1-2. ?Wanem ol blesing we wan man i save kasem afta we hem i baptaes?

 YUMI glad tumas taem yumi baptaes mo kam joen long famle blong Jehova. Olgeta we oli kasem nambawan blesing ya, bambae oli agri long ol tok ya blong Deved, we i talem se: ‘Man we yu Jehova, yu jusum mo yu tekem hem i kam klosap, blong i stap long yad blong yu, hem i glad.’—Sam 65:4.

² ?Jehova i tekem wanem kaen man i kam insaed long yad blong hem? Olsem we yumi tokbaot long las stadi, hem i jusum blong kam klosap long olgeta we oli soemaot se oli wantem fren gud wetem hem. (Jem. 4:8) Taem yu givim laef blong yu long Jehova mo yu baptaes, naoia yu gat wan spesel frensip wetem hem. Taswe yu save sua se afta we yu baptaes, bambae hem i ‘kafsaedem blesing i kam long yu gogo yu no moa sot long wan samting.’—Mal. 3:10; Jer. 17:​7, 8.

3. ?Ol Kristin we oli givim laef blong olgeta mo baptaes, oli mas mekem wanem? (Prija 5:​4, 5)

³ Baptaes, hem i stat nomo blong wan niufala rod we yu folem blong mekem wok blong Jehova. Afta we yu kasem mak ya, bambae yu wantem gohed blong mekem bes blong yu blong holem promes we yu mekem, nating sipos yu fesem ol samting we i traem bilif blong yu. (Ridim Prija 5:​4, 5.) Mo from we yu wan disaepol blong Jisas, bambae yu mekem bes blong yu blong folemgud eksampol blong Jisas mo ol komanmen  blong hem. (Mat. 28:​19, 20; 1 Pita 2:21) Stadi ya bambae i halpem yu blong mekem olsem.

‘FOLEM JISAS OLTAEM’ NATING SE YU FESEM OL TRABOL O TRAEM

4. ?Jisas i minim wanem taem i talem se ol disaepol bambae oli karem “pos” blong olgeta? (Luk 9:23)

⁴ Afta we yu baptaes, yu no mas ting se bambae yu no fesem ol trabol. ?From wanem? Jisas i talem klia se “evri dei” ol disaepol blong hem bambae oli karem “pos” blong olgeta. (Ridim Luk 9:23.) ?Hemia i min se oltaem ol disaepol blong hem bambae oli safa? Nogat. Jisas i wantem makem klia se antap long ol blesing we bambae oli kasem, bambae oli fesem sam trabol. Sam long ol trabol ya bambae oli had tumas.—2 Tim. 3:12.

5. ?Wanem promes we Jisas i mekem long olgeta we oli lego sam samting blong oli folem hem?

⁵ Maet yu fesem fasin agens finis long famle blong yu, o yu lego sam samting blong yu save putum Kingdom fasples. (Mat. 6:33) Sipos i olsem, yu save sua fulwan se Jehova i save olgeta samting we yu mekem blong yu save wosipim hem. (Hib. 6:10) I sua se yu luksave se tok blong Jisas i tru tumas, we i se: “Man we i lego haos, o brata, o sista, o mama, o papa, o pikinini, o graon blong hem from mi mo from gud nius, bambae hem i kasem haos, brata, sista, mama, pikinini, no graon 100 taem antap bakegen naoia, mo ol man bambae oli ronem mo kilim hem tu. Mo long sistem blong wol we i stap kam, bambae hem i kasem laef we i no save finis.” (Mak 10:​29, 30) Ol blesing ya we yu kasem oli plante moa i bitim ol samting we yu lego.—Sam 37:4.

6. Afta we yu baptaes, ?from wanem yu mas gohed blong faet agensem “ol samting we bodi i wantem”?

⁶ Afta we yu baptaes, yu mas gohed yet blong faet agensem “ol samting we bodi i wantem.” (1 Jon 2:16) Hemia from we yu yu sinman yet. Taswe samtaem yu save harem olsem aposol Pol, we i talem se: “Long hat blong mi, mi mi laekem tumas loa blong God. Be mi mi luk wan narafala loa long bodi blong mi we i stap agensem loa we i stap long tingting blong mi, mo i mekem mi mi kalabus long loa blong sin we i stap long bodi blong mi.” (Rom 7:​22, 23) I tru, yu save harem nogud from we yu mas faet agensem ol tingting we i no stret. Be sipos yu tingbaot promes we yu mekem blong givim laef blong yu long Jehova, bambae yu naf blong faet agensem ol samting we oli traem yu. Yes promes ya bambae i givhan long yu taem yu fesem wan traem. ?Olsem wanem bambae i givhan long yu?

7. ?Olsem wanem promes we yu mekem long Jehova i halpem yu blong holemstrong long hem?

⁷ Taem yu givim laef blong yu long Jehova, naoia yu mas blokem ol samting we yu nomo yu wantem. Hemia i min se yu mas talem no long ol samting we yu nomo yu wantem, we oli save mekem Jehova i harem nogud. (Mat. 16:24) Taswe taem yu fesem wan traem, bambae yu no nid blong tingbaot samting we yu mas mekem, from yu jusum finis se bambae yu holemstrong long Jehova. Yu gat strong tingting blong mekem Jehova i glad olsem Job. Nating se Job i fesem bigfala trabol, be hem i talem wetem strong tingting se: “!Bambae mi no lego fasin blong mi blong holemstrong long God!”—Job 27:5.

8. ?Olsem wanem spesel prea we yu mekem i save givhan long yu blong stanap strong?

⁸ Taem yu tingbaot prea we yu mekem blong givim laef blong yu long Jehova, hemia bambae i halpem yu blong stanap strong long eni traem. Eksampol, ?bambae yu pleplei wetem filing blong hasban o waef blong narafala? !I sua se nogat! From we yu promes finis long Jehova se bambae yu no mekem wan  samting olsem. Sipos yu no letem ol nogud filing olsem oli gru long hat blong yu, bambae yu no nid blong faet agensem olgeta. Bambae yu “tanem baksaed” long “rod blong ol man nogud.”—Prov. 4:​14, 15.

9. ?Olsem wanem spesel prea we yu mekem i save givhan long yu blong putum Jehova fasples?

⁹ ?Olsem wanem sipos yu kasem wan wok we i save blokem yu blong go long ol Kristin miting? Yu save finis samting we bambae yu mekem, from bifo we yu kasem wok ya, yu rerem tingting blong yu finis blong talem no long ol kaen wok olsem. Taswe, yu no nid blong tingbaot se bambae yu akseptem wok ya o nogat. Taem yu tingbaot olsem wanem Jisas i gat strong tingting blong mekem Papa blong hem i glad, bambae yu gat strong tingting tu mo yu kwik blong blokem eni samting we i save mekem God i harem nogud.—Mat. 4:10; Jon 8:29.

10. Afta we yu baptaes, ?olsem Jehova bambae i halpem yu blong ‘folem Jisas oltaem’?

¹⁰ Taem yu fesem ol trabol mo traem, hemia wan janis blong soemaot se yu gat strong tingting blong ‘folem Jisas oltaem.’ Taem yu mekem olsem, yu save sua se Jehova bambae i halpem yu. Baebol i talem se: “God i stap holem promes blong hem, mo hem i no save letem wan samting i traem yufala we i strong tumas blong yufala i winim. Mo taem samting olsem i traem yufala, hem bambae i mekem rod blong yufala i naf blong stanap strong.”—1 Kor. 10:13.

SAMTING WE YU SAVE MEKEM BLONG FOLEM JISAS OLTAEM

11. ?Wanem beswan rod blong folem Jisas oltaem? (Mo tu, yu luk pija.)

¹¹ Jisas i wok strong long wok blong Jehova, mo oltaem i prea long hem. (Luk 6:12) Beswan rod blong folem Jisas afta we yu baptaes,  hemia blong gohed blong mekem ol samting blong kam klosap long Jehova. Baebol i talem se: “Yumi stap traehad finis blong wokbaot long sem rod ya, be nomata se i olsem, i gud yumi gohed yet blong wokbaot olsem we yumi stap mekem finis.” (Fil. 3:16) Wanwan taem bambae yu harem ekspiriens blong ol brata mo sista we oli mekem moa long wok blong Jehova. Maet oli go long Skul Blong Kingdom Ivanjelis, o oli muv i go long ples we i gat moa nid. Sipos yu luk se yu naf blong mekem olsem olgeta, i gud yu mekem. Ol man blong Jehova oli wantem tumas blong mekem moa long wok blong prij. (Wok 16:9) ?Be olsem wanem sipos yu no save mekem moa naoia? Yu no mas ting se olgeta we oli save mekem moa, oli gud moa long yu. From long resis blong ol Kristin, samting we i moa impoten hemia se yu stanap strong. (Mat. 10:22) Yu no mas fogetem se yu mekem Jehova i glad, taem yu mekem samting we yu naf blong mekem. Mo hemia nao impoten samting we yu save mekem blong folem Jisas oltaem, afta we yu baptaes.—Sam 26:1.

12-13. ?Yu save mekem wanem sipos yu luk se yu no moa gat strong tingting? (1 Korin 9:​16, 17) (Mo tu, yu luk bokis ya “ Gohed Long Resis.”)

¹² ?Olsem wanem sipos afta we yu baptaes, yu harem se ol prea blong yu oli no moa kamaot long hat blong yu, o yu no moa glad blong prij, o ridim Baebol? Sipos i olsem, yu no mas ting se tabu spirit blong Jehova i gowe long yu. Yumi ol sinman, mo samtaem ol filing blong yumi oli save jenis. Sipos yu luk se yu no moa gat strong tingting olsem bifo, i gud yu tingbaot eksampol blong aposol Pol. Nating se hem i traehad blong folem eksampol blong Jisas, be hem i save se samtaem bambae hem i no gat strong tingting. (Ridim 1 Korin 9:​16, 17.) Hem i talem se: “Sipos mi mi no wantem be mi fosem mi nomo blong  mekem wok ya, be i oraet nomo, hemia wan wok we God i putum long han blong mi.” Yes, yumi save talem se Pol i gat strong tingting blong finisim wok blong prij we hem i mekem, nating se hem i gat defren tingting long taem ya.

¹³ Long sem fasin, yu no mas mekem ol desisen folem filing blong yu. Be i gud yu gat strong tingting blong mekem samting we i stret, nomata wanem filing we yu gat, from we maet long ol taem we i kam ol filing blong yu bambae oli jenis. Be go kasem taem ya, i gud yu gohed blong holemtaet wan gudfala program long saed blong spirit, from hemia bambae i halpem yu blong folem Jisas oltaem afta we yu baptaes. Nao taem ol brata mo sista oli luk we yu gohed nomo long wok blong Jehova, hemia bambae i leftemap tingting blong olgeta.—1 Tes. 5:11.

“GOHED BLONG JEKEM . . . GOHED BLONG FAENEMAOT”

14. ?Yu mas mekem wanem oltaem, mo from wanem? (2 Korin 13:5)

¹⁴ Afta we yu baptaes, i impoten we oltaem yu gohed blong jekem yu wan. (Ridim 2 Korin 13:5.) Wanwan taem i gud blong jekem yu wan blong luk sipos yu stap prea evri dei, ridim mo stadi Baebol, go long ol miting, mo joen long wok blong prij. I gud yu tingbaot sam rod we yu save folem blong harem gud long ol samting ya, mo luk olsem wanem oli save givhan long yu. Eksampol, askem yu wan se: ‘?Mi mi save eksplenem ol stamba trutok long ol narafala? ?I gat sam narafala samting we mi save mekem blong harem gud moa long wok blong prij? Taem mi prea, ?mi talemaot stret samting we mi wantem mo oli soemaot se mi trastem Jehova? ?Mi mi go oltaem long ol miting? ?Mi save mekem wanem moa blong lesin gud mo givim ol ansa long ol miting?’

15-16. ?Yu lanem wanem long ekspiriens blong Robert?

¹⁵ I impoten tu we yu jekem yu wan blong faenemaot ol slak fasin blong yu. Hemia nao samting we wan brata nem blong hem Robert i mekem afta we hem i fesem wan traem. Hem i se: “Taem mi gat samwe 20 yia, mi gat wan haftaem wok. Wan dei afta long wok, wan woman long ples blong wok i askem mi blong go long haos blong hem. Woman ya i talem se bambae mitufala i stap mitufala nomo, mo bambae mitufala ‘i gat wan gud taem.’ Fastaem mi mekem sam eskius, be biaen mi talem no, mo mi eksplenem from wanem mi no wantem go.” Robert i winim traem ya, mo hemia i wan nambawan samting. Samtaem biaen, taem hem i tingtingbak, hem i luksave se hem i sud mekem wan samting we i gud moa. Hem i talem se: “Mi no bin gat  strong tingting o kwik blong talem no, olsem we Josef i bin mekem long waef blong Potifa. (Jen. 39:​7-9) Mi mi sapraes se i had blong mi talem no long hem. Samting ya i halpem mi blong luksave se mi nidim blong fren gud moa wetem Jehova.”

¹⁶ Sipos yu tekem taem blong jekem gud yu wan, olsem we Robert i mekem, hemia i save givhan long yu. Nating se yu winim finis wan traem, be i gud blong askem yu wan se: ‘?Mi mi kwik blong talem no?’ Sipos yu luksave se yu nid blong kam gud moa, yu no mas harem nogud. Be yu mas glad se naoia yu save slak fasin blong yu. I gud yu tokbaot slak fasin blong yu long Jehova, mo yu mekem samting we bambae i givhan long yu blong obei long hem.—Sam 139:​23, 24.

17. Folem ekspiriens blong Robert, ?olsem wanem fasin blong yumi blong stanap strong i joen wetem nem blong Jehova?

¹⁷ I gat wan narafala lesen we yumi save lanem long ekspiriens blong Robert. Hem i talem se: “Afta we mi talem no long woman ya long wok, hem i talem long mi se, ‘!Yu winim tes ya!’ Taem mi askem se hem i minim wanem, hem i se wan fren blong hem we i wan Witnes bifo, i talem long hem se evri yangfala Witnes oli gat tu fes, mo sipos oli gat janis blong mekem samting we i no stret, bambae oli mekem nomo. Taswe woman ya i talem long fren blong hem se bambae hem i traem mi, blong luk sipos samting ya i tru, o nogat. Taem mi harem samting ya, mi glad tumas se mi stanap strong mo mi mekem nem blong Jehova i stap tabu.”

18. ?Yu yu gat strong tingting blong mekem wanem afta we yu baptaes? (Mo tu, yu luk bokis ya “ Tu Atikol We Bambae Yu Laekem.”)

¹⁸ Taem yu givim laef blong yu long Jehova mo yu baptaes, yu soemaot se yu wantem mekem nem blong Jehova i stap tabu, nomata wanem samting yu fesem. Mo yu save sua se Jehova i save ol trabol we yu fesem mo ol traem we yu winim. Taswe sipos yu traehad blong holemstrong long hem, bambae hem i blesem yu, mo i givim tabu spirit long yu, blong yu gat paoa blong stanap strong. (Luk 11:​11-13) Wetem help blong Jehova bambae yu naf blong folem Jisas oltaem afta we yu baptaes.