1-2. Sipos yu no rere yet blong baptaes, ?from wanem yu no mas harem nogud? (Yu luk pija long fran pej.)

 SIPOS yu wantem tekem baptaes, hemia i wan nambawan mak blong yu kasem. ?Olsem wanem? ?Yu yu rere naoia blong baptaes? Sipos yu gat strong tingting se yu yu rere, mo ol elda tu oli agri, yu no mas wet. Biaen, yu save gat wan gudfala laef long wok blong Jehova.

² Be maet yu kasem advaes se yu mas kam gud moa long sam samting bifo we yu baptaes, o maet yu wan yu luksave samting ya. Sipos i olsem, yu no mas harem nogud. Yu save gohed gogo yu naf blong kasem impoten mak ya, nating se yu yangfala o olfala.

3. ?Haeman blong Itiopia i askem wanem long Filip? Taem yu tingbaot kwestin blong haeman ya, ?wanem tingting blong yu? (Ol Wok 8:36, 38)

³ Ridim Ol Wok 8:36, 38. Wan haeman blong Itiopia i askem long Filip se: “?Wanem nao i blokem mi blong mi no save baptaes?” Man Itiopia ya i wantem tumas blong baptaes, ?be hem i rere blong tekem impoten step ya?

4. ?Olsem wanem man Itiopia ya i soemaot se hem i wantem lanem moa?

⁴ Man Itiopia ya i bin “go long Jerusalem blong mekem wosip.” (Wok 8:27) Taswe hem i mas wan proselaet, i min se hem i joen long skul blong ol man Jiu. I sua se hem i lanem plante samting finis long saed blong Jehova long ol tabu hanraet blong Hibru Haf Blong Baebol. Be hem i wantem tumas blong lanem moa. Traem tingbaot, taem Filip i mitim hem long rod, ?hem i stap mekem wanem? Hem i stap ridim wan skrol blong ol profet tok blong Aesea. (Wok 8:28) Hemia ol strong kakae  long saed blong spirit. Man ya i glad blong lanem ol stamba trutok, be hem i wantem lanem moa.

5. ?Man Itiopia i mekem wanem wetem samting we hem i lanem?

⁵ Man ya i wan haeman blong Kwin Kandes blong Itiopia, mo hem i “stap lukaot long olgeta sas samting blong kwin ya.” (Wok 8:27) Hem i bisi oltaem from we hem i gat plante wok. Nating se i olsem, hem i tekem taem blong wosipim Jehova. Hem i wantem kasemsave trutok, be tu hem i tekem aksen folem wanem we hem i lanem. Taswe hem i mekem longfala trip, i aot long Itiopia blong go long Jerusalem, blong wosipim Jehova long tempol. Hemia i tekem taem mo i sas, be man ya i mekem bes blong hem blong wosipim Jehova.

6-7. ?Olsem wanem lav we man Itiopia ya i gat long Jehova i kam bigwan moa?

⁶ Filip i tijim man Itiopia ya long sam niufala trutok, olsem trutok ya long saed blong Mesaea. (Wok 8:34, 35) Taem haeman ya i kasemsave long ol samting we Jisas i mekem blong hem mo ol narafala man, i sua se hemia i tajem hat blong hem. ?Hem i mekem wanem? Hem i save stap olsem nomo, from we hem i wan proselaet mo ol man oli respektem hem. Be, lav we hem i gat long Jehova mo Pikinini blong Hem i stap kam bigwan moa. Nao lav ya i pusum hem blong mekem desisen we bambae i jenisim laef blong hem, hemia blong baptaes mo kam wan man blong Jisas. Filip i luksave se man ya i rere, ale i baptaesem hem.

⁷ Sipos yu folem eksampol blong man Itiopia ya, yu tu yu save rere blong baptaes. Mo bambae yu talem wetem strong tingting se, “?Wanem nao i blokem mi blong mi no save baptaes?” Bambae yumi tokbaot olsem wanem yu save folem ol step we haeman ya i folem: Hem i gohed blong kasemsave moa, hem i tekem aksen folem samting we hem i lanem, mo lav we hem i gat long God i stap kam bigwan moa.

8. ?Jon 17:3 i talem se yu mas mekem wanem?

⁸ Ridim Jon 17:3. ?Ol tok ya blong Jisas oli halpem yu blong mekem desisen blong stadi Baebol? Hemia i sem mak long plante long yumi. Be ol tok ya oli talem tu se yumi mas gohed blong kasemsave moa. Bambae yumi neva stop blong “save . . . tru God.” (Pri. 3:11) Bambae yumi gohed blong kasemsave long hem gogo i no save finis. Taem yumi kasem save moa long trutok, yumi kam klosap moa long Jehova.—Sam 73:28.

9. Afta we yu kasemsave long ol stamba trutok, ?yu mas mekem wanem?

⁹ I tru se taem yu stat blong kasemsave long Jehova, yu mas lanem ol stamba tijing. Taem  aposol Pol i raet i go long ol man Hibru, hem i tokbaot “ol stamba tijing” olsem melek we mama i givim long pikinini, be hem i no minim se ol tijing ya oli no impoten. (Hib. 5:12; 6:1) Nating se i olsem, hem i talem se ol Kristin oli mas gohed moa blong lanem ol dip trutok blong Baebol. ?Yu yu laekem tumas blong kasemsave moa long ol dip trutok blong Baebol? ?Yu yu glad blong lanem moa long saed blong Jehova mo ol plan blong hem?

10. ?From wanem samfala oli faenem i had blong stadi?

¹⁰ Be plante long yumi oli faenem i had blong stadi. ?Olsem wanem long yu? Long skul, ?yu yu lanem blong rid gud mo stadi gud? ?Yu laekem blong stadi mo yu harem gud long hem? ?O yu ting se yu no save lanem samting long ol buk ya? Sipos yu gat tingting olsem, be i no yu nomo. Jehova i save halpem yu. Hem i stret olgeta, mo i no gat wan tija we i gud moa long hem.

11. ?Olsem wanem Jehova i soemaot se hem i “Bigfala Tija”?

¹¹ Jehova hem wan i talem se hem i “Bigfala Tija blong yu.” (Aes. 30:20, 21) Hem i wan Tija we i gat longfala tingting, i kaen, mo i kasemsave long ol studen blong hem. Hem i traem faenem ol gudfala fasin blong olgeta. (Sam 130:3) Hem i neva askem moa long wanem we yumi save mekem. Yu no mas fogetem se hem i wokem bren blong yumi, hemia wan nambawan presen. (Sam 139:14) Krieta blong yumi i wokem yumi blong yumi wantem lanem plante samting. Hem i wantem se yumi gohed olwe blong lanem moa, mo harem gud long ol samting we yumi lanem. Taswe i gud yumi lanem naoia blong “laekem tumas” ol trutok blong Baebol. (1 Pita 2:2) Putum ol mak we oli no strong tumas blong kasem, mo folem wan program blong ridim mo stadi long Baebol. (Jos. 1:8) Jehova bambae i blesem yu nao bambae yu harem gud blong ridim mo kasemsave moa long saed blong hem.

12. ?From wanem i gud we yu wan yu stadi long laef blong Jisas?

¹² Tingting dip oltaem long laef mo minista wok blong Jisas. Bigfala samting we bambae i halpem yumi blong mekem wok blong Jehova, speseli naoia we laef i had tumas, hemia blong folemgud trak blong leg blong Jisas. (1 Pita 2:21) Jisas i talem stret long ol man blong hem se bambae oli fesem hadtaem. (Luk 14:27, 28) Be hem i bilif strong se ol trufala man blong hem oli save win, olsem hem. (Jon 16:33) Stadi gud long laef blong Jisas, mo putum ol mak we yu save kasem blong folem fasin blong hem evri dei.

13. ?Yu mas gohed blong askem wanem long Jehova, mo from wanem?

¹³ Save nomo i no naf. Be save i impoten from we i givhan long yu blong lanem moa long saed blong Jehova, lavem hem, mo bilif long hem. (1 Kor. 8:1-3) Taem yu stap gohed blong lanem moa, askem Jehova blong i givhan long yu blong kasem moa bilif. (Luk 17:5) Hem i glad blong givim moa, i bitim wanem we yu askem long ol prea blong yu. Bilif we i stanap long stret save long saed blong God, bambae i halpem yu blong gohed moa.—Jem. 2:26.

14. ?Olsem wanem aposol Pita i soemaot se i impoten blong tekem aksen folem wanem we yu lanem? (Yu luk pija tu.)

¹⁴ Aposol Pita i soemaot se i impoten tumas blong ol man blong Kraes oli tekem aksen folem wanem we oli lanem. Hem i tokbaot stori blong Noa we i stap long Baebol. Jehova i talem long Noa se, bambae hem i mekem bigfala wota i ron blong spolem ol rabis man. I no naf nomo we Noa mo famle blong hem i save se bigfala wota bambae i kavremap wol. Makem  gud we Pita i talem se oli “stap wokem bigfala sip,” bifo we wota i kavremap wol. (1 Pita 3:20) Yes, Noa mo famle blong hem i tekem aksen folem wanem we oli lanem, nao oli bildim wan bigfala sip. (Hib. 11:7) Pita i komperem samting we Noa i mekem se i olsem baptaes, i se: “Samting ya i sem mak long baptaes we naoia i stap sevem yufala.” (1 Pita 3:21) Taswe, wok we yu yu stap mekem naoia blong rere blong baptaes, i sem mak long wok we Noa mo famle blong hem i mekem blong plante yia, taem oli bildim bigfala sip. ?Wanem wok we yu yu mas mekem blong yu rere blong baptaes?

15. ?Olsem wanem yu soemaot se yu rili tanem tingting blong yu?

¹⁵ Wan long ol impoten samting we yu mas mekem, i blong tanem tingting from ol sin blong yu. (Wok 2:37, 38) Sipos yu rili tanem tingting blong yu, bambae yu mekem ol jenis we oli stap olwe. ?Olsem wanem? ?Yu jenisim finis sam fasin we Jehova i no laekem, olsem ol doti fasin blong seks, smok tabak, o tok swea? (1 Kor. 6:9, 10; 2 Kor. 7:1; Efes. 4:29) Sipos yu no mekem ol jenis ya yet, i gud yu gohed blong traehad. Yu save toktok long hemia we i stadi Baebol wetem yu, o askem ol elda long kongregesen blong oli givim sam advaes long yu. Sipos yu wan yangfala mo yu stap yet wetem papa mama blong yu, i gud yu askem long tufala blong oli halpem yu blong lego ol nogud fasin, we oli stap blokem yu blong baptaes.

16. ?Yu mas mekem wanem blong wosipim Jehova oltaem?

¹⁶ I impoten tu blong folem wan gudfala program blong wosip. Hemia i min se yu mas joen long olgeta miting mo givim ansa. (Hib. 10:24, 25) Mo taem yu kam naf blong prij, yu save joenem hemia tu long program blong yu. Sipos yu joen plante long wok ya we i save sevem laef blong man, bambae yu glad moa. (2 Tim. 4:5) Sipos yu wan yangfala we i stap yet wetem papa mama, traem tingbaot kwestin ya: ‘?Papa mo mama i mas talem long mi blong go long miting o blong prij, o mi wan nomo mi mekem samting ya?’ Sipos yu wan yu tekem aksen, hemia i soemaot bilif blong yu, mo se yu lavem Jehova God mo yu wantem talem tangkiu long hem. Taem yu ‘soemaot long ol wok blong yu se yu stap fasgud long hem,’  hemia i olsem we yu stap givim wan presen i go long Jehova. (2 Pita 3:11; Hib. 13:15) Taem yu givim wan presen we i no gat narafala i fosem yu, God i glad tumas. (Skelem wetem 2 Korin 9:7.) Yu mekem ol aksen ya, from we yu wantem givim bes blong yu long Jehova.

17-18. ?Wanem impoten fasin we bambae i givhan long yu blong kasem mak ya blong baptaes? ?Mo from wanem fasin ya i impoten? (Ol Proveb 3:3-6)

¹⁷ Taem yu stap tekem ol step blong go kasem baptaes, bambae yu fesem sam hadtaem. Maet samfala oli jikim yu from niufala bilif blong yu, maet oli agensem o mekem i nogud long yu. (2 Tim. 3:12) Taem yu stap traehad blong winim wan nogud fasin, maet yu save mestem mo foldaon long fasin ya bakegen. Maet yu kam kros mo yu wantem hariap moa blong kasem mak ya blong baptaes. ?Wanem bambae i halpem yu blong gohed go kasem mak ya? Wan impoten fasin, hemia se yu mas lavem Jehova.

¹⁸ Fasin ya blong lavem Jehova, hem i wan nambawan fasin mo naes tumas. (Ridim Ol Proveb 3:3-6.) Strong lav we yu gat long God i save halpem yu blong stanap strong tru long ol hadtaem we yu fesem long laef. Plante taem Baebol i tokbaot fasin ya blong Jehova we hem i lavem ol man blong hem oltaem. Lav ya i min se hem i fasgud long ol man blong hem, i neva lego olgeta. (Sam 100:5) God i wokem yu long pija blong hem. (Jen. 1:26) ?Olsem wanem yu save soemaot sem kaen lav olsem hem?

19. ?Olsem wanem yu save kam gud moa long fasin ya blong talem tangkiu long Jehova? (Galesia 2:20)

¹⁹ Faswan samting, yu talem tangkiu long hem. (1 Tes. 5:18) Evri dei i gud yu askem se, ‘?Olsem wanem Jehova i soemaot finis se hem i lavem mi?’ Biaen, yu meksua se yu prea blong talem tangkiu long Jehova, mo yu tokbaot stret ol samting we hem i mekem blong yu. Olsem aposol Pol, yu mas luksave se Jehova i mekem ol aksen ya blong soemaot lav long yu stret. (Ridim Galesia 2:20.) Askem se, ‘?Mi mi wantem soemaot se mi lavem hem, from ol samting we hem i mekem long mi?’ Lav we yu gat long Jehova bambae i halpem yu blong agensem ol samting we oli traem yu, mo stanap strong long ol hadtaem we yu fesem. Lav ya bambae i pusum yu blong holemtaet program blong wosip we yu stap folem, mo long rod ya, yu soemaot evri dei se yu lavem Papa blong yu long heven.

20. ?Yu mekem wanem blong givim laef blong yu long Jehova? ?Mo desisen ya i impoten olsem wanem?

²⁰ Sloslo, lav we yu gat long Jehova bambae i pusum yu, blong mekem wan spesel prea blong givim laef blong yu i go long hem. Yu no mas fogetem se taem yu givim laef blong yu long Jehova, yu gat nambawan janis ya blong stap olsem man blong hem blong olwe. Promes ya blong givim laef blong yu long Jehova i no finis taem yu kasem trabol. Mo yu no nid blong mekem promes ya bakegen samtaem. Tru ya, taem yu givim laef blong yu long God, yu tekem wan step we i impoten tumas. Tingbaot samting ya: Yu mekem plante desisen long laef blong yu, we sam long olgeta i gud tumas, be bambae yu neva mekem wan desisen we i gud moa long hemia we yu mekem blong givim laef blong yu long Jehova. (Sam 50:14) Setan bambae i traem blong daonem lav we yu gat long Jehova, from hem i wantem se yu lego hem. !Be yu neva mas letem Setan i win! (Job 27:5) Strong lav we yu gat long Jehova, bambae i halpem yu blong folem promes we yu mekem taem yu givim laef blong yu long hem, mo kam klosap moa oltaem long Papa blong yu long heven.

21. ?From wanem yumi talem se baptaes i no en blong rod, be i stat blong hem nomo?

²¹ Afta we yu givim laef blong yu long Jehova, tokbaot wetem ol elda long kongregesen blong yu, nekis impoten step we bambae yu tekem. Be yu neva mas fogetem se baptaes i stat blong rod nomo, i no en blong hem. Yu statem wan niufala laef we bambae i neva finis, hemia blong mekem wok blong Jehova. Taswe, naoia yu mas mekem lav blong yu long Jehova i kam strong moa. Putum ol mak we yu save kasem, blong mekem se evri dei lav blong yu i kam strong moa. Samting ya bambae i lidim yu i go kasem baptaes. Dei blong baptaes i wan nambawan dei, be hemia i stat nomo blong niufala laef ya. !I gud se lav we yu gat long Jehova mo Pikinini blong hem, i gohed blong kam strong moa gogo i no save finis!