1. ?From wanem i had blong samfala oli stadi?

TEDE, plante man oli mas wok had blong winim mane. Sam brata oli wok plante aoa evri dei blong kasem ol samting we famle blong olgeta i nidim. Samfala oli stap longwe long ples blong wok, mo oli spenem plante aoa evri wik blong gokam. Plante brata mo sista oli mekem ol wok we i strong, mo long en blong dei oli no moa gat paoa. Oli harem se oli taed tumas blong stadi.

2. ?Yu yu stadi long wanem taem?

² Be yumi mas makemaot taem blong stadi gud long Baebol mo ol buk blong yumi. !Sipos no, bambae yumi no fren gud wetem Jehova, mo bambae yumi no kasem laef blong olwe! (1 Tim. 4:15) Samfala oli girap eli blong stadi, taem haos i kwaet, mo tingting blong olgeta i klia. Sam narafala oli tekem smoltaem long en blong dei, blong stadi mo tingting dip.

3-4. ?Wanem ol jenis we oli kamaot long saed blong save we yumi ridim? ?From wanem i gat ol jenis ya?

³ Ating yu agri se i impoten blong makemaot taem blong stadi. ?Be yu mas stadi long wanem samting? Maet yu talem se: ‘I gat tumas samting blong ridim. Mi mi no naf blong ridim evriwan.’ Sam brata mo sista oli gat taem blong ridim ol buk blong yumi mo wajem ol video, be plante narafala oli luk se i had. Hed Kampani i save samting ya. Taswe, i no longtaem, oli bin mekem desisen blong daonem namba blong ol magasin mo buk we oli printim, mo ol save long Intenet tu.

 ⁴ Wan buk we oli no moa printim, hemia Yearbook of Jehovah’s Witnesses. Hemia from we yumi save ridim mo harem plante gudfala stori olsem, long jw.org^® mo long JW Brodkasting evri manis. Naoia, Wajtaoa mo Wekap! we yumi seremaot long wok blong prij, oli printim tri taem nomo long wan yia. Ol jenis ya oli no blong givim moa taem long yumi blong mekem samting we yumi wantem, be oli blong givim moa taem blong yumi stadi mo tingting dip long “ol samting we oli moa impoten.” (Fil. 1:10) Bambae yumi tokbaot olsem wanem blong save waneem samting i moa impoten blong stadi long hem, mo olsem wanem yumi save kasem plante gudfala samting taem yumi mekem prapa Baebol stadi blong yumi.

5-6. ?Yumi mas meksua se yumi stadi long wanem?

⁵ ?I impoten blong stadi long wanem samting? I impoten blong tekem taem evri dei blong stadi long Tok blong God. Naoia, i no moa gat plante japta evri wik long Baebol riding. Hemia i mekem se yumi gat moa taem blong tingting dip long ol vas mo mekem risej. Yumi no ridim Baebol blong finisim ol japta nomo, be yumi wantem se ol save we yumi ridim i tajem hat blong yumi, mo i pulum yumi i kam klosap moa long Jehova.—Sam 19:14.

⁶ ?Wanem narafala samting we yumi mas stadi gud long hem? Yumi mas reregud Wajtaoa Stadi, mo Baebol Stadi Blong Kongregesen, mo ol narafala save long miting blong medel wik. Mo tu, yumi mas ridim evri Wajtaoa mo Wekap! we yumi kasem.

7. ?Yu mas harem nogud sipos yu no save lukluk evri samting long jw.org mo JW Brodkasting?

⁷ Maet yu talem se: ‘I gud, ?be olsem wanem long ol samting long jw.org mo JW Brodkasting? !I gat plante tumas!’ Traem tingbaot pijatok ya: I gat plante gudfala kakae long maket. Yu no save karem evriwan. Taswe yu mas jusum sam nomo we yu laekem. Long sem fasin, sipos yu no save ridim mo wajem evri samting long jw.org mo JW Brodkasting, yu no mas harem nogud. Mekem samting we yu yu naf blong mekem. Naoia, bambae yumi tokbaot olsem wanem blong stadi mo blong kasem plante gudfala samting from stadi blong yumi.

8. ?Yu save mekem wanem blong rerem Wajtaoa? ?Olsem wanem samting ya bambae i givhan long yu?

⁸ Taem yu stadi, yu putum tingting i stap strong long samting we yu ridim mo yu traehad blong lanem samting. Yu no ridim kwik nomo mo makem ol ansa. Taem yu rerem Wajtaoa Stadi, fastaem yu ridim bigfala tingting long stat blong stadi. Afta, yu tingbaot stamba tok blong stadi ya, wetem ol smol stamba tok mo ol kwestin blong tingtingbak. Biaen, yu ridim ful stadi, mo yu tingting long hem. Yu makem gud fastok long evri haf, from we plante taem fastok ya i talem bigfala tingting insaed long haf ya. Taem yu stap rid, tingbaot olsem wanem evri haf i joen wetem smol stamba tok bifo long hem, mo wetem stamba tok blong ful stadi ya. Raetemdaon ol tok mo poen we yu no save mining blong olgeta, mo we yu wantem mekem risej long olgeta.

9. (1) Taem yu rerem Wajtaoa, ?from wanem yu mas ridim gud ol vas, mo yu mas makem wanem? (2) Folem Josua 1:8, ?yu mas mekem wanem moa?

⁹ Taem yumi stadi long Wajtaoa, yumi rili stap stadi long Baebol. Taswe, taem yu rerem Wajtaoa, ridimgud ol vas blong Baebol, speseli  olgeta we bambae yumi ridim long miting. Makem gud olsem wanem ol impoten tok insaed long vas i joen wetem bigfala tingting long haf ya. Tekem taem blong tingting dip long ol vas, mo tingbaot olsem wanem yu save folem long laef blong yu.—Ridim Josua 1:8.

10. Folem Hibrus 5:14, ?from wanem ol pikinini oli mas lanem blong stadi mo mekem risej long famle wosip?

¹⁰ I stret nomo we Papa mo Mama i wantem se ol pikinini oli harem gud long Famle Wosip evri wik. Taswe i gud tufala i mekem plan, be i no nid blong mekem wan spesel projek evri wik. Maet yufala i wajem JW Brodkasting, o wanwan taem, yufala i wok long wan spesel projek, olsem bildim wan smol sip we i sem mak long sip blong Noa. Be i impoten tu we ol pikinini oli lanem olsem wanem blong stadi, rerem ol miting, mo mekem risej long wan kwestin we i kamaot long skul. (Ridim Hibrus 5:14.) Sipos oli stadi long haos, bambae i isi moa blong oli lesin mo kasem save long ol tok long miting mo asembli, we maet i no gat video insaed long olgeta. Papa mo Mama i mas mekem desisen se stadi bambae i longfala olsem wanem, folem yia mo fasin blong ol pikinini.

11. ?From wanem i impoten blong tijim ol Baebol stadi blong oli mekem prapa stadi blong olgeta?

¹¹ Ol Baebol Stadi blong yu tu, oli mas lanem olsem wanem blong mekem prapa stadi blong olgeta. Taem oli jes stat blong stadi, yu yu glad taem yu luk we oli makem ol ansa long buk blong stadi mo rerem ol miting. Be yu mas tijim olgeta tu blong mekem risej mo prapa stadi blong olgeta. Sipos yu mekem olsem, taem oli gat wan problem, bambae oli no ron i go long wan long kongregesen blong askem help, be bambae oli mekem risej long ol buk blong yumi, blong kasem gudfala advaes we i save givhan long olgeta.

12. ?Wanem sam samting we yu save mekem taem yu stadi?

¹² Sipos yu no laekem tumas blong stadi, maet yu ting se bambae yu neva harem gud blong stadi. Be i no olsem. Fastaem, i gud yu stadi blong smoltaem nomo, mo sloslo yu pulum i kam longfala moa. Mo tu, yu mas tingbaot samting we yu wantem lanem. I tru, impoten samting se yu wantem kam klosap moa long Jehova. Be fastaem maet yu faenem ansa blong wan kwestin we narafala i askem long yu, o yu mekem risej long wan problem we yu fesem.

13. (1) ?Yu save mekem wanem blong eksplenem bilif blong yu long skul? (2) ?Olsem wanem blong folem advaes blong Kolosi 4:6?

 ¹³ Maet olgeta long klas blong yu oli agensem yu from we yu no singsing long sing blong kantri. Ating yu wantem eksplenem samting we Baebol i talem, be yu harem se yu no naf. !Taswe yu mas stadi! Yu gat tu gudfala risen blong stadi: (1) blong mekem bilif blong yu i strong moa se yu no mas joen long wol, mo (2) blong kam gud moa blong eksplenem trutok long narafala. (Jon 17:16; 1 Pita 3:15) Fastaem, maet yu tingbaot se: ‘?From wanem ol yangfala long klas oli talem se mi mas singsing long sing blong kantri?’ Nao yu mekem risej long ol buk blong yumi. Maet i no had tumas blong eksplenem bilif blong yu long olgeta. Plante oli ting se oli mas singsing long sing blong kantri from we wan man we oli respektem hem, i talem long olgeta. Sipos yu faenem wan o tu tingting we yu save eksplenem, maet bambae yu givhan long wan yangfala we i rili wantem save trutok.—Ridim Kolosi 4:6.

14-16. (1) ?Olsem wanem blong save moa long wan buk blong Baebol? (2) ?Olsem wanem ol narafala vas oli givhan blong kasem save moa long buk blong Amos? (Yu luk bokis ya “ Save Gud Ol Man Long Baebol.”)

¹⁴ Maet long miting bambae yumi tokbaot wan long ol sot buk blong Baebol we ol profet oli raetem, mo yu no gat plante save long hem. Fas samting se yu mas wantem blong save moa long saed ya. ?Olsem wanem blong save moa?

¹⁵ Fastaem, yu tingbaot se: ‘?Mi save wanem long saed blong profet ya? ?Hem i hu? ?Hem i stap wea? ?Wanem wok blong hem?’ Taem yu lanem moa long saed blong man ya, bambae yu kasem save moa long ol toktok mo pijatok we hem i yusum. Taem yu ridim buk ya, traem lukaot ol tok we i soemaot fasin blong man we i raetem.

¹⁶ Afta, yu save faenemaot wetaem hem i raetem buk ya. I isi blong faenem samting ya long “Table of the Books of the Bible” long pej 1662-1663 long New World Translation of the Holy Scriptures. Mo tu, yu save luk lis blong ol profet mo king long Buk We i Givhan Blong Stadi Baebol, pej 14-17. Sipos yu stap stadi long wan profet tok, i gud yu faenemaot se laef blong ol man i olsem wanem taem profet i raetem buk ya. ?Wanem ol nogud tingting mo fasin we profet ya i wantem stretem? ?Hu i laef long taem ya? Blong save moa, maet yu lukluk i go long sam narafala buk blong Baebol. Olsem nao, blong kasem save moa long samting we i hapen taem profet Amos i laef, i gud yu ridim sam vas long 2 King mo 2 Kronikel. Mo tu, i gud yu lukluk long buk blong Hosea we maet hem i laef long semtaem olsem Amos. Ol narafala buk ya bambae oli givhan long yu, blong yu kasem save moa long laef blong ol man long taem blong Amos.—2 King 14:25-28; 2 Kron. 26:1-15; Hos. 1:1-11; Amos 1:1.

17-18. Talem wan eksampol long haf ya o narafala eksampol, blong soemaot olsem wanem ol smosmol save i mekem yumi harem gud blong stadi Baebol.

¹⁷ Taem yu ridim Baebol, i gud yu wantem faenemaot moa. Tingbaot sipos yu stap ridim profet tok blong Sekaraea japta 12, we i tokbaot ded blong Mesaea. (Sek. 12:10) Vas 12 i talem se “ol laen blong Natan” bambae oli krae taem Mesaea i ded. I gud yu no hareap tumas long smol ples ya, be yu tektaem blong tingbaot se: ‘?Olsem wanem ol laen blong Natan oli famle wetem Mesaea? ?I gat rod blong faenemaot moa?’ Ale yu mekem smol risej. Long Sekaraea 12:12 long New World  Translation of the Holy Scriptures, i gat tu refrens, wan long 2 Samuel 5:13, 14 we i soemaot se Natan i wan boe blong King Deved, mo narawan long Luk 3:23, 31, we i soemaot se Jisas i kamaot long laen blong Natan, tru long mama blong hem Meri. (wp16.3 pej 9 haf 1-3) !Yu yu sapraes blong lanem samting ya! Yu save finis profet tok we i talemaot se Jisas bambae i kamaot long laen blong Deved. (Mat. 22:42) Be Deved i gat moa long 20 pikinini boe. ?Olsem wanem? ?Yu yu sapraes blong faenemaot from wanem Sekaraea i talem se laen blong Natan bambae i krae moa taem Jisas i ded?

¹⁸ Tingbaot wan narafala profet tok. Long Luk japta wan, enjel Gabriel i talem long Meri se bambae hem i bonem wan pikinini boe, i se: “Hem bambae i wan haeman mo bambae oli singaot hem se Pikinini blong Hae God. Mo Jehova God bambae i givim jea blong king long hem, we i jea blong wan papa blong hem bifo, King Deved, mo bambae hem i rul long laen blong Jekob blong olwe.” (Luk 1:32, 33) Maet yu luk fastok blong Gabriel nomo se bambae oli singaot Jisas se “Pikinini blong Hae God.” Be Gabriel i talem tu se Jisas bambae i “rul” olsem King. Ale yu tingbaot se: ?Wanem tingting blong Meri taem hem i harem tok ya? ?Hem i ting se Jisas bambae i tekem ples blong Herod o wan king we i kam biaen long hem, blong rul long Isrel? Sipos Jisas i kam king, Meri bambae i kasem spesel ona olsem mama blong king, mo famle blong hem bambae oli stap long haos blong king. Be Baebol i no talem se Meri i tokbaot samting ya wetem Gabriel. Mo tu, Meri i no askem wan spesel ples long Kingdom, olsem tu disaepol blong Jisas i askem. (Mat. 20:20-23) !Smol save ya i mekem yumi luksave se Meri i gat bigfala tingting daon!

19-20. Folem Jemes 1:22-25 mo 4:8, ?wanem ol bigfala risen blong stadi?

 ¹⁹ Yu no mas fogetem se bigfala risen blong stadi long Baebol mo ol buk blong yumi, i blong kam klosap moa long Jehova. Mo tu, yu wantem luksave klia se ‘yu yu olsem wanem,’ mo wanem ol jenis we yu mas mekem blong God i glad long yu. (Ridim Jemes 1:22-25; 4:8.) Taswe taem yu stat blong stadi, yu mas askem long Jehova blong i givim tabu spirit long yu, i givhan long yu blong yu kasem plante gudfala samting long stadi blong yu, mo yu luksave ol jenis we yu mas mekem.

²⁰ I gud yumi evriwan i olsem man blong God we Ol Sam i tokbaot, i se: ‘Man olsem, i glad blong folem Loa blong Hae God, mo oltaem i stap ridim, mo i stap tingting long hem long dei mo long naet. Hem i stap win long evri samting we hem i mekem.’—Sam 1:2, 3.