1-2. ?Wanem wan risen we i mekem se yumi mas intres long buk blong Revelesen?

 ?WAN man i bin singaotem yu finis blong kam lukluk foto albam blong wan narafala man? Taem yu stap lukluk ol foto, yu luk plante man we yu no save olgeta. Be long wan foto, yu stop, mo yu stap traem blong lukluk gud. ?From wanem? From we yu yu stap insaed long foto ya. Yu stap lukluk gud blong traem tingbaot se oli tekem foto ya wetaem mo oli tekem wea. Mo tu, yu traem blong lukluk gud se hu ya ol narafala man long foto ya. Foto ya i spesel tumas long yu.

² Buk blong Revelesen i olsem foto ya. ?From wanem? I gat tu risen. Faswan, oli raetem buk ya blong yumi. Long faswan vas blong buk ya, yumi ridim se: “Hemia ol samting we God i givim long Jisas Kraes blong hem i soemaot, mo hem i soemaot long ol slef blong hem. Ol samting ya bambae oli hapen i no longtaem.” (Rev. 1:1) Taswe ol samting we oli raetem long buk ya, i no blong evri man be i blong yumi, we yumi mekem wok blong God. From we yumi man blong God, yumi no mas sapraes se yumi joen tu blong mekem ol profet tok blong nambawan buk ya oli kamtru. Wan narafala rod blong talem, hemia se yumi stap “insaed long foto ya.”

3-4. ?Wetaem ol profet tok long buk blong Revelesen oli kamtru? ?Mo hemia i mas pulum yumi blong wantem mekem wanem?

³ Nambatu risen, hemia taem we ol profet tok ya bambae oli  kamtru. Aposol Jon i talemaot wetaem ol profet tok ya bambae oli kamtru, hem i se: “Tabu spirit i tekem mi mi go long dei blong Masta.” (Rev. 1:10) Taem Jon i raetem ol tok ya samwe long yia 96 K.T., “dei blong Masta” i no kamtru yet. (Mat. 25:14, 19; Luk 19:12) Be folem ol profet tok long Baebol, dei ya i stat long 1914 taem Jisas i kam King long heven. Stat long yia ya i go, ol profet tok blong Revelesen, we i go long ol man blong God, i stat blong kamtru. !Yes, yumi stap laef naoia long “dei blong Masta”!

⁴ From we yumi laef long wan impoten taem, yumi mas lukluk gud long ol advaes we i stap long Revelesen 1:3, we i se: “Man we i ridim profet tok ya long bigfala voes mo olgeta we oli harem tok ya mo oli folem, oli glad from we stret taem blong ol samting ya i klosap.” Yes, yumi mas ‘ridim ol profet tok ya long bigfala voes’ mo “folem” olgeta. ?Wanem sam long ol tok ya we yumi mas folem?

5. ?Olsem wanem buk blong Revelesen i soem se i impoten blong mekem Jehova i glad long wosip blong yumi?

⁵ Long faswan japta blong Revelesen, yumi lanem se Jisas i save evri samting we i stap hapen insaed long ol kongregesen. (Rev. 1:12-16, 20; 2:1) Ol mesej we Jisas i sanem long ol seven kongregesen long Esia Maena i pruvum klia samting ya. Long ol mesej ya, Jisas i givim klia daereksen blong halpem ol Kristin long taem ya, blong meksua se Jehova i glad long wosip blong olgeta. Mo tu, samting we Jisas i talem long mesej ya i stret long ol man blong God tede. ?Yumi lanem wanem? Lida blong yumi, Kraes Jisas, i savegud sipos yumi frengud wetem Jehova o nogat. Jisas i stap lidim mo protektem yumi, mo hem i luk evri samting. Hem i save samting we yumi mas mekem blong Jehova i gohed blong glad long yumi. ?Jisas i givim wanem daereksen we yumi mas folem tede?

6. (1) Folem tok blong Jisas long Revelesen 2:3, 4, ?wanem problem we kongregesen blong Efesas i gat? (2) ?Yumi lanem wanem from samting ya?

⁶ Ridim Revelesen 2:3, 4. Yumi no mas lusum lav ya we yumi gat fastaem long Jehova. Mesej we Jisas i talem long kongregesen blong Efesas, i soemaot se oli bin stanap strong mo oli mekem wok blong Jehova nating se oli fesem plante hadtaem. Nating se i olsem, oli lusum lav ya we oli bin gat fastaem. Sipos oli no wokem bak lav ya we oli gat fastaem, bambae Jehova i no save glad long wosip blong olgeta. Long sem fasin, tede yumi mas mekem sam moa samting i bitim we yumi jes stanap strong nomo. Yumi mas stanap strong from stret risen. God blong yumi i intres long wanem we yumi mekem, be tu from wanem yumi mekem. Risen we i pulum yumi blong stanap strong i impoten long hem, from we hem i wantem se wosip blong yumi i stanap long lav mo fasin tangkiu we yumi gat long hem.—Prov. 16:2; Mak 12:29, 30.

7. (1) Folem Revelesen 3:1-3, ?wanem problem we kongregesen blong Sadis i gat? (2) ?Yumi mas mekem wanem?

⁷ Ridim Revelesen 3:1-3. Yumi mas gohed blong stap wekap mo lukaot gud. Ol Kristin long kongregesen blong Sadis oli gat wan defren problem. Nating se oli bin mekem wok blong Jehova bifo, be biaen oli no moa mekem. Taswe Jisas i talem long olgeta se oli “mas wekap.” ?Yumi lanem wanem long woning ya we Jisas i givim? I tru se Jehova i no save fogetem ol wok blong yumi. (Hib. 6:10) Be, yumi no mas gat tingting ya se from we yumi mekem wok blong Jehova bifo, naoia yumi no moa nid blong mekem. Nating se  maet naoia yumi no save mekem moa, be yumi mas gohed blong stap bisi “long wok blong Masta,” blong yumi save stap wekap mo lukaot gud go kasem en.—1 Kor. 15:58; Mat. 24:13; Mak 13:33.

8. Folem Revelesen 3:15-17 ?yumi lanem wanem long ol tok we Jisas i talem long ol brata long Laodisia?

⁸ Ridim Revelesen 3:15-17. Yumi mas wok strong long wok blong Jehova mo wosipim hem long fulhat. Mesej we Jisas i talem long kongregesen blong Laodisia i soem se olgeta oli gat wan defren problem. Oli ‘no hot gud mo oli no kolkol gud’ long wosip blong olgeta. Taswe, Jisas i talem long olgeta se oli “trabol gud, we ol man oli sore tumas” long olgeta. Oli mas wok strong long wok blong Jehova mo wosipim hem. (Rev. 3:19) ?Yumi lanem wanem? Sipos yumi luk se yumi no moa wok strong long wok blong Jehova, yumi mas traehad blong glad moa long ol gudfala samting we Jehova mo oganaesesen blong hem i givim long yumi. (Rev. 3:18) Yumi no mas traehad blong gat wan gudfala laef naoia, we i mekem se wosip blong Jehova i kam seken ples long laef blong yumi.

9. ?Folem mesej we Jisas i talem long ol Kristin long Pegamam mo Tuatira, yumi mas lukaot long wanem?

⁹ Yumi mas sakemaot ol tijing blong apostasi. Jisas i stretem sam Kristin long Pegamam from oli stap mekem ol brata oli seseraot. (Rev. 2:14-16) Hem i talem gudfala toktok long olgeta long Tuatira from we oli blokem ol “tokhaed blong Setan” mo Hem i pulum olgeta blong oli “holemstrong” long trutok. (Rev. 2:24-26) Ol Kristin long Pegamam we oli stap folem ol giaman tijing, oli mas tanem tingting blong olgeta. ?Be olsem wanem long yumi tede? Yumi mas sakemaot eni tijing we i agensem tingting blong Jehova. Maet ol man blong apostasi “bambae oli mekem olsem se oli ona long God, be oli no wantem paoa blong hem long laef blong olgeta. (2 Tim. 3:5) Sipos yumi stadi long Tok blong God, bambae i isi blong yumi luksave mo sakemaot ol giaman tijing.—2 Tim. 3:14-17; Jud 3, 4.

10. ?Yumi lanem wanem moa long samting we Jisas i talem long kongregesen blong Pegamam mo Tuatira?

¹⁰ Yumi mas blokem o sakemaot enikaen doti fasin blong seks. Ol brata long Pegamam mo Tuatira oli gat wan narafala problem tu. Jisas i tok strong long samfala long ol kongregesen ya, from we oli no sakemaot enikaen doti fasin blong seks. (Rev. 2:14, 20) ?Yumi lanem wanem? Yumi no mas ting se Jehova bambae i akseptem eni kaen doti fasin we yumi stap mekem, from we yumi mekem wok blong hem  blong plante yia finis mo yumi gat sam nambawan privilej naoia. (1 Saml. 15:22; 1 Pita 2:16) Hem i wantem se yumi gat ol gudfala fasin nating se ol fasin blong wol ya oli stap kam moa nogud.—Efes. 6:11-13.

11. ?Yumi lanem wanem kam kasem naoia? (Yu luk bokis ya tu “ Ol Lesen Blong Yumi Tede.”)

¹¹ ?Yumi lanem wanem kam kasem naoia? Yumi bin luk se yumi mas meksua se Jehova i glad long wosip blong yumi. Sipos yumi stap mekem wan samting we i save mekem Jehova i no moa glad long wosip blong yumi, yumi mas tekem aksen kwiktaem blong God i save glad long yumi. (Rev. 2:5, 16; 3:3, 16) Jisas i talem wan narafala samting tu long mesej we hem i talem long ol kongregesen ya. ?Wanem mesej ya?

12. ?Yumi lanem wanem long tok we Jisas i talem long ol brata long Smana mo Filadelfia? (Revelesen 2:10)

¹² Naoia bambae yumi luk mesej we Jisas i talem long kongregesen blong Smana mo Filadelfia. Hem i talem long ol Kristin long ples ya se oli no mas fraet blong fesem fasin agens, from we Jehova bambae i blesem olgeta sipos oli holemstrong long hem. (Ridim Revelesen 2:10; 3:10) ?Yumi lanem wanem? Yumi mas tingbaot se bambae yumi kasem fasin agens, mo yumi mas rere blong stanap strong. (Mat. 24:9, 13; 2 Kor. 12:10) ?From wanem i impoten blong tingbaot samting ya?

13-14. ?Wanem i hapen long ol man blong God, folem tok we i stap long Revelesen japta 12?

¹³ Buk blong Revelesen i wonem yumi se long “dei blong Masta,” hemia tede, ol man blong God bambae oli kasem fasin agens. Revelesen japta 12 i talem se, i gat faet long heven stret afta we Jisas i kam King long Kingdom blong God. Maekel, hemia Jisas Kraes, wetem ol ami blong hem oli faet agensem Setan mo ol dimon. (Rev. 12:7, 8) From samting ya, oli winim ol enemi blong God mo oli sakem olgeta i kamdaon long wol. Taswe ol enemi ya oli mekem plante nogud samting long wol we i mekem ol man oli safa. (Rev. 12:9, 12) ?Be samting ya i mekem wanem long ol man blong God?

¹⁴ Mo tu, buk blong Revelesen i talemaot samting we Setan i mekem. Hem i no save gobak long heven, taswe hem i stap atakem ol man we God i makemaot olgeta long wol, we oli “holem wok ya blong givim witnes long saed blong Jisas.” (Rev. 12:17; 2 Kor. 5:20; Efes. 6:19, 20) ?Olsem wanem profet tok ya i kamtru?

15. ?Hu i representem “tu witnes” ya we Revelesen japta 11 i tokbaot, mo wanem i hapen long olgeta?

¹⁵ Setan i mekem se ol enemi blong God oli atakem ol tabu brata we oli lidim wok blong talemaot Kingdom. Ol tabu brata ya oli representem “tu witnes” we buk blong  Revelesen i tokbaot se oli kilim tufala i ded. * (Rev. 11:3, 7-11) Long yia 1918, oli talem ol giaman tok long saed blong ol eit brata we oli stap lidim oganaesesen, mo oli putum olgeta long kalabus. Long taem ya, plante man oli ting se oli “kilim” o stopem wok we ol brata ya oli mekem.

16. ?Wanem i hapen long yia 1919, mo Setan i gohed blong mekem wanem stat long taem ya?

¹⁶ Profet tok ya long Revelesen japta 11 i tokbaot se smoltaem afta, bambae “tu witnes” ya i laef bakegen. Profet tok ya i kamtru long wan nambawan fasin smoltaem afta we oli putum ol brata ya long kalabus. Long Maj 1919, ol tabu brata ya oli kamaot long kalabus, mo biaen oli klosem kes blong olgeta. Wantaem nomo ol brata ya oli stat bakegen blong lidim wok blong talemaot Kingdom. Be hemia i no stopem Setan blong atakem ol man blong God. Stat long taem ya, Setan i wokem “wan reva” hemia ol fasin agens we i blong spolem ol man blong God. (Rev. 12:15) Hemia nao from wanem yumi wanwan i “mas stanap strong mo . . . gat bilif.”—Rev. 13:10.

17. ?Wanem i halpem ol man blong God nating se Setan i mekem trabol long olgeta?

¹⁷ Revelesen japta 12 i tokbaot se ol man blong God bambae oli kasem sam help long ples we oli no tingbaot. Buk blong Revelesen i eksplenem se “graon” bambae i swolemdaon “reva,” hemia fasin agens we ol man blong God oli kasem. (Rev. 12:16) Mo hemia nao samting we i hapen. Samtaem ol samting long wol blong Setan, olsem sam jaj long kot, oli mekem ol desisen we i givhan long ol man blong God. Plante taem, ol man blong Jehova oli winim ol kot kes, we i mekem se oli fri moa. ?Olsem wanem oli yusum fasin fri ya? Oli yusum evri janis we oli gat blong mekem wok we Jehova i givim long olgeta. (1 Kor. 16:9) ?Wanem wok ya?

18. ?Wanem impoten wok we yumi stap mekem long ol las dei ya?

¹⁸ Jisas i talemaot se ol man blong hem bambae oli talemaot “gud nius ya blong Kingdom” blong God, long olgeta ples long wol bifo we en i kam. (Mat. 24:14) Taem oli mekem wok ya, wan enjel o wan grup blong ol enjel i stap givhan long olgeta blong oli “talemaot gud nius ya we i blong stap olwe, long  olgeta man we oli stap long wol, long olgeta kantri, long olgeta traeb, long olgeta lanwis, mo long olgeta grup blong man.”—Rev. 14:6.

19. ?Wanem narafala mesej we ol man blong God oli mas talemaot?

¹⁹ Ol man blong God oli stap talemaot gud nius blong Kingdom, be tu oli mas sapotem wok we ol enjel oli mekem, we Revelesen japta 8 kasem 10 i tokbaot. Ol enjel ya oli stap talemaot sam strong trabol we bambae i kasem ol man we oli no wantem akseptem Kingdom blong God. Taswe, ol Witnes blong Jehova oli stap talemaot wan mesej blong jajmen, we i olsem “ston blong aes mo faea,” blong soemaot jajmen we God bambae i mekem long rabis wol ya blong Setan. (Rev. 8:7, 13) Ol man oli mas save se en i stap kam klosap, olsem nao oli save mekem sam jenis long laef blong olgeta mo laef tru long dei blong kros blong Jehova. (Sef. 2:2, 3) Be plante man oli no save samting ya. Taswe yumi nidim strong tingting blong talemaot long olgeta. Long taem blong bigfala trabol, laswan mesej ya blong jajmen bambae i strong mo i save mekem ol man oli kros.—Rev. 16:21.

20. ?Bambae yumi tokbaot wanem long tufala nekiswan stadi?

²⁰ Yumi mas obei long ‘ol tok blong profet tok ya’ from we yumi joen tu blong mekem ol samting long buk blong Revelesen i kamtru. (Rev. 1:3) ?Be olsem wanem yumi save stanap strong mo gohed blong gat strong tingting blong talemaot ol mesej ya? I gat tu samting we i save givim paoa long yumi: faswan, hemia samting we buk blong Revelesen i tokbaot long saed blong ol enemi blong God, mo nambatu, hemia ol fiuja blesing we bambae yumi kasem sipos yumi gohed blong holemstrong long Jehova. Long tufala nekiswan stadi, bambae yumi tokbaot ol samting ya.