1. Afta we Adam mo Iv i mekem sin, ?Jehova i talem wanem long saed blong enemi blong yumi?

ADAM i save se ol snek oli no save toktok. Taswe taem hem i faenemaot se wan snek i toktok long Iv, maet hem i tingbaot se hemia wan spirit we i toktok. (Jenesis 3:1-6) Adam mo Iv i no save se spirit ya hem i hu. Nating se i olsem, Adam i jus blong joenem strenja ya blong agensem gudfala Papa blong hem long heven. (1 Timoti 2:14) Wantaem nomo, Jehova i stat blong givim save long saed blong rabis enemi ya, mo i promes se long fiuja bambae hem i lus. Jehova i givim woning tu, se go kasem taem ya, spirit we i toktok tru long snek ya bambae i agensem olgeta we oli lavem God.—Jenesis 3:15.

2, 3. ?From wanem Jehova i givim smol save nomo long saed blong Setan bifo we Mesaea i kamtru?

² Jehova i neva talem prapa nem blong rabis enjel ya. * Be samwe long 2,500 yia afta we enjel ya i mekem stronghed,  Jehova i putum wan nem blong hem we i eksplenem rabis fasin blong hem. (Job 1:6) Nem ya hemia “Setan,” we i min se “Man Blong Agens.” Long olfala Hibru hanraet, i gat tri buk nomo we oli tokbaot Setan, hemia 1 Kronikel, Job, mo Sekaraea. ?From wanem i gat smol save nomo long saed blong enemi ya, bifo we Mesaea i kamtru?

³ Long Hibru haf blong Baebol, Jehova i no talem plante samting long saed blong Setan mo wok blong hem. Bigfala risen blong raetem Hibru haf blong Baebol i no blong givim save ya, be i blong givhan long ol man blong oli luksave Mesaea mo folem hem. (Luk 24:44; Galesia 3:24) Taem Mesaea i kamtru, Jehova i yusum hem mo ol disaepol blong hem blong givim plante moa save long saed blong Setan mo ol rabis enjel blong hem. * I stret nomo we Jehova i yusum olgeta, from we long fiuja, Jisas mo ol tabu man nao bambae oli spolem Setan mo ol man blong hem.—Rom 16:20; Revelesen 17:14; 20:10.

4. ?From wanem yumi no mas fraet bitim mak long Setan?

⁴ Aposol Pita i tokbaot Setan olsem “wan laeon we i stap singaot bigwan,” mo Jon i singaot hem se “snek” mo “Bigfala algita.” (1 Pita 5:8; Revelesen 12:9) Be yumi no mas fraet bitim mak long Setan. Hem i no gat olgeta paoa. (Ridim Jemes 4:7.) Jehova, Jisas, mo ol gudfala enjel oli protektem yumi. Oli save givhan long yumi, blong yumi blokem Setan. Nating se i olsem, yumi mas save ansa blong tri impoten kwestin ya: ?Paoa blong Setan i bigwan olsem wanem? ?Olsem wanem hem i pulum ol man? ?Mo wanem sam samting we Setan i no save mekem? Bambae yumi tokbaot trifala kwestin ya mo samting we yumi save lanem.

5, 6. ?From wanem ol gavman blong wol oli no save givim evri samting we man i nidim?

⁵ Plante enjel oli joen wetem Setan blong agensem God. Bifo we bigfala wota i ron, Setan i pulum sam enjel blong oli slip wetem ol woman long wol. Baebol i yusum pijatok, i talem se hem i pulum wan haf blong ol sta, tu haf nomo i stap. (Jenesis 6:1-4; Jud 6; Revelesen 12:3, 4) Taem ol enjel ya oli lego famle blong God, oli putum olgeta aninit long paoa blong Setan. Yumi no mas ting se ol stronghed enjel ya oli wok olbaot nomo. Oli wok folem plan. Setan i stanemap prapa gavman blong hem long ples blong ol spirit, mo i putumap hem wan i kam king. Hem i traem blong kopi long Kingdom blong God. Hem i givim paoa long ol enjel, mo i putumap olgeta olsem ol rula blong wol.—Efesas 6:12.

⁶ Setan mo ol rabis enjel oli bos long ol gavman blong wol. Yumi save samting  ya from we, Setan i soem “olgeta kantri” long Jisas, mo i se: “Bambae mi givim olgeta kantri ya mo olgeta gudgudfala samting blong olgeta long yu, from we oli stap finis long han blong mi, mo mi save givim long eni man we mi wantem.” (Luk 4:5, 6) I tru se plante gavman oli givim sam gudfala samting long ol man, mo sam lida oli gat gudfala tingting blong halpem ol man. Be i no gat wan lida blong wol we i save givim evri samting we man i nidim.—Ol Sam 146:3, 4; Revelesen 12:12.

7. Antap long ol gavman, ?olsem wanem Setan i yusum ol giaman skul mo ol bigfala bisnes? (Yu luk pija long stat blong stadi.)

⁷ Setan mo ol rabis enjel oli yusum ol giaman skul mo ol bigfala bisnes blong pulum “olgeta man long wol.” (Revelesen 12:9) Ol giaman skul oli givim rong tingting long saed blong God, mo oli traem haedem nem blong hem tu. (Jeremaea 23:26, 27, NW) Taswe, sam man we oli ting se oli stap wosipim God, oli rili stap wosipim ol rabis enjel. (1 Korin 10:20; 2 Korin 11:13-15) Mo tu, Setan i yusum ol bigfala bisnes blong giaman long ol man, se oli save glad sipos oli gat mane mo plante samting. (Ol Proveb 18:11) Ol man we oli trastem giaman tok ya oli kam slef blong “mane” i bitim we oli slef blong God. (Matiu 6:24) Samfala oli lavem God fastaem, be taem oli ronem mane mo olting, sloslo oli no moa lavem God.—Matiu 13:22; 1 Jon 2:15, 16.

8, 9. (1) ?Yumi lanem wanem taem yumi tingbaot stronghed fasin blong Adam, Iv, mo ol rabis enjel? (2) ?From wanem i gud blong save se Setan i bos long wol ya?

⁸ Yumi lanem tu impoten samting taem yumi tingbaot stronghed fasin blong Adam, Iv, mo ol rabis enjel. Faswan, se yumi wanwan i mas jusum Jehova o Setan. (Matiu 7:13) Sekenwan, se Setan i givim smol samting nomo long olgeta we oli joenem hem. Hem i givim janis long Adam mo Iv blong jusumaot wanem i stret mo wanem i no stret. Mo hem i givim paoa long ol rabis enjel blong oli save bos long ol gavman blong wol. (Jenesis 3:22) Be ol samting ya we oli luk olsem se oli gud, oli nogud nomo. Man we i jus blong go long saed blong Setan, oltaem hem i kasem rabis frut.—Job 21:7-17, NW; Galesia 6:7, 8.

⁹ ?From wanem i gud blong save se Setan nao i bos long wol ya? Taem yumi save, yumi gat stret tingting long ol gavman, mo yumi wantem talemaot gud nius. Jehova i wantem we yumi respektem ol gavman. (1 Pita 2:17) Yumi mas obei long ol loa blong gavman, sipos oli no agensem loa blong God. (Rom 13:1-4) Be yumi no mas joen nating long politik mo sapotem wan pati o wan lida blong wol. (Jon 17:15, 16; 18:36) From we Setan i stap traem blong haedem nem blong Jehova mo spolem hem, yumi mekem bes blong yumi blong tijim ol man long trutok long saed blong God. Yumi glad tumas blong karem nem  blong hem mo yusum nem ya. Taem yumi save God mo lavem hem, hemia samting we i sas moa i bitim mane mo olting.—Aesea 43:10; 1 Timoti 6:6-10.

10-12. (1) ?Olsem wanem Setan i pulum ol enjel? (2) ?Yumi lanem wanem from?

¹⁰ Setan i save gud olsem wanem blong winim man. Samtaem hem i traem pulum ol man blong oli mekem samting we hem i wantem, mo samtaem hem i agensem olgeta.

¹¹ Setan i pulum plante enjel. Ating hem i wajem olgeta longtaem finis, blong save olsem wanem blong pulum olgeta. Hem i pulum sam enjel blong oli slip wetem ol woman. Ol pikinini blong olgeta oli ol bigbigfala man we oli raf mo oli spolem ol narafala. (Jenesis 6:1-4) Mo tu, Setan i promes long ol enjel ya se oli save rulum ol man. Taem hem i mekem olsem, maet hem i stap traem blong blokem profet tok blong Jehova long saed blong ‘pikinini blong woman,’ blong i no kamtru. (Jenesis 3:15) Be Jehova i no letem Setan i win. Hem i mekem bigfala wota i ron, nao samting ya i spolem plan blong Setan mo ol rabis enjel.

¹² ?Yumi lanem wanem? Yumi lanem se, tufala tul blong Setan we oli wok gud blong pulum man, hemia ol doti fasin blong seks mo fasin flas. !Ol enjel we oli joenem Setan oli stap plante yia finis wetem Jehova long heven! Nating se i olsem, oli stat blong tingbaot ol nogud samting, nao sloslo oli wantem tumas ol samting ya. Taswe, nomata hamas yia yumi bin mekem wok blong Jehova, be yumi no mas fogetem se, sipos yumi tingting tumas long ol nogud samting we yumi wantem, hemia i save spolem yumi. (1 Korin 10:12) !Taswe, oltaem yumi mas jekem hat mo tingting blong yumi, mo rutumaot ol doti fasin mo flas tingting!—Galesia 5:26; ridim Kolosi 3:5.

13. ?Wanem narafala samting we Setan i yusum blong pulum ol man, mo olsem wanem blong no foldaon long trap ya?

¹³ Wan narafala samting we Setan i  yusum blong pulum ol man, hemia wok blong ol rabis spirit. Ol giaman skul mo ol samting we yumi mekem blong spel, oli save pulum tingting i go long ol rabis spirit. Yumi save harem gud blong wajem ol muvi, pleplei ol video gem mo sam narafala pleplei, we oli soemaot wok blong ol rabis spirit. ?Olsem wanem blong no foldaon long trap ya? Ogenaesesen blong God i no givim wan lis blong ol pleplei mo muvi we oli nogud. Be yumi mas trenem tingting blong yumi folem ol rul blong Jehova, nao yumi save jusum ol gudfala muvi mo pleplei. (Hibrus 5:14) Sipos yumi “no giaman” se yumi lavem God, bambae yumi jus gud. (Rom 12:9) Man we i gat tu fes i talem wan samting, be i mekem defren samting. Taswe, taem yumi jusum ol muvi mo pleplei, yumi mas tingbaot se: ‘?Mi mi stap folem ol semfala rul we mi talem long ol narafala blong folem? ?Ol Baebol stadi mo visit blong mi bambae oli gat wanem tingting sipos oli luk ol muvi mo pleplei we mi jusum?’ Taem yumi folem ol semfala rul we yumi tijim narafala blong folem, i moa isi blong no foldaon long trap blong Setan.—1 Jon 3:18.

14. ?Olsem wanem Setan i save agensem yumi, mo olsem wanem blong stanap strong?

¹⁴ Setan i yusum wan narafala trik tu. Hem i traem blong agensem yumi mo mekem yumi fraet, blong yumi lego Jehova. Maet hem i pulum gavman blong putum tabu long wok blong prij. Mo hem i save pulum olgeta we yumi wok o skul wetem olgeta, blong oli jikim yumi taem yumi folem ol rul blong Baebol. (1 Pita 4:4) Mo tu, Setan i save yusum ol famle we oli no stap long trutok, blong oli traem blokem yumi long ol miting. (Matiu 10:36) ?Olsem wanem blong stanap strong taem Setan i agensem yumi? Yumi no mas sapraes, from we yumi save se Setan i stap faet agens long yumi. (Revelesen 2:10; 12:17) Mo tu, yumi mas tingbaot toktok we Setan i sakem, se bambae yumi holemstrong long Jehova long gud taem, be lego hem  long hadtaem. (Job 1:9-11; 2:4, 5) Yumi mas askem oltaem long Jehova, blong i givim paoa long yumi. Tingbaot se Jehova bambae i no save lego yumi.—Hibrus 13:5.

15. ?Setan i save fosem yumi blong mekem samting we yumi no wantem? Eksplenem.

¹⁵ Setan i no save fosem yumi blong mekem samting we yumi no wantem. (Jemes 1:14) Plante man long wol oli no save se oli stap long saed blong Setan. Be taem wan man i kasem save long trutok, hem i mas jus se bambae i stap long saed blong Jehova o Setan. (Ol Wok 3:17; 17:30) Sipos yumi obei gud long God, bambae Setan i no save mekem yumi foldaon.—Job 2:3; 27:5.

16, 17. (1) ?Wanem narafala samting we Setan mo ol rabis enjel oli no save mekem? (2) ?From wanem yumi no mas fraet blong prea long bigfala voes?

¹⁶ I gat sam narafala samting tu we Setan mo ol rabis enjel oli no save mekem. I no gat wan tok long Baebol we i soemaot se oli save luk long hat mo tingting blong yumi. Jehova mo Jisas nomo i save mekem olsem. (1 Samuel 16:7; Mak 2:8) Taswe yumi no mas fraet se sipos yumi toktok o prea long bigfala voes, Setan mo ol rabis enjel bambae oli harem, nao oli yusum ol save ya blong agensem yumi. ?From wanem yumi no mas fraet? Traem tingbaot: Nating se Setan i luk yumi long wok blong Jehova, be yumi no fraet blong mekem wok ya. Taswe, nating se Setan i harem yumi taem yumi prea long bigfala voes, be yumi no mas fraet. Baebol i tokbaot plante man blong God we oli prea long bigfala voes, be oli no fraet se Setan bambae i harem olgeta. (1 King 8:22, 23; Jon 11:41, 42; Ol Wok 4:23, 24) Sipos yumi traehad blong talem mo mekem ol samting we God i wantem, yumi save sua se Jehova bambae i no letem Setan i spolem yumi.—Ridim Ol Sam 34:7.

¹⁷ Yumi mas save gud enemi blong yumi, be yumi no nid blong fraet bitim mak. !Nating se yumi sinman, be wetem paoa blong Jehova, yumi save winim Setan! (1 Jon 2:14) Sipos yumi agensem hem, bambae hem i ronwe long yumi. (Jemes 4:7; 1 Pita 5:9) Tede, i luk olsem se Setan i agensem moa ol yangfala. ?Olsem wanem oli save stanap strong? Bambae yumi tokbaot samting ya long nekis stadi.