1, 2. ?Buk blong Jenesis i tokbaot se sam man oli kros from wanem samting? ?From wanem i gud we yumi tokbaot ol stori ya?

BAEBOL i tokbaot stori blong sam man we oli gat fasin blong kros long narafala. Long ol fas japta blong Jenesis, yumi luk stori blong Ken we i kilim Ebel i ded. (Jenesis 4:3-8) Mo Lamek, we i kilim i ded wan yangfala boe, from we boe ya i faetem hem. (Jenesis 4:23) Mo tu, stori blong ol man blong lukaot long ol anamol blong Lot mo Ebraham, we oli raorao long olgeta. (Jenesis 13:5-7) Stori blong Hega we i flas se hem i gud moa long Sera, mo samting ya i mekem se Sera i kros tumas long Ebraham. (Jenesis 16:3-6) Mo stori blong Ismael we i agens long evri man, mo evri man oli agens long hem.—Jenesis 16:12.

² ?From wanem Baebol i tokbaot ol stori ya? From we ol man ya, oli sinman mo oli gat ol problem olsem yumi. Taswe, yumi save folem ol gudfala eksampol blong ol man long Baebol, we oli stretem problem wetem lav, be yumi no wantem folem ol nogud eksampol. (Rom 15:4) Sipos yumi mekem olsem, bambae yumi gat pis wetem ol narafala.

3. ?Bambae yumi tokbaot wanem long stadi ya?

 ³ Long stadi ya, bambae yumi tokbaot from wanem yumi mas stretem wan problem wetem narafala, mo olsem wanem yumi save mekem samting ya. Mo tu, bambae yumi luk sam rul blong Baebol we oli save givhan long yumi, blong stretem ol problem mo gohed blong fren gud wetem Jehova mo ol narafala.

4. ?Wanem nogud tingting we i kasem olgeta ples long wol, mo wanem frut i kamaot from?

⁴ Fasin blong no laekem narafala mo kros long narafala, i kamaot long Setan. ?From wanem yumi talem olsem? Yu traem tingbaot. Long garen blong Iden, Setan i talem se evri man i save jusum samting we i gud mo samting we i nogud, mo oli no nidim God. (Jenesis 3:1-5) Be tede, fasin ya i mekem plante problem i kamaot. Plante man oli ting se oli gat raet blong jusum samting we i gud mo samting we i nogud. Oli flas, oli tingbaot olgeta nomo, mo oli wantem win long evri samting we oli stap mekem, mo oli no kea sipos desisen we oli mekem i spolem narafala. Ol fasin ya, oli save mekem se ol man oli raorao. Be Baebol i givhan long yumi blong save se, sipos yumi gat fasin blong kros kwik, bambae yumi no fren gud wetem ol narafala mo yumi save mekem plante sin.—Ol Proveb 29:22.

5. ?Jisas i talem se ol man oli mas mekem wanem taem i gat wan problem?

⁵ Long bigfala toktok we Jisas i mekem antap long hil, hem i talem se ol man blong hem oli mas mekem pis wetem narafala. Mo oli no mas rao wetem ol man, nating sipos ol man oli harem se i had blong mekem. Eksampol, hem i talem long olgeta se oli mas kaen long man, oli mas mekem pis wetem narafala, oli no mas kros long narafala, oli mas stretem problem kwiktaem, mo oli mas lavem ol enemi blong olgeta.—Matiu 5:5, 9, 22, 25, 44.

6, 7. (1) ?From wanem yumi mas kwik blong mekem pis wetem narafala mo fogivim narafala? (2) ?Wanem ol kwestin we i gud yumi wanwan i askem?

⁶ Tede, yumi wosipim Jehova taem yumi prea, yumi prij, mo yumi go long ol miting. Be sipos yumi no mekem pis wetem ol narafala, bambae Jehova i no glad long wosip we yumi mekem. (Mak 11:25) Sipos yumi wantem stap olsem ol fren blong Jehova, yumi mas fogivim ol narafala from ol mastik we oli mekem.—Ridim Luk 11:4; Efesas 4:32.

⁷ Jehova i wantem se olgeta man blong hem oli mas fogivim ol narafala, mo oli mas gat pis wetem ol narafala. I gud yumi askem se: ‘?Mi mi kwik blong fogivim ol brata mo sista? ?Mi mi glad blong joen wetem olgeta?’ Sipos yu luksave se yu mas wok had long fasin ya blong fogivim narafala, i gud yu prea long Jehova blong i givhan long yu. Papa blong yumi long heven, bambae i harem ol gudfala prea blong yu mo bambae hem i ansa long yu.—1 Jon 5:14, 15.

8, 9. ?Yumi mas mekem wanem sipos narafala i mekem yumi harem nogud?

⁸ Yumi evriwan i sinman, taswe samtaem yumi save harem nogud from toktok we narafala i talem, no samting we hem i mekem. (Prija 7:20; Matiu 18:7) Sipos samting olsem i hapen long yu, ?bambae yu mekem wanem? I gud yumi luk stori blong tu brata, we i save givhan long yumi. Wan dei, ol brata mo sista oli joen wanples mo wan sista i kam talem halo long tu brata. Be wan long tufala, i no glad long fasin we sista ya i mekem, blong talem halo long hem.  Taem sista i aot long tufala, brata we i no glad, i stat blong komplen from fasin blong sista ya. Be narafala brata i talem long hem se, sista ya i holemstrong long wok blong Jehova blong 40 yia, nating se hem i kasem plante hadtaem. Brata ya i talem olsem, from we hem i save se sista ya, i no minim blong mekem fasin ya, taem hem i talem halo long tufala. ?Brata we i no glad, i talem wanem? Hem i talem se: “Si, yu talem tru ya.” Ale, hem i jusum blong no moa tingbaot samting we i hapen.

⁹ ?Stori ya i tijim yumi long wanem? Taem wan man i mekem yumi harem nogud, yumi save jusum blong tingbaot rong we hem i mekem, no yumi save jusum blong no tingbaot rong we hem i mekem. Man we i lavem narafala, hem i save fogivim hem. (Ridim Ol Proveb 10:12; 1 Pita 4:8.) Sipos narafala i “mekem rong long yu, nao yu no tingbaot,” hemia wan gudfala samting we i mekem Jehova i glad. (Ol Proveb 19:11; Prija 7:9) Taswe, sipos wan man i talem wan samting, no i mekem wan samting we i mekem yu harem nogud, i gud yu askem se: ‘?Bambae mi fogivim hem? ?I stret we mi gohed blong tingbaot samting ya?’

10. (1) ?Fastaem wan sista i mekem wanem taem ol narafala oli tokbaot hem? (2) ?Wanem vas blong Baebol we i givhan long sista ya blong i gat pis?

¹⁰ Taem ol narafala oli talem wan samting we i mekem yumi harem nogud, maet i had blong yumi fogetem samting we oli talem. Yu traem tingbaot samting we i hapen long Lusi, we i wan paenia. Samfala long kongregesen oli stap tokbaot hem, se hem i no save prij gud, mo tu oli talem se hem i no stap yusumgud taem blong hem. Lusi i harem nogud bigwan, mo i askem advaes long sam brata we oli bigman long tingting. ?Wanem frut i kamaot? Ol brata ya oli ridim sam vas blong Baebol, we oli givhan long hem blong i tingbaot Jehova moa, i bitim we hem i stap tingbaot samting we ol narafala oli talem agensem hem. Vas blong Matiu 6:1-4. (Ridim.) i givhan bigwan long hem. Ol vas ya, oli mekem hem i tingbaot se i impoten tumas blong mekem Jehova i glad. Taswe, hem i jusum blong no tingbaot samting we i hapen. Naoia, sipos wan brata no sista i tokbaot hem from wok blong prij, be hem i glad nomo from we hem i save se hem i stap traehad blong mekem Jehova i glad.

11, 12. (1) ?Wan Kristin i mas mekem wanem, sipos hem i save se wan brata blong hem ‘i stap kros long hem from wan samting’? (2) ?Yumi lanem wanem long stori blong Ebraham mo Lot? (Yu luk pija long stat blong stadi.)

¹¹ “Plante taem, yumi evriwan i mekem i no stret.” (Jemes 3:2) Sipos yu kasemsave se wan brata i no glad long yu, from wan samting we yu mekem no yu talem, ?bambae yu mekem wanem? Jisas i talem se, sipos “yu kam long Olta blong God blong givim presen i go long hem, nao yu tingbaot we brata blong yu i stap kros long yu from wan samting, yu mas livim presen ya i stap long fes blong Olta fastaem. Nao yu mas go stretem poen ya wetem brata blong yu blong yutufala i fren gud, nao biaen yu save kambak bakegen blong givim presen blong yu long God.” (Matiu 5:23, 24) Taswe, i gud yu go storian wetem brata no sista we i mekem yu harem nogud. Mak blong yu, hemia blong mekem pis wetem hem. Yu mas talem se yu nao yu rong mo yu no mas blemem hem from mastik blong yu. Samting we i moa impoten, hemia blong mekem pis wetem narafala.

¹² Baebol i tokbaot olsem wanem ol man blong  God oli save mekem pis, taem i gat wan problem. Yu traem tingbaot Ebraham mo Lot. Tufala i gat plante anamol, mo ol man blong lukaot long ol anamol blong tufala, oli stap raorao long olgeta from we i no gat ples blong ol anamol oli stap long hem. Ebraham i wantem se tufala i gat pis, taswe hem i letem Lot blong i jusum beswan ples we hem i wantem go stap long hem. (Jenesis 13:1, 2, 5-9) !Hemia wan gudfala eksampol blong yumi! ?Olsem wanem? ?Ebraham i harem nogud from gudfala fasin we hem i soemaot long Lot? Nogat. Stret afta long taem ya, Jehova i promes blong blesem Ebraham. (Jenesis 13:14-17) ?Yumi lanem wanem long stori ya? Yumi lanem se Jehova bambae i blesem yumi, taem yumi stretem problem blong yumi long kaen fasin, nating se yumi harem nogud. ^[1]—Yu luk ol not, pej 8.

13. ?Wan brata we i lukaot long wan wok long asembli, i mekem wanem taem narafala i talem sam toktok we oli no stret? ?Eksampol blong brata ya i save givhan long yumi olsem wanem?

¹³ Yu traem tingbaot stori blong wan brata we i lukaot long wan wok blong asembli. Hem i ring long wan narafala brata mo i askem hem blong wok wetem hem, long taem blong asembli. Brata we i ansa long telefon, i talem sam toktok we oli no stret, mo i ofem telefon long narafala brata ya. Hem i mekem olsem from we hem i kros long wan narafala brata we i bin lukaot long wok ya fastaem. Brata we i ring, i no kros, be hem i wantem stretem problem ya. Afta we wan aoa i pas, hem i ring bakegen long brata ya, mo i askem hem sipos tufala i save storian. Long nekis wik, tufala i mit long Haos Kingdom mo tufala i mekem wan prea long Jehova, biaen tufala i storian blong wan aoa. Brata we i kros, i tokbaot samting we faswan brata we i lukaot long wok ya, i bin mekem long hem, we i spolem hem. Narafala brata i lesin gud, mo i tokbaot sam gudfala vas we oli leftemap tingting blong brata ya. From samting ya, tufala i mekem pis mo tufala i wok wanples long taem blong asembli. Brata we i bin kros, i glad bigwan taem brata we i lukaot long wan wok long asembli i toktok kaen long hem, mo i no strong tumas long hem.

14, 15. (1) ?Wetaem i stret blong yumi folem advaes blong Matiu 18:15-17? (2) ?Wanem ol trifala rod we Jisas i tokbaot? ?Wanem mak blong yumi taem yumi folem ol advaes ya?

¹⁴ Sipos tu Kristin oli gat wan problem, i gud we tufala nomo i stretem problem blong tufala. Be samtaem, i nidim we narafala tu i joen long bisnes ya, olsem Matiu 18:15-17 (Ridim.) i tokbaot. Taem Jisas i talem tok ya se brata blong yu i “mekem i no stret,” hemia i no min se i wan smol problem. ?Olsem wanem yumi save samting ya? Jisas i talem se, sipos man i no wantem tanem tingting blong hem, afta we hem i storian wetem brata blong hem, bambae brata blong hem i mas tekem wan no tu man wetem hem, blong oli witnes blong hem, mo sipos hem i no wantem lesin yet, brata blong hem i mas talemaot long ol man we oli gat wok long kongregesen. Mo sipos hem i no wantem lesin yet, oli mas luk hem “olsem we hem i wan hiten man, no wan man blong tekem mane blong takis.” Hemia i min se kongregesen i mas putumaot hem. Fasin ya blong “mekem i no stret,” i minim ol fasin olsem, kruked fasin, no fasin blong spolem nem blong narafala, be i no minim ol rabis fasin olsem, man i slip wetem woman blong narafala, woman i slip wetem man blong narafala, man i slip wetem man, woman i slip wetem woman, fasin blong apostasi, mo fasin blong wosipim aedol. Sipos wan brata no sista i mekem ol fasin ya, bambae ol elda oli mas luk hem.

¹⁵ Taem Jisas i talem tok ya, hem i wantem se yumi givhan long ol brata mo sista. Mo yumi wantem mekem olsem, from we yumi lavem olgeta. (Matiu 18:12-14) ?Olsem wanem yumi save folem advaes ya? (1) Yumi mas traehad blong gat pis wetem ol brata mo sista, mo i no  nid blong yumi tokbaot long ol narafala. Maet yumi mas storian wetem hem plante taem. ?Be olsem wanem sipos i no gat pis yet? (2) Yumi mas go toktok wetem brata blong yumi, mo askem wan narafala we maet hem tu i save problem ya, blong hem i save kam wetem yumi, blong luk sipos i gat wan samting we i no stret. Sipos yu stretem problem ya, bambae yutufala i save “fren gud bakegen.” Be, sipos yu go plante taem blong yutufala i stretem problem ya, be hem i no wantem, yu mas go (3) talemaot problem ya long ol elda.

16. ?Wanem i soemaot se advaes blong Jisas i save givhan long yumi taem yumi folem?

¹⁶ Samtaem, i no nid blong folem evri samting long ol trifala rod ya we oli stap long Matiu 18:15-17. Hemia i wan gudfala samting. ?From wanem yumi talem olsem? From plante taem, man we i mekem sin i luksave mastik we hem i mekem long narafala mo i stretem kwiktaem, taswe i no nid blong kongregesen i putumaot hem. Mo brata we i harem nogud i save fogivim narafala, blong tufala i save gat pis bakegen. Taswe, tok blong Jisas i soemaot klia se yumi no nid blong go luk ol elda kwiktaem, blong talemaot wan problem long olgeta. Be sipos yumi folem finis tufala faswan rod mo yumi gat ol pruf long problem we i hapen, long taem ya nao yumi save go talemaot problem ya long ol elda.

17. ?Wanem ol blesing we bambae yumi kasem taem yumi “mekem pis” wetem narafala?

¹⁷ From we yumi sinman, oltaem yumi mestem mo yumi save mekem narafala i harem nogud. Jemes i raetem se: “Plante taem, yumi evriwan i mekem i no stret. Be man we i no mekem mastik samtaem long toktok blong hem, hem i wan man we i stret gud olgeta. Man olsem bambae i save blokem olgeta rabis samting we i save spolem laef blong hem.” (Jemes 3:2) Sipos yumi wantem stretem wan problem, yumi mas “wok had blong mekem pis.” (Ol Sam 34:14) Taem yumi gohed blong mekem pis wetem narafala, bambae yumi fren gud wetem ol brata mo sista, mo samting ya bambae i mekem se yumi joen gud oltaem. (Ol Sam 133:1-3) Be samting we i moa impoten, hemia se bambae yumi fren gud moa wetem Jehova, “God ya we i stamba blong pis blong yumi.” (Rom 15:33) Bambae yumi harem gud tumas long ol gudfala blesing ya, taem yumi stretem problem wetem narafala long fasin we i soemaot se yumi lavem olgeta.