1. ?Wanem sam eksampol blong ol loa blong Baebol? ?Olsem wanem ol loa ya oli givhan long yumi taem yumi folem olgeta?

JEHOVA i givim ol loa blong hem long yumi we oli stap long Baebol, mo i talem samting we yumi mas mekem. Eksampol, hem i talem se yumi no mas wosipim ol aedol, stil, dring bitim mak, mo mekem ol rabis fasin blong man wetem woman. (1 Korin 6:9, 10) Mo Jisas, pikinini blong Jehova, i talem long ol man blong hem se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.’ (Matiu 28:19, 20) Evri samting we Jehova mo Jisas tufala i talem long yumi, oli blong givhan long yumi. Ol loa blong Jehova oli tijim yumi blong lukaot gud long yumi wanwan, mo ol famle blong yumi. Mo tu, oli  tijim yumi blong gat wan gudfala helt mo blong harem gud long laef. Samting we i moa impoten, hemia se Jehova i glad bigwan taem yumi obei long ol tok blong hem, olsem wok blong prij we hem i askem yumi blong mekem, mo hem bambae i blesem yumi.

2, 3. (1) ?From wanem Baebol i no putum sam stret rul long evri samting we yumi mekem long laef? (2) ?Wanem ol kwestin we bambae yumi tokbaot long stadi ya? (Yu luk pija long stat blong stadi.)

² Baebol i no talemaot evri samting we yumi mas mekem long laef blong yumi. Eksampol, Baebol i no givim wan loa blong ol klos we yumi mas werem. Hemia i soemaot se Jehova i waes tumas. Nating se i gat plante niufala stael blong klos we oli stap kamaot mo ol man oli werem ol defdefren stael blong klos, be Baebol i neva jenis. Mo tu, Baebol i no givim plante rul long saed blong ol wok we yumi mas mekem, no ol samting we yumi mas mekem blong spel mo pleplei, no ol samting we yumi mas mekem blong gat wan gudfala helt. Jehova i letem we wanwan man mo ol hed blong famle, oli mekem ol desisen long saed blong ol samting ya.

³ Taswe, taem yumi wantem mekem wan impoten desisen, be i no gat wan prapa loa blong hem long Baebol, maet yumi stap tingbaot se: ‘?Jehova bambae i glad long desisen we mi mekem? ?Bambae hem i glad nomo long eni samting we mi mekem, nating sipos mi no brekem wan loa blong Baebol? ?Olsem wanem mi save se Jehova bambae i glad long desisen we mi mekem?’

4, 5. ?Ol desisen blong yumi oli save mekem wanem long yumi mo ol narafala?

⁴ Sam man oli ting se, oli save mekem eni samting we oli wantem. Be yumi wantem mekem Jehova i glad. Taswe, bifo we yumi mekem wan desisen, yumi mas tingbaot samting we Baebol i talem, mo yumi obei long hem. Eksampol, Baebol i talemaot tingting we God i gat long blad, taswe yumi mas obei long samting we Baebol i talem. (Jenesis 9:4; Ol Wok 15:28, 29) Yumi save prea long Jehova blong hem i givhan long yumi, blong mekem ol desisen we oli mekem hem i glad.

⁵ Ol desisen blong yumi, oli save mekem i gud long yumi, no oli save spolem yumi. Wan gudfala desisen i save mekem yumi fren gud moa wetem Jehova. Be, wan nogud desisen i save spolem fasin blong yumi blong fren gud wetem Jehova. Mo tu, ol desisen blong yumi oli save mekem i gud long narafala, no oli save spolem olgeta. From samting ya, yumi no mas mekem wan samting we i save spolem bilif blong ol brata mo sista, no yumi mekem olgeta oli harem nogud. Mo yumi no mas mekem eni samting we i save spolem pis long kongregesen. Taswe, i impoten tumas we yumi mekem ol gudfala desisen.—Ridim Rom 14:19; Galesia 6:7.

6. ?Wanem i save givhan long yumi blong mekem prapa desisen blong yumi?

⁶ ?Olsem wanem yumi save mekem wan gudfala desisen, nating se Baebol i no talem stret samting we yumi mas mekem? Yumi mas lukaot gud blong no mekem samting we yumi nomo i wantem. I gud yumi tingting gud long samting we yumi wantem mekem, mo yumi mas tingbaot blong mekem Jehova i glad. Olsem nao, Jehova bambae i givhan long yumi blong mekem wan gudfala desisen.—Ridim Ol Sam 37:5.

7. ?Olsem wanem blong save tingting blong Jehova long wan samting, nating se Baebol i no givim wan loa long samting ya?

⁷ ?Olsem wanem yumi save mekem Jehova i glad? Efesas 5:17 i talem se: “Yufala i mas  traem save olgeta samting we Masta blong yumi i wantem blong yufala i mekem.” Sipos i no gat wan stret loa long Baebol long saed blong wan samting, i gud yumi tingting gud blong kasemsave samting we Jehova i wantem yumi blong mekem. ?Olsem wanem yumi save mekem samting ya? Yumi mas prea long hem mo letem tabu spirit blong hem i lidim yumi.

8. ?Olsem wanem Jisas i mekem samting we Jehova i wantem? Yu tokbaot wan eksampol.

⁸ Oltaem Jisas i save samting we Jehova i wantem hem blong mekem. Yu traem tingbaot. I bin gat tu taem we wan bigfala hip blong ol man oli hanggri, mo Jisas i prea mo i mekem merikel blong givim kakae long olgeta. (Matiu 14:17-20; 15:34-37) Be taem Jisas i stap long draeples, hem i hanggri mo Setan i wantem se Jisas i jenisim ol ston i kam bred, be Jisas i no wantem mekem nating. (Ridim Matiu 4:2-4) Jisas i savegud Jehova, mo i save se Jehova i no wantem se hem i yusum tabu spirit blong mekem samting we hem nomo i wantem. Hem i save se Papa blong hem bambae i lidim gud hem, mo i givim kakae long hem, taem hem i nidim.

9, 10. ?Wanem i save givhan long yumi blong mekem wan gudfala desisen? Yu talem wan stori.

⁹ Yumi save mekem ol gudfala desisen olsem Jisas, sipos yumi letem Jehova i lidim yumi. Baebol i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem. I nogud yu ting se yu yu wan waes man. Yu mas tinghevi long Hae God, yu mas ona gud long hem, mo yu mas tanem baksaed long ol fasin nogud.” (Ol Proveb 3:5-7) Taem yumi stadi Baebol mo lanem ol tingting blong Jehova, hemia bambae i givhan long yumi blong mekem wan gudfala desisen long eni samting we yumi wantem mekem. Mo taem yumi gohed blong savegud ol tingting blong Jehova, bambae yumi naf blong mekem ol gudfala desisen we oli mekem Jehova i glad. Taem yumi mekem olsem, bambae Jehova i ‘givim long yumi gudfala tingting blong yumi save obei long hem.’—Esikel 11:19.

¹⁰ Yu traem tingbaot wan woman. Hem i go wokbaot long stoa mo hem i luk wan sus we i naes. Be sus ya i sas tumas. Nating se man blong woman ya i no folem hem, be woman ya i save finis tingting blong man blong hem, sipos hem i spenem bigfala mane blong pem sus ya. ?Olsem wanem hem i save samting ya? Hemia from we tufala i mared blong plante yia finis, mo hem i savegud tingting blong man blong hem long saed blong mane. Long sem fasin, taem yumi savegud ol tingting blong Jehova, mo ol samting we hem i mekem long ol man blong hem bifo, bambae yumi naf blong save ol samting we hem i wantem yumi blong mekem, long ol defren samting we yumi mekem.

11. ?Wanem ol kwestin we yumi save tingbaot taem yumi ridim Baebol mo stadi long hem? (Luk bokis ya,  “Taem Yu Stadi Long Baebol, I Gud Yu Tingbaot Ol Kwestin Ya.”)

¹¹ ?Olsem wanem yumi save faenemaot ol  tingting blong Jehova? Wan impoten samting we yumi save mekem, hemia blong ridim Baebol oltaem mo stadi long hem. Taem yumi mekem olsem, i gud yumi tingbaot ol kwestin ya: ‘?Vas ya i tijim mi long wanem fasin blong Jehova? ?From wanem Jehova i mekem olsem?’ I gud we yumi mekem olsem Deved, blong askem Jehova blong i givhan long yumi blong savegud Hem. Deved i raetem se: “Hae God. Plis yu tijim mi long ol fasin blong yu, yu mekem mi mi savegud ol rod blong yu. Yu tijim mi, blong mi save folem trutok blong yu long olgeta laef blong mi, from we yu nomo yu God blong mi we yu stap sevem mi. Oltaem mi mi trastem yu.” (Ol Sam 25:4, 5) Taem yumi savegud ol tingting blong Jehova, hemia bambae i givhan long yumi blong mekem ol gudfala desisen long famle, long wok, long skul, mo long wok blong prij. Taswe, bambae i isi blong yu folem tingting blong Jehova, taem yumi mas mekem desisen long wan samting.

12. ?Olsem wanem ol buk mo ol miting blong yumi, oli givhan long yumi blong savegud ol tingting blong Jehova?

¹² Wan narafala rod we yumi save folem blong faenemaot ol tingting blong Jehova, hemia taem yumi folemgud ol advaes blong Baebol, we ogenaesesen blong Jehova i stap givimaot. Eksampol, tufala buk ya, Watch Tower Publications Index mo Buk Blong Mekem Risej  oli save givhan long yumi blong fanemaot ol tingting blong Jehova long wan desisen we yumi wantem mekem. Mo tu, ol miting oli save givhan long yumi, taem yumi lesin gud long ol tok, yumi joen blong givim ol ansa, mo yumi tingting dip long ol samting we yumi lanem. Samting ya bambae i givhan long yumi blong gat tingting olsem Jehova, long ol samting we yumi mekem. Ale, bambae yumi naf blong mekem ol gudfala desisen we Jehova i glad long hem, mo bambae hem i blesem yumi.

13. Yu tokbaot wan eksampol we i soemaot se ol tingting blong Jehova, oli save givhan long yumi blong mekem ol waes desisen.

¹³ I gud yumi luk wan eksampol we i soemaot olsem wanem yumi save mekem wan gudfala desisen, we i laenap wetem tingting blong Jehova. Maet yu putum mak blong kam wan paenia. Yu mekem sam jenis long laef blong yu, blong yu save mekem moa long wok blong prij. Be maet yu no sua gud sipos smol mane mo ol samting we yu gat, bambae oli mekem yu glad. I tru, Baebol i no talem se yumi mas kam paenia blong mekem wok blong Jehova. Yumi save gohed blong mekem wok blong Jehova, nating se yumi no paenia. Be Jisas i talem se, Jehova i stap blesem ol man we oli lego sam samting long laef blong olgeta, blong oli save talemaot gud nius blong Kingdom. (Ridim Luk 18:29, 30.) Mo tu, Baebol i talem se Jehova i glad long yumi taem yumi mekem bes blong yumi blong leftemap nem blong hem, mo hem i wantem se yumi glad taem yumi mekem wok blong hem. (Ol Sam 119:108; 2 Korin 9:7) Taem yumi prea from ol samting ya, mo yumi tingting dip long olgeta, bambae yumi save mekem wan desisen we i stret, mo Jehova bambae i blesem yumi.

14. ?Olsem bambae yu save sipos stael blong klos we yu jusum i mekem Jehova i glad?

¹⁴ Wan narafala eksampol bakegen. Yu laekem tumas wan stael blong klos, be yu save se samfala long kongregesen bambae oli no glad sipos oli luk we yu werem klos ya. Be Baebol i no givim wan rul long stael blong klos ya. Taswe, ?olsem wanem bambae yu save tingting blong Jehova long saed ya? Baebol i talem se: “Ol woman oli putum klos blong olgeta we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel, mo ol dres ya we praes blong olgeta i antap tumas, blong mekem ol man oli glad long olgeta. Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.” (1 Timoti 2:9, 10) Tok ya i go long yumi evriwan we i wosipim Jehova. Sipos yumi gat tingting daon, bambae yumi tingbaot tingting blong narafala long ol klos we yumi werem. Yumi lavem ol brata mo sista, taswe yumi no wantem mekem oli kros, no oli harem nogud. (1 Korin 10:23, 24; Filipae 3:17) Sipos yumi savegud ol tingting blong Jehova long Baebol, bambae yumi naf blong mekem ol gudfala desisen we i mekem Jehova i glad.

15, 16. (1) ?Jehova i harem olsem wanem sipos yumi stap gohed blong tingbaot ol rabis fasin? (2) ?Olsem wanem yumi save mekem Jehova i glad, taem yumi jusum ol samting blong spel mo pleplei? (3) ?Olsem wanem yumi save mekem ol desisen we oli impoten?

¹⁵ Yumi lanem long Baebol se Jehova i harem nogud taem hem i luk ol man oli mekem ol rabis fasin, mo oli tingbaot ol samting we oli no stret. (Ridim Jenesis 6:5, 6.) Jehova i no laekem nating we yumi stap drim long ol nogud fasin blong seks evridei. Sipos oltaem yumi stap drim long ol nogud fasin ya, maet yumi save mekem ol fasin ya. Be Jehova i  wantem se yumi tingbaot ol gudfala samting. Disaepol Jemes i raetem se waes we i kamaot long Jehova, i save mekem laef blong man i “klin gud, mo hem i man blong pis, i kwaet man, i man blong joen gud long narafala man, mo i man we i gat sore long man. Waes blong man ya i gat plante gudfala frut long laef blong hem. Hem i no save jajem man long fasin we i no stret, mo hem i no save giaman.” (Jemes 3:17) Taswe, Baebol i tijim yumi se yumi mas blokem eni samting we i save pulum tingting blong yumi blong mekem ol samting we oli no stret. Sipos yumi savegud tingting blong Jehova, bambae i isi blong yumi jusum ol gudfala samting blong spel mo pleplei, olsem ol buk blong ridim, ol muvi blong wajem, mo ol pleplei. Bambae yumi no nid blong askem ol narafala blong talem samting we yumi mas mekem.

¹⁶ I gat plante rod we yumi save folem blong mekem wan desisen we Jehova i glad long hem. Be sipos yumi wantem mekem wan desisen we i moa impoten, maet i gud we yumi askem advaes long wan elda, no wan brata, no sista we i bigman long tingting. (Taetas 2:3-5; Jemes 5:13-15) Be yumi no mas askem narafala blong i mekem desisen blong yumi. Yumi mas tingbaot samting we Baebol i talem, mo yumi mekem prapa desisen blong yumi. (Hibrus 5:14) Aposol Pol i talem se: “Evri man i gat wok blong hem.”—Galesia 6:5.

17. ?Wanem ol blesing we bambae yumi kasem sipos yumi mekem ol desisen we Jehova i glad long hem?

¹⁷ Taem yumi mekem ol desisen we Jehova i glad long hem, hemia i mekem yumi kam klosap moa long hem, mo hem i blesem yumi. (Jemes 4:8) Nao bilif blong yumi i kam strong moa. Taswe, blong savegud ol tingting blong Jehova, i gud we yumi tingting dip long ol save we yumi ridim long Baebol. I tru, oltaem yumi save lanem plante samting long saed blong Jehova. (Job 26:14) Taswe, sipos yumi traehad blong savegud Jehova naoia, bambae yumi kam waes mo yumi naf blong mekem ol gudfala desisen. (Ol Proveb 2:1-5) Ol tingting blong man mo ol plan blong olgeta oli stap jenis, be ol tingting blong Jehova oli neva jenis. Wan man blong raetem Sam i talem se: “Be ol plan blong hem oli stap stanap strong oltaem. Tingting blong hem i stap we i stap, i no save finis samtaem.” (Ol Sam 33:11) Yumi save mekem ol gudfala desisen, taem yumi savegud tingting blong Jehova, mo yumi mekem samting we hem i glad long hem.