1. ?Jisas i soemaot wanem eksampol long ol disaepol blong hem mo oli mekem wanem? (Yu luk pija long fran pej.)

TAEM Jisas i stap long wol, hem i gohed blong holemtaet stret tingting long saed blong wok blong prij, mo hem i wantem se ol disaepol blong hem tu oli mekem sem mak. (Jon 4:35, 36) Ol disaepol oli gat strong tingting blong prij, taem Jisas i stap wetem olgeta. (Luk 10:1, 5-11, 17) Be taem oli arestem Jisas mo kilim hem i ded, ol disaepol oli no moa gat strong tingting blong prij. (Jon 16:32) Taem Jisas i laef bakegen, hem i enkarejem olgeta blong oli gohed blong prij. Mo afta we hem i go long heven, ol disaepol oli prij wetem strong tingting we i mekem se ol enemi oli komplen se: “!Luk! Yufala i mekem Jerusalem i fulap finis wetem ol tijing blong yufala.”—Wok 5:28.

2. ?Olsem wanem Jehova i blesem wok blong prij?

² Jisas nao i lidim wok blong prij we ol fas Kristin oli mekem mo Jehova i blesem olgeta. Eksampol, long Pentekos long yia 33 K.T., samwe 3000 man oli baptaes. (Wok 2:41) Mo namba blong ol disaepol i stap grup i kam plante moa. (Wok 6:7) Be Jisas i talem se long ol lasdei, plante moa man bambae oli akseptem gud nius.—Jon 14:12; Wok 1:8.

3-4. ?From wanem long sam ples i had blong prij, mo bambae yumi tokbaot wanem long stadi ya?

³ Yumi evriwan i stap traehad blong holemtaet stret tingting long wok blong prij. Long sam ples, i isi blong mekem olsem from we plante man oli intres blong stadi Baebol, mo samfala  oli mas wet go kasem we wan Witnes i fri blong stadi Baebol wetem olgeta. Be long sam narafala ples, ol pablisa oli faenem i had blong prij, from we maet ol man oli no stap long haos o maet oli stap be oli no intres tumas long Baebol.

⁴ Sipos yu laef long wan ples we wok blong prij i had, stadi ya bambae i tokbaot sam rod we i save givhan long yu. Bambae yumi tokbaot sam samting we samfala oli mekem blong kasem moa man long wok blong prij. Mo bambae yumi tokbaot from wanem yumi mas gat stret tingting, nating sipos man i lesin no nogat.

5. ?Plante Witnes oli fesem wanem long wok blong prij?

⁵ Plante Witnes oli luk se i had moa blong faenem ol man long haos. Sam pablisa oli laef long ol eria we i gat ol apatmen o komuniti we i had blong go insaed. Long ol ples ya, maet i gat ol sekiuriti gad we oli no letem eni man blong go insaed, sipos oli no askem hem blong go. Long sam narafala ples, i isi nomo blong ol pablisa oli go long ol haos wanwan, be smol man nomo oli stap long haos. Sam narafala pablisa oli prij long ol rurol eria we i no gat plante man long hem. Maet oli mas travel longwe blong go long wan haos, be taem oli kasem, maet i no gat man long haos. Sipos hemia ol semfala samting we yumi stap fesem long ol teritori blong yumi, yumi no mas givap. ?Yumi save mekem wanem blong gohed mo gat gudfala frut long wok blong prij?

6. ?Olsem wanem yumi olsem wan fisaman?

⁶ Jisas i komperem wok blong prij wetem wok blong wan fisaman. (Mak 1:17) Sam fisaman oli save fising blong plante dei, be maet oli no kasem eni fis. Nating se i olsem, oli no givap. Oli jenisim taem, ples, mo wei blong olgeta blong fising. Hemia sem samting we yumi save mekem long wok blong prij. Naoia bambae yumi tokbaot sam samting we yumi save mekem.

7. ?Wanem i kamaot taem yumi prij long wan defren taem?

⁷ Traem wan defren taem. Nating sipos ol man oli aot long haos, be bambae oli stil kambak. !Taswe bambae yumi kasem plante moa man, sipos yumi go long taem we ol man oli stap long haos! Plante brata mo sista oli luk se i gud moa blong prij long aftenun o long sapa, from hemia taem we oli faenem moa man. Mo tu, long taem ya, maet man blong haos bambae i rere moa blong storian. O maet yu save mekem olsem elda ya we nem blong hem David. Afta we oli finisim wan teritori, hem wetem pablisa we i folem hem, tufala i gobak long sem teritori ya mo mekem ol haos we oli no bin faenem ol man long hem fastaem. Hem i se: “Mi mi sapraes se i gat plante man oli stap long haos taem mitufala i gobak seken taem.” *

8. ?Olsem wanem yumi save folem Prija 11:6 long wok blong prij?

⁸ Yumi no mas givap. Hemia nao tingting we stamba vas blong stadi ya i tokbaot. (Ridim Prija 11:6.) David we yumi tokbaot hem finis, hem i no givap. Hem i gobak plante taem long wan haos we i no stap gat man long hem, be naoia hem i faenem wan man. Man ya i intres long Baebol mo i talem se: “Mi mi stap ya eit yia finis be mi neva mitim wan Witnes blong Jehova.” David i se: “Mi makem se taem yu traehad gogo yu faenem man long haos, plante taem man i glad blong lesin long mesej we yu talemaot.”

9. ?Sam Witnes oli mekem wanem blong faenem ol man we i had blong kasem olgeta long haos?

 ⁹ Traem wan defren ples. Sam pablisa oli jenisim ples we oli stap prij long hem, blong oli save kasem ol man we i had blong faenem olgeta long haos. Eksampol, fasin blong prij long rod mo troli i wan nambawan rod blong kasem plante man we oli laef long ol apatmen we yumi no save go insaed, hemia wan janis blong ol pablisa oli save toktok wetem ol man ya fes tu fes. Mo tu, ol pablisa oli makem se plante man oli glad moa blong storian mo karem buk long pablik ples, long ol maket, mo long ol ples blong mekem bisnes. Floiran, wan eria elda long Bolivia i se: “Mifala i go long maket mo ples blong mekem bisnes bitwin wan klok mo tri klok. Long taem ya ol man blong salem samting oli no bisi tumas. Mo plante taem mifala i gat gudfala storian mo iven statem ol Baebol stadi.”

10. ?Yumi save mekem wanem moa blong kasem ol man?

¹⁰ Traem wan defren wei. Sipos yu traehad plante taem blong traem kasem wan man, be yu no faenem hem, yu jenisim taem blong yu, be yet hem i no stap, ?yu save mekem wanem moa blong kasem hem? Katarina i talem se: “Mi mi raetem leta long olgeta we mi neva faenem olgeta long haos, mo mi tokbaot samting we bae mi talem sipos mi mitim olgeta.” ?Yumi lanem wanem? Yumi mas traehad long evri rod blong kasem ol man long teritori blong yumi.

11. ?From wanem sam man oli no intres long mesej we yumi talemaot?

¹¹ Sam man oli no intres long mesej we yumi talemaot. Oli ting se oli no nidim God o Baebol.  Oli no bilif long God from oli luk se fulap man oli safa long wol ya. Oli no intres long Baebol from oli luk se ol lida blong skul oli gat tu fes. Sam narafala oli bisi tumas wetem ol wok, ol famle, mo ol narafala problem blong olgeta mo oli no ting se Baebol i save halpem olgeta. ?Olsem wanem yumi save holemtaet glad, nating se ol man we yumi prij long olgeta oli no tinghevi long mesej we yumi talemaot?

12. ?Olsem wanem Filipae 2:4 i save givhan long yumi long wok blong prij?

¹² Soem intres long man. Plante man we fastaem oli no intres long gud nius, naoia oli glad blong lesin from oli luk se pablisa i intres long olgeta. (Ridim Filipae 2:4.) Eksampol, David we yumi tokbaot hem finis i talem se: “Sipos wan man i talem se hem i no intres, mifala i no soem Baebol o ol buk long hem, be mifala i askem se: ‘Mi intres blong save from wanem nao yu talem olsem.’” Ol man oli naf blong haremsave sipos yumi kea long olgeta no nogat. Maet oli save fogetem samting we yumi talem, be bambae oli neva fogetem fasin we yumi soem long olgeta. Nating sipos man blong haos i no letem yumi blong toktok, yumi save soem long olgeta long fes blong yumi se yumi kea long olgeta.

13. ?Yumi save mekem wanem blong man i intres moa long mesej blong yumi?

¹³ Yumi soem se yumi intres long man, taem yumi jenisim storian blong yumi blong i laenap wetem samting we man blong haos i intres long hem. Eksampol, ?i gat eni samting long yad we i soemaot se man blong haos i gat pikinini? Maet ol perens bambae oli intres long advaes blong Baebol we i tokbaot olsem wanem blong tijim pikinini o blong gat wan hapi famle. ?Yu luk se i gat plante lok long doa blong olgeta? Maet yu save tokbaot ol defren trabol we i mekem ol man oli fraet. Maet man blong haos bambae i glad blong save se wan dei ol trabol ya bambae oli finis. Evritaem we yu faenem wan man we i wantem lesin, traem halpem hem blong i kasemsave olsem wanem advaes blong Baebol i save halpem hem. Katarina we yumi tokbaot hem finis i se: “Oltaem mi stap tingbaot olsem wanem Baebol i bin halpem mi.” From samting ya, taem Katarina i toktok, ol man oli luksave se hem i bilif long samting we hem i talem.

14. Folem Ol Proveb 27:17, ?olsem wanem ol pablisa oli save givgivhan long olgeta long wok blong prij?

¹⁴ Kasem help long narafala. Pol i trenem Timoti long ol defren rod blong prij mo tij, mo i leftemap tingting blong Timoti blong folem ol defren rod ya blong halpem ol narafala. (1 Kor. 4:17) Olsem Timoti, yumi save  lanem samting long ol brata sista blong yumi long kongregesen we oli gat ekspiriens. (Ridim Ol Proveb 27:17.) Tingbaot eksampol blong wan brata we nem blong hem Shawn. Blong smoltaem hem i bin mekem wok blong paenia long wan rurol eria, we plante man oli glad finis long jos we oli gat. ?Wanem i givhan long hem blong i stap glad long wok blong paenia? Hem i se: “Taem mi gat janis blong prij wetem wan pablisa, mitufala i yusum taem ya we mifala i stap wokbaot i go long wan narafala haos, blong tokbaot ol rod we i save givhan long mitufala blong kamgud moa long fasin blong tij. Eksampol, mitufala i tokbaot bakegen samting we man blong haos i talem mo ansa we mitufala i givim. Biaen, mitufala i tokbaot wanem samting we mitufala i save talem sipos man blong haos i talem samting ya bakegen.”

15. ?Evritaem we yumi prij, from wanem i impoten blong prea?

¹⁵ Prea long Jehova from help. Askem Jehova blong i halpem yu evritaem we yu prij. Sipos tabu spirit i no halpem yumi, bambae yumi no naf blong mekem eni samting. (Sam 127:1; Luk 11:13) Yu mas askem stret samting we yu wantem taem yu prea long Jehova. Eksampol, yu askem hem blong i lidim yu i go stret long man we i wantaem save hem, mo we i rere blong lesin. Biaen yu wok folem prea blong yu, hemia blong prij long eni man we yu mitim olgeta.

16. ?Olsem wanem prapa stadi i givhan long yumi long wok blong prij?

¹⁶ Makemaot taem blong stadi yu wan. Baebol i talem se: “Yufala i save pruvum long yufala wan se wil blong God i gud, i stret gud, mo hem i glad long hem.” (Rom 12:2) Taem yumi save gud God, ol man we yumi prij long olgeta bambae oli luksave se yumi rili bilif long samting we yumi talemaot. Katarina we yumi tokbaot hem finis i talem se: “Wan taem mi luksave se mi mas mekem bilif blong mi long sam stamba tijing blong Baebol i kam strong moa. So mi stadi dip moa long ol pruf we i soem se i gat wan Krieta, se Baebol i rili tok blong God, mo se God i gat wan oganaesesen blong hem long wol tede.” Hem i se prapa stadi i givhan blong mekem bilif blong hem i kam strong moa, mo hem i glad moa long wok blong prij.

17. ?From wanem Jisas i holemtaet stret tingting taem i prij?

¹⁷ Jisas i holemtaet stret tingting mo i gohed blong prij nating se sam man oli no wantem lesin long mesej blong hem. ?From wanem? From we hem i save se plante man oli nidim trutok, mo i wantem givhan long plante man blong oli akseptem mesej blong Kingdom. Mo tu, hem i save se samfala we oli no wantem lesin, maet biaen bambae oli wantem lesin. Tingbaot samting we i hapen long famle blong hem. Long ol tri yia haf we Jisas i mekem wok blong prij, i no gat wan long ol brata blong hem i kam disaepol. (Jon 7:5) Be afta we hem i laef bakegen, oli jes kam Kristin.—Wok 1:14.

18. ?From wanem yumi gohed nomo blong prij?

¹⁸ Yumi no save se hu bambae i kam man blong Jehova. Samfala oli tekem longtaem moa bitim ol narafala blong lanem trutok. Iven olgeta we oli no wantem lesin long yumi, oli stap luk ol gudfala fasin blong yumi mo stret tingting we yumi gat, mo maet sloslo bambae olgeta tu oli stat blong “presem God.”—1 Pita 2:12.

19. Folem 1 Korin 3: 6, 7, ?yumi mas luksave wanem?

¹⁹ Nating se yumi prij mo tij, be yumi mas luksave se God nao i mekem wok ya i karem  frut. (Ridim 1 Korin 3:6, 7.) Getahun, wan brata we i stap prij long Itiopia i talem se: “Blong bitim 20 yia, mi wan nomo mi Witnes blong Jehova long eria we mi stap long hem. Be naoia i gat 14 pablisa long ples ya. Tetin oli baptaes finis, inkludum waef blong mi mo tri pikinini blong mitufala. Oltaem i gat samwe long 32 man olsem long miting.” Getahun i glad se hem i gohed nomo blong prij kasem we Jehova nomo i pulum ol man we hat blong olgeta i stret, blong oli kam insaed long oganaesesen blong hem.—Jon 6:44.

20. ?Olsem wanem wok blong prij i sem mak long wok ya blong sevem ol man?

²⁰ Jehova i luk laef blong evri man se i sas. Hem i givim privilej ya long yumi blong wok wetem boe blong hem, blong hivimap ol man blong olgeta nesen bifo we en blong sistem ya i kam. (Hag. 2:7) Wok blong prij we yumi mekem, i sem mak long wok ya blong sevem ol man we oli stap long denja. Yumi olsem ol memba blong wan tim we i go blong sevem ol man we oli draon long wan sip. Nating se maet yumi faenem smol man nomo we oli laef, be wok we evri memba blong tim oli mekem i impoten. Hemia i sem mak long wok blong prij. Yumi no save hamas man yet we bambae oli sef long rabis wol ya blong Setan. Be Jehova i save yusum eniwan long yumi blong halpem olgeta. Andreas we i laef long Bolivia i talem se: “Mi luksave se taem wan man i lanem trutok mo i baptaes, hemia i kamaot from traehad we plante man oli mekem blong halpem hem.” Taswe, i gud yumi gohed blong holemtaet stret tingting long wok blong prij. Sipos yumi mekem olsem, Jehova bambae i blesem yumi mo bambae yumi kasem bigfala glad long wok blong prij.