1. ?Wanem wan rod we i givhan long Job blong i save Jehova moa?

 WAN long ol beswan storian we Job i gat long laef blong hem, hemia taem hem i toktok wetem Jehova God. Blong mekem Job i trastem moa se Jehova i waes mo i naf blong lukaot gud long ol man blong Hem, Jehova i tokbaot sam nambawan samting we hem i krietem. Eksampol, God i rimaenem Job se hem nao i stap givim ol samting we ol animol oli nidim, so Hem i naf blong lukaot gud tu long Job. (Job 38:39-41; 39:1, 5, 13-16) Taem Job i tingbaot ol eksampol olsem, hemia i givhan long hem blong lanem plante samting long saed blong ol fasin blong God.

2. ?From wanem maet samtaem i had blong yumi blong lukluk kriesen?

² Yumi tu yumi naf blong kasemsave moa long God, taem yumi tekem taem blong lukluk ol kriesen blong hem. Be maet i no isi blong yumi mekem samting ya oltaem. Sipos yumi laef long wan taon, maet i had blong luk kriesen blong hem evri dei. Mo nating sipos yumi laef aotsaed long taon, maet yumi harem se yumi no gat taem blong lukluk ol naesfala kriesen ya. Taswe, naoia bambae yumi tokbaot from wanem i gud we yumi traehad mo tekem taem blong lukluk kriesen. Mo tu, bambae yumi tokbaot olsem wanem Jehova mo Jisas i yusum kriesen blong tijim narafala, mo wanem sam moa lesen we yumi save lanem long kriesen.

3. ?Wanem i soemaot se Jehova i wantem we Adam i harem gud long kriesen?

³ Jehova i wantem se faswan man we hem i wokem i harem gud long ol kriesen blong Hem. Taem God i wokem Adam, Hem i putum hem long wan naesfala paradaes mo i givim wok ya long hem blong i lukaot gud long hem mo mekem i kam bigwan moa. (Jen. 2:8, 9, 15) I sua se Adam i harem gud tumas taem i luk we  ol sid oli stap gru mo ol tri oli putum flaoa. !Adam i gat nambawan privilej ya blong lukaot gud long garen blong Iden! Mo tu, Jehova i askem long Adam blong i putum nem blong ol defdefren kaen animol. (Jen. 2:19, 20) Jehova i save mekem samting ya hem wan nomo, be yet hem i givim wok ya long Adam. I sua se bifo we Adam i putum nem blong ol animol ya, hem i stadi gud long ol olgeta wanwan mo long ol fasin blong olgeta. Adam i glad tumas blong mekem samting ya. Mo hemia wan nambawan janis blong Adam i kasemsave gud se Jehova i waes, mo se ol kriesen blong hem oli defdefren mo oli naes tumas.

4. (1) ?Wanem wan risen from wanem yumi mas lukluk kriesen? (2) ?Wanem kriesen blong God we yu yu laekem moa?

⁴ Wan risen from wanem yumi mas lukluk kriesen, hemia se Jehova nao i wantem se yumi mekem olsem. Jehova i talem se: “Yufala i lukluk i go long heven mo yufala i luk.” Biaen hem i askem se: “?Hu i wokem ol samting ya?” Ansa i klia. (Aes. 40:26) Jehova i no fulumap heven nomo, be hem i mekem wol mo solwota tu i fulap gud long ol naesfala kriesen blong hem, we yumi save lanem plante samting from. (Sam 104:24, 25) Mo traem tingbaot olsem wanem God i wokem yumi. Hem i wokem yumi long wan fasin we yumi glad blong luk ol naesfala kriesen blong hem. Mo tu, hem i wantem se yumi harem gud long ol naesfala kriesen blong hem, taswe hem i wokem yumi we yumi naf blong lukluk, harem, testem, mo smelem samting.

5. Folem Rom 1:20, ?wanem gudfala samting i kamaot taem yumi lukluk kriesen?

⁵ Baebol i tokbaot wan narafala impoten risen tu from wanem yumi mas lukluk kriesen. Kriesen i save tijim yumi long ol fasin blong Jehova. (Ridim Rom 1:20.) Eksampol, traem luk olsem wanem Jehova i krietem ol samting mo i disaenem gud olgeta. ?Yu no ting se hemia i soemaot se God i waes? Mo traem tingbaot ol defdefren kaen kakae we yumi stap harem gud long olgeta. Olgeta samting ya oli pruvum klia se Jehova i lavem ol man tumas. Taem yumi luk ol nambawan fasin blong Jehova tru long ol kriesen blong hem, yumi kasemsave moa long hem mo hemia i pulum yumi blong kam klosap moa long hem. Naoia i gud yumi luk sam rod we Jehova i yusum kriesen blong tijim sam impoten lesen long yumi ol man.

6. ?Yumi save lanem wanem long fasin blong ol pijin we oli stap flae i go long defren ples?

⁶ Jehova i putum wan stret taem blong ol samting oli hapen. Evri yia, long en blong manis Februari go kasem long medel blong manis Mei, ol man Isrel oli luk ol pijin ya stok oli stap flae i go long not. God i talem long ol man Isrel se:  “Pijin ya stok long skae, hem i save ol defdefren taem blong hem.” (Jer. 8:7) Olsem we Jehova i putum wan stret taem blong ol pijin ya, hem i putum wan stret taem tu blong mekem jajmen blong hem. Tede, taem yumi luk we ol pijin oli stap flae i go long wan defren ples, yumi save trastem se Jehova i putum wan “stret taem” finis blong distroem rabis wol ya.—Hab. 2:3.

7. ?Yumi save lanem wanem long fasin blong pijin blong flae? (Aesea 40:31)

⁷ Jehova i givim paoa long ol man blong hem. Tru long Aesea, Jehova i promes se bambae Hem i givim paoa long ol man blong Hem, i mekem oli “gat wing olsem igel, oli flae i go antap,” taem oli harem se oli slak o oli harem nogud. (Ridim Aesea 40:31.) Oltaem ol man Isrel oli stap luk ol igel oli stap flae antap we oli no nid blong yusum tumas ol wing blong olgeta, from we oli dipen long hot win we i stap pusum olgeta. !Hemia i wan naesfala rimaenda se Jehova i save givim paoa long ol man blong hem, olsem we hem i mekem long ol pijin ya! Taem yu luk wan pijin i stap flae antap we antap, be i no yusum tumas tufala wing blong hem, yu mas tingbaot se Jehova i save givim paoa long yu tu, blong yu save winim ol problem blong yu.

8. ?Job i lanem wanem taem hem i tingbaot ol kriesen blong God, mo yumi save lanem wanem from?

⁸ Yumi save trastem Jehova. Jehova i halpem Job blong i trastem Hem moa. (Job 32:2; 40:6-8) Taem God i stap toktok wetem Job, Hem i tokbaot plante samting we hem i krietem olsem ol sta, ol klaod, mo ol laet blong laetning. Mo tu, Jehova i tokbaot ol animol olsem wael bul mo hos. (Job 38:32-35; 39:9, 19, 20) Olgeta samting ya oli no pruvum nomo se God i gat bigfala paoa, be oli soemaot tu se hem i gat lav mo i waes tumas. Storian ya we Job i gat wetem Jehova i mekem se hem i trastem Jehova moa i bitim bifo. (Job 42:1-6) Long sem fasin, taem yumi stadi long kriesen, bambae yumi luksave se Jehova i waes we i waes mo se hem i gat moa paoa i bitim yumi. Hem i naf mo bambae hem i finisim olgeta trabol blong yumi. Save ya we yumi gat long saed blong Jehova, i save halpem yumi blong trastem hem moa.

9-10. ?San mo ren i soemaot wanem long saed blong Jehova?

⁹ Jisas i save plante samting long saed blong kriesen. Hem i “wan nambawan man blong wok,” from we hem i gat privilej ya blong joen wetem Papa blong hem blong krietem olgeta samting long yunives. (Prov. 8:30) Biaen, taem Jisas i stap long wol, hem i yusum kriesen blong tijim ol disaepol blong hem long saed blong Papa blong hem. Traem luk sam nambawan lesen we hem i tijim ol man long hem.

¹⁰ Jehova i soemaot lav long evri man. Long Bigfala Toktok Blong Jisas Antap Long Hil, Jisas i pulum tingting blong ol disaepol i go long tu kriesen we plante man oli ting nating long hem, hemia san mo ren. Yumi nidim tufala samting ya blong yumi stap laef. Sipos Jehova i wantem, hem i save blokem ren mo san blong i no kasem ol man we oli no wosipim hem. Be hem i no mekem olsem. (Mat. 5:43-45) Jisas i yusum lesen ya blong tijim ol disaepol blong hem se Jehova i wantem we yumi soem lav long evri man. Taem yumi harem gud blong lukluk naesfala kala long skae taem san i godaon o luk we ren i foldaon, i gud yumi tingbaot se Jehova i lavem olgeta man. Eksampol blong hem i save pulum yumi blong soem sem kaen lav ya, taem yumi prij long olgeta man.

11. Taem yumi lukluk ol pijin, ?olsem wanem hemia i enkarejem yumi?

¹¹ Jehova i givim samting we yumi nidim blong stap laef. Taem Jisas i stap toktok antap long hil, hem i talem tu se: “Yufala i lukluk gud ol  pijin ya we oli stap flae. Olgeta oli no planem kakae mo oli no tekem kakae long garen, mo oli no stap hivimap kakae long ol stohaos, be Papa blong yufala long heven i stap givim kakae long olgeta.” Ol man we oli stap lesin long Jisas long taem ya, oli luk ol pijin oli stap flae antap, taem hem i askem long olgeta se: “?Yufala i no ting se yufala i moa impoten i bitim ol pijin ya?” (Mat. 6:26) !Jisas i yusum rod ya blong soemaot long ol man se Jehova i lavem yumi mo bambae i givim samting we yumi nidim! (Mat. 6:31, 32) Nambawan lesen ya long saed blong kriesen i gohed blong enkarejem ol man blong Jehova. Wan yang paenia sista long Spen, tingting blong hem i foldaon from hem i no save faenem wan gudfala ples blong stap long hem. Be taem hem i luk we ol pijin oli stap kakae ol sid mo ol beri, tingting blong hem i kam kwaet moa. Hem i talem se: “Ol pijin ya oli mekem mi tingbaot se Jehova i stap lukaot gud long olgeta, mo bambae hem i lukaot gud tu long mi.” Mo samtaem biaen, sista ya i faenem wan ples blong laef long hem.

12. Folem Matiu 10:29-31, ?ol smol pijin oli soemaot wanem long saed blong Jehova?

¹² Jehova i tinghae long yumi wanwan. Bifo we Jisas i sanemaot ol aposol blong hem blong oli go prij, hem i halpem olgeta blong oli no fraet long ol man blong agens. (Ridim Matiu 10:29-31.) Hem i mekem samting ya, taem hem i tokbaot ol smol pijin we ol man Isrel oli save gud long hem, we long taem blong Jisas, ol man oli ting nating long ol smol pijin ya. Be hem i talem long ol disaepol blong hem se: “Papa blong yufala i save taem wan nomo long olgeta i foldaon long graon.” Mo hem i gohed se: “Yufala i gud moa i winim plante smol pijin.” Jisas i mekem ol disaepol blong hem oli luksave se Jehova i tinghae long wanwan long olgeta, taswe oli no nid blong fraet long ol man we oli agens. So i sua se taem ol disaepol oli stap go prij long ol taon mo ol vilej mo oli luk ol smol pijin ya, oli mas tingbaot ol tok ya blong Jisas. Taswe taem yu luk wan smol pijin, tingbaot se Jehova i tinghae long yu, from yu tu yu “gud moa i winim plante smol pijin.” So from we Jehova i stap sapotem yu, yu no nid blong fraet taem ol narafala oli stap agensem yu.—Sam 118:6.

13. ?Yumi save mekem wanem blong lanem samting tru long kriesen?

¹³ Yumi save lanem plante moa lesen long saed blong Jehova tru long kriesen. ?Olsem wanem yumi save mekem olsem? Fastaem, yumi mas makemaot taem blong lukluk kriesen. Biaen, yumi mas tingbaot se samting ya i tijim wanem long yumi long saed blong Jehova. Be maet i no isi oltaem blong mekem samting ya. Géraldine, wan sista long Kamerun i talem se: “Mi mi gruap long taon, taswe mi mas traehad moa blong lukluk kriesen.” Wan elda we nem blong hem Alfonso, i talem se: “Mi makem se mi mas putum wan stret taem blong mi save stap mi wan blong lukluk kriesen blong Jehova, mo tingting dip long samting we oli save tijim mi long saed blong hem.”

14. ?Deved i lanem wanem taem hem i tingting dip long ol kriesen blong God?

 ¹⁴ Deved i tingting dip long ol samting we God i krietem. Hem i talem long Jehova se: “Taem mi luk heven, ol wok blong ol fingga blong yu, mun mo ol sta we yu bin mekemrere olgeta i stap, mi luk se man i nating nomo, i save ded, taswe ?from wanem yu stap tingbaot hem?” (Sam 8:3, 4) Yes, taem Deved i stap lukluk i go antap long skae long naet, hem i no jes lukluk ol sta nomo, be hem i tingting dip tu olsem wanem ol sta ya oli tijim hem long saed blong God. Hem i lanem se Jehova i gud tumas. Long wan narafala taem, Deved i tingbaot olsem wanem bodi blong hem i stap gru long bel blong mama blong hem. Taem hem i tingting dip long ol nambawan samting ya, hem i luksave moa se Jehova i waes we i waes.—Sam 139:14-17.

15. Tokbaot sam samting long kriesen we i mekem yumi luksave ol fasin blong Jehova. (Ol Sam 148:7-10)

¹⁵ Olsem Deved, i no had blong faenem wan samting long kriesen we yumi save tingting dip long hem. Sipos yu lukluk raon long yu, yu save faenem plante samting we i halpem yu blong luk ol gudfala fasin blong Jehova. Eksampol, yu save luksave paoa blong Jehova, taem san i kasem skin blong yu. (Jer. 31:35) Tingbaot olsem wanem God i waes we i waes, taem yu luk wan pijin i stap wokem nes blong hem. Tingbaot se Jehova i wan hapi God, taem yu luk wan smol dog i stap traem blong kasem tel blong hem. Mo talem tangkiu long Jehova from lav blong hem, taem yu luk wan mama i stap pleplei wetem bebi blong hem. Yumi gat plante janis blong lanem moa long saed blong Jehova tru long ol kriesen blong hem, from we nating se oli bigwan o oli smol, oli stap longwe o klosap, be evriwan oli presem hem.—Ridim Ol Sam 148:7-10.

16. ?Yumi mas gat strong tingting blong mekem wanem?

¹⁶ God blong yumi i waes we i waes, hem i gat lav, i gat bigfala paoa, mo evri samting we hem i krietem oli naes tumas. Yumi save luksave ol fasin ya blong hem mo plante moa, sipos yumi tekem taem blong lukluk ol kriesen we oli stap raonabaot long yumi. I gud we oltaem yumi evriwan i makemaot taem blong harem gud long kriesen mo tingting dip long ol samting we oli save tijim yumi long saed blong Jehova. Taem yumi mekem olsem, bambae yumi kam klosap moa long Krieta blong yumi. (Jem. 4:8) Long nekis stadi, bambae yumi luk olsem wanem ol perens oli save yusum kriesen blong halpem ol pikinini blong olgeta blong kam klosap long Jehova.