1. ?Wanem impoten desisen we evri man i mas mekem?

 TEDE, ol man oli gat wan impoten desisen blong mekem. ?Bambae oli sapotem Jehova we hem nomo i gat raet blong rul, o bambae oli sapotem enemi blong hem, Devel Setan? Evri man i mas jus, mo oli no save stap nutrol. Mo desisen blong olgeta bambae i afektem fiuja blong olgeta. (Mat. 25:31-33, 46) Long taem blong “bigfala trabol,” bambae oli kasem wan mak blong soemaot se bambae oli kasem laef o oli go blong lus olwe.—Rev. 7:14; 14:9-11; Esik. 9:4, 6.

2. (1) ?Hibru 10:35-39 i enkarejem yumi blong mekem wanem? (2) ?Olsem wanem buk blong Revelesen i save halpem yumi?

² Ridim Hibru 10:35-39. Sipos yu jusum blong sapotem rul blong Jehova, yu yu mekem wan waes desisen. Mo naoia yu wantem tumas blong halpem ol narafala blong olgeta tu oli mekem gudfala desisen. Blong mekem olsem, yu save yusum ol save we i stap long buk blong Revelesen blong halpem olgeta. Buk ya i tokbaot samting we bambae i hapen long ol man we oli agensem Jehova, mo i tokbaot ol blesing we olgeta we oli sapotem rul blong hem bambae oli kasem. Taswe i gud we yumi stadi long ol impoten trutok ya. Hemia bambae i halpem yumi blong gat strong tingting blong gohed blong wosipim Jehova. Mo tu, yumi save yusum samting we yumi lanem blong halpem ol narafala blong oli jusum blong wosipim Jehova mo gohed blong mekem wok blong hem.

3. ?Bambae yumi tokbaot wanem long stadi ya?

³ Long stadi ya, bambae yumi tokbaot ol kwestin ya: ?Wanem bambae i hapen long olgeta we oli sapotem rul blong God? ?Mo wanem bambae i hapen long ol man we oli sapotem wael animol ya we kala blong hem i laet red, we buk blong Revelesen i tokbaot?

4. ?Jon i luk wanem grup blong man wetem Jisas long heven?

⁴ Long wan vison, aposol Jon i luk tu grup blong ol man we oli sapotem rul blong Jehova mo oli kasem blesing blong laef olwe. Long faswan grup, i gat 144,000 man. (Rev. 7:4) Olgeta oli blong wol ya, mo oli go long heven blong joen wetem Jisas long gavman o Kingdom blong hem, blong rulum ful wol. (Rev. 5:9, 10; 14:3, 4) Long vison ya, Jon i luk we oli stanap wetem Jisas long heven long Hil Ya Saeon.—Rev. 14:1.

5. ?Wanem bambae i hapen long ol tabu Kristin we oli stap yet long wol?

⁵ Stat long taem blong ol aposol kam kasem tede, God i makemaot plante taosen man blong oli kam pat blong ol 144,000. (Luk 12:32; Rom 8:17) Be long vison blong Jon hem i luk se long las dei, namba blong ol man ya bambae i smol nomo. Olgeta “we oli stap” yet, God bambae i putum laswan “stamp” long fored blong olgeta bifo we bigfala trabol i stat. (Rev. 7:2, 3; 12:17) Mo long taem blong bigfala trabol, Jehova bambae i tekemaot olgeta blong go long heven mo joen wetem narafala haf blong ol 144,000 we oli stap finis long heven. Long ples ya, bambae oli rul wetem Jisas long Kingdom blong God.—Mat. 24:31; Rev. 5:9, 10.

6-7. (1) ?Wanem narafala grup we Jon i luk, mo hu ya ol man ya? (2) ?From wanem yumi mas intres long samting we Revelesen japta 7 i tokbaot?

⁶ Afta we Jon i luk grup blong olgeta we bambae oli laef long heven, hem i luk “wan bigfala hip blong ol man.” Baebol i no talem namba blong ol man long grup ya. (Rev. 7:9, 10) ?Hu ya ol man ya? Wan enjel i talem long Jon se: “Hemia ol man ya we oli pastru long bigfala trabol, mo oli wasem klos blong olgeta finis long blad blong Smol Sipsip blong mekem oli kam waet.” (Rev. 7:14) Afta we “bigfala hip blong ol man” ya oli pastru long bigfala trabol, bambae oli laef olwe long wol mo oli harem gud long ol nambawan blesing blong hem.—Sam 37:9-11, 27-29; Prov. 2:21, 22; Rev. 7:16, 17.

⁷ Nating se bambae yumi laef long heven o long wol, be yumi mas bilif fulwan se yumi save kasem ol nambawan blesing ya we Revelesen japta 7 i tokbaot. !Hemia bambae i wan nambawan taem blong yumi! Bambae yumi glad tumas se yumi bin jusum blong sapotem rul blong Jehova.?Wanem sam moa samting we buk blong Revelesen i tokbaot long saed blong bigfala trabol?—Mat. 24:21.

8. ?Olsem wanem bigfala trabol bambae i stat, mo plante man bambae oli mekem wanem?

⁸ Long las stadi, yumi lanem se i no longtaem ol gavman blong wol bambae oli atakem Bigfala Babilon, hemia olgeta giaman skul. (Rev. 17:16, 17) Long taem ya nao bigfala trabol bambae i stat. ?Plante man bambae oli wantem stat blong wosipim Jehova long taem? Nogat. Revelesen japta 6 i soem se long taem ya, ol man we oli no wosipim Jehova bambae oli resis i go long ol gavman mo ol bigfala bisnesman blong wol ya, we oli olsem ol hil blong protektem olgeta. From we ol man ya oli no wantem sapotem Kingdom blong God, Jehova bambae i luk olgeta se oli agensem hem.—Luk 11:23; Rev. 6:15-17.

9. Long taem blong bigfala trabol, ?olsem wanem ol man blong Jehova bambae oli stap defren, mo wanem bambae i hapen long olgeta?

⁹ Long taem blong bigfala trabol, ol man bambae oli luksave se ol man blong Jehova oli defren long ol narafala man. Olgeta nomo  bambae oli gohed blong wosipim Jehova God mo oli no wantem sapotem nating “wael animol ya.” (Rev. 13:14-17) From we oli gohed blong holemstrong long Jehova, hemia bambae i mekem ol enemi blong Jehova oli kros tumas. From samting ya, wan grup blong ol nesen bambae i atakem ol man blong God long olgeta ples long wol. Mo Baebol i singaot atak ya se, atak blong Gog Blong Magog.—Esik. 38:14-16.

10. Folem Revelesen 19:19-21, ?Jehova bambae i mekem wanem taem Gog Blong Magog i atakem ol man blong hem?

¹⁰ ?Jehova bambae i mekem wanem long taem blong atak ya? Hem i talem long yumi se: “Bigfala kros blong mi bambae i girap kwiktaem nomo.” (Esik. 38:18, 21-23) Revelesen japta 19 i tokbaot nekiswan samting we i hapen. Jehova i sanem Pikinini blong hem blong protektem ol man blong hem mo winim ol enemi blong hem. Long taem ya “ol ami long heven,” hemia ol enjel mo ol 144,000 bambae oli joen wetem Jisas blong faet agensem Gog Blong Magog. (Rev. 17:14; 19:11-15) ?Wanem risal blong faet ya? !Olgeta man mo ol oganaesesen we oli agensem Jehova, bambae oli lus blong olwe!—Ridim Revelesen 19:19-21.

11. ?Wanem impoten taem we buk blong Revelesen i tokbaot?

¹¹ Traem tingbaot filing blong ol man blong Jehova we oli laef tru long taem ya we God i spolem ol enemi blong hem. !Yes, bambae evriwan i glad tumas! Olgeta long heven tu oli bambae glad taem oli luk we Bigfala Babilon i lus, be i gat wan narafala samting tu we bambae i mekem se oli glad moa. (Rev. 19:1-3) Hemia wan impoten taem we buk blong Revelesen i tokbaot, “hemia mared blong Smol Sipsip.”—Rev. 19:6-9.

12. Folem Revelesen 21:1, 2, ?wetaem Smol Sipsip bambae i mared?

¹² ?Wetaem mared ya bambae i hapen? Smoltaem bifo we faet blong Amagedon i stat, olgeta 144,000 man bambae oli stap finis long heven. Nating se i olsem, hemia i no stret taem yet blong Smol Sipsip i mared. (Ridim Revelesen 21:1, 2.) Smol Sipsip bambae i mared afta we faet blong Amagedon i finis mo God i distroem olgeta enemi blong hem.—Sam 45:3, 4, 13-17.

13. ?Wanem bambae i hapen long mared blong Smol Sipsip?

¹³ ?Wanem bambae i hapen long mared blong Smol Sipsip? Wan mared i joenem man mo woman tugeta. Long sem fasin, long mared blong Smol Sipsip, Jisas Kraes bambae i kam joen wetem “woman” blong hem, hemia ol 144,000 man. Long taem ya nao bambae oli setemap wan niufala gavman we bambae i rulum wol blong 1,000 yia.—Rev. 20:6.

14-15. ?Revelesen japta 21 i tokbaot ol 144,000 se oli olsem wanem? (Yu luk pija long fran pej.)

¹⁴ Biaen, Revelesen japta 21 i talem se ol 144,000 oli olsem naesfala taon ya “Niufala Jerusalem.” (Rev. 21:2, 9) Long fandesen blong taon ya, i gat 12 bigfala ston we oli raetem “12 nem blong ol 12 aposol blong Smol Sipsip long olgeta.” ?From wanem Jon i intres long samting ya? From we hem i luk nem blong hem long wan long ol ston ya. !Yes, hemia wan nambawan privilej!—Rev. 21:10-14; Efes. 2:20.

¹⁵ Taon ya i defren long ol narafala taon. Ol bigrod blong hem oli wokem long gol we i klin gud, ol 12 get blong hem oli wokem long perel, ol wol mo fandesen blong hem oli wokem long ol sas ston, mo ol mesamen blong hem  oli stretgud. (Rev. 21:15-21) !Be Jon i makem se wan samting i no gat! Hem i se: “Mi no luk wan tempol long taon ya, from we Jehova God We i Gat Olgeta Paoa, hem nao i tempol blong hem, mo Smol Sipsip tu i tempol blong hem. Taon ya i no nidim san mo mun blong saen long hem, from we glori blong God i saen i go long hem, mo Smol Sipsip, hem i laet blong taon ya.” (Rev. 21:22, 23) Olgeta we oli pat blong Niufala Jerusalem bambae oli stap wetem Jehova. (Hib. 7:27; Rev. 22:3, 4) Taswe, Jehova mo Jisas nao tufala i tempol blong taon ya.

16. ?Wanem bambae i hapen long ol man long Wan Taosen Yia Rul Blong Kingdom Blong God?

¹⁶ Ol tabu man oli glad tumas taem oli tingbaot taon ya. Be olgeta we oli gat hop blong laef long wol, olgeta tu oli sud intres long samting ya. Long Wan Taosen Yia Rul Blong Kingdom Blong God, Niufala Jerusalem bambae i mekem plante blesing long wol ya. Jon i luk ol blesing ya oli ron olsem ‘wan reva blong wota blong laef.’ Long tufala saed blong reva ya, i gat “ol tri blong laef” we lif blong olgeta “oli blong hilim ol man blong olgeta nesen.” (Rev. 22:1, 2) Olgeta man we oli laef long taem ya, bambae oli gat janis blong haremgud long ol nambawan blesing. Sloslo, olgeta man we oli obei long Jehova, bambae oli kam stretgud olgeta. Bambae i no moa gat sik, man i no moa harem nogud long bodi blong hem, mo bambae man i no moa krae from we hem i harem nogud.—Rev. 21:3-5.

17. Folem Revelesen 20:11-13 ?hu bambae i haremgud long ol blesing long Wan Taosen Yia Rul Blong Kraes?

¹⁷ ?Hu bambae i haremgud long ol nambawan blesing ya? Ol faswan man we bambae oli haremgud long ol blesing ya, hemia bigfala hip blong ol man we oli laef tru long Amagedon mo eni pikinini we i bon long niufala wol. Be Revelesen japta 20 i promes tu se ol dedman bambae oli laef bakegen. (Ridim Revelesen 20:11-13.) “Ol man we oli stret” we oli bin ded bifo, wetem “ol man we oli no stret,” we oli no gat janis blong save Jehova, olgeta evriwan bambae oli laef bakegen long wol ya. (Wok 24:15; Jon 5:28, 29) ?Hemia i min se long Wan Taosen Yia Rul Blong Kraes, evri man bambae oli laef bakegen long wol? Nogat. Ol man we oli save gud se yumi mas wosipim Jehova, be oli sakemaot janis ya we oli  gat blong wosipim hem bifo we oli ded, bambae oli no laef bakegen. Olgeta ya i bin gat janis blong stadi mo save Jehova, be oli soemaot se oli no stret blong laef long Paradaes long wol ya.—Mat. 25:46; 2 Tes. 1:9; Rev. 17:8; 20:15.

18. ?Wol bambae i olsem wanem long en blong 1,000 yia?

¹⁸ Long en blong 1,000 yia, olgeta man we oli laef long wol bambae oli kam stretgud olgeta. Sin ya we Adam i bin pasem, bambae i no moa gat paoa long eni man. (Rom 5:12) Ol nogud samting we oli kamaot from sin blong Adam, bambae oli lus fulwan. Hemia i min se olgeta man long wol bambae oli “kasem laef,” from we evri man bambae oli stretgud olgeta long en blong 1,000 yia.—Rev. 20:5.

19. ?From wanem bambae i gat wan laswan traem?

¹⁹ Yumi save se Jisas i holemstrong long God nating se Setan i traem hem. ?Be bambae olgeta man we oli kam stretgud olgeta oli naf blong holemstrong long Jehova taem Setan i traem olgeta? Ansa blong kwestin ya i dipen long wanwan man taem oli letem Setan i aot long abys long en blong 1,000 yia. (Rev. 20:7) Olgeta we oli holemstrong long Jehova long taem blong laswan traem ya, bambae oli laef olwe mo oli haremgud from we oli fri fulwan. (Rom 8:21) Be olgeta we oli rebel, bambae oli lus blong olwe wetem Devel mo ol dimon blong hem.—Rev. 20:8-10.

20. ?Yu yu harem olsem wanem afta we yumi tokbaot ol profet tok ya long buk blong Revelesen?

²⁰ ?Yu yu harem olsem wanem afta we yu lanem ol samting ya we buk blong revelesen i tokbaot? ?Yu yu glad blong save se yu stap laef long ol taem ya we ol profet tok long buk blong Revelesen i tokbaot? I sua se hemia i pulum yu blong invaetem ol narafala blong oli joen wetem yumi long tru wosip. (Rev. 22:17) Naoia we yumi tokbaot finis ol samting we bambae oli hapen long fiuja, yumi glad tumas mo yumi wantem talem olsem aposol Jon we i se: “!Amen! Masta Jisas, yu kam.”—Rev. 22:20.