1, 2. (1) ?Ol Witnes blong Jehova oli gat wanem tingting long Baebol? (2) ?Yu yu laekem weswan haf blong Baebol?

YUMI ol Witnes blong Jehova, yumi laekem Baebol tumas. Baebol i leftemap tingting blong yumi taem yumi harem nogud, i tokbaot ol gudfala hop long yumi, mo i givim ol gudfala advaes we yumi save folem. (Rom 15:4) I tru se ol man nomo oli raetem Baebol, be ol tingting we oli stap insaed, oli kamaot ‘stret long God.’—1 Tesalonaeka 2:13.

² Ating yumi evriwan i laekem sam defdefren haf insaed long Baebol. Samfala oli laekem ol gospel, from we oli tokbaot ol gudfala fasin blong Jehova we Jisas i soemaot taem hem i stap long wol. (Jon 14:9) Sam narafala oli laekem ol buk we oli tokbaot ol profet tok, olsem Revelesen we i tokbaot ‘ol samting we, bambae oli kamtru i no longtaem.’ (Revelesen 1:1) Samfala oli laekem blong ridim buk blong Ol Sam, from ol gudfala toktok we i mekem olgeta oli glad. Mo tu, sam narafala oli laekem blong ridim buk blong Ol Proveb, from ol gudfala advaes we oli stap long hem. I tru nomo se Baebol i wan buk blong yumi evriwan.

3, 4. (1) ?Yumi gat wanem tingting long ol buk blong yumi? (2) ?Wanem sam buk we yumi kasem, we oli wokem speseli blong samfala man nomo?

 ³ Yumi laekem Baebol tumas, from samting ya yumi laekem ol buk blong yumi, we oli stanap long ol save blong Baebol. Evri buk, buklet, magasin, mo traket we yumi kasem, oli ol gudfala samting we Jehova i givim long yumi. Ol samting ya, oli givhan long yumi blong fren gud wetem hem, mo blong gat bilif we i strong oltaem.—Taetas 2:2.

⁴ Plante long ol buk blong yumi, oli wokem speseli blong ol Witnes blong Jehova. Be i gat sam buk we oli wokem blong ol yangfala mo ol papa mo mama. Long Websaet blong yumi, ol putum sam atikol mo video we oli blong ol man we oli no Witnes blong Jehova. Ol samting ya oli soemaot se Jehova i holem promes we hem i mekem, blong givim plante save long olgeta man.—Aesea 25:6.

5. ?Jehova i glad long yumi taem yumi mekem wanem?

⁵ Plante long yumi oli laekem blong spenem moa taem blong ridim Baebol mo ol buk blong yumi. Taswe, maet yumi no gat naf taem blong ridim mo stadi gud long evri buk we yumi gat. Yumi save se Jehova i glad long yumi, taem yumi yusumgud taem blong yumi, blong ridim mo stadi gud long Baebol, mo ol buk blong yumi. (Efesas 5:15, 16) Be i gat wan samting we yumi mas lukaot gud blong i no spolem yumi. ?Wanem samting ya?

6. ?Wanem i save mekem se yumi mestem sam gudfala samting we Jehova i stap givim?

⁶ Sipos yumi no lukaot gud, yumi save gat rong tingting se sam haf blong Baebol no ol buk blong yumi, oli no stret long yumi. Eksampol, maet yumi luk se wan haf blong Baebol i no laenap wetem problem we yumi gat. No maet yumi luk wan buk we oli raetem, se i no blong yumi, mo yumi ridim buk ya kwik taem nomo, no maet yumi no wantem ridim nating. Sipos yumi mekem olsem, bambae yumi mestem ol gudfala advaes we oli save givhan long yumi. ?Olsem wanem yumi save blokem ol rong tingting ya? Yumi mas tingbaot se Jehova nao, i stap givim evri save we yumi kasem. Baebol i talem se: “Mi mi Hae God, mi God blong yufala. Mi nao mi stap tijim yufala blong givhan long yufala.” (Aesea 48:17) Long stadi ya, bambae yumi tokbaot tri rod we oli save givhan long yumi, blong yusumgud ol gudfala samting we Jehova i stap givim blong tijim yumi.

7. ?From wanem yumi mas gat stret tingting taem yumi ridim Baebol?

⁷ Gat stret tingting taem yu ridim Baebol. I tru se sam haf blong Baebol oli raetem speseli blong wan man, no wan grup blong ol man. Nating se i olsem, Baebol i talem se ‘olgeta tok blong Baebol oli kamaot long God fastaem, mo oli stret gud blong tijim yumi.’ (2 Timoti 3:16) Taswe, yumi mas gat stret tingting taem yumi ridim Baebol. Wan brata i tingbaot se hem i save lanem plante samting, taem hem i ridim wan stori nomo, long Baebol. Hemia i givhan long hem blong lanem plante niufala save. Taswe, bifo we yumi ridim Baebol, yumi mas askem long Jehova blong i openem tingting blong yumi, mo i givhan long yumi blong kasemsave ol gudfala lesen we hem i wantem yumi blong save.—Esra 7:10; ridim Jemes 1:5.

8, 9. (1) ?Wanem ol kwestin we i gud yumi askem taem yumi ridim Baebol? (2) ?Fasin we ol elda oli mas gat, i tijim wanem long saed blong Jehova?

⁸ Yu askem kwestin. Taem yu ridim Baebol, i gud yu stop smol mo yu askem ol kwestin ya: ‘?Vas ya i tijim wanem long saed blong Jehova? ?Olsem wanem bambae mi yusum save ya long laef blong mi? ?Olsem wanem  bambae mi yusum save ya blong givhan long ol narafala?’ Taem yumi tingting dip long ol kwestin ya, bambae yumi kasem plante gudfala samting taem yumi ridim Baebol. I gud yumi luk wan eksampol. Baebol i tokbaot sam fasin we wan elda i mas gat. (Ridim 1 Timoti 3:2-7.) Be plante long yumi oli no ol elda, taswe maet yumi ting se ol advaes ya oli no blong yumi. Nating se i olsem, i gud yumi yusum ol trifala kwestin we yumi tokbaot, blong luk olsem wanem ol advaes ya oli save givhan long yumi evriwan.

⁹ “?Vas ya i tijim wanem long saed blong Jehova?” Jehova i talemaot ol fasin we wan elda i mas gat. Hem i wantem se ol man we oli lukaot long kongregesen oli mas gat ol gudfala fasin. Samting ya i soemaot se Jehova i tinghae long kongregesen. Baebol i talem se, Jehova “i pemaot ol man ya finis long blad blong Pikinini blong hem.” (Ol Wok 20:28) Taswe, Jehova i wantem se ol elda oli mas soemaot gudfala eksampol long ol narafala, mo oli mas talemaot long hem, olsem wanem oli lukaot long kongregesen. Jehova i wantem se yumi harem gud, taem ol elda ol lukaot long yumi. (Aesea 32:1, 2) Taswe, taem yumi ridim Baebol mo yumi luk ol fasin we Jehova i wantem se ol elda oli mas gat, yumi lanem se Jehova i kea bigwan long yumi.

10, 11. (1) ?Ol save we yumi lanem long fasin blong ol elda, oli save givhan long yumi olsem wanem? (2) ?Olsem wanem yumi save yusum ol save ya blong givhan long ol narafala?

¹⁰ “?Olsem wanem bambae mi yusum save ya  long laef blong mi?” Sipos yu yu wan elda, i gud yu luklukgud bakegen long ol fasin we wan elda i mas gat mo yu traehad blong folem olgeta. Mo sipos yu ‘wantem kam wan elda,’ yu mas traehad blong wokem ol fasin we wan elda i mas gat. (1 Timoti 3:1) Nating se i olsem, yumi evriwan i save lanem samting long fasin blong ol elda, we Baebol i tokbaot. Eksampol, Jehova i wantem se yumi wanwan i mas mekem i gud long yumi mo yumi gat gudfala tingting. (Filipae 4:5; 1 Pita 4:7) Taem ol elda oli ‘soemaot stret fasin long ol man,’ hemia i givhan long yumi blong folem eksampol blong olgeta mo ‘bilif blong olgeta.’—1 Pita 5:3; Hibrus 13:7.

¹¹ “?Olsem wanem bambae mi yusum save ya blong givhan long ol narafala?” Ol save we yumi lanem long fasin blong ol elda we Baebol i tokbaot, bambae i givhan long yumi blong eksplenem long ol Baebol stadi blong yumi se, ol elda oli no olsem ol lida blong ol narafala skul. Mo tu, ol save ya bambae oli givhan long yumi blong tingbaot bigfala wok we ol elda oli stap mekem, long ol kongregesen blong yumi. Mo hemia i givhan long yumi blong gat respek long ol elda. (1 Tesalonaeka 5:12) Taem yumi respektem ol elda, bambae oli glad blong mekem wok blong olgeta long kongregesen.—Hibrus 13:17.

12, 13. (1) ?Yumi save lukaot moa save long saed blong wanem? (2) Yu tokbaot wan eksampol we i soemaot se taem yumi lukaot moa save, bambae yumi faenem ol gudfala lesen.

¹² Yu lukaot moa save. Taem yumi stadi long Baebol, i gud yumi askem ol kwestin ya, mo traem faenem ansa blong olgeta:

• ?Hu i raetem haf blong Baebol ya?

• ?Hem i raetem wetaem mo long weples?

• ?Wanem ol samting we oli hapen long taem we hem i raetem haf blong Baebol ya?

Ol save we yumi faenem, bambae oli givhan long yumi blong lanem wan niufala samting.

¹³ Eksampol, Esikel 14:13, 14 i talem se: “Sipos ol man blong wan kantri oli mekem sin agens long mi we tingting blong olgeta i no moa stap strong long mi, mi bambae mi leftemap han blong mi, mi spolem ol kakae blong olgeta. Bambae mi mekem olgeta oli kasem wan hadtaem we oli sot long kakae, mo bambae oli hanggri gogo oli ded, mo ol anamol blong olgeta tu bambae oli ded. Nating we sipos trifala man ya, Noa mo Daniel mo Job, trifala i stap long taem ya, be gudfala fasin blong trifala bambae i sevem laef blong trifala nomo. Mi mi Hae God, mi Masta blong yufala, mo hemia tok blong mi.” Sipos yumi lukaot moa save, bambae yumi faenemaot se Esikel i raetem ol tok ya samwe long 612 yia bifo Kraes. Noa mo Job tufala i ded plante handred yia finis, be Jehova i tingbaot tufala yet, from strong bilif blong tufala. Daniel i laef yet long taem ya. Ating hem i gat samwe long 20 yia, taem Jehova i talem se hem i olsem Noa mo Job, we tufala i gat strong bilif. ?Yumi lanem wanem? Yumi lanem se Jehova i stap luk mo i tinghae long ol gudfala man blong hem, hemia i minim ol yangfala tu.—Ol Sam 148:12-14.

14. ?Olsem wanem ol buk we oli wokem blong ol yangfala i save givhan long olgeta? ?Olsem wanem ol buk ya oli save givhan long yumi taem yumi ridim? (Yu luk pija long stat blong stadi.)

¹⁴ Ol buk blong ol yangfala. Yumi lanem finis se evri haf blong Baebol, oli save givhan long yumi. Long sem fasin, evri buk mo magasin blong yumi oli save givhan long yumi. I gud yumi luk sam eksampol. Long ol yia we oli jes pas, Jehova i givim plante gudfala advaes long ol yangfala. ^[1] (Yu luk ol not, pej 32.) Ol advaes ya oli givhan long olgeta, blong winim ol problem we oli gat long skul, mo ol trabol we oli kasem taem oli gruap. ?Be olsem wanem ol advaes ya oli save givhan long yumi evriwan, taem yumi ridim ol buk blong ol yangfala? Taem yumi ridim ol buk ya, yumi kasemsave long ol problem we ol yangfala oli stap fesem, mo hemia i givhan long yumi blong halpem olgeta mo leftemap tingting blong olgeta.

15. ?From wanem ol bigman oli mas glad blong save ol advaes we oli kamaot long ol buk blong ol yangfala?

¹⁵ Ol bigman oli no mas gat tingting ya se, advaes blong ol yangfala i no stret long ol bigman. Ol buk blong ol yangfala oli tokbaot ol problem we plante Kristin oli kasem. Eksampol, yumi evriwan i traehad blong gat strong bilif, bos long filing blong yumi, ronwe long ol man we oli traem pulum yumi blong mekem rabis fasin, mo lego ol rabis fren mo ol samting blong spel mo pleplei. Taswe, nating sipos oli wokem ol buk ya speseli blong ol yangfala, be ol advaes we oli stap insaed oli kamaot long Baebol, mo oli save givhan bigwan long evri Kristin.

16. ?Ol buk blong yumi oli givhan long ol yangfala blong oli mekem wanem?

¹⁶ Ol buk we oli wokem blong ol yangfala, oli save givhan long olgeta blong oli fren gud moa wetem Jehova. (Ridim Prija 12:1, 13.) Ol buk ya oli save givhan tu long ol bigman. Eksampol, long Wekap! blong Eprel 2009 (Franis / Inglis) haf ya, “Kwestin We Ol Yangfala Oli Askem . . . ?Olsem Wanem Mi Save Glad Blong Ridim Baebol?” Insaed long atikol ya, i gat ol gudfala advaes mo wan bokis we yu save katemaot mo putumgud, blong yu stadi long hem. ?Olsem wanem? ?Atikol ya i save givhan tu long ol bigman? Wan mama i talem se, fasin blong ridim Baebol i wan samting we i had blong hem i mekem. Be ol advaes we hem i kasem long atikol ya, oli givhan long hem blong ridim Baebol mo luk olsem wanem ol buk blong Baebol oli joen gud tugeta. Hem i talem se: “Hemia faswan taem we mi glad blong ridim Baebol. Naoia mi wantem ridim Baebol evri dei nomo.”

17, 18. ?Ol magasin we yumi seremaot long ol man, oli save givhan long yumi olsem wanem? Yu tokbaot wan eksampol.

¹⁷ Magasin we yumi seremaot long ol man. Stat long 2008, yumi glad se oli wokem wan Wajtaoa we yumi save stadi long hem. Magasin ya oli wokem speseli blong ol Witnes blong Jehova, be i gat ol narafala magasin tu we yumi seremaot long ol man. Ol magasin we yumi seremaot long ol man, ?oli save givhan long yumi olsem wanem? Yu traem tingbaot wan eksampol. Yu yu glad taem yu  luk wan man we yu singaot hem blong kam long miting, i kam long Haos Kingdom. Taem brata i stap mekem pablik tok, yu tingbaot man we yu singaot hem i kam long miting. Maet yu stap tingbaot filing blong man ya, taem hem i stap lesin long tok, mo olsem wanem ol save we hem i harem, oli save jenisim laef blong hem. From samting ya, yu glad tumas mo yu harem gud long tok we brata ya i givim.

¹⁸ Maet sem samting olsem i hapen long yumi, taem yumi ridim ol magasin we yumi seremaot long ol man. Eksampol, Wajtaoa we yumi seremaot long ol man, mo ol atikol we oli stap long Websaet blong yumi, oli eksplenem Baebol long wan fasin we i klia mo i isi blong kasemsave. Taem yumi ridim ol save ya, yumi kasemsave moa long ol trutok blong Baebol we yumi save finis. Mo tu, maet yumi lanem ol niufala rod blong eksplenem bilif blong yumi long ol man we yumi prij long olgeta. Long sem fasin, magasin ya Wekap! i mekem bilif blong yumi i strong se, i gat wan man we i Wokem olgeta samting. Mo i givhan long yumi blong yumi save tokbaot bilif blong yumi long ol narafala.—Ridim 1 Pita 3:15, 16.

19. ?Olsem wanem yumi soemaot se yumi glad long ol gudfala samting we Jehova i givim blong tijim yumi?

¹⁹ I klia nomo se Jehova i givim plante advaes we oli save givhan long yumi. (Matiu 5:3) I gud we yumi gohed blong ridim mo folem ol advaes we hem i givim long yumi. Sipos yumi mekem olsem, bambae yumi kasem ol gudfala blesing mo yumi soemaot long Jehova se yumi glad long ol gudfala samting we hem i stap givim blong tijim yumi.—Aesea 48:17.