1, 2. (1) ?Long taem blong Jisas, ol tok long Matiu 24:12 i stret long hu? (2) Folem ol tok long Ol Wok, ?ol Kristin oli mekem wanem blong gohed nomo blong lavem God? (Yu luk pija long stat blong stadi.)

TAEM Jisas i stap long wol, hem i tokbaot ol saen blong soemaot “en blong wol.” Wan long olgeta, hemia se ‘bighaf blong ol man bambae oli no moa gat lav.’ (Matiu 24:3, 12) Long taem blong Jisas, ol man Jiu oli talem se oli man blong God, be oli no moa lavem God.

² Be bighaf blong ol Kristin long taem ya oli no olsem. Oli gohed nomo blong lavem God. Oli stap wok strong blong talemaot “gud nius blong Jisas,” mo blong soemaot lav long God mo long ol narafala Kristin, wetem ol man we oli no save trutok yet. (Ol Wok 2:44-47; 5:42) Be sore tumas, sam long olgeta oli no moa lavem God. ?Olsem wanem yumi save samting ya?

3. ?From wanem sam Kristin oli no moa gat lav?

³ Jisas i talem long kongregesen blong Efesas, se: “Yu no  moa gat lav ya we yu gat fastaem.” (Revelesen 2:4) Maet ol man blong wol oli stap pulum ol Kristin ya, blong oli mekem samting we olgeta nomo oli wantem. (Efesas 2:2, 3) Ol man Efesas oli rij, mo oli tingbaot moa ol sas samting we i save mekem laef blong olgeta i isi. Plante man long taon ya oli no respektem loa blong God, mo oli stap slip olbaot. Oli tingbaot moa blong mekem ol samting we oli save harem gud long hem, i bitim we oli lavem God mo ol narafala.

4. (1) ?Olsem wanem lav blong ol man tede i stap godaon? (2) ?Bambae yumi tokbaot wanem?

⁴ Tok blong Jisas i stret long taem blong yumi tu. Tede, lav blong ol man i stap godaon. Oli no moa lukluk i go long God blong stretem ol problem long wol, be oli trastem ol ogenaesesen we man i stanemap. Oli no moa laekem God tumas. Ol man blong Jehova tede tu oli save lusum lav blong olgeta, olsem kongregesen blong Efesas bifo. Bambae yumi tokbaot olsem wanem blong gohed blong: (1) lavem Jehova, (2) lavem trutok blong Baebol, mo (3) lavem ol brata mo sista.

5. ?From wanem yumi mas lavem God?

⁵ ?Yumi mas lavem hu moa? Jisas i talem se: “‘Yu mas lavem God blong yu Jehova long olgeta hat blong yu mo long olgeta laef blong yu mo long olgeta tingting blong yu.’ Loa ya nao i hae moa mo i faswan long ol narafala loa.” (Matiu 22:37, 38) Sipos yumi lavem God, bambae i isi moa blong obei long ol loa blong hem, stanap strong, mo agensem ol nogud fasin. (Ridim Ol Sam 97:10.) Be Setan mo wol blong hem oli save pulum yumi, nao yumi lusum lav ya.

6. Taem man i no moa lavem God, ?wanem i hapen?

⁶ Ol man blong wol oli gat rong tingting long saed blong lav. Oli “tingbaot olgeta nomo,” i bitim we oli lavem God. (2 Timoti 3:2) Tingting blong olgeta i stap nomo long “ol samting we bodi i wantem, mo ol samting we ae i wantem, mo fasin ya we man i flas from ol samting we hem i gat.” (1 Jon 2:16) Aposol Pol i givim woning long trabol we yumi save kasem sipos yumi folem fasin blong olgeta, i se: “Sipos tingting blong man i stap oltaem long samting we bodi nomo i wantem, bambae hem i ded.” ?From wanem? From we hem i kam enemi blong God. (Rom 8:6, 7) Ol man we oli spenem ful laef blong olgeta blong winim mane no blong ronem ol rabis fasin, biaen oli harem nogud nomo.—1 Korin 6:18; 1 Timoti 6:9, 10.

7. ?Wanem sam rong tingting we oli save pulum yumi?

⁷ Sam man oli no bilif long God, sam oli no sua sipos i gat wan God, mo sam narafala oli bilif long evolusen. Ol man ya oli pulum ol narafala blong oli no bilif long God, no blong oli no moa lavem God. Oli mekem man i ting se sipos hem i bilif long God, hem i no gat hed. Ale, plante man oli respektem ol saentis i bitim God. (Rom 1:25) Ol rong tingting ya oli save pulum yumi tu. Nao bambae yumi no moa fren gud wetem  Jehova mo yumi no moa lavem hem.—Hibrus 3:12.

8. (1) ?Wanem i save mekem tingting blong yumi i foldaon? (2) ?Olsem wanem Sam 136 i leftemap tingting blong yumi?

⁸ From we yumi stap long wol blong Setan, tingting blong yumi i save foldaon. (1 Jon 5:19) Sipos samting ya i hapen oltaem, bilif blong yumi i save kam slak, nao yumi no moa lavem God. Hemia i save hapen taem yumi kam olfala, yumi sik, yumi no gat mane, yumi no naf blong mekem sam samting, no sam samting long laef blong yumi oli no kamaot olsem we yumi wantem. Nating se i olsem, yumi no mas ting se Jehova i lego yumi. I gud yumi tingbaot Ol Sam 136:23 we i talem se: “Taem ol enemi blong yumi oli winim yumi, be [Jehova] i no fogetem yumi. Oltaem bambae hem i lavem yumi, gogo i no save finis.” Yumi save bilif strong se Jehova “i stap lesin” long ol prea blong yumi, mo bambae hem i ansa.—Ol Sam 116:1; 136:24-26.

9. ?Wanem i givhan long Pol blong i gohed nomo blong lavem God?

⁹ Aposol Pol i tingting dip long ol samting we Jehova i mekem blong givhan long hem, nao hem i stanap strong. Hem i talem se: “Jehova nao i stap halpem mi. Bambae mi no fraet. ?Man i save mekem wanem long mi?” (Hibrus 13:6) Pol i trastem Jehova, taswe hem i naf blong winim ol trabol. Taem hem i fesem hadtaem, hem i gohed nomo blong trastem Jehova. Mo tu, taem hem i stap long kalabus, hem i raetem leta i go long ol kongregesen, blong leftemap tingting blong olgeta. (Efesas 4:1; Filipae 1:7; Filimon 1) Nomata wanem problem Pol i kasem, hem i gohed nomo blong lavem Jehova. Hem i dipen long “God ya we i mekem olgeta samting blong leftemap tingting blong man. Hem i stap givhan long yumi long olgeta trabol blong yumi.” (2 Korin 1:3, 4) ?Olsem wanem yumi save folem fasin blong Pol?

10. ?Wanem i save givhan long yumi blong lavem Jehova?

 ¹⁰ Pol i tokbaot wan samting we i save givhan long yumi blong lavem God, i se: “Yufala i mas prea oltaem.” Biaen, hem i talem bakegen se: “Yufala i mas prea oltaem.” (1 Tesalonaeka 5:17; Rom 12:12) ?Olsem wanem prea i mekem se yumi kam klosap moa long God? Taem yumi prea, yumi toktok wetem Jehova, nao yumi fren gud wetem hem. (Ol Sam 86:3) Taem yumi talemaot ol tingting mo filing blong yumi long Papa blong yumi long heven, yumi kam klosap moa long hem. (Ol Sam 65:2) Mo tu, taem yumi luksave se Jehova i ansa long prea blong yumi, yumi lavem hem moa. (Ol Sam 145:18) Sipos yumi bilif strong se Jehova i lavem yumi mo i stap givhan long yumi, bambae yumi naf blong stanap strong agensem ol trabol we yumi fesem naoia mo long fiuja.

11, 12. ?Olsem wanem blong lavem ol trutok blong Baebol?

¹¹ Yumi lavem trutok we yumi faenem long Baebol. Jisas i talem long Papa blong hem se: “Tok blong yu i trutok.” (Jon 17:17) Taswe, blong lavem trutok, yumi mas kasem save long Baebol. (Kolosi 1:10) Be i no hemia nomo. Man blong raetem Sam 119 i soemaot wan narafala samting we yumi mas mekem. (Ridim Ol Sam 119:97-100.) Evri dei, yumi mas tingting dip long ol tok we yumi ridim long Baebol. Sipos yumi tingbaot olsem wanem trutok blong Baebol i stap givhan long laef blong yumi, bambae yumi lavem trutok.

¹² Man blong raetem Ol Sam i talem se: “Mi traem ol tok blong yu, mi harem i swit gud. Hem i swit we i swit, i winim hani.” (Ol Sam 119:103) Ol buk we ogenaesesen blong God i wokem, oli olsem kakae we i tes gud. Taem yumi kakae samting we yumi laekem, yumi tektaem blong harem gud long hem. Long sem fasin, yumi mas tektaem blong stadi. Nao bambae yumi harem gud tumas long “ol gudfala tok” blong Baebol. Mo tu, bambae i isi moa blong rimemba ol tok ya, mo yusum blong givhan long ol narafala.—Prija 12:10, NW.

13. ?Wanem i mekem se Jeremaea i lavem ol tok blong God, mo tok ya i mekem wanem long hem?

¹³ Profet Jeremaea i lavem ol tok blong God, i se: “Yu yu God blong mi, mo yu gat olgeta paoa. Mi mi man blong wok blong yu. Taem yu toktok long mi, mi lesin gud long tok blong yu, mo oltaem, tok ya blong yu i mekem mi mi harem gud, mi glad we mi glad.” (Jeremaea 15:16) Jeremaea i tingting dip long ol nambawan tok blong God, nao i lavem olgeta. Hem i tingbaot bigfala ona we hem i gat blong toktok long nem blong Jehova, mo talemaot ol tok blong hem. Sipos yumi lavem trutok blong Baebol, bambae yumi tingbaot spesel ona we yumi gat long ol las dei ya, blong stap olsem ol Witnes blong Jehova mo talemaot Kingdom long ol man.

14. ?Wanem narafala samting we i save mekem se yumi lavem trutok?

¹⁴ ?Wanem narafala samting we i save mekem se yumi lavem trutok? Yumi mas go oltaem long ol miting blong  kongregesen, blong kasem tijing blong Jehova we i kamaot long Baebol. Wajtaoa Stadi we yumi mekem evri wik i nambawan rod blong kasem tijing ya. Be blong kasem gud ol trutok ya, yumi mas reregud fastaem. I gud yumi jekem ol vas blong Baebol. Naoia, Wajtaoa i stap long jw.org mo long JW Library long plante lanwis. Plante long yumi oli ridim long websaet ya no daonlodem, nao i isi nomo blong faenem ol vas blong Baebol we oli stap insaed. Nating se yumi jusum wanem rod blong stadi long Wajtaoa, be sipos yumi ridim gud ol vas mo tingting dip long olgeta, bambae yumi lavem trutok.—Ridim Ol Sam 1:2.

15, 16. (1) Long Jon 13:34, 35, ?Jisas i talem se yumi mas mekem wanem? (2) Taem yumi lavem ol brata mo sista, ?olsem wanem yumi soemaot se yumi lavem God mo Baebol?

¹⁵ Long naet bifo we Jisas i ded, hem i talem long ol disaepol blong hem se: “Mi mi givim wan niufala loa long yufala, se yufala i mas lavlavem yufala. Olsem we mi lavem yufala, ale long sem fasin, yufala tu i mas lavlavem yufala. Sipos yufala i lavlavem yufala, bambae olgeta man oli save se yufala i disaepol blong mi.”—Jon 13:34, 35.

¹⁶ Sipos yumi no lavem Jehova, yumi no save lavem ol brata mo sista. Mo sipos yumi no lavem ol brata mo sista, yumi no save lavem Jehova. Aposol Jon i raetem se: “Sipos man i no lavem brata blong hem we hem i stap luk oltaem, hem i no save lavem God we hem i no luk hem samtaem.” (1 Jon 4:20) Mo tu, taem yumi lavem Jehova mo ol brata mo sista, yumi lavem Baebol. ?From wanem? From we, Baebol i talem se yumi mas lavem God mo ol brata mo sista. Taem yumi glad blong obei long tok ya, yumi soemaot se yumi lavem Baebol.—1 Pita 1:22; 1 Jon 4:21.

17. ?Olsem wanem blong soemaot lav long ol brata mo sista?

 ¹⁷ Ridim 1 Tesalonaeka 4:9, 10. ?Olsem wanem blong soemaot lav long ol narafala long kongregesen? Maet yumi tekem wan olfala brata no sista i go long miting. Yumi save fiksimap sam samting long haos blong wan wido. (Jemes 1:27) Yumi save spenem taem blong leftemap tingting blong ol brata mo sista we tingting blong olgeta i foldaon, oli harem nogud, no oli fesem sam narafala problem. (Ol Proveb 12:25; Kolosi 4:11) Ol tok mo aksen blong yumi oli soemaot se yumi lavem ol “brata mo sista blong yumi.”—Galesia 6:10.

18. ?Wanem bambae i givhan blong stretem ol smosmol rao wetem ol brata mo sista?

¹⁸ Baebol i talem se long “ol las dei” blong rabis wol ya, plante man bambae oli tingbaot olgeta nomo, mo oli wantem plante samting tumas. (2 Timoti 3:1, 2) Yumi mas wok had moa blong lavem Jehova, Baebol, mo ol brata mo sista. Yumi sinman, taswe samtaem yumi save rao smol wetem wan brata no sista. Be from we yumi lavlavem yumi, bambae yumi traehad blong stretem problem ya kwiktaem mo long kaen fasin. (Efesas 4:32; Kolosi 3:14) !Yumi neva mas lusum lav we yumi gat! Be yumi mas gohed nomo blong lavem Jehova, Baebol, mo ol brata mo sista.