1. ?Sam gudfala man blong Jehova bifo oli no sua long wanem?

 !I GUD tumas blong save se Jehova i glad long ol man blong hem olsem wan grup! Baebol i talem se: “Jehova i glad long ol man blong hem.” (Sam 149:4) Be samtaem, samfala tingting blong olgeta i foldaon bitim mak, nao oli stap tingting se: ‘?I tru se Jehova i glad long mi?’ I gat plante gudfala man blong Jehova long Baebol, we samtaem oli no sua sipos Jehova i glad long olgeta o nogat.—1 Saml. 1:​6-10; Job 29:​2, 4; Sam 51:11.

2. ?Jehova i save glad long hu?

² Baebol i soemaot klia se yumi ol sinman, yumi save mekem Jehova i glad. ?Olsem wanem yumi mekem hem i glad? Yumi mas soemaot se yumi bilif long Jisas Kraes mo yumi baptaes. (Jon 3:16) Olsem nao, yumi soemaot long olgeta man se yumi tanem tingting blong yumi from ol sin blong yumi, mo yumi mekem wan promes long God se bambae yumi mekem samting we hem i wantem. (Wok 2:38; 3:19) Jehova i glad tumas taem yumi mekem ol samting ya blong yumi save kam fren blong hem. Sipos yumi gohed blong mekem bes blong yumi blong holemtaet promes ya, bambae hem i glad long yumi mo i luk yumi olsem ol gudfala fren blong hem.—Sam 25:14.

3. ?Wanem ol kwestin we bambae yumi tokbaot naoia?

³ ?From wanem maet samtaem, sam man oli ting se God i no glad long olgeta? ?Jehova i mekem wanem blong soemaot se hem i glad long yumi? ?Mo olsem wanem wan Kristin i save sua se God i glad long hem?

?FROM WANEM SAM MAN OLI TING SE GOD I NO GLAD LONG OLGETA?

4-5. Nating se yumi gat filing ya se yumi nating nomo, ?be yumi save sua long wanem?

⁴ Plante long yumi, stat taem yumi smol, yumi gat filing ya se yumi nating nomo. (Sam 88:15) Wan brata we nem blong hem Adrián i talem se: “Oltaem mi harem olsem se mi no impoten. Mi tingbaot se taem mi smol, mi stap prea blong famle blong mi  i save laef long Paradaes. Be nating se i olsem, mi mi sua se mi no save laef long Paradaes from mi mi nogud.” Tony, we i gruap long wan famle we i no Kristin, i talem se: “Perens blong mi oli neva talem long mi se oli lavem mi o se oli glad long mi. Hemia i mekem mi harem se evri samting we mi mekem, i no save mekem oli glad.”

⁵ Sipos wanwan taem yumi gat filing ya se yumi nating nomo, i gud blong tingbaot se Jehova nao i pulum yumi i kam long hem. (Jon 6:44) Hem i luk sam gudfala samting long yumi, we maet yumi wan yumi no luk, mo hem i save gud hat blong yumi. (1 Saml. 16:7; 2 Kron. 6:30) Taswe yumi save trastem hem, taem hem i talem se yumi sas long ae blong hem.—1 Jon 3:​19, 20.

6. ?Aposol Pol i harem olsem wanem taem hem i tingbaot ol sin blong hem bifo?

⁶ Sam long yumi, bifo we yumi lanem trutok, yumi mekem sam samting we tingting blong yumi i stap stikim yumi yet from. (1 Pita 4:3) Olgeta we oli bin mekem wok blong Jehova plante yia, olgeta tu oli stap gohed yet blong faet agensem ol slak fasin blong olgeta. ?Olsem wanem long yu? ?Samtaem yu gat tingting ya se Jehova i no save fogivim yu? Sipos yes, yu no mas harem nogud from we bifo sam gudfala man blong Jehova tu oli gat tingting olsem. Eksampol, aposol Pol i harem nogud taem hem i stap tingbaot ol slak fasin blong hem. (Rom 7:24) I tru se Pol i tanem tingting blong hem from ol sin blong hem mo i baptaes. Be yet, hem i tokbaot hem wan olsem wan man we i “daon moa long ol narafala aposol,” mo i “mowas” long olgeta man we oli stap mekem sin.—1 Kor. 15:9; 1 Tim. 1:15.

7. ?Oltaem yumi mas tingbaot wanem long saed blong ol sin we yumi bin mekem?

⁷ Papa blong yumi long heven i promes blong fogivim yumi sipos yumi tanem tingting blong yumi. (Sam 86:5) Taswe, sipos yumi rili sore from ol sin we yumi bin mekem, yumi save trastem tok blong Jehova we i se hem i fogivim yumi.—Kol. 2:13.

8-9. ?Olsem wanem blong winim tingting ya se yumi no naf blong mekem Jehova i glad?

⁸ Yumi evriwan i wantem mekem bes blong yumi blong wosipim Jehova. Be samfala oli gat tingting ya se samting we oli mekem i smol tumas, mo se Jehova i no save glad long olgeta from. Wan sista we nem blong hem Amanda i talem se: “Plante taem mi gat tingting ya se, mekem bes blong mi, hemia i min se oltaem mi mas mekem moa. Taswe, plante taem mi traem blong mekem moa long wanem we mi naf blong mekem. Be taem mi ‘no mekem olsem we mi wantem,’ mi harem nogud mo mi gat tingting ya se Jehova tu i no glad long mi.”

⁹ ?Olsem wanem blong winim tingting ya se yumi no naf blong mekem Jehova i glad? Tingbaot se Jehova i no save mekem i strong long yumi. Bambae hem i neva askem yumi blong mekem samting we yumi no naf blong mekem. Mo long eni wok we yumi mekem, sipos hem i luk se yumi mekem bes blong yumi long wok ya, hemia i mekem hem i glad. Mo tu, i gud blong tingbaot eksampol blong sam man long Baebol we oli mekem wok blong Jehova long fulhat blong olgeta. Wan eksampol, hemia Pol. Hem i wok had blong plante yia, hem i wokbaot plante taosen kilometa, mo i stanemap plante kongregesen. Be taem ol samting long laef blong hem i jenis, nao hem i no moa save prij plante olsem bifo, ?Jehova i no moa glad long hem? No. Hem i gohed blong mekem samting we hem i naf blong mekem, mo Jehova i blesem hem. (Wok 28:​30, 31) Long sem fasin, samtaem ol samting we yumi wantem givim long Jehova, maet oli save jenis. Be samting we i moa impoten long hem,  hemia tingting we i pusum yumi blong mekem. Naoia, bambae yumi tokbaot sam samting we Jehova i mekem blong soemaot se hem i glad long yumi.

?JEHOVA I MEKEM WANEM BLONG SOEMAOT SE HEM I GLAD LONG YUMI?

10. ?Olsem wanem yumi save “harem” we Jehova i talem se hem i glad long yumi? (Jon 16:27)

¹⁰ Hem i givim Baebol. Jehova i glad blong soemaot long ol man blong hem se hem i lavem olgeta mo i glad long olgeta. Baebol i tokbaot tu taem we Jehova i talem long Jisas se Hem i lavem hem, mo i glad long hem. (Mat. 3:17; 17:5) ?Yu yu wantem harem we Jehova i talem long yu se hem i glad long yu? Jehova i no save toktok stret long yumi, be hem i yusum Tok blong hem blong toktok long yumi. Yumi save “harem” voes blong Jehova we i talem se i glad long yumi, taem yumi ridim ol tok blong Jisas long buk blong ol Gospel. (Ridim Jon 16:27.) Jisas i soemaot gud ol fasin blong Papa blong hem. Taswe, taem yumi ridim se Jisas i talem long ol gudfala man blong hem we oli sinman se hem i glad long olgeta, yumi save pijarem se Jehova i stap talem ol tok ya tu long yumi.—Jon 15:​9, 15.

11. Taem yumi kasem ol trabol, ?hemia i min se Jehova i no glad long yumi? (Jemes 1:12)

¹¹ Hem i givim samting we yumi nidim. Jehova i wantem tumas blong givhan long yumi, mo givim ol samting we yumi nidim long bodi. Be samtaem, Jehova i save letem yumi fesem ol hadtaem, olsem we i mekem long gudfala man ya Job. (Job 1:​8-11) Taem yumi fesem ol trabol, hemia i no min se Jehova i no glad long yumi. Be oli givim janis long yumi blong pruvum se yumi lavem God mo se yumi trastem hem. (Ridim Jemes 1:12.) Mo bambae yumi luksave se Jehova i lavem yumi mo i stap sapotem yumi, taem i halpem yumi blong stanap strong.

12. ?Yumi save lanem wanem long ekspiriens blong Dmitrii?

¹² Traem tingbaot wan brata long Esia we nem blong hem Dmitrii. Hem i lusum wok blong hem mo blong plante manis hem i no save faenem wan narafala wok. Ale blong soemaot se hem i trastem Jehova, hem i jusum blong prij moa. Plante manis i pas, be hem i no faenem wan wok yet. Biaen hem i kasem wan bigfala sik we i mekem se hem i no save kamaot long bed. Nao hem i stat blong gat tingting ya se hem i no wan gudfala hasban  o papa, mo i ting se Jehova i no moa glad long hem. Be long wan sapa, gel blong hem i printim ol tok we i stap long Aesea 30:15 we i se: “Yufala i save kam strong sipos yufala i stap kwaet mo yufala i soemaot se yufala i trastem God,” mo i go putum long saed blong bed blong hem, mo i talem se: “Papa, taem yu harem nogud, yu save tingbaot vas ya.” Dmitrii i luksave se famle blong hem i gat wan ples blong slip, oli no sot long kakae, klos, mo i talem tangkiu long Jehova from. Hem i talem se: “Samting we mi nidim blong mekem, hemia blong stap kwaet mo soemaot se mi trastem God.” Sipos yu fesem wan problem olsem, yu save trastem se Jehova i kea long yu mo bambae i halpem yu blong stanap strong.

13. ?Jehova i save yusum hu blong talem se hem i glad long yumi, mo hem i mekem samting ya olsem wanem?

¹³ Hem i givim ol brata mo sista. Jehova i yusum ol brata mo sista blong soemaot long yumi se hem i glad long yumi. Eksampol, hem i save pulum olgeta blong talem ol gudfala tok long stret taem, blong leftemap tingting blong yumi. Hemia nao samting we i hapen long wan sista long Esia we i harem nogud tumas. Hem i bin lusum wok blong hem mo i kasem wan bigfala sik. Biaen hasban blong hem i mekem wan bigfala sin mo i no moa mekem wok blong elda. Sista ya i talem se: “Mi no save from wanem ol samting ya i hapen. Mi stap tingting se maet mi bin mekem wan samting we i no stret, nao Jehova i no moa glad long mi.” Sista ya i askem strong long Jehova blong i mekem hem i sua se Hem i glad long hem. ?Olsem wanem Jehova i ansa long prea blong hem? Hem i talem se: “Ol elda long kongregesen oli storian wetem mi, mo oli mekem mi harem save se Jehova i lavem mi.” Sam taem biaen, hem i askem bakegen blong  Jehova i halpem hem. Hem i talem se: “Long sem dei ya, mi kasem wan leta blong ol brata mo sista long kongregesen. Ol tok we mi ridim i leftemap tingting blong mi, mo mi luksave se Jehova i harem prea blong mi.” Yes, plante taem Jehova i yusum ol narafala blong talem ol gudfala tok blong soemaot se hem i glad long yumi.—Sam 10:17.

14. ?Wanem narafala samting we Jehova i mekem blong soemaot se hem i glad long yumi?

¹⁴ Jehova i soemaot tu se hem i glad long yumi, taem hem i yusum ol brata mo sista blong givim advaes long yumi taem yumi nidim. Eksampol, long faswan handred yia, Jehova i pulum aposol Pol blong raetem 14 leta i go long ol Kristin brata mo sista. Ol advaes long ol leta ya oli strong, be oli soemaot lav. ?From wanem Jehova i pulum Pol blong givim advaes olsem? Jehova i wan gudfala Papa, mo hem i stap stretem ol pikinini blong hem “we hem i glad tumas” long olgeta. (Prov. 3:​11, 12) Taswe, sipos yumi kasem wan advaes long Baebol, yumi no mas ting se Jehova i no glad long yumi, be yumi mas luk advaes ya olsem wan pruf se Jehova i glad long yumi. (Hib. 12:6) ?Jehova i mekem wanem moa blong soemaot se hem i glad long yumi?

SAM MOA PRUF SE JEHOVA I GLAD LONG YUMI

15. ?Jehova i givim tabu spirit long hu, mo hemia i mekem yu sua se long wanem?

¹⁵ Jehova i givim tabu spirit blong hem long ol man we hem i glad long olgeta. (Mat. 12:18) Taswe, yumi wanwan i save askem se: ‘?Mi mi stap soemaot sam long ol fasin we oli olsem ol frut blong tabu spirit?’ ?Yu yu luksave se yu gat longfala tingting moa i bitim taem ya we yu jes save Jehova? !Blong talem stret, taem yu stap lanem blong soemaot moa ol frut blong tabu spirit, bambae yu sua moa se Jehova i glad long yu!—Yu luk bokis ya “ Frut Blong Tabu Spirit Hemia . . .”

16. ?Jehova i stap yusum hu blong talemaot gud nius, mo hemia i mekem yu harem olsem wanem? (1 Tesalonaeka 2:4)

¹⁶ Jehova i givim wok ya blong talemaot gud nius long ol man we hem i glad long olgeta. (Ridim 1 Tesalonaeka 2:4.) Makem gudfala samting we i kamaot taem wan sista we nem blong hem Jocelyn, i talemaot gud nius long ol narafala. Wan dei, taem Jocelyn i wekap, hem i no harem gud tumas, hem i talem se: “Mi harem olsem se mi no gat paoa mo mi gud blong nating nomo. Be mi mi wan paenia mo hemia  dei blong mi blong prij. Ale, mi prea mo mi go long wok blong prij.” Long moning ya, Jocelyn i mitim Mary. Hem i wan woman we i kaen mo i agri blong stadi Baebol. Sam manis biaen, Mary i talem se, bifo we Jocelyn i noknok long doa blong hem, hem i bin prea blong God i halpem hem. Taem Jocelyn i tingbaot ekspiriens ya, hem i talem se: “Mi harem olsem se Jehova i stap talem long mi se: ‘Mi glad long yu.’” I tru se i no evri man we bambae oli glad blong lesin taem yumi prij. Be yumi save sua se Jehova i glad long yumi, taem yumi mekem bes blong yumi blong talemaot gud nius.

17. ?Yu lanem wanem long tok we Vicky i talem? (Ol Sam 5:12)

¹⁷ Jehova i yusum praes blong ransom blong pemaot ol man we hem i glad long olgeta. (1 Tim. 2:​5, 6) ?Be olsem wanem sipos yumi bilif long ransom mo yumi baptaes, be yumi gat tingting ya yet se Jehova i no glad long yumi? I gud blong tingbaot se yumi no save trastem prapa filing blong yumi oltaem, be yumi save trastem Jehova. Hem i luk ol man we oli bilif long ransom se oli olsem ol stret man long fes blong hem, mo hem i promes blong blesem olgeta. (Ridim Ol Sam 5:12; Rom 3:26) Wan sista we nem blong hem Vicky i luk se taem hem i tingting dip long ransom, hemia i halpem hem bigwan. Hem i talem se: “Longtaem finis, Jehova i gat longfala tingting long mi, . . . Be i olsem we mi mi stap talem long hem se: ‘Lav blong yu i smol, yu no naf blong lavem mi. Sakrefaes blong Pikinini blong yu i no naf blong kavremap sin blong mi.’” Taem hem i tingting dip long presen ya ransom, hem i stat blong harem se Jehova i lavem hem. Yumi tu, sipos yumi tingting dip long ransom, bambae yumi harem se Jehova i lavem yumi mo i glad long yumi.

18. Sipos yumi gohed blong lavem Jehova, ?yumi save sua long wanem?

¹⁸ Nating sipos yumi traehad blong folem ol advaes we yumi tokbaot antap, be maet samtaem yumi save harem nogud mo yumi no sua sipos Jehova i glad long yumi o nogat. Sipos i hapen olsem, tingbaot se Jehova i glad long “olgeta we oli gohed blong lavem Hem.” (Jem. 1:12) Taswe, i gud yu gohed blong kam klosap long Jehova, mo luksave ol samting we hem i mekem blong soemaot se hem i glad long yu. Mo i gud blong tingbaot oltaem se Jehova “i no stap longwe nating long yumi evriwan.”—Wok 17:27.