DANIEL MO MERIAM, we tufala i stap long Spen, tufala i mared long Septemba 2000, mo tufala i gat evri samting we tufala i nidim. Daniel i talem se: “Mitufala i wok, ale mitufala i save kakae long restoron, go spel long narafala kantri, mo pem ol gudfala klos. Mo tu, mitufala i joen oltaem long wok blong prij.” Be wan dei, sam samting i jenis.

Daniel i harem wan tok long asembli long 2006, we brata i talem se: “Ol man oli stap long ‘rod blong ded’ nomo. ?Yu yu stap givhan long olgeta blong oli faenem rod blong kasem laef?” (Ol Proveb 24:11) Brata ya i eksplenem se yumi mas talemaot ol tok blong Baebol we i save sevem laef blong man. (Ol Wok 20:26, 27) Daniel i tingting bak, i se: “Mi harem se Jehova i stap toktok stret long mi.” Brata ya i talem tu se yumi glad tumas taem yumi mekem moa long wok blong Jehova. Daniel i save se hemia i tru, from we Meriam i jes stat blong mekem wok blong paenia, mo hem i luk se Meriam i glad tumas.

Tok ya i tajem hat blong Daniel, nao hem i jenisim sam samting long laef blong hem. Hem i katem ol aoa blong wok i godaon, mo i statem wok blong paenia. Mo tu, hem i tingbaot bigfala glad we tufala i save kasem, sipos tufala i go long ples we i nidim moa man blong prij.

Long Mei 2007, Daniel mo Meriam i lego wok, nao tufala i muv i go long Panama, long ol aelan ya Bocas del Toro. Bighaf blong ol man long ples ya oli blong laen ya Ngabe. Tufala i gat naf mane blong stap eit manis long ples ya.

Tufala i yusum bot blong go prij long ol aelan, mo baskel blong go long ol vilej. Ples i hot tumas mo tufala i mas klaem long ol bigfala hil. Fastaem we tufala i ron 30 kilometa long baskel, Daniel i taed we i taed, mo klosap ae blong hem i dak. Be ol man Ngabe oli kaen tumas. Taem tufala i lanem blong toktok smol long lanwis blong olgeta, oli glad moa. Smoltaem biaen, tufala i mekem 23 Baebol stadi.

Daniel i tokbaot samting we i hapen taem mane blong tufala i finis, i se: “Wota blong ae blong mitufala i ron, taem mitufala i tingbaot se mitufala i mas lego ol Baebol stadi mo gobak long Spen.” Be wan manis biaen, tufala i kasem wan gudfala nius. Meriam i talem se: “Oli askem long mitufala blong mekem wok blong spesel paenia. !Mitufala i glad we!”

Long 2015, i gat sam jenis long ogenaesesen, nao tufala i no moa mekem wok blong spesel paenia. Be tufala i trastem promes we i stap long Ol Sam 37:5 se: “Yu mas givim laef blong yu long Hae God, yu mas trastem hem, nao bambae hem i halpem yu.” Ale, tufala i faenem wok we i naf blong sapotem tufala. Nao tufala i mekem wok blong fultaem paenia long kongregesen blong Veraguas.

Daniel i talem se: “Bifo, mitufala i no ting se mitufala i save laef wetem smol samting nomo. Be tede, mitufala i no gat plante samting. Nating se i olsem, mitufala i no sot long ol samting we mitufala i nidim.” ?Wanem i givim bigfala glad long tufala? Tufala i ansa se: “!Taem mitufala i givhan long ol man we oli gat tingting daon blong oli save Jehova, mitufala i glad bitim mak! !I no gat wan narafala samting we i save givim bigfala glad olsem!”