1, 2. ?Wanem kwestin we yumi save tingbaot folem tok blong Jisas long Matiu 24:14?

JISAS i talem se long lasdei, ol man bambae oli talemaot gud nius blong Kingdom long olgeta ples long wol. (Matiu 24:14) Long fulwol, ol man oli save yumi ol Witnes blong Jehova, from wok blong prij we yumi stap mekem. Sam man oli glad blong lesin long mesej we yumi talemaot, be samfala oli no laekem nating. Nating se samfala oli no laekem, be oli respektem wok we yumi stap mekem. Yumi talem se yumi nao yumi stap mekem wok we Jisas i talem. ?I stret we yumi talem olsem? ?Olsem wanem yumi save se wok blong prij we yumi stap mekem, hem i wok ya nao we Jisas i talem?

² Plante jos oli talem se olgeta oli stap talemaot gud nius blong Jisas. Be samting we oli mekem i smol nomo. Oli prij long jos, long TV, long Intenet, no maet oli tokbaot long ol narafala olsem wanem oli save Jisas. Samfala oli  ting se taem oli mekem wok olsem wan dokta, tija no wan narafala wok blong givhan long ol man, hemia i olsem we oli prij long olgeta. ?Be yu ting se ol wok olsem hem i wok blong prij we Jisas i stap tokbaot?

3. Folem vas blong Matiu 28:19, 20, ?wanem fo samting we ol man blong Jisas oli mas mekem?

³ ?Olsem wanem? ?Jisas i wantem se ol disaepol oli wet blong ol man oli kam luk olgeta? !Nogat! Taem Jisas i laef bakegen, hem i talem long ol disaepol blong hem se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta. . . . Mo yufala i mas tijim olgeta blong oli folem olgeta tok ya we mi mi givim finis long yufala.” (Matiu 28:19, 20) Taswe, from we yumi man blong Jisas, yumi mas mekem fo samting. Yumi mas go pulum ol man oli kam disaepol blong Jisas, yumi baptaesem olgeta, mo yumi mas tijim olgeta. Be fastaem, yumi mas go luk ol man. Wan man blong stadi long Baebol i talem se: “Tok ya ‘go,’ i minim wok we wan man blong bilif i mekem, blong go luk ol man long taon, no i go long wan defren ples.”—Matiu 10:7; Luk 10:3.

4. ?Tok ya “man blong pulum man,” i minim wanem?

⁴ ?Jisas i wantem se ol disaepol blong hem oli prij olsem wanem? ?Yu ting se hem i wantem we ol disaepol oli prij wanwan, no oli wok olsem wan grup? Blong talem stret, wan man nomo i no naf blong prij long “olgeta ples long wol.” Taswe, ol disaepol oli mas wok olsem wan grup. Hemia nao from wanem Jisas i talem se, ol disaepol oli “man blong pulum man.” (Ridim Matiu 4:18-22.) Taem Jisas i talem tok ya, hem i no minim fasin blong pulum fis we wan man i yusum string blong hem, mo i wet blong fis i kam kakae. Defren olgeta, Jisas i stap minim fasin blong pulum fis, we man i yusum net blong kasem fis. Mo hemia i wan had wok, mo i nidim plante man blong oli wok gud wanples blong mekem wok ya.—Luk 5:1-11.

5. ?Wanem ol fo kwestin we yumi mas ansa long olgeta? ?From wanem yumi mas save ansa blong olgeta?

⁵ I gud yumi ansa long fo kwestin, we bambae oli givhan long yumi blong save hu olgeta we oli stap talemaot gud nius tede:

• ?Wanem mesej we ol man blong Jisas oli mas talemaot?

• ?Wanem i pusum olgeta blong oli mekem wok ya?

• ?Oli mekem wok ya olsem wanem?

• ?Wanem mak blong wok ya, mo bambae i finis wetaem?

Ansa blong ol kwestin ya bambae i givhan long yumi blong luksave hu olgeta we oli stap mekem wok ya blong sevem laef blong ol man. Mo samting ya bambae i leftemap tingting blong yumi blong gohed blong talemaot gud nius.—1 Timoti 4:16.

6. ?From wanem yumi sua se ol Witnes blong Jehova nao oli stap talemaot gud nius blong Kingdom?

⁶ Ridim Luk 4:43. Jisas i ‘talemaot gud  nius blong Kingdom,’ mo hem i wantem se ol disaepol blong hem tu oli mekem sem mak. ?I gat wan grup blong ol man we oli stap talemaot mesej ya long ol man? !Yes, hemia ol Witnes blong Jehova nomo! Samfala we oli no laekem yumi, oli talem sem samting. Yu traem luk toktok we wan pris i talem long wan Witnes blong Jehova. Pris ya i laef long plante defren kantri, we i gat ol Witnes blong Jehova tu long hem. Long ol kantri ya, pris ya i askem long ol Witnes blong oli talem mesej we oli stap talemaot long ol man. Ol Witnes ya oli givim sem ansa nomo, mo pris ya i talem se: “Yufala evriwan i krangke, from we yufala i talem sem samting, hemia: ‘Gud nius blong Kingdom.’” Toktok we pris ya i talem, i soemaot se yumi no krangke, be yumi wok wanples olsem ol trufala Kristin. (1 Korin 1:10) Mo tu, Kingdom blong God nao hem i bigfala mesej we i stap insaed long magasin ya, Wajtaoa i Talemaot Kingdom Blong Jehova. Magasin ya i stap long 254 lanwis, mo evri manis oli printim 59,000,000 kopi. !I nogat wan narafala magasin long wol we i olsem!

7. ?Olsem wanem yumi save se ol lida blong ol giaman skul oli no stap talemaot gud nius blong Kingdom?

⁷ Ol lida blong ol giaman skul, oli no stap talemaot Kingdom blong God. Oli talem se Kingdom blong God, hem i wan samting insaed long hat blong man. (Luk 17:21) Oli no tijim ol man se Kingdom blong God hem i wan trufala gavman long heven, we Jisas nao i king long hem. Be, oli tokbaot Jisas nomo long taem blong Krismas, no long Ista. Oli no talem se Kingdom blong God nao bambae i stretem evri problem long wol ya. (Revelesen 19:11-21) Blong talem stret, ol lida blong ol skul we oli talem se oli Kristin, oli no save samting we Jisas bambae i mekem, olsem King long Kingdom blong God. Taswe, from we oli no kasemsave mesej blong Jisas, oli no kasemsave tu from wanem oli mas talemaot gud nius.

8. ?Wanem nogud tingting we yumi no mas gat long wok blong prij?

⁸ Ol disaepol blong Jisas oli no mas prij blong kasem mane mo blong gat ol naesfala haos. Jisas i se: “Paoa ya, yufala i kasem we yufala i no pem, mo yufala i mas yusum, we oli no pem yufala from.” (Matiu 10:8) Taswe, wok blong prij i no mas kam olsem wan bisnes. (2 Korin 2:17) Ol disaepol blong Jisas oli no mas askem ol narafala blong oli pem olgeta from wok blong prij. (Ridim Ol Wok 20:33-35.) Tok we Jisas i talem i klia nomo, nating se i olsem, plante jos oli stap askem mane long ol narafala blong pem ol pasta blong olgeta, ol narafala man we oli wok long jos, mo ol samting blong jos. From samting ya, plante lida blong ol skul we oli talem se oli Kristin, oli kam rijman.—Revelesen 17:4, 5.

9. ?Ol Witnes blong Jehova oli soemaot olsem wanem se oli gat stret tingting blong prij?

⁹ ?Ol Witnes blong Jehova oli askem mane long taem blong ol miting no asembli blong olgeta? !Nogat! Wok blong olgeta i stanap  long presen mane we oli kasem. (2 Korin 9:7) Long las yia, ol Witnes blong Jehova oli spenem samwe long tu bilian aoa blong talemaot gud nius, mo oli mekem Baebol stadi long bitim naen milian man evri manis. Oli no kasem mane from wok blong prij we oli mekem, be oli glad nomo blong yusum mane blong olgeta long wok ya. Wan man blong mekem risej i tokbaot ol Witnes blong Jehova i se: “Mak blong olgeta hemia blong prij mo tijim narafala.” Mo tu, hem i talem se ol Witnes blong Jehova oli no gat ol pasta mo oli no pem ol narafala from wok we oli mekem blong prij. Taswe, sipos yumi no prij blong kasem mane, ?wanem i pusum yumi blong mekem wok ya? Yumi glad nomo blong mekem wok ya from we yumi lavem Jehova mo ol man. Hemia i mekem tok we i stap long Ol Sam 110:3. (Ridim.) i kamtru.

10. ?Jisas wetem ol disaepol oli mekem olsem wanem blong prij?

¹⁰ ?Jisas wetem ol disaepol oli mekem olsem wanem blong prij? Oli prij long eni ples we oli save faenem man long hem. Yu traem tingbaot, oli prij long rod mo long maket. Mo tu, oli go long haos blong ol man. (Matiu 10:11; Luk 8:1; Ol Wok 5:42; 20:20) Taem yumi go long ol haos wanwan blong prij, hemia i wan nambawan rod we i save givhan long yumi blong prij long olgeta man.

11, 12. ?Olsem wanem wok we ol Witnes blong Jehova oli mekem blong talemaot gud nius, i defren long wok we ol skul we oli talem se oli Kristin oli mekem?

¹¹ ?Ol jos we oli talem se oli Kristin, oli stap talemaot gud nius olsem we Jisas i mekem? Plante taem ol pasta oli prij long ol man we oli memba blong jos blong olgeta  nomo. Ol pasta ya oli no traehad blong pulum ol man oli kam disaepol, be oli holemtaet nomo ol man we oli stap finis long jos blong olgeta. Samtaem, oli talem long ol memba blong olgeta blong oli prij. Eksampol, long yia 2001, Pop Jon Pol II i raetem wan leta blong talem se ol memba blong jos oli mas prijimaot Gospel, mo oli mas gat strong tingting olsem aposol Pol we i talem se: “Sipos mi no prijimaot Gospel, hemia i wan bigfala trabol blong mi ya.” Pop i gohed i se, evri man we oli memba blong jos oli mas mekem wok ya, i no olgeta nomo we oli kasem trening. Be smol man nomo oli folem tok ya we Pop i talem.

¹² ?Be olsem wanem long ol Witnes blong Jehova? Ol Witnes blong Jehova nomo oli stap talemaot se Jisas i stat blong rul olsem King long yia 1914. Oli obei long Jisas mo oli putum wok ya blong talemaot gud nius i stap fasples long laef blong olgeta. (Mak 13:10) Buk ya, Pillars of Faith—American Congregations and Their Partners i talem se, ol Witnes blong Jehova oli tinghae bigwan long wok blong prij. Oli givhan long ol man we oli hanggri, oli stap olgeta nomo, mo oli sik, be oltaem oli tingbaot se mak blong olgeta hemia blong prij long olgeta man long wol, blong oli save kasem laef we i no save finis. Ol Witnes blong Jehova oli gohed blong talemaot mesej ya, mo oli folemgud fasin blong Jisas mo ol disaepol blong hem blong prij.

13. ?Wanem mak blong wok blong prij?

¹³ Jisas i talem se ol man blong hem bambae oli talemaot gud nius “long olgeta ples long wol.” Hem i talem se oli mas go long “olgeta ples long wol” blong pulum ol man oli kam disaepol. (Matiu 24:14; 28:19, 20) Hemia i min se oli mas talemaot gud nius long fulwol.

14, 15. ?Wanem i soemaot se ol Witnes blong Jehova oli stap mekem profet tok we Jisas i talem i kamtru? (Yu luk pija long stat blong stadi.)

¹⁴ Ol Witnes blong Jehova nomo oli stap mekem profet tok we Jisas i talem i kamtru, hemia blong talemaot gud nius long olgeta ples long wol. ?From wanem yumi talem olsem? Long Yunaeted Stet, i gat samwe long 600,000 memba blong ol pasta blong ol skul we oli talem se oli Kristin, be i gat samwe long 1,200,000 Witnes blong Jehova we oli stap talemaot gud nius long kantri ya. Long fulwol, i gat samwe long 400,000 pris blong Katolik, be i gat bitim 8 milian Witnes blong Jehova we oli stap talemaot gud nius long 240 kantri. Ol Witnes blong Jehova nomo oli stap talemaot gud nius long olgeta ples long wol. !Samting ya i leftemap nem blong Jehova!—Ol Sam 34:1; 51:15.

¹⁵ Yumi ol Witnes blong Jehova, mak blong yumi i blong talemaot gud nius long ol man bifo we en i kam. Yumi wokem plante buk, magasin, traket, mo ol invetesen blong asembli mo memoriol long bitim 700 lanwis. Ol samting ya oli givhan long yumi blong mekem gud wok ya blong talemaot gud nius. Yumi no salem ol samting ya, be yumi givimaot fri nomo long ol man. Long las yia nomo, yumi printim samwe long 4.5 bilian buk we oli tokbaot Baebol. Mo tu, yumi printim bitim 200 milian kopi blong Baebol ya, New World Translation of the Holy Scriptures long bitim 130 lanwis. Mo Websaet blong yumi tu i stap long bitim  750 lanwis. Ol Witnes blong Jehova nomo oli stap mekem nambawan wok ya.

16. ?Olsem wanem yumi save se tabu spirit i stap wetem ol Witnes blong Jehova?

¹⁶ ?Wok blong prij bambae i gohed kasem wetaem? Jisas i talem se ol man bambae oli talemaot gud nius go kasem we en i kam. Yumi ol Witnes blong Jehova, yumi wok strong blong talemaot gud nius long ol lasdei, from we Jehova i givim tabu spirit blong hem long yumi. (Ol Wok 1:8; 1 Pita 4:14) Sam skul oli talem se: “Tabu spirit i stap wetem mifala.” ?Be i tru we oli gohed blong prij long ol lasdei ya? Sam jos oli traem blong prij olsem ol Witnes blong Jehova, be oli no naf blong mekem. Samfala oli glad blong prij, be oli mekem smol taem nomo. Mo tu, maet samfala oli go long ol haos wanwan blong prij, be oli no talemaot gud nius blong Kingdom. Taswe, oli no save mekem wok ya we Jisas i statem.

17, 18. (1) ?From wanem yumi sua se ol Witnes blong Jehova nomo oli stap talemaot gud nius blong Kingdom tede? (2) ?Olsem wanem yumi save gohed blong mekem wok ya?

¹⁷ Taswe, ?hu olgeta we oli stap talemaot gud nius blong Kingdom tede? !Ol Witnes blong Jehova nomo! ?Yumi save samting ya olsem wanem? From we yumi stap talemaot stret mesej long ol man, hemia gud nius blong Kingdom. Yumi stap go prij long ol man, taswe yumi stap folem stret rod blong prij. Mo from we yumi lavem Jehova mo ol man, hemia nao stret tingting we i pusum yumi blong prij. Wok blong prij we yumi mekem, i wan bigfala wok from we yumi mas prij long olgeta ples long wol mo long ol defren lanwis. Mo bambae yumi gohed blong talemaot gud nius blong Kingdom go kasem en.

¹⁸ I gud tumas blong luk ol gudfala wok we ol man blong Jehova oli stap mekem long ol lasdei ya. ?Wanem i mekem se yumi naf blong mekem olgeta wok ya? Aposol Pol i talem se: “Oltaem God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem.” (Filipae 2:13) Jehova bambae i gohed blong givim paoa long yumi, blong yumi save mekem bes blong yumi, long wok ya blong talemaot gud nius.—2 Timoti 4:5.