1. ?Tok blong God i mekem wanem long yumi?

JEHOVA i Bigfala Tija blong yumi, taswe yumi save winim enikaen problem we yumi fesem. (Aes. 30:20, 21) Tok blong hem i mekem yumi ‘naf blong wok,’ mo i mekem se yumi ‘gat evri samting we yumi nidim blong mekem evri gudfala wok.’ (2 Tim. 3:17) Taem yumi folem ol tijing blong Baebol, yumi kam waes moa i bitim ol man we oli leftemap “waes blong wol ya.”—1 Kor. 3:19; Sam 119:97-100.

2. Long stadi ya, ?bambae yumi tokbaot wanem?

² Bambae yumi luk se waes blong wol i save pulum yumi, from we i mekem yumi tingbaot samting we yumi nomo i wantem. Taswe maet i had blong yumi no folem ol tingting mo aksen blong ol man blong wol. Baebol i talem se: “Yufala i mas lukaot se i no gat man i mekem yufala i fas long trap. Man olsem i save yusum waes blong wol mo ol giaman tok we i blong nating nomo. Ol samting olsem oli stanap long kastom blong ol man.” (Kol. 2:8) Long stadi ya, bambae yumi tokbaot olsem wanem plante man oli stat blong bilivim tu giaman toktok blong Setan. Mo bambae yumi luk from wanem waes blong wol i krangke nomo, be waes blong God long Baebol i moa gud.

3-4. ?Olsem wanem tingting blong ol man i jenis afta long yia 1900?

³ Afta long yia 1900, tingting blong ol man i jenis bigwan long saed blong seks. Bifo, plante man oli ting se seks i blong ol man mo woman we oli mared nomo, mo i tabu blong tokbaot seks long fored blong ol narafala. Be ol tingting ya oli stat blong lus, nao ol man oli ting se ol rabis fasin oli oraet nomo.

⁴ Afta long Wol Wo Wan, tingting mo fasin blong ol man long plante ples blong wol i jenis. Wan woman we i stadi long histri i talem se: “Seks i kamaot moa long ol muvi, ol stori we oli  aktem, ol singsing, mo ol toktok we ol bisnesman oli mekem blong salem samting.” Long ol yia ya, ol danis oli pulum ol man mo woman blong tingting moa long seks, mo tu, oli werem klos we i taet mo i soemaot bodi. Olsem Baebol i talem, long ol las dei, ol man bambae “oli laekem moa ol samting we oli save harem gud long hem.”—2 Tim. 3:4.

5. Afta long 1960, ?wanem i hapen long ol gudfala fasin?

⁵ Afta long yia 1960, plante moa man mo woman oli stap tugeta nomo we oli no mared, fasin blong man i slip wetem man i kam antap, mo i gat plante moa divos. Ol muvi oli soemaot seks long klia ples nomo. ?Wanem frut i kamaot? Wan woman we i raetem ol buk i talem se, “taem ol man oli lego ol gudfala fasin, ol famle oli stat blong seraot, i gat plante mama we olgeta nomo oli lukaot long ol pikinini, famle i harem nogud, plante man oli lukluk ol doti pija, mo ol narafala fasin olsem.” Ol sik olsem AIDS tu oli soemaot se waes blong wol i krangke nomo.—2 Pita 2:19.

6. ?Olsem wanem ol man we oli folem tingting blong wol long saed blong seks oli mekem Setan i glad?

⁶ Setan i wantem tumas we ol man oli folem tingting blong wol long saed blong seks. I sua se hem i glad nomo taem hem i luk we plante man oli yusum seks long fasin we i no stret, mo oli no gat respek long fasin blong mared we God i stanemap. (Efes. 2:2) Taem man i mekem rabis fasin long saed blong seks, hem i soemaot se i ting nating long presen we Jehova i givim long ol man blong oli save gat pikinini. Be antap long hemia, rabis fasin ya i save mekem se man i no kasem laef blong olwe.—1 Kor. 6:9, 10.

7-8. ?Wanem tingting blong Baebol long saed blong seks?

⁷ Ol man we oli folem waes blong wol oli jikim ol gudfala fasin we Baebol i leftemap, oli talem se i no stret blong folem ol fasin ya. Maet oli askem se: ‘Sipos yumi no save folem ol filing blong seks, ?from wanem God i wokem yumi wetem ol filing ya?’ Ol man ya oli gat rong tingting, oli ting se yumi mas letem ol filing blong yumi oli lidim yumi. Be Jehova i leftemap yumi taem hem i mekem we yumi save jus, yumi no nid blong folem evri filing. Yumi naf blong faet agensem ol filing we oli no stret mo blokem olgeta. (Kol. 3:5) Mo tu, Jehova i stanemap fasin blong mared, olsem rod blong harem gud long saed blong seks. (1 Kor. 7:8, 9) Hasban mo waef we i respektem  plan blong mared, tufala i save harem gud long seks, mo tufala i no save kasem ol trabol mo wari we ol man blong mekem rabis fasin oli kasem.

⁸ Baebol i tijim yumi long stret tingting long saed blong seks, we i defren olgeta long waes blong wol ya. I tru, seks i save mekem man mo woman i harem gud. (Prov. 5:18, 19) Be Baebol i talem tu se: “Yufala wanwan i mas save olsem wanem blong bos long prapa bodi blong yufala long fasin we i klin mo i soem ona. Mo yufala i no mas folem fasin blong ol man blong ol narafala neson we oli no save God, olgeta ya oli wantem tumas ol rabis fasin blong seks nao oli bitim mak long hem, be oli harem se i no naf yet.”—1 Tes. 4:4, 5.

9. (1) Wan handred yia bifo, ?wanem i pulum ol man blong Jehova blong oli folem advaes blong Baebol? (2) ?Wanem advaes blong 1 Jon 2:15, 16? (3) Folem Rom 1:24-27, ?wanem ol rabis fasin we yumi mas blokem?

⁹ Wan handred yia bifo, ol man blong Jehova oli no folem ol giaman toktok blong ol man we “oli no moa gat sem nating, nao oli stap gohed olbaot.” (Efes. 4:19) Oli traehad blong folem gud ol stret fasin blong Jehova. Wajtaoa blong 15 Mei 1926 i talem se: “Man i mas gat klin tingting mo mekem stret fasin long woman, mo woman i mas mekem sem mak long man.” Nating se wol i mekem olsem wanem, be ol man blong Jehova oli folem waes blong Baebol we i hae moa. (Ridim 1 Jon 2:15, 16.) !Yumi glad tumas se God i givim Baebol long yumi! Mo yumi glad tu se Jehova i stap yusum ogenaesesen blong hem, blong givim save we i halpem yumi blong no letem waes blong wol long saed blong seks i trikim yumi. *—Ridim Rom 1:24-27.

10-11. ?Baebol i givim wanem woning long saed blong ol las dei?

¹⁰ Baebol i givim woning se long ol las dei, ol man bambae “oli tingbaot olgeta nomo.” (2 Tim. 3:1, 2) Yumi no sapraes se wol ya i pulum ol man blong oli tinghae long olgeta. Wan buk i talem se long ol yia afta long 1970, “i gat fulap buk we oli tokbaot olsem wanem blong mekem laef i kam gud moa.” Sam long olgeta “oli talem se ol man oli no nid blong jenisim wan samting, oli mas glad nomo long ol fasin blong olgeta mo tinghae long olgeta.” Wan buk i talem se: “I stret nomo we yu lavem yu wan, from we yu yu taf tumas, mo i no gat wan man we i naes olsem yu.” Buk ya i talem tu se man i mas “jusum ol fasin we hem i wantem folem, mo mekem samting we hem nomo i harem se i stret.”

¹¹ ?Yu yu harem tingting ya bifo? Setan i pulum Iv blong mekem samting olsem. Hem i talem se Iv i save “kam olsem [God], we i save ol fasin we i nogud mo ol fasin we i gud.” (Jen. 3:5) From we plante man tede oli tinghae long olgeta, oli no wantem se eniman, mo God tu, i talem long olgeta wanem samting i stret mo wanem samting i no stret. Taswe, plante man oli ting nating long fasin blong mared.

12. ?Waes blong wol i pulum ol man blong oli tingting olsem wanem long mared?

¹² Baebol i talem se hasban mo waef i mas lavlavem tufala mo holem promes blong tufala. Hem i talem se tufala i mas wok had blong stap tugeta olwe, i se: “Man i mas aot long papa mo mama blong hem, i mas go joen wetem woman blong hem, nao tufala bambae i kam olsem wan bodi nomo.” (Jen. 2:24) Be ol man we oli folem waes blong wol oli gat defren tingting. Oli talem se wanwan long  tufala i mas tingbaot samting we hem nomo i nidim. Wan buk we i tokbaot divos i talem se: “Samfala oli no moa promes blong stap tugeta blong ‘olgeta yia we tufala i laef,’ be blong ‘olgeta yia we tufala i lavem tufala.’” Tingting ya i mekem se plante mared oli brokdaon, mo ol famle ya oli harem nogud bitim mak. I klia se tingting blong wol we i pulum man blong no respektem mared, i wan krangke tijing.

13. Talem wan risen from wanem Jehova i no wantem nating ol man we oli stap flas.

¹³ Baebol i talem se: “[Jehova] i no wantem nating ol man we oli stap flas.” (Prov. 16:5) ?From wanem? Wan risen se, ol man ya we oli tinghae long olgeta oli gat fasin olsem Setan. Traem tingbaot: !Jehova i yusum Jisas blong wokem evri samting, be Setan i ting se Jisas i mas bodaon long hem! (Mat. 4:8, 9; Kol. 1:15, 16) Olgeta we oli ting se oli impoten tumas olsem Setan, oli pruvum se waes blong wol ya i wan krangke samting nomo long ae blong God.

14. ?Olsem wanem Rom 12:3 i givhan long yumi blong yumi gat stret tingting?

¹⁴ Baebol i talem se yu no mas tinghae tumas long yu wan. I tru, Jisas i talem se i stret we yu laekem yu wan, i se: “Yu mas lavem ol man raonabaot long yu olsem we yu stap mekem long yu wan.” Hemia i soemaot se i stret we yumi tingbaot ol nid blong yumi. (Mat. 19:19) Be Baebol i tijim se yumi no mas ting se yumi moa impoten i bitim ol narafala, i se: “Yufala i no mas mekem samting blong man i rao nomo no blong leftemap yufala nomo, be yufala i mas mekem tingting blong yufala i stap daon mo yufala i mas luk ol narafala man se oli hae moa long yufala.”—Fil. 2:3; ridim Rom 12:3.

15. ?From wanem yu ting se Baebol i stret, taem i talem se yumi no mas leftemap yumi tumas?

¹⁵ Tede, plante man we oli folem waes blong wol, oli laf long advaes ya blong Baebol se man i no mas tinghae tumas long hem wan.  Oli talem se sipos yu ting se ol narafala oli moa impoten long yu, bambae oli lukluk daon long yu mo spolem yu. Be traem tingbaot: ?Wanem frut i kamaot taem man i leftemap hem wan, olsem wol blong Setan i talem? ?Yu yu luk wanem? ?Ol man oli hapi taem oli tingbaot olgeta nomo? ?Oli gat ol gudfala fren? ?Oli fren gud wetem God? ?Yu luk se weswan rod i karem gudfala frut: waes blong wol o waes blong Baebol?

16-17. ?Yumi talem tangkiu long Jehova from wanem samting?

¹⁶ Man we i lesin long olgeta we oli folem waes blong wol, hem i olsem wan turis we i askem long narafala turis blong i soem stret rod, be hem tu i lusum rod. Jisas i tokbaot ol “waes” man long taem blong hem, i se: “Olgeta oli lida be oli blaen nomo. Sipos wan blaen man i lidim wan blaen man bakegen, bambae tufala tugeta i foldaon long wan hol.” (Mat. 15:14) Tru ya, waes blong wol i wan krangke samting nomo long ae blong God.

¹⁷ Oltaem ol waes advaes blong Baebol oli “stret gud blong tijim ol man, mo blong soemaot ol samting we i no stret, mo blong stretem olgeta samting, mo blong stretem tingting blong man blong i folem ol stret rul blong God.” (2 Tim. 3:16) !Yumi talem tangkiu long Jehova we i yusum ogenaesesen blong hem blong protektem yumi long ol waes blong wol! (Efes. 4:14) Ol save we hem i givim, i mekem se yumi strong blong folem ol gudfala fasin we Baebol i tokbaot. !I gud tumas we Jehova i givim waes blong Baebol blong lidim yumi!