1-2. ?Wanem ol problem we plante Witnes oli fesem?

APOSOL Pol i enkarejem Timoti mo olgeta Kristin blong oli mekem bes blong olgeta long wok blong prij. (2 Tim. 4:5) Yumi evriwan i stap traehad blong folem advaes ya blong Pol. Be samtaem, i no isi blong mekem olsem. Plante brata sista oli fraet blong mekem wok blong prij. (2 Tim. 4:2) Be traem tingbaot ol brata mo sista we oli laef long ol kantri we gavman i putum ol strong rul o tabu long wok blong prij. !Olgeta ya oli gohed nomo blong prij nating se maet oli save go long kalabus from!

² Ol man blong Jehova oli fesem plante problem we i save mekem tingting blong olgeta i foldaon. Eksampol, plante oli wantem mekem moa long wok blong prij, be from we oli mas wok plante aoa blong pem samting we famle i nidim, hemia i mekem se long en blong wik oli taed tumas. Sam narafala oli no save mekem moa, maet from we oli sik bigwan, oli kam olfala, o oli no save aot long haos. Mo sam narafala, oltaem oli gat filing ya se Jehova i no tinghae long olgeta. Mary, * wan sista we i laef long Medel Is, i talem se: “Mi mi traehad oltaem blong kontrolem ol filing blong mi taem mi harem nogud, mo hemia i mekem mi kam taed tumas. Taswe mi harem se mi gilti from we mi no moa gat taem mo paoa blong spenem long wok blong prij.”

3. ?Bambae yumi tokbaot wanem long stadi ya?

³ Nomata wanem problem yumi fesem, Jehova i save givim paoa we yumi nidim blong yumi gohed blong mekem wok blong hem. Bifo we yumi tokbaot olsem wanem Jehova i save halpem yumi, fastaem i gud yumi luk olsem wanem Jehova i  givim paoa long Pol mo Timoti blong mekem gud wok blong prij, nating se tufala i fesem ol problem.

4. ?Wanem ol problem we Pol i fesem?

⁴ Pol i nidim paoa from we hem i fesem plante problem. Ol man oli wipim hem, oli stonem hem, mo oli putum hem long kalabus. (2 Kor. 11:23-25) Pol i no sem blong talem se samtaem hem i mas wok had blong sakemaot ol nogud tingting. (Rom 7:18, 19, 24) Mo tu, hem i mas stanap strong from hadtaem we hem i fesem we i olsem “ropnil we i stap stikim” hem, we hem i wantem tumas se God i karemaot.—2 Kor. 12:7, 8.

5. ?Pol i mekem wanem nating se hem i fesem ol trabol?

⁵ Jehova i givim paoa long Pol blong i gohed blong prij, nomata wanem problem hem i fesem. Traem tingbaot ol samting we Pol i mekem. Taem hem i stap kalabus long wan haos long Rom, hem i no fraet blong talemaot gud nius long ol lida blong skul blong ol man Jiu, mo maet long ol haeman blong gavman. (Wok 28:17; Fil. 4:21, 22) Mo tu, hem i prij long plante Praetorian Gad, mo evri man we oli stap kam blong visitim hem. (Wok 28:30, 31; Fil. 1:13) Long taem ya tu, Pol i raetem plante leta we i givhan long ol Kristin long taem bifo mo tede tu. Mo tu, eksampol blong Pol i givhan long kongregesen blong Rom, we i “mekem tingting blong olgeta i strong moa blong talemaot tok blong God.” (Fil. 1:14) Nating se samtaem Pol i no save mekem moa long wok blong prij, be yet hem i mekem bes blong hem, mo samting ya i “mekem se gud nius i stap goaot moa.”—Fil. 1:12.

6. Folem 2 Korin 12:9, 10, ?wanem i halpem Pol blong i finisimgud minista wok blong hem?

⁶ Pol i luksave se evri samting we hem i mekem long wok blong Jehova, i kamaot from paoa blong God, be i no blong hem. Hem i talem se long taem we hem i no gat paoa, long taem ya nao paoa blong God i “kam strong moa” long hem. (Ridim 2 Korin 12:9, 10.) Tabu spirit blong Jehova nao i givhan long Pol blong finisimgud minista wok blong hem, nating se ol man oli agensem hem, oli putum hem long kalabus o i fesem ol narafala hadtaem bakegen.

7. ?Wanem ol problem we maet i mekem i had blong Timoti i finisimgud minista wok blong hem?

⁷ Timoti, we i yangfala fren blong Pol, hem  tu i dipen long paoa blong God blong mekem minista wok blong hem. Timoti i folem Pol long plante misinari trip blong hem. Mo tu, Pol i sanem Timoti blong i go long sam kongregesen blong leftemap tingting blong ol brata sista. (1 Kor. 4:17) Maet Timoti i harem se hem i no naf nating. Be Pol i talem long hem se: “Yu no mas letem man i luklukdaon long yu from we yu yu yangfala.” (1 Tim. 4:12) Timoti tu i gat wan samting olsem ropnil we i stap stikim hem, hem i “stap sik oltaem.” (1 Tim. 5:23) Be hem i save se Jehova bambae i givim paoa we hem i nidim blong gohed blong prij mo givhan long ol brata blong hem.—2 Tim. 1:7.

8. Olsem wanem Jehova i givim paoa long ol man blong hem tede?

⁸ Jehova i givim “paoa ya we i bigwan bitim mak” long ol man blong hem, blong oli save gohed blong mekem wok blong hem. (2 Kor. 4:7) Naoia bambae yumi tokbaot fo samting we Jehova i givim blong mekem yumi gat paoa mo holemstrong long hem, hemia: prea, Baebol, ol brata sista, mo wok blong prij.

9. ?Olsem wanem prea i save halpem yumi?

⁹ Prea i mekem yumi gat paoa. Long Efesas 6:18, Pol i enkarejem yumi blong “prea enitaem” long God. Mo God bambae i ansa taem i halpem yumi. Jonnie, we i laef long Bolivia, i luksave se Jehova i halpem hem, taem hem i fesem sam problem. Perens blong hem wetem waef blong hem, evriwan oli sik bigwan long semtaem. I had blong Jonnie i mekem evri samting blong lukaot long trifala ya. Samtaem biaen, mama blong hem i ded, mo i tekem longtaem blong waef blong hem mo papa blong hem oli kam gud bakegen. Jonnie i tingtingbak mo i se: “Taem mi wari tumas, samting we i halpem mi, hemia blong mi prea long Jehova mo talemaot evri samting we i stap long hat blong mi.” Jehova i givim paoa we Jonnie i nidim blong stanap strong. Ronald we i wan elda long Bolivia, i harem se mama blong hem i kasem kansa. Mo wan manis biaen, mama blong hem i ded. ?Wanem i halpem hem long hadtaem ya? Hem talem i se: “Taem mi prea long Jehova, mi talemaot evri filing blong mi. Mi save se Jehova i kasemsave gud long mi i bitim mi wan o eni narafala man.” Maet samtaem yumi harem se yumi no save stanap strong o yumi no save wanem blong prea from. Be Jehova i wantem se yumi prea long hem, nating sipos yumi harem se i had blong talemaot ol tingting mo filing blong yumi.—Rom 8:26, 27.

10. Folem Hibru 4:12, ?from wanem i impoten blong ridim Baebol mo tingting dip long hem?

¹⁰ Baebol i mekem yumi gat paoa. Pol i kasem paoa mo i haremgud taem i ridim Baebol, mo yumi tu yumi mas mekem sem mak. (Rom 15:4) Taem yumi ridim Baebol mo tingting dip long hem, Jehova i save givhan long yumi blong kasemsave olsem wanem Baebol i save halpem yumi. (Ridim Hibru 4:12.) Ronald we yumi tokbaot hem finis, i talem se: “Mi glad se mi traehad blong ridim Baebol evri naet. Mi tingting dip plante long ol fasin blong Jehova, mo olsem wanem hem i kea long ol man blong hem. Mo hemia i halpem mi blong kasembak paoa.”

11. ?Olsem wanem Baebol i givhan long wan sista we i stap harem nogud?

¹¹ Taem yumi tingting dip long Tok blong God, hemia i save halpem yumi blong gat stret tingting long ol problem blong yumi. Traem luk olsem wanem Baebol i givhan long wan wido we i stap harem nogud from hasban blong hem i ded. Wan elda i talem long hem blong i ridim buk blong Job, blong luk ol  gudfala lesen we i save halpem hem. Ale hem i mekem, be hem i kwik blong jajem Job from rong tingting we hem i gat. Long tingting blong hem, hem i stap talem se: “!Job! !Yu no stap tingbaot ol problem blong yu tumas!” Be afta, hem i luksave se fasin blong hem tu i sem mak olsem long Job. Hemia i halpem hem blong jenisim tingting blong hem, mo kasembak paoa blong dil wetem harem nogud blong hem.

12. ?Olsem wanem Jehova i givim paoa long yumi tru long ol brata sista?

¹² Ol brata sista oli mekem yumi gat paoa. Wan narafala rod we Jehova i yusum blong givim paoa long yumi, hemia tru long ol brata sista. Pol i raetem se hem i wantem tumas blong luk ol brata mo sista, blong “bilif blong [olgeta] i save leftemap tingting blong [hem].” (Rom 1:11, 12) Mary, we yumi tokbaot hem finis, i laekem tumas blong joen wetem ol brata sista. Hem i talem se: “Jehova i yusum ol brata sista we oli no iven save problem blong mi. Samtaem oli talem ol tok we i leftemap tingting blong mi o sanem ol kad long mi, mo hemia nao samting we mi rili nidim. Hemia i halpem mi tu blong toktok wetem ol sista we oli gat semfala problem olsem mi mo lanem samting from ekspiriens blong olgeta. Mo oltaem ol elda oli mekem mi mi harem se mi tu mi impoten insaed long kongregesen.”

13. ?Olsem wanem yumi kasem paoa long ol Kristin miting?

¹³ Wan long beswan ples blong leftemap tingting blong yumi, hemia long ol miting blong kongregesen. Long ol miting, taem yumi talem long ol brata sista se yumi lavem olgeta mo yumi talem tangkiu from ol gudfala samting we oli mekem, hemia i save givim paoa long olgeta. Eksampol, bifo long wan miting wan elda nem blong hem Pita, i talem long wan sista we hasban blong hem i no stap long trutok se: “Mifala i glad tumas blong luk yu, hemia i leftemap tingting blong mifala. Oltaem yu rerem gud ol sikis pikinini blong yu, mo oli givim ol gudfala ansa.” Taem hem i harem tok ya, hem i wantem krae mo i talem se: “Ating yu no save, be mi rili nidim blong harem toktok olsem tede.”

14. ?Wok blong prij i givhan long yumi olsem wanem?

¹⁴ Wok blong prij i mekem yumi gat paoa. Taem yumi prij long ol narafala, yumi harem gud nating se man i lesin no nogat. (Prov. 11:25) Wan sista we nem blong Stacy, i luksave olsem wanem wok blong prij i givim paoa long hem. Taem wan famle blong hem i disfelosip, hem i harem nogud tumas mo i stap tingting se, ‘?Bambae mi mekem wanem moa blong givhan long famle blong mi?’ Oltaem Stacy i stap tingbaot problem ya. ?Wanem i halpem hem blong i harem gud bakegen? !Hemia wok blong prij! Taem hem i prij, hem i tingbaot moa ol man long teritori we oli nidim help blong hem. Hem i talem se: “Long taem ya, Jehova i givim wan Baebol stadi long mi we i kwik blong folem ol samting we hem i lanem. Mo hemia i leftemap tingting blong mi bigwan. Taswe, samting we i rili halpem mi hemia wok blong prij.”

15. ?Yu yu lanem wanem long ol toktok we Mary i talem?

¹⁵ Samfala oli harem se oli no moa save mekem moa long wok blong Jehova, from sam samting long laef blong olgeta i jenis. Sipos yu tu yu gat filing olsem, tingbaot se Jehova i glad sipos yu mekem bes blong yu. Tingbaot bakegen eksampol blong Mary. Taem hem i muv i go long wan ples we oli toktok narafala lanwis, hem i harem olsem se hem i no stap mekem i naf long wok blong prij. Hem i se: “Blong longtaem lelebet, taem mi go long wok blong prij, mi talem wan smol toktok nomo,  o ridim wan vas long Baebol, o givim wan traket.” Hemia i mekem hem i harem nogud taem i skelem hem wetem olgeta we oli toktok gud lanwis ya. Be biaen, hem i jenisim tingting blong hem. Hem i luksave se Jehova i save yusum hem yet, nating sipos hem i no save toktok gud lanwis ya. Hem i talem se: “Samting we Baebol i tijim i no had tumas, mo i save jenisim laef blong man.”

16. ?Wanem i save givhan long olgeta we oli wantem prij be oli no save aot long haos?

¹⁶ Jehova i save se samfala oli wantem mekem moa long wok blong prij, be nomo se oli no save aot long haos. Taswe, hem i save halpem yumi blong prij long olgeta we oli lukaot long yumi, o ol dokta mo nes. Sipos yumi skelem wok we yumi mekem naoia wetem wok we yumi mekem bifo, maet tingting blong yumi i save foldaon. Be sipos yumi luksave olsem wanem Jehova i stap halpem yumi naoia, hemia bambae i givim paoa we yumi nidim blong stanap strong long eni traem.

17. Folem Prija 11:6, ?from wanem yumi mas gohed nomo long wok blong prij nating se i no karem frut kwiktaem?

¹⁷ Long ol sid blong trutok we yumi stap planem, yumi no save weswan nao bambae i gru. (Ridim Prija 11:6.) Eksampol, Barbara wan sista we i gat bitim 80 yia, oltaem i prij tru long telefon mo ol leta. Long wan leta, hem i putum Wajtaoa blong 1 Maj 2014 we taetel blong hem i se, “?God i Mekem Wanem Blong Yu?” Hem i no save se leta we hem i sanem, i go long wan kapol we oli no moa Witnes Blong Jehova. Kapol ya i ridim magasin ya bakegen mo bakegen. Nao hasban i harem olsem se Jehova i stap toktok stret long hem. Kapol ya i stat blong kam long ol miting bakegen mo afta long 27 yia, kongregesen i tekembak tufala. !I sua se Barbara i glad tumas taem hem i luk frut we i kamaot long wan long ol leta we hem i raetem, mo hemia i givim paoa long hem blong i gohed!

18. ?Olsem wanem yumi save kasem paoa we Jehova i givim?

¹⁸ Jehova i givim plante samting long yumi blong mekem yumi gat paoa, hemia prea, Baebol, ol brata sista, mo wok blong prij. Taem yumi yusum ol samting ya, yumi soemaot se yumi trastem hem mo wantem se hem i halpem yumi. I gud yumi gohed blong trastem Papa blong yumi long heven, we i glad blong “soemaot paoa blong hem blong givhan long olgeta we hat blong olgeta i stap fulwan long hem.”—2 Kron. 16:9.