lav i impoten?

⁶ Tok blong God i soemaot long yumi se lav i rili impoten. Eksampol, hemia sam vas we plante man oli laekem tumas: “God hem i lav.” (1 Jon 4:8) “Yu mas lavem neba blong yu olsem we yu lavem yu wan.” (Mat. 22:39) “Lav i kavremap plante plante sin.” (1 Pita 4:8) “Lav i no save finis samtaem.” (1 Kor. 13:8) Ol vas ya mo plante narafala vas bakegen, oli soemaot klia se i rili impoten blong wokem mo soemaot nambawan fasin ya lav.

7. ?From wanem Setan i neva save mekem ol man oli joen gud mo lavlavem olgeta?

 ⁷ Plante man oli askem se: ‘?Olsem wanem blong luksave trufala skul? Evri skul oli talem se oli stap tijim trutok, be olgeta wanwan oli tijim samting we i defren long saed blong God.’ Setan i mekem se i gat plante giaman skul, we i mekem se i had blong ol man oli luksave se weswan i trufala skul. Be hem i neva save mekem se i gat wan grup blong ol Kristin raon long wol oli lavlavem olgeta. Jehova nomo i save mekem samting ya, from we lav i kamaot long Jehova. Ol man nomo we Jehova i stap blesem olgeta mo we tabu spirit i stap long olgeta, oli naf blong lavlavem olgeta. (1 Jon 4:7) Hemia nao from wanem Jisas i talem se ol man blong hem nomo bambae oli naf blong soemaot trufala lav ya.

8-9. ?Lav we ol Witnes blong Jehova oli gat bitwin olgeta, i gat paoa long hamas man?

⁸ Olsem we Jisas i talem, plante man bambae oli luksave ol trufala man blong hem from lav we oli gat bitwin olgeta. Eksampol, wan brata we nem blong hem Ian i tingbaot faswan taem we hem i bin go long wan bigfala asembli, we i stap long wan stadium klosap long haos blong hem. Ian i bin go long stadium ya sam manis bifo blong wajem spot. Hem i talem se: “Ol man we oli kam long bigfala asembli ya, fasin blong olgeta i defren long ol man we oli kam blong wajem spot. Ol Witnes oli kaen, oli jenis gud, mo ol pikinini blong olgeta oli gat gudfala fasin. Antap long hemia, mi luk se ol man ya oli glad mo oli gat pis, mo hemia samting we mi wantem long laef blong mi. Mi no tingbaot ol tok we mi harem long dei ya, be mi tingbaot yet fasin we ol Witnes oli soemaot.” c Olgeta oli gat ol fasin ya from we oli lavlavem olgeta. From we yumi lavem ol brata mo sista blong yumi, yumi kaen long olgeta mo respektem olgeta.

⁹ Wan brata we nem blong hem Jon, i gat sem filing olsem taem hem i stat blong kam long ol miting blong kongregesen. Hem i talem se: “Mi mi sapraes blong luk se evriwan oli fren gud, oli olsem ol tabu man. Lav we oli soemaot i mekem mi sua gud se mi faenem tufala relijen.” d Ol ekspiriens olsem mo plante moa oli pruvum se ol man blong Jehova oli ol trufala Kristin.

10. ?Wetaem yumi gat moa janis blong soemaot Kristin lav? (Yu luk futnot tu.)

¹⁰ Olsem we yumi tokbaot long stat, i no gat wan long ol brata mo sista blong yumi we i stret gud olgeta. Taswe, samtaem oli save talem o mekem samting we yumi harem nogud from. e (Jem. 3:2) Long taem olsem, hemia i wan nambawan janis blong soemaot Kristin lav ya tru long ol aksen blong yumi. Folem tingting ya, ?yumi save lanem wanem long eksampol blong Jisas?—Jon 13:15.

11. ?Wanem slak fasin we Jemes mo Jon i soemaot? (Yu luk pija tu.)

¹¹ Jisas i no ekspektem ol man blong hem blong oli mekem samting we i stretgud olgeta. Be, hem i halpem olgeta blong oli traehad blong winim ol slak fasin blong olgeta, blong Jehova i save glad long olgeta. Wan taem, tu aposol blong Jisas, hemia Jemes mo Jon, tufala i talem long mama blong tufala blong i go askem long Jisas blong i givim hae posisen long tufala long Kingdom. (Mat. 20: 20, 21) Jemes mo Jon i soemaot se tufala i praod mo tufala i wantem se man i leftemap tufala.—Prov. 16:18.

12. ?Jemes mo Jon nomo i soemaot se tufala i gat ol slak fasin? Yu eksplenem.

¹² I no Jemes mo Jon nomo we tufala i soemaot long taem ya se tufala i gat ol slak fasin. Makem fasin we ol narafala aposol oli gat long taem ya: “Taem ol ten narafala oli harem samting ya, oli kros long tufala brata ya.” (Mat. 20:24) Traem tingbaot ol nogud tok we ol narafala aposol oli stap talem long Jemes mo Jon. Maet oli talem ol tok olsem: ‘?Yutufala i ting se yutufala i gud moa long mifala, nao yutufala i askem blong gat wan hae posisen long Kingdom? Mifala tu i wok had wetem Jisas. !Mo mifala i gat raet blong kasem ol spesel privilej olsem!’ Nomata wanem tok oli talem, be long taem ya oli foget se oli sud lavlavem olgeta oltaem mo kaen long olgeta.

13. ?Jisas i mekem wanem taem hem i luk slak fasin blong ol aposol? (Matiu 20:25-28)

¹³ ?Olsem wanem Jisas i dil wetem situesen ya? Hem i no kros long olgeta. Mo hem i no talem se bambae hem i lukaot ol narafala aposol we oli gud moa, we oli gat tingting daon mo oltaem bambae oli lavlavem olgeta. Be, Jisas i gat longfala tingting taem i toktok long olgeta, from hem i save se oli wantem mekem samting we i stret. (Ridim Matiu 20:25-28.) Hem i gohed blong soemaot lav  taem i dil wetem olgeta, nating se oli gohed blong agiu se hu long olgeta i hae moa.—Mak 9:34; Luk 22:24.

14. ?Ol aposol blong Jisas oli gruap long medel blong ol man we oli gat wanem kaen tingting?

¹⁴ I sua se Jisas i tingbaot kalja mo bakgraon we ol aposol oli gruap long hem. (Jon 2:24, 25) Oli gruap long wan taem we ol lida blong skul oli pulum ol man blong tinghae long fasin ya blong gat haenem mo hae posisen. (Mat. 23:6) Ol lida blong skul blong ol man Jiu tu oli ting se oli stret moa i bitim ol narafala. f (Luk 18:9-12) Jisas i kasemsave se tingting ya we aposol oli gruap wetem, i save gat paoa long tingting we oli gat long olgeta wan mo ol narafala. (Prov. 19:11) Hem i no ekspektem se ol disaepol bambae oli no mekem mastik, mo hem i no kros bitim mak long olgeta taem oli mestem. Hem i save se oli gat wan gudfala hat, taswe hem i gohed blong halpem olgeta blong oli gat tingting daon, mo blong oli soemaot lav long ol narafala, i bitim we oli traem blong mekem narafala i leftemap olgeta.

15. ?Yumi save lanem wanem long stori blong Jemes mo Jon?

¹⁵ Yumi save lanem plante samting long stori blong Jemes mo Jon. I no stret nating we tufala i askem blong gat hae posisen long Kingdom. Mo ol narafala aposol tu oli mekem i no stret, taem oli letem samting ya i spolem fasin blong olgeta blong joen gud. Be Jisas i stretem ol 12 aposol ya long fasin we i kaen mo i soemaot lav. ?Yumi lanem wanem? Yumi no mas tingbaot nomo samting we narafala i mekem, be yumi mas tingbaot tu se bambae yumi mekem wanem taem narafala i mestem o yumi luk slak fasin blong hem. ?Wanem i save halpem yumi? Taem yumi harem nogud from wan samting we wan brata o sista i mekem, yumi save askem yumi wan se: ‘?From wanem mekem mi harem nogud tumas from samting we hem i mekem? ?Hemia i soemaot wan slak fasin we mi mas winim? ?Man ya we i mekem mi harem nogud, hem i stap fesem wan hadtaem? Nating sipos mi harem se i stret nomo we mi kros, ?mi save soemaot lav mo fogivim hem?’ Taem yumi soem se yumi lavlavem yumi, yumi pruvum se yumi ol tru disaepol blong Kraes.

16. ?Yumi save lanem wanem moa long eksampol blong Jisas?

¹⁶ Eksampol blong Jisas i tijim yumi se yumi mas traem kasemsave long ol brata mo sista blong yumi. (Prov. 20:5) Jisas i save samting we i stap long hat blong man. Nating se yumi no save mekem olsem hem, be yumi save soemaot longfala tingting long ol brata mo sista, taem oli mekem yumi kros. (Efes. 4:1, 2; 1 Pita 3:8) Bambae i isi blong mekem olsem, sipos yumi traem save gud olgeta. Hemia wan eksampol.

17. ?Wanem i kamaot taem wan eria elda i traem blong save gud wan brata?

¹⁷ Wan eria elda i tingbaot wan brata long wan kongregesen we hem i stap visitim long Is Afrika. Fastaem hem i ting se brata ya i no kaen nating. ?Eria elda ya i mekem wanem? Hem i talem se: “Mi no traem spae glas long hem, be mi disaed blong save gud hem moa.” Taem hem i mekem olsem, hem i faenemaot plante samting long saed bakgraon blong  brata ya, we i mekem se i gat paoa long ol fasin blong hem. Hem i gohed se: “Taem mi kasemsave se brata ya i bin traehad blong mekem plante jenis blong i save joen gud wetem ol narafala, mo naoia mi luksave se hem i mekem ol jenis ya, hemia i mekem mi respektem hem mo mitufala i kam ol gudfala fren.” Yes, taem yumi traem save gud ol brata mo sista blong yumi, bambae i moa isi blong soem lav long olgeta.

18. ?Wanem ol kwestin we yumi save askem, sipos yumi wantem go toktok wetem narafala we i mekem yumi harem nogud? (Ol Proveb 26:20)

¹⁸ Samtaem, maet yumi harem se yumi mas toktok wetem wan Kristin we i mekem yumi harem nogud. Be bifo we yumi mekem olsem, i gud yumi askem se: ‘?Mi mi kasemsave fulwan long samting we i hapen?’ (Prov. 18:13) ‘?Hem i no minim blong mekem mi harem nogud?’ (Pri. 7:20) ‘?Mi mi mekem sem mastik olsem finis?’ (Pri. 7:21, 22) ‘Sipos mi go toktok long hem, ?hemia bambae i mekem problem i kam bigwan moa?’ (Ridim Ol Proveb 26:20.) Sipos yumi tekem taem blong tingbaot ol kwestin olsem, bambae yumi faenemaot se lav i save mekem yumi no moa tingbaot samting we i hapen.

19. ?Yu gat strong tingting blong mekem wanem?

¹⁹ Ol Witnes blong Jehova oli pruvum se oli ol tru disaepol blong Kraes from oli lavlavem olgeta. Yumi wanwan i pruvum se yumi trufala man blong Jisas, taem yumi soemaot lav long ol brata mo sista, nating se oli gat ol slak fasin. Taem yumi soemaot lav ya, ol narafala tu bambae oli luksave se hemia nao trufala skul, mo oli joenem yumi blong wosipim Jehova we i God blong lav. I gud yumi gat strong tingting blong gohed blong soemaot lav ya we i makemaot ol tru Kristin.