1, 2. (1) ?From wanem ol yangfala Kristin oli winim Setan mo ol rabis enjel? (Yu luk pija long stat blong stadi.) (2) ?Bambae yumi tokbaot wanem?

APOSOL POL i talem se ol Kristin oli olsem ol soldia. !Yumi gat ol enemi, mo yumi stap faet! Faet blong yumi i no agensem ol man, be i agensem Setan mo ol rabis enjel. Olgeta oli gat gudhan blong faet, from we oli faet plante taosen yia finis. Maet yu ting se yu no save winim faet ya, antap moa sipos yu yu wan yangfala. ?Olsem wanem? ?Ol yangfala oli save winim ol strong enemi ya? !Yes, oli stap win finis! ?From wanem oli win? From we Jehova i givim paoa long olgeta. Mo tu, oli “putum olgeta klos blong faet we God i givim,” olsem ol soldia we oli tren gud mo oli rere blong faet.—Ridim Efesas 6:10-12.

² Taem Pol i talem pijatok ya, maet hem i stap tingbaot klos blong faet we ol ami blong Rom oli werem. (Ol Wok 28:16) Long stadi ya, bambae yumi tokbaot nambawan pijatok ya. Mo bambae yumi ridim tok blong ol yangfala, long  saed blong ol hadtaem mo ol blesing we oli kasem taem oli werem ol klos blong faet ya.

3, 4. ?Olsem wanem trutok blong Baebol i olsem strap blong soldia blong Rom?

³ Ridim Efesas 6:14. Long strap blong ol soldia blong Rom, i gat ol smosmol pis aean blong protektem bel, mo blong mekem se aean klos we i kavremap jes, i no muvmuv tumas. Mo tu, long sam strap i gat ol huk blong hangem naef blong faet mo wan narafala smol naef. Taem soldia i fasemtaet strap, hem i harem se hem i rere gud blong faet.

⁴ Trutok blong Baebol i olsem wan strap we i protektem yumi long ol giaman tijing. (Jon 8:31, 32; 1 Jon 4:1) Sloslo yumi laekem ol trutok blong Baebol, nao i isi moa blong folem ol rul blong God, hemia “aean klos we i kavremap jes.” (Ol Sam 111:7, 8; 1 Jon 5:3) Mo tu, taem yumi kasem save moa long trutok, yumi kam gud moa blong yusum trutok ya blong agensem ol enemi blong yumi.—1 Pita 3:15.

5. ?From wanem yumi mas tok tru oltaem?

⁵ From we yumi laekem trutok blong Baebol, yumi obei long Tok blong God mo tok tru oltaem. Giaman tok i wan bigfala tul blong Setan. Mo tu, man we i giaman i spolem hem wan, mo i spolem man we i trastem hem. (Jon 8:44) Nating se yumi sinman, be yumi mas traehad blong no giaman. (Efesas 4:25) Maet i no isi. Abigel we i gat 18 yia i talem se: “Maet yu ting se i moa gud blong giaman, speseli long taem ya we yu save kasem panis.” Taswe, ?from wanem Abigel i traehad blong tok tru oltaem? Hem i se: “Taem mi tok tru, tingting blong mi i klin long fes blong Jehova. Mo tu, Papa mo Mama mo ol fren blong mi oli trastem mi.” Viktoria we i gat 23 yia, i talem se: “Taem yu tok tru mo yu stanap strong long bilif blong yu, maet samfala oli tok nogud long yu. Be i gat ol bigfala blesing tu: Tingting i kam strong moa, yu kam klosap moa long Jehova, mo olgeta we oli lavem yu oli respektem yu moa.” ?Yu luksave from wanem i impoten blong werem oltaem ‘strap ya we i olsem trutok’?

6, 7. ?Olsem wanem stret fasin i olsem aean klos we i kavremap jes?

⁶ Plante taem aean klos we i kavremap jes blong soldia, hemia ol longfala pis aean we oli benem i goraon blong blokem jes. Oli yusum ol huk mo bakel blong strap, blong fasem ol aean ya long skin blong buluk. Oli kavremap tufala solda tu wetem ol pis blong aean we oli fasem long skin blong buluk. Aean klos ya i mekem se i had blong soldia i muvmuv olbaot. Mo hem i mas jekem oltaem se ol aean ya oli stap long stret ples blong olgeta. !Aean klos ya i impoten, from we i blokem hat mo ol narafala haf insaed long bodi, blong ol ara mo naef blong faet i no gotru!

 ⁷ Sipos yumi mekem ol stret fasin we Jehova i wantem, samting ya i save protektem “hat” blong yumi. Taswe stret fasin i olsem aean klos we i kavremap jes. (Ol Proveb 4:23, NW) Wan soldia i no save jenisim aean klos ya, wetem klos we oli wokem long wan narafala samting we i no strong. Long sem fasin, yumi neva mas jenisim ol stret fasin we Jehova i wantem, wetem ol fasin we yumi nomo i wantem. Yumi no gat naf waes blong protektem hat blong yumi. (Ol Proveb 3:5, 6) Taswe, oltaem yumi mas jekem “aean klos we i kavremap jes,” blong meksua se oli stap protektem hat blong yumi.

8. ?From wanem yumi mas obei long ol rul blong Jehova?

⁸ ?Samtaem yu harem se ol rul blong Jehova oli blokem yu tumas, nao yu no save mekem samting we yu wantem? Daniel we i gat 21 yia, i talem se: “Ol tija mo ol yangfala long klas oli jikim mi from we mi folem ol rul blong Baebol. Oli mekem mi mi ting se mi nating nomo, mo tingting blong mi i foldaon.” ?Be naoia hem i harem olsem wanem? Hem i se: “Sloslo, mi luksave se laef blong mi i gud moa from we mi folem ol rul blong Jehova. Sam ‘fren’ long skul oli tekem drag, sam narafala oli no moa skul. Mi sore blong luk se laef blong olgeta i go nogud. I tru tumas se Jehova i protektem yumi.” Madison we i gat 15 yia, i talem se: “I had blong folem ol rul blong Jehova mo no mekem ol samting we ol nara yangfala oli talem se i taf.” Taswe, ?Madison i mekem wanem? Hem i se: “Oltaem mi tingbaot se mi mi karem nem blong Jehova, mo taem wan samting i pulum mi, mi luksave se hemia Setan mo ol ara blong hem. Taem mi winim hadtaem ya, mi harem gud.”

9-11. (1) ?Olsem wanem ol Kristin oli werem sus we God i givim? (2) ?Wanem i save mekem se yumi harem gud blong prij?

⁹ Ridim Efesas 6:15 (Baebol Long Bislama). Wan soldia blong Rom i mas werem sus taem i go faet. Blong mekem sus ya i strong, oli wokem long skin blong buluk we oli dabolem tu taem. Ol soldia oli harem gud blong wokbaot long sus ya, oli no glis, mo oli no fraet blong foldaon.

¹⁰ Sus blong soldia blong Rom i givhan long hem blong i faet, be sus we God i givim, i givhan long yumi blong yumi “talemaot gud nius blong pis.” (Aesea 52:7; Rom 10:15) Nating se i olsem, yumi nidim strong tingting blong prij. Bo we i gat 20 yia, i talem se: “Taem mi skul, mi fraet blong prij long ol yangfala long klas. Ating mi mi sem. Taem mi tingting bak, mi no save from wanem mi sem. Naoia mi glad blong prij long ol yangfala.”

¹¹ Plante yangfala Kristin oli talem se oli harem gud blong prij taem oli rere gud. ?Yu save mekem wanem blong rere  gud? Julia we i gat 16 yia, i talem se: “Taem mi go long skul, mi karem sam buk blong yumi long basket. Mi lesin long olgeta long klas taem oli talemaot tingting mo bilif blong olgeta, mo mi tingbaot samting we i save givhan long olgeta. Taem mi rere gud olsem, mi save tokbaot samting we i stret blong givhan long olgeta.” Makensi we i gat 23 yia, i talem se: “Sipos yu kaen mo yu lesin gud, bambae yu kasem save long ol trabol blong ol yangfala. Mi meksua se mi ridim evri samting we ogenaesesen i givim long ol yangfala. Nao mi save soemaot samting long Baebol o long jw.org we bambae i givhan long olgeta.” Taem yu rere gud, yu harem gud blong prij, olsem “sus” we yu harem gud blong werem.

12, 13. ?Wanem sam ara blong Setan we ‘faea i laet long olgeta’?

¹² Ridim Efesas 6:16. Soldia blong Rom i karem wan bigfala sil we i blokem bodi blong hem, i stat long solda antap i godaon kasem ni. Sil ya i blokem hem blong i no kasem kil long ol naef blong faet, ol spia, mo ol ara.

 ¹³ ?Wanem ol ara blong Setan we ‘faea i laet long olgeta’? Maet hemia ol giaman toktok long saed blong Jehova. Setan i wantem we yu ting se Jehova i no lavem yu, mo se i no gat wan man we i tingbaot yu. Ida we i gat 19 yia, i talem se: “Plante taem mi harem se Jehova i stap longwe, mo i no wantem kam Fren blong mi.” Taem Ida i harem nogud olsem, ?hem i mekem wanem? Hem i se: “Ol miting oli givhan bigwan long bilif blong mi. Bifo, mi no ting se i gat wan we i wantem lesin long mi, taswe mi no ansa, mi jes sidaon nomo. Be naoia, mi rere gud mo mi traem ansa tu o tri taem. I had, be biaen mi harem gud. Ol brata mo sista tu oli leftemap tingting blong mi. Ol miting oli mekem mi mi harem se Jehova i lavem mi.”

14. ?Stori blong Ida i soemaot wanem?

¹⁴ Oltaem soldia i karem wan sil we i bigwan. Be stori blong Ida i soemaot se i no oltaem we bilif blong yumi i bigwan, samtaem i smol nomo. Bilif i save kam strong moa o i save kam slak. I stap long yumi nomo. (Matiu 14:31; 2 Tesalonaeka 1:3) !Sipos yumi wantem se bilif blong yumi ‘i olsem wan bigfala sil’ we i protektem gud yumi, yumi mas mekem i kam bigwan moa!

15, 16. ?Olsem wanem strong tingting se God bambae i sevem yumi i olsem wan hat?

¹⁵ Ridim Efesas 6:17. Soldia blong Rom i werem wan hat blong protektem hed, nek, mo fes blong hem. Long sam hat i gat wan handel, blong soldia i save karem long han blong hem.

¹⁶ Hat i protektem bren blong soldia, mo long sem fasin, ‘strong tingting se God bambae i sevem yumi’ i save protektem tingting blong yumi. (1 Tesalonaeka 5:8; Ol Proveb 3:21) Sipos yumi tingting oltaem long ol promes blong God, ol trabol oli no save mekem tingting blong yumi i foldaon. (Ol Sam 27:1, 14; Ol Wok 24:15) Be sipos yumi wantem se strong tingting ya i protektem yumi, yumi mas bilif se ol promes ya oli tru. I min se: !Oltaem yumi mas werem “hat” ya, yumi no karem long han nomo!

17, 18. (1) ?Olsem wanem Setan i save trikim yumi, blong yumi tekemaot hat blong yumi? (2) ?Olsem wanem yumi soemaot se Setan i no save trikim yumi?

¹⁷ ?Olsem wanem Setan i save trikim yumi, blong yumi tekemaot hat blong yumi? Tingbaot samting we hem i mekem long Jisas. Hem i save se Jisas bambae i rulum wol ya. Be fastaem, Jisas i mas safa mo ded. Afta, hem i mas wet kasem stret taem we Jehova i makem, blong i kam King. Taswe, Setan i givim janis long hem blong i save rul kwiktaem. Hem i promes se sipos Jisas i mekem wan samting nomo blong wosipim hem, wantaem nomo bambae hem i rulum wol. (Luk 4:5-7) Tede, Setan i save long ol nambawan blesing we Jehova i promes blong givim long yumi long niufala wol. Be yumi mas wet gogo promes ya i kamtru, mo taem yumi stap wet, yumi kasem plante trabol. Taswe Setan i givim janis blong yumi mekem samting blong harem gud naoia nomo. Hem i wantem se fastaem yumi ronem ol sas samting, mo biaen yumi tingbaot Kingdom blong God.—Matiu 6:31-33.

¹⁸ Plante yangfala Kristin oli no letem Setan i trikim olgeta. Kiana we i gat  20 yia, i talem se: “Mi save se Kingdom blong God nomo bambae i stretem ol trabol blong yumi.” ?Hop ya i mekem wanem long tingting mo laef blong hem? I mekem se hem i luk ol samting blong wol ya se oli blong smoltaem nomo. Hem i no yusum olgeta taem mo paoa blong hem long wan wok blong wol ya, be hem i mekem wok blong Jehova nomo.

19, 20. ?Olsem wanem yumi save kam gud moa blong yusum Tok blong God?

¹⁹ Ol soldia blong Rom oli yusum naef blong faet we longfala blong hem i samting olsem haf meta. Oli gat gudhan blong yusum naef blong faet, from we oli praktis evri dei.

²⁰ Aposol Pol i talem se Tok blong God i olsem wan naef blong faet we Jehova i givim. Be yumi mas lan blong yusum gud naef ya blong pruvum se bilif blong yumi i tru, mo blong stretem tingting blong yumi. (2 Korin 10:4, 5; 2 Timoti 2:15) ?Olsem wanem blong kam gud moa? Sebastian we i gat 21 yia, i talem se: “Mi raetemdaon wan vas long evri japta blong Baebol we mi ridim. Hemia i olsem wan lis blong ol vas we mi laekem tumas.” Samting ya i mekem se hem i kasem save moa long tingting blong Jehova. Daniel i gohed se: “Taem mi ridim Baebol, mi jusum ol vas we mi save yusum blong givhan long ol man long wok blong prij. Ol man oli glad taem oli luk se yu laekem tumas Baebol mo yu stap traehad blong givhan long olgeta.”

21. ?From wanem yumi no fraet bitim mak long Setan mo ol rabis enjel?

²¹ Stori blong ol yangfala long stadi ya i soemaot se yumi no nid blong fraet bitim mak long Setan mo ol rabis enjel. I tru se oli gat paoa, be Jehova i gat moa paoa. Bambae oli no laef olwe. Bambae oli go kalabus taem Jisas i rul blong Wan Taosen Yia, mo biaen bambae oli lus blong olwe. (Revelesen 20:1-3, 7-10) Yumi save gud enemi blong yumi, ol trik blong hem, mo samting we hem i traehad blong mekem long yumi. !Be wetem help blong Jehova, yumi save stanap strong agensem hem!