1-2. ?Wan man i mas mekem wanem bifo we hem i baptaes?

 LONG ol faef yia we i pas, i gat bitim wan milian man oli tekem baptaes mo oli kam ol Witnes blong Jehova. Plante long olgeta oli olsem Timoti, we oli lanem trutok “stat taem [oli] bebi.” (2 Tim. 3:​14, 15) Sam narafala oli lanem trutok afta we oli bigman finis. Eksampol, sam yia i pas, wan woman we i stadi Baebol wetem ol Witnes blong Jehova, i baptaes taem hem i gat 97 yia.

² Sipos yu yu wan Baebol stadi o yu wan pikinini we perens blong yu oli Witnes blong Jehova, ?yu yu stap tingbaot blong baptaes? !Hemia wan gudfala mak blong kasem! Be bifo we yu baptaes, yu mas givim laef blong yu long Jehova. Stadi ya bambae i eksplenem se i minim wanem blong givim laef long Jehova. Mo tu, bambae i halpem yu blong luk ol risen from wanem yu no mas fraet blong givim laef blong yu long Jehova mo baptaes sipos yu rere.

?I MINIM WANEM BLONG GIVIM LAEF LONG JEHOVA?

3. Tokbaot eksampol blong sam man we oli mekem wan spesel promes long Jehova.

³ Long Baebol, wan man we i givim laef blong hem long Jehova, i jusum blong mekem wan spesel wok. Nesen blong Isrel i blong Jehova, be sam long olgeta oli mekem wan spesel promes long Jehova. Eksampol, Eron i werem wan “tabu saen blong dedikesen,” hemia wan gol plet long fored blong kaliko we i stap long hed blong hem. Gol plet ya i soemaot se Jehova i jusumaot hem blong i mekem wan spesel wok, hemia blong hem i kam hae pris blong ol man Isrel. (Lev. 8:9) Ol Nasiraet tu oli mekem wan spesel promes long Jehova. Tok ya “Nasiraet,” we i kamaot long Hibru tok ya na·zir′, i minim “Man We i Seraot Long Ol Narafala” o “Dediketem Laef Blong Hem.” Ol Nasiraet  oli mas obei long ol spesel loa we i stap long Loa blong Moses.—Nam. 6:​2-8.

4. (1) ?Olgeta we oli givim laef blong olgeta long Jehova, oli jusum blong mekem wanem? (2) ?I minim wanem se yu ‘blokem ol samting we yu nomo yu wantem’? (Mo tu, yu luk pija.)

⁴ Taem yu givim laef blong yu long Jehova, yu jusum blong kam wan disaepol blong Jisas Kraes, mo putum wok blong Jehova fasples long laef blong yu. Be blong mekem olsem, ?wan Kristin i mas mekem wanem? Jisas i talem se: “Sipos eni man i wantem kam biaen long mi, hem i mas blokem ol samting we hem nomo i wantem.” (Mat. 16:24) Grik tok we oli tanem i kam “blokem ol samting we hem nomo i wantem,” i save minim tu se “hem i mas talem no long hem wan.” Wan man we i givim laef blong hem long Jehova, i mas talem no long eni samting we i go agensem wil blong Jehova. (2 Kor. 5:​14, 15) Hemia i minim tu se hem i mas talem no long “ol wok we oli kamaot long tingting blong man nomo,” olsem enikaen doti fasin blong seks. (Gal. 5:​19-21; 1 Kor. 6:18) Sipos yu obei long ol loa ya, ?hemia i min se laef blong yu bambae i kam had moa? !Nogat! Bambae i no had sipos yu lavem Jehova mo yu tingbaot se ol loa ya oli blong mekem i gud long yu. (Sam 119:97; Aes. 48:​17, 18) Wan brata we nem blong hem Nicholas, i talem se: “Yu save luk ol loa blong Jehova olsem ol aean blong wan kalabus we i blokem yu blong mekem ol samting we yu wantem, o olsem aean fenis we i goraon long wan laeon, we i protektem yu long denja.”

5. (1) ?Olsem wanem blong givim laef blong yu long Jehova? (2) ?Olsem wanem fasin blong givim laef long Jehova i defren long baptaes? (Mo tu, yu luk pija.)

⁵ ?Olsem wanem blong givim laef blong yu long Jehova? Yu mekem olsem, taem yu mekem wan spesel prea long hem mo yu promes se bambae yu wosipim hem nomo, mo yu putum wok blong hem i stap fasples long laef blong yu. Blong talem stret, yu promes long  Jehova se bambae yu gohed blong lavem hem “long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.” (Mak 12:30) Taem yu givim laef blong yu long Jehova, i no gat wan narafala man i save, yu mo Jehova nomo. Be taem yu baptaes, yu soemaot long evri man se yu givim laef blong yu finis long Jehova. Mo hemia i wan spesel promes we yu mekem mo yu mas holemtaet, mo Jehova tu i wantem se yu holemtaet promes ya.—Pri. 5:​4, 5.

?FROM WANEM YU GIVIM LAEF BLONG YU LONG JEHOVA?

6. ?Wanem i pulum wan man blong i givim laef blong hem long Jehova?

⁶ Impoten risen from wanem yu givim laef blong yu long Jehova, hemia se yu lavem hem. Lav ya i no wan filing nomo, be hem i stanap long “stret save” we yu gat long Jehova, mo long “fasin blong kasem save long ol samting we i kam long God.” Ol samting ya nao oli mekem se yu lavem Jehova moa. (Kol. 1:9) Taem yu stadi Baebol, yu kasemsave se (1) Jehova i rili stap, (2) Baebol i tok blong hem, mo (3) se hem i yusum oganaesesen blong hem blong mekem samting we hem i wantem i kamtru.

7. ?Yumi mas mekem wanem bifo we yumi givim laef blong yumi i go long God?

⁷ Olgeta we oli givim laef blong olgeta long Jehova, oli mas save ol stamba tijing long Baebol mo obei long ol loa blong hem. From we oli lavem Jehova, oli mekem bes blong olgeta blong tokbaot ol samting we oli lanem long ol narafala. (Mat. 28:​19, 20) Mo tu, oli wantem wosipim hem nomo. ?Hemia sem filing we yu yu gat? Sipos yu lavem Jehova long fulhat blong yu, bambae yu no givim laef blong yu mo baptaes jes blong mekem Baebol tija o perens  blong yu i glad, o from we ol fren blong yu tu oli mekem olsem.

8. ?Sipos yumi glad long ol samting we Jehova i mekem blong yumi, bambae yumi glad blong mekem wanem? (Ol Sam 116:​12-14)

⁸ Taem yumi tingbaot olgeta gudfala samting we Jehova i mekem blong yumi, bambae yumi glad nomo blong givim laef blong yumi long hem. (Ridim Ol Sam 116:​12-14.) Baebol i tokbaot Jehova se hem i God ya we i givim “olgeta gudfala presen mo ol presen we oli nambawan.” (Jem. 1:17) Be beswan presen we hem i givim, hemia sakrefaes blong Boe blong hem, Jisas. !Traem tingbaot! Ransom i mekem se yu naf blong fren gud wetem Jehova mo i givim janis long yu blong kasem laef olwe. (1 Jon 4:​9, 10, 19) Taem yu givim laef blong yu long Jehova, yu soemaot klia se yu glad long lav we hem i soemaot long yu mo long olgeta narafala blesing we hem i givim. (Dut. 16:17; 2 Kor. 5:15) Long tri minit video ya Givim Ol Presen Blong Yu Long God, we i stap long buk ya !Enjoem Laef Olwe! lesen 46, poen 4, i tokbaot sam rod we yu save folem blong soemaot se yu glad long lav ya blong God.

?YU YU RERE BLONG GIVIM LAEF BLONG YU LONG JEHOVA MO BAPTAES?

9. ?From wanem wan man i no mas komperem hem wetem ol narafala, taem hem i tekem desisen blong givim laef blong hem long Jehova?

⁹ Maet yu harem se yu no rere yet blong givim laef blong yu long Jehova mo baptaes. Maet yu nidim blong mekem sam jenis long laef blong yu, blong yu save obei long ol loa blong Jehova, o maet yu nidim moa taem blong mekem bilif blong yu i kam strong moa. (Kol. 2:​6, 7) Lav we ol Baebol studen oli gat long Jehova i no sem mak, mo i no evri yangfala we oli rere blong givim laef blong olgeta long Jehova mo baptaes. Taswe, i gud yu traem luksave ol samting we yu mas kam gud moa long olgeta mo yu mekem, be yu no mas komperem yu wetem ol narafala.—Gal. 6:​4, 5.

10. ?Yu save mekem wanem sipos yu luksave se yu no rere yet blong givim laef blong yu mo baptaes? (Mo tu, yu luk bokis ya “ Olgeta We Oli Gruap Long Trutok.”)

¹⁰ Sipos yu luksave se yu no rere yet blong givim laef blong yu long Jehova, i gud yu gohed blong tingbaot mak ya. Askem Jehova blong i blesem yu taem yu traehad blong mekem ol jenis we yu mas mekem. (Fil. 2:13; 3:16) Mo yu save sua se bambae hem i harem prea blong yu mo i ansa.—1 Jon 5:14.

?FROM WANEM SAMFALA OLI FRAET?

11. ?Olsem wanem Jehova bambae i halpem yumi blong holemstrong long hem?

¹¹ Samfala oli rere blong givim laef blong olgeta long Jehova mo baptaes, be oli fraet. Maet oli stap tingting se: ‘?Olsem wanem sipos afta we mi baptaes, mi mekem wan bigfala sin mo kongregesen i putumaot mi?’ Sipos yu gat tingting olsem, i gud yu trastem se Jehova bambae i givim evri samting we yu nidim blong “wokbaot stret olsem we [hem] i wantem, blong mekem hem i glad.” (Kol. 1:10) Mo tu, bambae hem i givim paoa long yu blong mekem samting we i stret. Hem i bin halpem plante man finis blong oli mekem samting we i stret. (1 Kor. 10:13) Hemia nao from wanem i gat smol man nomo we kongregesen i putumaot olgeta. Yes, Jehova i halpem ol man blong hem blong oli holemstrong long hem.

12. ?Yumi save mekem wanem blong yumi no mekem bigfala sin?

¹² From we yumi evriwan i sinman, yumi save mekem sam samting we i no stret. (Jem. 1:14) Be yu save jusum se bambae yu mekem wanem taem wan samting i traem yu. Blong talem stret, yu wan yu save jusum se laef blong yu bambae i olsem wanem. Sam man oli talem se yumi no save kontrolem ol filing mo ol samting we yumi wantem mekem. Be tingting ya i  giaman. Yu save lanem blong kontrolem ol nogud filing we yu gat. Taswe, taem wan samting i traem yu, yu save jusum blong no mekem samting we i no stret. Mo i gat sam narafala samting tu we yu mas mekem. Eksampol, yu mas prea evri dei. Holem wan gudfala program blong mekem prapa stadi blong yu. Go oltaem long ol Kristin miting, mo tokbaot bilif blong yu long ol narafala. Sipos yu mekem ol samting ya oltaem, bambae yu naf blong holemtaet promes we yu mekem long Jehova. Mo yu neva mas fogetem se Jehova i naf blong halpem yu.—Gal. 5:16.

13. ?Wanem gudfala eksampol we Josef i soemaot long yumi?

¹³ Bambae i isi blong yu holemstrong long Jehova, sipos yu mekem desisen fastaem finis se bambae yu mekem wanem sipos wan samting i traem yu. Baebol i tokbaot plante man we oli mekem olsem, nating se olgeta tu oli sinman. Eksampol, waef blong Potifa i traehad plante taem blong pulum Josef blong i slip wetem hem. Be Josef i save finis samting we hem i mas mekem. Baebol i talem se “hem i no wantem,” mo hem i talem se: “?Olsem wanem mi save mekem bigfala rong olsem mo mekem sin agens long God?” (Jen. 39:​8-10) I klia se Josef i save finis samting we bambae hem i mekem, bifo we waef blong Potifa i traem pulum hem. Hemia i mekem se i isi blong Josef i mekem samting we i stret, taem hem i fesem traem ya.

14. ?Wanem i save halpem yu blong talem no long ol samting we i traem yu?

¹⁴ ?Olsem wanem yu save folem eksampol blong Josef blong talem no long ol samting we i traem yu? Yu save mekem olsem sipos yu tingbaot naoia samting we bambae yu mekem, sipos yu fesem wan traem. Lanem blong talem no kwiktaem long ol samting we Jehova i no laekem, mo no tingbaot olgeta nating. (Sam 97:10; 119:165) Sipos yu mekem olsem, bambae yu no mekem sin taem wan samting i traem yu, from yu save finis samting we bambae yu mekem.

15. ?Olsem wanem wan man i soemaot se hem i “stap traehad blong faenem” Jehova? (Hibru 11:6)

¹⁵ Maet yu save se yu faenem trutok mo yu wantem mekem wok blong Jehova long fulhat blong yu, be i gat wan samting we i blokem yu blong givim laef blong yu long Jehova mo  baptaes. Sipos i olsem, yu save mekem olsem King Deved. Yu askem strong long Jehova se: “O God, yu jekemgud laef blong mi mo yu save hat blong mi. Yu lukluk gud laef blong mi, mo i gud yu save ol tingting we oli stap mekem mi mi wari. Yu traem luk sipos i gat eni nogud samting long laef blong mi, mo yu lidim mi long rod we i no gat en blong hem.” (Sam 139:​23, 24) Jehova i blesem olgeta we oli “stap traehad blong faenem hem.” Taem yu stap traehad blong kasem mak ya blong givim laef blong yu long Jehova mo baptaes, yu soemaot long hem se yu stap traehad blong faenem hem.—Ridim Hibru 11:6.

GOHED BLONG KAM KLOSAP LONG JEHOVA

16-17. ?Olsem wanem Jehova i pulum olgeta we oli gruap long trutok oli kam long hem? (Jon 6:44)

¹⁶ Jisas i talem se Jehova nao i pulum ol disaepol oli kam long hem. (Ridim Jon 6:44.) Hemia i wan nambawan samting, mo hemia nao samting we hem i mekem long yu tu. Jehova i luk wan gudfala samting long yumi wanwan mo i pulum yumi i kam long hem. Hem i luk yumi wanwan olsem “spesel propeti,” o “sas samting” blong hem. (Dut. 7:6; fut.) Hemia nao olsem wanem Jehova i luk yu.

¹⁷ Maet yu yu wan yangfala we i gruap long trutok. Maet yu harem se yu stap wosipim Jehova nomo from we perens blong yu i wosipim Jehova, be i no from we Jehova nao i pulum yu yu kam long hem. Nating se i olsem, Baebol i talem se: “Yufala i mas kam klosap long God, nao hem bambae i kam klosap long yufala.” (Jem. 4:8; 1 Kron. 28:9) Taem yu tekem faswan step blong kam klosap long Jehova, hem bambae i kam klosap long yu. Jehova i no luk yu olsem wan man insaed long wan grup nomo, be hem i pulum yumi wanwan, inkludum olgeta we oli gruap long trutok, blong yumi kam long hem. Taem ol man olsem oli tekem faswan step blong kam klosap long Jehova, Jehova i kam klosap long olgeta olsem we Jemes 4:8 i talem.—Skelem wetem 2 Tesalonaeka 2:13.

18. ?Bambae yumi tokbaot wanem long nekis stadi? (Ol Sam 40:8)

¹⁸ Taem yu givim laef blong yu long Jehova mo baptaes, yu soemaot se yu stap folem fasin blong Jisas. Hem i glad nomo blong givim laef blong hem long Papa blong hem, blong mekem eni samting we Hem i askem. (Ridim Ol Sam 40:8; Hib. 10:7) Long nekis stadi, bambae yumi tokbaot samting we i save halpem yu, blong yu gohed blong holemstrong long Jehova afta we yu baptaes.