1-2. ?Wanem i hapen taem wan man i baptaes? ?Mo naoia bambae yumi tokbaot wanem?

 ?SAMTAEM yu bin wajem wan grup blong ol man we oli rere blong baptaes? Yu harem we oli ansa finis wetem strong bilif long tufala kwestin. Yu luk bigfala smael long fes blong ol famle mo fren blong olgeta. Mo taem oli kamaot long wota, yu harem ol man oli klapem han mo yu luk fes blong olgeta i glad we i glad. Evri wik, plante taosen man oli tekem step ya blong givim laef blong olgeta long Jehova mo tekem baptaes blong kam ol Witnes blong hem.

² ?Olsem wanem long yu? Sipos yu stap tingbaot blong tekem baptaes, yu yu olsem wan laet we i saen long tudak long rabis wol ya, from we yu “stap lukaotem Jehova.” (Sam 14:1, 2) Nating se yu yangfala o olfala, be stadi ya i blong yu. Mo tu, yumi we yumi baptaes finis, yumi wantem mekem tingting blong yumi i strong moa blong gohed blong mekem wok blong Jehova olwe. Taswe naoia i gud yumi tokbaot tri risen from wanem yumi wantem mekem wok blong Jehova.

3. ?From wanem ol man blong Jehova oli laekem trutok mo stret fasin? (Ol Sam 119:128, 163)

³ Jehova i talem long ol man blong hem se oli mas “laekem trutok.” (Sek. 8:19) Jisas i pulum ol man blong hem blong oli folem stret fasin. (Mat. 5:6) Hemia i min se yumi mas wantem tumas blong mekem samting we i stret, i gud, mo i klin long ae blong God. ?Yu yu laekem trutok mo stret fasin? I sua se yu laekem. Yu no laekem nating ol giaman tok, mo ol nogud fasin. (Ridim Ol Sam 119:128, 163.) Setan we i rula blong wol, hem nao i man blong giaman. (Jon 8:44; 12:31) Setan i wantem tumas blong spolem tabu nem blong Jehova God. Stat long garen blong Iden, hem i stap talemaot olbaot ol giaman  toktok long saed blong God. Hem i giaman se Jehova i wan Rula we i tingbaot hem wan nomo, i giaman long ol man, mo i blokem olgeta blong oli no kasem ol gudfala samting. (Jen. 3:1, 4, 5) Ol giaman tok ya blong Setan i mekem se tingting mo hat blong ol man i agensem Jehova. Taem ol man oli no “laekem trutok,” Setan i save lidim olgeta blong mekem plante rabis fasin mo ol fasin we oli no stret nating.—Rom 1:25-31.

4. ?Olsem wanem Jehova i soemaot se hem i “God blong trutok”? (Yu luk pija tu.)

⁴ Jehova i “God blong trutok,” mo hem i glad nomo blong tijim trutok long ol man we oli lavem hem. (Sam 31:5) Taem hem i mekem olsem, hem i leftemap olgeta, i mekem oli fri long ol giaman tok blong Setan. Mo tu, Jehova i tijim ol man blong hem blong oli tok tru mo mekem stret fasin. Hemia i mekem se oli gat pis long tingting, mo oli respektem olgeta wan bakegen. (Prov. 13:5, 6) ?Olsem wanem? ?Hem i mekem olsem long yu taem yu stap stadi Baebol? Yu lanem se ol rod blong Jehova oli save mekem i gud long yu mo long olgeta man long wol. (Sam 77:13) Taswe yu wantem stanap long saed blong stret fasin blong God. (Mat. 6:33) Yu wantem leftemap trutok, mo pruvum se ol giaman toktok long saed blong Jehova oli rong. ?Olsem wanem yu save mekem samting ya?

5. ?Olsem wanem yu save stanap long saed blong trutok mo stret fasin?

⁵ Sipos yu jusum blong folem stret rod long laef, i olsem we yu talem se: ‘Mi mi sakemaot ol giaman tok blong Setan, mo mi stanap long saed blong trutok. Mi wantem se Jehova i King blong mi, mo mi wantem mekem samting we hem i talem se i stret.’ ?Olsem wanem blong gat strong tingting olsem? Yu mas prea long Jehova mo givim laef blong yu i go long hem, mo biaen yu mas baptaes blong soemaot samting ya long ol man. Taem yu laekem trutok mo stret fasin, hemia i save pusum yu blong wantem tekem baptaes.

6. Folem Ol Sam 45:4, ?wanem sam bigfala risen blong lavem Jisas Kraes?

⁶ ?From wanem yu yu lavem Jisas Kraes? Makem sam bigfala risen long Ol Sam 45:4. (Ridim.) Jisas i lavem trutok, tingting daon, mo stret fasin. Sipos yu yu lavem trutok mo stret fasin, bambae yu lavem Jisas Kraes tu. Tingbaot se Jisas i no fraet blong leftemap  trutok mo stret fasin. (Jon 18:37) ?Be olsem wanem hem i leftemap tingting daon?

7. ?Yu yu laekem wanem long fasin blong Jisas blong gat tingting daon?

⁷ Jisas i soemaot gudfala eksampol blong tingting daon. Eksampol, hem i neva leftemap hem wan be oltaem i leftemap Papa blong hem. (Mak 10:17, 18; Jon 5:19) ?Wanem filing blong yu taem yu luk we hem i gat tingting daon? I sua se hemia i pusum yu blong lavem Pikinini blong God mo folem hem. ?From wanem Jisas i gat tingting daon? From we hem i lavem Papa blong hem, mo i folem fasin blong hem. (Sam 18:35; Hib. 1:3) Taem yu luk we Jisas i soemaot gud ol nambawan fasin blong Jehova, hemia i pulum yu blong lavem hem.

8. ?From wanem yumi glad se Jisas i King blong yumi?

⁸ Yumi glad se Jisas i King blong yumi, from we hem i wan nambawan Rula. Jehova nao i trenem Pikinini blong hem, mo i putumap hem blong i rul. (Aes. 50:4, 5) Tingbaot tu se Jisas i lego plante samting blong halpem yumi. (Jon 13:1) From we Jisas i King blong yu, i stret nomo we yu lavem hem. Hem i eksplenem se olgeta we oli lavem hem, mo we hem i singaot olgeta se ol fren blong hem, oli soemaot lav ya taem oli obei long ol komanmen blong hem. (Jon 14:15; 15:14, 15) !Tru ya, i wan bigfala ona blong kam wan fren blong Pikinini blong Jehova!

9. ?Long wanem fasin baptaes blong yumi i sem mak long baptaes blong Jisas?

⁹ Wan long ol komanmen blong Jisas, hemia se ol man blong hem oli mas baptaes. (Mat. 28:19, 20) Hem i soemaot eksampol long yumi. Be baptaes blong hem i defren long baptaes blong yumi. (Yu luk bokis ya “ ?Olsem Wanem Baptaes Blong Jisas i Defren Long Baptaes Blong Yumi?”) Nating se i olsem, i gat sam samting long tufala baptaes ya we i sem mak. Taem Jisas i baptaes, hem i lego hem i go long han blong Papa blong hem, blong mekem wil blong hem. (Hib. 10:7) Long sem fasin, ol man blong Kraes oli baptaes blong soemaot se oli givim laef blong olgeta i go long Jehova God. Oli no moa mekem wil blong olgeta, be wil blong God. Taswe, naoia oli stap folem eksampol blong Masta blong olgeta.

10. ?Wanem sam risen we i mekem yu lavem Jisas, mo lav ya save pusum yu blong mekem wanem?

¹⁰ Yu yu bilif se Jisas i stret Pikinini blong Jehova, mo King we God i putumap blong rulum yumi. Yu save se Jisas we i gat tingting daon, i soemaot gud ol fasin blong Papa blong hem. Yu lanem finis se hem i givim kakae long ol man we oli hanggri, hem i kamfotem ol man we oli harem nogud, mo tu hem i hilim ol sikman. (Mat. 14:14-21) Yu luk finis olsem wanem hem i lidim kongregesen tede. (Mat. 23:10) Mo yu save se bambae hem i mekem plante moa samting long fiuja, from we hem i King long Kingdom blong God. ?Olsem wanem yu save soemaot se yu lavem hem? Hemia taem yu folem eksampol blong hem. (Jon 14:21) Yu stat long rod ya taem yu givim laef blong yu long Jehova mo yu baptaes.

11. ?Wanem risen blong baptaes we i impoten moa? ?From wanem yu talem olsem?

¹¹ ?Wanem risen blong baptaes we i impoten moa? Jisas i talem komanmen blong God we i impoten moa long ol narawan, i se: “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.” (Mak 12:30) ?Olsem wanem? ?Ol tok ya oli soemaot lav we yu yu gat long God?

12. ?From wanem yu yu lavem Jehova? (Yu luk pija tu.)

¹² I gat plante risen blong lavem Jehova. Eksampol, yu kasemsave se hem i “stamba blong laef” mo hem i givim “olgeta gudfala presen mo  ol presen we oli nambawan.” (Sam 36:9; Jem. 1:17) Evri gudfala samting we yumi kasem, i kam long God we i lavem yumi, mo i glad blong givim samting long yumi.

13. ?From wanem ransom i wan nambawan presen?

¹³ Ransom i wan nambawan presen we Jehova i givim long yumi. ?From wanem yumi talem olsem? Tingbaot se Jehova mo Pikinini blong hem i fren gud. Jisas i talem se: “Papa i lavem mi” mo “mi mi lavem Papa.” (Jon 10:17; 14:31) Long ol milian yia we tufala i stap tugeta, lav blong tufala i kam strong moa. (Prov. 8:22, 23, 30) Taswe, i sua se God i mas harem nogud taem i letem Pikinini blong hem i safa mo i ded. Jehova i lavem tumas olgeta man mo yu tu, taswe hem i rere blong givim Pikinini blong hem we i lavem tumas, olsem wan sakrefaes blong mekem se yu mo ol narafala man i save laef olwe. (Jon 3:16; Gal. 2:20) Taswe, i no gat wan risen we i impoten moa i bitim we yu lavem God.

14. ?Wanem beswan samting we yu save jusum blong mekem long laef blong yu?

¹⁴ Taem yu kasemsave moa long Jehova, lav blong yu i kam strong moa. I sua se yu wantem gohed blong kam klosap moa long hem naoia mo blong olwe. Mo yu save mekem olsem. Long kaen fasin, hem i askem long yu blong yu mekem hem i glad. (Prov. 23:15, 16) Yu save mekem olsem long ol toktok mo ol  aksen blong yu. Fasin blong laef blong yu bambae i soemaot se yu rili lavem Jehova. (1 Jon 5:3) Hemia beswan samting we yu save jusum blong mekem long laef blong yu.

15. ?Olsem wanem yu save soemaot se yu lavem Jehova?

¹⁵ ?Olsem wanem yu save soemaot se yu lavem Jehova? Fastaem, yu mas mekem wan spesel prea blong givim laef blong yu i go long God ya we i tru. (Sam 40:8) Afta, yu baptaes blong soemaot samting ya long ol man. Olsem we yumi tokbaot finis long stadi ya, hemia wan taem blong bigfala glad, mo yu statem wan niufala laef. Naoia yu no moa laef blong mekem samting we yu yu wantem, be blong mekem Jehova i glad. (Rom 14:8; 1 Pita 4:1, 2) Maet yu ting se hemia i wan bigfala step blong tekem. I tru, be i openem rod blong laef we i beswan. ?Hemia i minim wanem?

16. Folem Ol Sam 41:12, ?Jehova bambae i givim wanem long olgeta we oli mekem wok blong hem long ful laef blong olgeta?

¹⁶ Jehova nao i glad blong givim samting i bitim eni narafala man. Nomata wanem yu givim long hem, be oltaem bambae hem i givimbak moa long yu. (Mak 10:29, 30) Nating se yumi stap long rabis wol ya we klosap nao bambae i lus, be hem i givim wan gudfala laef long yumi we i mekem yumi glad. Mo hemia i stat nomo. Rod we yu stat blong folem taem yu baptaes, i no gat en blong hem. Yu save gohed blong mekem wok blong Papa blong yu blong olwe. Lav we yu mo Jehova i gat bitwin yutufala bambae i gohed nomo blong kam strong moa, mo bambae yu laef gogo i no save finis olsem hem.—Ridim Ol Sam 41:12.

17. ?Yu save givim wanem long Jehova we hem i no gat?

¹⁷ Taem yu givim laef blong yu long Jehova mo yu baptaes, yu givim wan samting we i rili sas long Papa blong yu long heven. Hem i givim evri gudfala samting long yu, evri samting blong mekem yu hapi, mo evri samting long laef we yu harem gud long hem. Nao blong soemaot se yu glad long ol samting ya, yu givim wan samting long hem we hem i no gat, hemia ful laef blong yu we yu yusum blong mekem wok blong hem. (Job 1:8; 41:11;  Prov. 27:11) I no gat wan rod we i moa gud blong yusum laef blong yu. I klia nomo se lav we yu gat long Jehova, hemia nao beswan risen blong baptaes.

18. ?Wanem ol kwestin we yu save askem?

¹⁸ Wanem ansa blong yu long kwestin ya, ?Bambae mi mi baptaes? Yu nomo yu save ansa long kwestin ya. Be maet i gud blong askem se, ‘?From wanem mi wantem wet?’ (Wok 8:36) Tingbaot trifala risen ya we yumi tokbaot. Faswan, yu lavem trutok mo stret fasin. Nao i gud yu askem se, ‘?Mi mi wantem luk taem ya we evri man i tok tru mo mekem stret fasin?’ Seken wan, yu lavem Jisas Kraes. Traem askem se, ‘?Mi mi wantem se Pikinini blong God i King blong mi, mo mi wantem folem eksampol blong hem?’ Mo nambatri, yu lavem Jehova. Nao askem se, ‘?Mi mi rere blong mekem wok blong Jehova mo mekem hem i glad?’ Sipos yu ansa yes long ol kwestin ya, i gud yu baptaes. ?From wanem yu wantem wet?—Wok 16:33.

19. ?From wanem yu no mas fraet blong baptaes? Talem wan pijatok. (Jon 4:34)

¹⁹ Sipos yu yu fraet blong baptaes, traem tingbaot wan pijatok blong Jisas. (Ridim Jon 4:34.) Jisas i talem se taem hem i mekem wil blong Papa blong hem, hemia i olsem kakae blong hem. ?From wanem? Kakae i mekem i gud long yumi. Jisas i save se evri samting we Jehova i askem, i mekem i gud long yumi. Jehova i no askem long yumi blong mekem samting we i blong spolem yumi. ?Olsem wanem? ?Jehova nao i wantem se yu baptaes? Yes. (Wok 2:38) Sipos i olsem, yu save sua se taem yu obei long komanmen ya blong tekem baptaes, hemia bambae i mekem i gud long yu. Sipos yu no fraet blong kakae wan gudfala kakae, ?from wanem yu fraet blong baptaes?

20. ?Bambae yumi tokbaot wanem long nekis stadi?

²⁰ ?From wanem yu wantem wet? Plante man oli talem se: “Mi mi no redi yet.” I tru se desisen blong givim laef blong yu long Jehova mo baptaes, i impoten moa i bitim eni narafala desisen. Taswe i tekem taem, mo yu mas tingting gud, mo wok had blong kasem mak ya. Be sipos yu rili wantem baptaes, ?yu save mekem wanem naoia blong rere? Bambae yumi tokbaot ansa blong kwestin ya long nekis stadi.