SAMWE long yia 1910, Papa mo Mama i aot long Georgia blong go long Kanada. Tufala i stap long wan smol haos long wan fam klosap long taon ya Pelly, long wes Kanada. Mi mi bon long 1928, mo mi lasbon blong sikis pikinini. Sikis manis bifo we mi bon, Papa i ded, mo taem mi smol yet, Mama tu i ded. Smoltaem biaen, fasbon sista blong mi Lusi, we i gat 17 yia, hem tu i ded. Ale, smol papa blong mifala, Nik, i lukaot long mifala.

Wan dei, taem mi jes stat blong wokbaot, mi pulum tel blong wan hos. Sam famle oli luk mi, nao oli singaot strong from we oli fraet se hos ya bambae i kikim mi. Be from we oli toktok long baksaed blong mi, mi no harem. Laki nomo, hos i no kikim mi. Be long dei ya nao, oli luksave se sora blong mi i fas.

Wan fren blong mifala i talem se i moa gud mi go skul wetem ol narafala pikinini we sora blong olgeta i fas. Ale Papa Nik i sanem mi mi go long wan skul long Saskatoon. Ples ya i longwe long famle blong mi. Mi mi gat faef yia nomo, mo mi fraet we mi fraet. Mi stap luk famle blong mi long taem blong spel nomo. Sloslo, mi lanem saen lanwis, nao mi harem gud blong pleplei wetem ol narafala pikinini.

Long 1939, bigfala sista blong mi, Marion, i mared long Bil Daniljak, mo  tufala i lukaot long mi mo sista blong mi Fransis. Tufala i faswan long famle blong stadi Baebol wetem ol Witnes blong Jehova. Long spel blong mi, tufala i traehad blong serem ol trutok blong Baebol wetem mi. Be i no isi from we tufala i no save saen lanwis. Nating se i olsem, tufala i luksave se mi mi laekem tumas ol samting we mi stap lanem. Mi kasem save se wok blong prij i joen wetem samting we Baebol i talem, ale mi folem tufala long wok ya. I no longtaem, mi mi wantem baptaes. Ale, long 5 Septemba 1941, Bil i baptaesem mi long wan tang wota. !Wota ya i kolkol bitim mak!

Long 1946, mifala i go long wan asembli long Ohio. Long fas dei, ol sista blong mi oli raetem ol not mo mi mi ridim. Be long seken dei, mi faenemaot se i gat wan grup long asembli ya we oli toktok saen lanwis. !Mi harem gud tumas blong kasem save long ol tok blong Baebol!

Long en blong Wol Wo Tu, ol man oli wantem ona long kantri blong olgeta. Be mi mi gat strong tingting blong obei long Jehova. Taswe, taem mi gobak long skul, mi no moa salut long flaeg, singim singsing blong kantri, mo joen long ol lafet blong wol. Mo tu, mi no moa go long jos. Ol tija oli no glad, oli tok strong blong fosem mi, mo oli giaman long mi blong traem jenisim tingting blong mi. Ol yangfala long skul oli luk samting ya, nao mi gat janis blong prij long olgeta. Sam long olgeta we oli kam long trutok mo oli wosipim Jehova yet tede, hemia Lari Androsof, Noman Ditrik, mo Emil Shnaeda.

Mi traehad blong prij long ol man we sora blong olgeta i fas. Long Montreal, mi prij long wan yangfala, Edi Taga, we i joen wetem wan grup blong ol stronghed. Hem i kam wan Witnes, mo i joen long wan kongregesen long Quebec we oli toktok saen lanwis, gogo kasem we hem i ded las yia. Mo tu, i gat yangfala Yuan Adanes, we i olsem ol man Berea bifo. Hem i jekem gud evri samting we hem i lanem blong luk sipos i kamaot long Baebol. (Ol Wok 17:10, 11) Hem i kam wan Witnes, mo i mekem wok blong elda long Ontario, go kasem we hem i ded.

Long 1950, mi muv i go long Vancouver. Mi no save fogetem wan taem we mi stap prij long rod, nao mi mitim wan woman we sora blong hem i no fas, nem blong hem Kris Spaesa. Hem i wantem kasem evri magasin tru long postofis, mo tu, hem i wantem se mi mitim man blong hem, Gari. Ale, mi go long haos blong tufala, mo mifala i storian longtaem. Mifala i raetem ol toktok long pepa. Mi no moa luk tufala, gogo, wan dei, mi stap long wan asembli long Ontario, nao mi sapraes we tufala i kam talem halo long mi. Long asembli ya, Gari i baptaes. Samting ya i mekem mi mi tingbaot se yumi mas gohed nomo blong prij, from we yumi no save hu bambae i kam long trutok.

Biaen, mi muv i gobak long Saskatoon. Nao mi mitim wan woman we i wantem se mi stadi Baebol wetem tufala gel blong hem, Jin mo Joan Rotenbega. Tufala i twin, mo sora blong  tufala i fas. Tufala i go long sem skul we mi bin go long hem. I no longtaem, tufala gel ya i stat blong prij long ol yangfala long skul. Faef yangfala long klas blong tufala, oli kam Witnes blong Jehova. Wan long olgeta, hemia Yunis Kolin. Mi bin mitim Yunis long las yia blong mi long skul. Hem i bin givim wan loli long mi, mo i askem long mi sipos mitufala i save fren. !Biaen, Yunis i kam wan impoten woman long laef blong mi, from we mitufala i mared!

Taem mama blong Yunis i faenemaot se Yunis i stap stadi Baebol, hem i talem long hed tija blong skul blong i pulum hem blong stop. Tija i tekemaot ol buk blong stadi long hem, be Yunis i gat strong tingting blong obei long Jehova. Taem hem i wantem baptaes, papa mo mama blong hem i talem se: “!Sipos yu kam wan Witnes blong Jehova, yu mas aot long haos!” Ale, taem Yunis i gat 17 yia, hem i go stap wetem wan famle we oli Witnes, nao hem i baptaes. Long 1960, mitufala i mared, be papa mo mama blong Yunis i no kam long mared. Nating se i olsem, taem ol yia oli stap pas, tufala i respektem moa bilif blong mitufala, mo tufala i laekem gudfala fasin blong mitufala blong tijim ol pikinini.

I no isi blong tijim ol seven pikinini blong mitufala we sora blong olgeta i no fas. Be mitufala i tijim olgeta long saen lanwis, nao mitufala i save toktok oltaem wetem olgeta mo tijim olgeta long trutok. Ol brata mo sista long kongregesen oli givhan bigwan. Wan taem, wan sista i raetem wan not long mitufala, se wan boe blong mitufala i stap tok swea insaed long Haos  Kingdom. Mitufala i stretem trabol ya kwiktaem. Fo long ol boe blong mitufala, Jemes, Jeri, Nikolas, mo Steven, oli stap mekem wok blong elda, mo ful famle blong olgeta i gohed gud long wosip blong Jehova. Mo tu, Nikolas wetem woman blong hem Debora, tufala i stap givhan blong tanem ol tok i go long saen lanwis, long Betel long Inglan. Steven mo woman blong hem Sanan, tufala i joen long tim blong tanem ol tok i go long saen lanwis, long Betel long Yunaeted Stet.

Mi mo Yunis i mared klosap 40 yia, nao Yunis i kasem sik ya kansa, mo sore tumas, hem i ded. Taem hem i sik, strong bilif long laef bakegen i givim paoa long hem. Mi stap wet long dei ya we mi save luk hem bakegen.

Long Februari 2012, mi foldaon mo mi brekem hip blong mi. Ale, mi mi go stap wetem wan boe blong mi mo woman blong hem. Naoia, mifala i joen long wan kongregesen long Calgary we oli toktok saen lanwis, mo mi gohed blong mekem wok blong elda. !Hemia fastaem long laef blong mi we mi joen long wan kongregesen olsem! Long  olgeta yia we mi stap long ol Inglis kongregesen, ?olsem wanem mi gohed blong fren gud wetem Jehova? Jehova i givhan long mi. Hem i holem promes blong hem, blong lukaot long ol pikinini we i no gat man blong givhan long olgeta. (Ol Sam 10:14) Mi mi talem tangkiu tumas long olgeta we oli raetem ol not, lanem saen lanwis, mo mekem bes blong olgeta blong tanem ol tok.

I gat sam taem we mi no bin kasem save long tok blong narafala, mo mi harem se i no gat wan man i kasem save long tingting blong mifala we sora blong mifala i fas. Long ol taem olsem, mi harem nogud mo mi wantem lego, be mi tingbaot ol tok we Pita i talem long Jisas se: “?Masta, bambae mifala i go long hu? Yu nomo yu gat ol tok blong laef ya we i no save finis.” (Jon 6:66-68) Mi mi lanem blong mekem tingting blong mi i longfala, olsem plante narafala brata mo sista we sora blong olgeta i fas. Mi lanem blong trastem Jehova mo ogenaesesen blong hem, mo mi kasem plante blesing from. Naoia i gat plante buk long lanwis blong mifala, mo mi go long ol miting mo asembli we oli toktok saen lanwis blong Amerika. Tru ya, mi mi gat wan gudfala laef long wok blong nambawan God blong yumi, Jehova.