Samting we i hapen long naet ya i jenisim laef blong mi, from long taem ya nao mi stat blong lukaotem God. Be bifo we mi tokbaot samting we i hapen long naet ya, fastaem bambae mi tokbaot samting we i hapen long mi taem mi pikinini, we i pulum mi blong wantem save God moa.

Mi mi bon long 1937 long Guesnain, wan taon blong not Franis we oli stap digim maen long hem. Papa blong mi i wok long maen blong digim jakol, mo hem i tijim mi se i impoten blong wok had. Mo tu, hem i tijim mi blong agensem ol fasin we i no stret, hem i luk we plante man oli stap mekem i no stret long ol man blong digim maen, oli wok long ol ples we i no sef, mo hem i wantem tumas blong givhan long olgeta. Taswe hem i joen long wan oganaesesen we i faet from raet blong ol man blong digim maen. Mo hem i no glad tu long fasin blong ol lokol pris we oli gat tu fes. Plante long olgeta oli gat gudfala laef, be yet oli stap askem kakae mo mane long ol man blong digim maen, we oli traehad blong kasem ol samting we oli nidim. From we papa i no laekem fasin blong ol pris ya, hem i no tijim eni samting long  saed blong relijen long mi. Blong talem stret, mifala i neva tokbaot God.

Taem mi gruap, mi tu mi stat blong agensem ol fasin we i no stret. Wan fasin we mi no laekem, hemia se plante man oli no laekem ol man blong defren ples we oli kam stap long Franis. Be mi mi stap plei futbol wetem ol pikinini we oli blong ol defren kantri mo mi laekem blong joen wetem olgeta, mo antap moa, mama blong mi i no blong Franis, hem i blong Polan. Mi mi wantem tumas we ol man oli mekem i sem mak long ol man blong defren ples mo blong oli laef tugeta long pis.

Long 1957, mi joen long ami. Hemia nao olsem wanem mi bin kasem ol hil blong Aljeria, olsem we mi bin tokbaot long stat. Afta we mi krae long God se, “!God, oh God!” mi tanem hed blong mi, mi sek se i no wan soldia be wan wael dongki. !Man, long taem ya mi harem gud wantaem! Be yet samting we i bin hapen mo faet we i stap gohed, i mekem mi tingting plante long saed blong laef. Mi stap tingting se, ?From wanem yumi laef? ?God i kea long yumi??Wan dei bambae i gat pis?

Samtaem biaen, taem mi go spel long haos blong papa mama, mi mitim wan Witnes blong Jehova. Hem i givim wan kopi blong La Sainte Bible long mi, we i wan Franis Katolik translesen. Mo taem mi gobak long Aljeria, mi stat blong ridim. Wan vas we i tajem hat blong mi, hemia Revelesen 21:3, 4. I talem se: “Tent blong God i stap wetem ol man . . . Mo hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem.” * Mi neva harem samting olsem bifo. Mo mi stap tingting se, ‘?Hemia i tru ya?’ Long taem ya, mi no save eni samting long saed blong God mo Baebol.

Long 1959, taem mi finis long ami, mi mitim wan Witnes, nem blong hem François, mo hem i tijim plante trutok blong Baebol long mi. Eksampol, hem i soem long mi long Baebol se God i gat wan prapa nem, hemia Jehova. (Sam 83:18) Mo tu, François i eksplenem se Jehova bambae i mekem se fulwol i gat jastis, i mekem wol i kam paradaes, mo i mekem ol promes ya long Revelesen 21:3, 4 i kamtru.

Ol tijing ya oli klia gud mo oli tajem hat blong mi. Be long semtaem, mi kros long ol pris mo mi wantem talem stret long olgeta se ol tijing blong olgeta i no stanap long Baebol. I luk olsem se mi stil gat sem tingting olsem papa blong mi, mo mi no gat longfala tingting. !Mi wantem stretem samting ya kwiktaem nomo!

François mo ol narafala Witnes, oli halpem mi blong kontrolem kros blong mi. Oli eksplenem se wok blong yumi ol Kristin, i no blong jajem narafala, be i blong talemaot gud nius blong Kingdom blong God we i givim hop long man. Wok ya nao Jisas i bin mekem mo i talem long ol man blong hem tu blong oli mekem sem mak. (Mat. 24:14; Luk 4:43) Mo tu, mi mas lanem blong toktok kaen long ol man mo long fasin we i waes, nating se mi no agri long bilif blong olgeta. Baebol i talem se: “Wan slef blong Masta i no mas faet, hem i mas kaen long evri man.”—2 Tim. 2:24.

 Mi bin mekem plante jenis, mo mi baptaes olsem wan Witnes blong Jehova long 1959, long wan dei asembli. Long taem ya, mi mitim wan yangfala sista we mi laekem hem tumas, nem blong hem Angèle. Mi stat blong visitim kongregesen blong hem wanwan taem, mo long 1960 mitufala i mared. Hem i gat ol gudfala fasin, i wan gudfala waef, mo i wan presen we i kam long Jehova.—Prov. 19:14.

Long ol yia we i pas, mi lanem plante impoten lesen long ol brata we oli waes mo gat ekspiriens. Wan impoten wan hemia: Yumi save mekem gud wok we yumi kasem, sipos yumi gat tingting daon mo folem gud waestok ya long Ol Proveb 15:22, we i se: “Wok i save gohed gud, taem i gat plante man blong givim advaes.”

Long 1964, mi stat blong luksave se ol tok ya oli tru. Long yia ya, mi stat blong wok olsem eria elda, mi visitim ol kongregesen blong enkarejem ol brata sista, mo mekem oli strong long saed long spirit. Be mi gat 27 yia nomo long taem ya, mo mi no gat naf ekspiriens. So mi mekem plante mastik. Be mi traehad blong lanem samting from olgeta. Mo tu, mi lanem plante impoten lesen long ol ‘man ya blong givim advaes’ we oli gat gudhan mo ekspiriens.

Mi tingbaot wan samting we i hapen taem mi stat blong mekem wok blong eria elda. Afta we mi visitim wan kongregesen long Paris, wan brata we i bigman long spirit, i askem blong toktok wetem mi. Nao mi se: “I stret.”

Ale hem i askem mi se: “?Louis, taem wan dokta i go long haos blong wan man, hem i go blong luk hu?”

Mi se: “Sikman.”

Nao hem i talem se: “Hemia nao. Be mi makem se yu stap spenem moa taem wetem olgeta we oli strong long spirit, olsem olgeta we oli lidim kongregesen. Long kongregesen blong yumi, i gat plante brata sista we tingting blong olgeta i foldaon, sam oli niu o oli sem. I sua se bambae oli glad tumas sipos yu spenem taem wetem olgeta o go kakae wetem olgeta.”

Mi glad tumas long advaes blong brata ya. Lav we hem i gat long ol sipsip blong Jehova i tajem hat blong mi. Nating se i had blong akseptem se mi mekem wan mastik, be mi kwik blong folem advaes ya. Mi talem tangkiu tumas long Jehova from ol brata olsem.

 Long yia 1969 mo 1973, oli putum mi mi wok long dipatmen we i lukaot long ol kakae, long taem blong tufala intenasnal asembli long Colombes, Paris. !Long asembli long 1973, mifala i mas fidim samwe 60,000 man long faet dei! Mi no save olsem wanem bambae mifala i mekem samting ya. Be bakegen, samting we i givhan, hemia vas blong Ol Proveb 15:22 we i talem se, askem advaes. So mi askem advaes long ol brata we oli gat ekspiriens blong oli givhan. Sam long olgeta oli wok long ples blong mit, vejtebol, oli kuk, mo oli pem samting. From we mifala evriwan i wok wanples, mifala i naf blong mekem gud wok ya.

Long 1973, oli askem mi mo waef blong mi blong go wok long Betel long Franis. Be faswan asaenmen blong mi, i no isi. Mi mas faenem rod blong sanem ol buk i go long ol brata long Afrika, long Kamerun, we wok i tabu bitwin yia 1970 mo 1993. Be bakegen mi no save sipos mi naf blong mekem wok ya. Brata long branj we i lukaot long wok long Franis, i luksave samting ya. Ale hem i enkarejem mi se: “!Ol brata long Kamerun oli nidim ol kakae long saed blong spirit, i gud yumi fidim olgeta!” Mo hemia nao samting we mifala i mekem.

Mi mekem plante trip i go long ol kantri klosap long Kamerun blong mitim ol elda blong Kamerun. Ol brata ya oli gat strong tingting mo oli waes. Oltaem oli givhan long mi blong faenem rod blong sanem ol buk i go long ol brata long Kamerun. Jehova i blesem traehad blong mifala. Blong talem stret, blong samwe 20 yia, ol brata longwe oli neva mestem wan kopi blong Wajtaoa mo Kingdom Wok we i stap kamaot evri manis.

Stat taem mitufala i stap fren, mi makem se Angèle i rili fren gud wetem Jehova. Afta long mared, fasin ya blong hem i kam klia moa. Eksampol, long naet blong dei ya we mitufala i mared  long hem, hem i askem mi blong prea long Jehova, mo tokbaot se mitufala i wantem mekem wok blong hem long ful laef blong mitufala olsem wan mared kapol. Mo Jehova i ansarem prea ya.

Angèle i halpem mi tu blong trastem Jehova fulwan. Eksampol: Long 1973, taem oli askem mitufala blong go wok long Betel, mi mi no wantem from mi laekem tumas wok blong eria elda. Be Angèle i rimaendem mi se mitufala i givim laef blong mitufala long Jehova. Mo se mitufala i mas mekem eni samting we oganaesesen i askem mitufala blong mekem. (Hib. 13:17) Mi luksave se samting we hem i talem i tru. Taswe, mitufala i go long Betel. Waef blong mi i waes, i gat stret tingting, mo i rili lavem Jehova. Long olgeta yia we mitufala i laef tugeta, ol gudfala fasin ya blong hem oli givhan blong mekem mared blong mitufala i stap strong, mo i halpem mitufala tu blong mekem ol gudfala desisen.

Nating se naoia mitufala i olfala, be Angèle i gohed blong stap olsem wan gudfala waef we i sapotem gud mi. Eksampol, blong joen long ol tiokratik skul, we plante oli stap long Inglis, mi mo Angèle i mas wok had blong kamgud moa long lanwis ya. So mitufala i joenem wan Inglis kongregesen, nating se long taem ya mitufala i gat bitim 70 yia. Long mi, i no isi from we mi mi wok olsem wan memba blong Branj Komiti long Franis, so i had blong mi faenem taem blong lanem wan narafala lanwis. Be mitufala i givgivhan long mitufala. Mo naoia we mitufala i gat 80 yia finis, mitufala i gohed blong rerem ol miting long Inglis mo Franis. Mo tu, mitufala i traehad oltaem blong joen long ol miting mo wok blong prij wetem kongregesen blong mitufala. Jehova i rili blesem traehad blong mitufala blong lanem Inglis.

Long 2017, mitufala i kasem wan nambawan blesing. Oli invaetem mitufala blong joen long Skul Blong Ol Memba Blong Branj Komiti Wetem Woman Blong Olgeta, long Wajtaoa Edukesen Senta long Patterson, New York.

I tru nomo se Jehova i Bigfala Tija. (Aes. 30:20) Taswe yumi no sapraes se ol man blong hem, ol yangfala, ol olfala, evriwan oli kasem beswan trening. (Dut. 4:5-8) Mi luksave se taem ol yangfala oli lesin long Jehova mo ol ekspiriens brata sista, oli naf blong mekem ol gudfala desisen, mo oli naf blong holemstrong long wok blong Jehova. Ol Proveb 9:9 i rimaendem yumi se: ‘Taem yumi serem save wetem man we i waes, bambae hem i kam waes moa. Yumi tijim wan stret man, nao bambae hem i lanem plante moa samting.’

Naoia 60 yia i pas finis, be taem mi tingtingbak long naet ya antap long ol hil blong Aljeria mi neva ting se bambae mi gat wan hapi laef olsem tede. !Mi mi lanem plante samting from ol narafala! Jehova i givim wan nambawan laef long mitufala we i gat mining. So mitufala i gat strong tingting se bambae mitufala i neva stop blong lanem samting long Papa blong yumi long heven, mo long ol brata mo sista we oli lavem hem, we oli waes mo oli gat plante ekspiriens.