1. ?From wanem yumi evriwan i nidim moa waes blong God? (Ol Proveb 4:7)

 SIPOS yu mas mekem wan impoten desisen, i sua se yu prea from waes, from yu save se yu rili nidim. (Jem. 1:5) King Solomon i raetem se: “Waes i impoten moa long ol narafala samting.” (Ridim Ol Proveb 4:7.) I klia se Solomon i no stap tokbaot enikaen waes, be hem i stap tokbaot waes ya we i kam long Jehova God. (Prov. 2:6) ?Be olsem wanem? ?Waes ya we i kam long God i save halpem yumi blong dil wetem ol problem we yumi stap fesem tede? Yes i save givhan long yumi, olsem we bambae yumi luk long stadi ya.

2. ?Yumi save mekem wanem blong kam waes?

² Wan rod blong yumi save kam waes, hemia blong stadi mo folem ol tijing blong tu man we tufala i gat bigfala waes. Fastaem bambae yumi tokbaot Solomon. Baebol i talem se “God i givim waes mo fasin luksave we i bigwan we i bigwan long Solomon.” (1 King 4:29) Biaen, bambae yumi tokbaot Jisas we hem i man ya we i waes bitim olgeta man long wol. (Mat. 12:42) Baebol i tokbaot Jisas se: “Spirit blong Jehova bambae i stap long hem, hemia spirit blong waes mo blong kasemsave samting.”—Aes. 11:2.

3. ?Bambae yumi tokbaot wanem long stadi ya?

³ God i givim bigfala waes long Solomon mo Jisas blong tufala i save givim ol gudfala advaes long yumi long saed blong ol samting we oli impoten. Long stadi ya bambae yumi tokbaot tri advaes, yumi mas gat stret tingting long saed blong mane, wok, mo long yumi wan.

4. ?Olsem wanem laef blong Solomon i defren long Jisas?

⁴ Solomon i rij we i rij mo hem i laef long wan naesfala haos. (1 King 10:7, 14, 15) Be Jisas i no gat tumas samting, mo hem i no gat prapa haos blong hem. (Mat. 8:20) Nating se i olsem, tufala tugeta i gat stret tingting long saed blong ol sas samting, from we waes blong tufala i kam long Jehova God.

5. ?Wanem stret tingting we Solomon i gat long saed blong mane?

⁵ Solomon i talem se mane i save “protektem man.” (Pri. 7:12) Sipos yumi gat mane, yumi save pem ol samting we yumi nidim mo maet sam samting we yumi wantem. Nating se Solomon i rij we i rij, be hem i luksave se i gat sam samting we oli moa impoten i bitim mane. Eksampol, hem i raetem se: ‘I moa gud yu jusum blong gat gudnem i bitim we yu jusum blong gat ol sas samting.’ (Prov. 22:1, fut.) Solomon i talem tu se ol man we oli laekem mane oli no rili glad long wanem we oli gat. (Pri. 5:10, 12) Mo hem i wonem yumi se yumi no mas putum tras blong yumi long mane from we mane i save lus kwiktaem nomo.—Prov. 23:4, 5.

6. ?Wanem stret tingting we Jisas i gat long saed blong ol sas samting? (Matiu 6:31-33)

⁶ Jisas i gat stret tingting long saed blong ol sas samting, mo hem i laekem blong kakae mo dring. (Luk 19:2, 6, 7) Eksampol, faswan merikel we hem i mekem, hem i givim beswan waen. (Jon 2:10, 11) Mo long dei we hem i ded, hem i werem wan sas klos. (Jon 19:23, 24) Be Jisas i no letem ol sas samting ya oli gat paoa long laef blong hem. Hem i talem long ol man blong hem se: “I no gat man we i save kam slef blong tu masta wantaem . . . Yufala i no save kam slef blong God mo long semtaem yufala i slef blong Mane.” (Mat. 6:24) Jisas i talem se sipos yumi lukaot Kingdom fastaem, Jehova bambae meksua se yumi gat samting we yumi nidim.—Ridim Matiu 6:31-33.

7. ?Wan brata we i gat stret tingting long saed blong mane i kasem wanem gudfala samting?

⁷ Plante brata mo sista oli kasem gudfala  samting, taem oli folem waes advaes blong Jehova long saed blong mane. Traem luk eksampol blong Daniel, we i wan singel brata. Hem i se: “Taem mi yangfala, mi mekem desisen se impoten samting long laef blong mi, hemia blong mekem wok blong Jehova.” Daniel i mekem laef blong hem i simpol, taswe hem i yusum taem mo gudhan we hem i gat, blong mekem plante tiokratik wok. Hem i gohed se: “Blong talem stret, mi no rigret nating long desisen we mi mekem. I tru, sipos mane nao i impoten samting long laef blong mi, bambae mi kasem plante mane. Be sipos i olsem, bambae mi no save gat ol gudfala fren we mi gat naoia. Mo bambae mi no kasem glad ya we mi gat naoia long wok blong Jehova. Yes, Jehova i givim bigfala glad long mi i bitim wanem we mane i save mekem.” I klia se yumi kasem plante gudfala samting, taem yumi tingbaot ol samting long saed blong spirit, i bitim we yumi tingbaot mane.

8. ?Olsem wanem yumi save se Solomon i gat stret tingting long saed blong wok? (Prija 5:18, 19)

⁸ Solomon i talem se man i save kasem bigfala glad taem hem i wok had. Hem i luk samting ya olsem wan “presen we i kam long God.” (Ridim Prija 5:18, 19.) Hem i se: “Taem man i wok had long enikaen wok, gudfala samting i kamaot from.” (Prov. 14:23) !Solomon i savegud samting ya from we hem i wan man we i wok had! Hem i bildim ol haos, i planem ol plantesen blong grep, i wokem plante garen mo ol pul blong wota. Mo tu hem i bildim ol taon. (1 King 9:19; Pri. 2:4-6) Hemia ol hadwok ya, mo i sua se oli mekem hem i glad. Be Solomon i no dipen long ol samting ya nomo blong hem i save glad. Hem i mekem sam moa samting. Mo hem i mekem plante samting blong Jehova. Eksampol, hem i lukaot long wok blong bildim naesfala tempol blong wosipim Jehova, we i tekem seven yia blong finisim projek ya. (1 King 6:38; 9:1) Solomon i mekem plante defren wok, be long en, hem i luksave se samting we i moa impoten, hemia blong man i mekem wok blong Jehova. Hem i talem se: “Antap long ol samting ya we yu harem finis, lastok blong mi i olsem: Yu mas fraet long tru God mo yu holemtaet ol komanmen blong hem.”—Pri. 12:13.

9. ?Olsem wanem Jisas i putum wok blong hem i stap long prapa ples blong hem?

⁹ Jisas i wan man we i wok had. Taem hem i yangfala, hem i wok olsem wan kapenta. (Mak 6:3) I sua se ol perens blong hem oli glad long help we hem i givim blong lukaot long nid blong famle. Jisas i stret gud olgeta, taswe wok blong hem i beswan, mo maet plante man bambae oli wantem ol samting we hem i wokem. I tru Jisas i laekem tumas wok we hem i mekem. Be oltaem hem i meksua se hem i gat taem blong mekem wok blong Jehova. (Jon 7:15) Biaen, taem hem i stap mekem wok blong prij, hem i givim advaes long ol man we oli lesin se: “Yufala i mas wok, be i no from kakae we i blong smoltaem nomo. Yufala i mas wok from kakae we i blong stap longtaem, we i save givim laef we i no save finis.” (Jon 6:27) Mo long Bigfala Toktok Blong Jisas Antap Long Hil, hem i talem se: “Yufala i mas hivimap ol gudgudfala samting blong yufala long heven.”—Mat. 6:20.

10. ?Wanem traem we maet samfala oli fesem long ples blong wok?

¹⁰ Taem yumi folem ol waes advaes blong Jehova, bambae yumi gat stret tingting long wok blong yumi. Baebol i talem se ol Kristin oli mas ‘wok had mo mekem ol gudfala wok.’ (Efes. 4:28) Plante taem ol bos  oli luk we yumi tok tru mo yumi wok had, mo maet oli talem se oli tinghae long yumi from wok blong yumi. Hemia i save mekem yumi stat blong wok plante aoa from yumi wantem se bos i gat gudfala tingting long ol Witnes blong Jehova. Be sipos yumi mekem olsem, maet bambae yumi nogat naf taem blong spenem wetem famle blong yumi mo blong mekem wok blong Jehova. Taswe, yumi mas mekem sam jenis blong yumi gat moa taem blong mekem ol samting we oli moa impoten.

11. ?Olsem wanem William i lanem blong gat stret tingting long saed blong wok?

¹¹ William, wan yangfala brata we i bin wok blong wan elda bifo, i luk olsem wanem elda ya i putum wok long prapa ples blong hem. William i talem se: “[Brata ya] i soemaot wan gudfala eksampol blong man we i skelem gud wok blong hem wetem ol narafala samting. Hem i wok had mo hem i fren gud wetem ol man, from we hem i mekem gud wok blong hem. Long en blong dei, hem i no moa tingbaot wok, be hem i tingbaot famle blong hem mo wosip blong hem. !Hem i wan man we i stap glad oltaem!” *

12. ?Olsem wanem Solomon i soemaot se hem i gat stret tingting? ?Olsem wanem hem i lusum stret tingting ya?

¹² Taem Solomon i stap wosipim Jehova yet, hem i gat stret tingting long hem wan. Taem hem i yangfala, hem i gat tingting daon mo i luksave se i gat sam samting we hem i no naf blong mekem, mo i askem Jehova blong i lidim hem. (1 King 3:7-9) Mo taem hem i stat blong rul, hem i luksave se i denja blong kam praod. Hem i se: “Man we i praod, trabol bambae i spolem gud hem, mo man we tingting blong hem i antap tumas, i no longtaem bambae hem i foldaon.” (Prov. 16:18) Sore tumas smoltaem biaen, Solomon i no folem advaes ya. Hem i stat blong kam praod mo hem i no moa obei long ol loa blong God. Eksampol, wan long ol loa ya i talem se wan king i no mas  “gat plante waef, nao oli pulum hat blong hem i gowe” long Jehova. (Dut. 17:17) !Solomon i no obei long loa ya, mo hem i tekem 700 waef mo 300 narafala woman, we plante long olgeta oli wosipim ol giaman god! (1 King 11:1-3) Maet Solomon i ting se “hemia bambae i no spolem hem.” Be biaen, hem i kasem bigfala trabol from we hem i no obei long Jehova.—1 King 11:9-13.

13. ?Yumi lanem wanem long fasin blong Jisas blong gat tingting daon?

¹³ Jisas i gat tingting daon mo i gat stret tingting long hem wan. Bifo we hem i kam long wol, hem i mekem plante nambawan samting long wok blong Jehova. God i yusum Jisas blong mekem “olgeta narafala samting long heven mo long wol.” (Kol. 1:16) Taem Jisas i baptaes, hem i tingbaot olgeta samting we hem i bin mekem taem hem i stap wetem Papa blong hem. (Mat. 3:16; Jon 17:5) Be Jisas i no kam praod taem hem i tingbaot ol samting ya, mo hem i neva mekem olsem se hem i gud moa long ol narafala man. Hem i talem long ol disaepol se, hem “i no kam blong ol man oli mekem minista wok blong givhan long hem, be hem i kam blong mekem minista wok blong givhan long olgeta mo blong givim laef blong hem olsem wan ransom, blong pembak plante man oli go fri.” (Mat. 20:28) Hem i talem tu se, hem i no save mekem wan samting long tingting blong hem nomo. (Jon 5:19) !Jisas i gat tingting daon! Mo hem i soem wan nambawan eksampol blong yumi folem.

14. ?Yumi lanem wanem long toktok blong Jisas blong gat stret tingting long saed blong yumi wan?

¹⁴ Jisas i tijim ol man blong hem blong oli gat stret tingting long olgeta wan. Wan taem, Jisas i talem long olgeta se: “Ol hea long hed blong yufala, hem [God] i kaontem evriwan.” (Mat. 10:30) Tok ya i leftemap tingting blong yumi, speseli sipos yumi stap gat rong tingting long yumi wan. Yumi mas tingbaot se Papa blong yumi long heven i intres bigwan long yumi, mo hem i luk se yumi sas long ae blong hem. Taswe, sipos Jehova i letem blong yumi wosipim hem, mo hem i luk se i stret blong yumi kasem laef olwe, yumi no mas ting se tingting blong hem i no rong.

15. (1) ?Olsem wanem wan Wajtaoa i tokbaot fasin ya blong gat stret tingting long yumi wan? (2) Folem pija long pej 24, sipos yumi tingbaot yumi wan tumas, ?wanem ol blesing we yumi save mestem?

 ¹⁵ Samwe 15 yia i pas, Wajtaoa i talem se yumi mas gat stret tingting long yumi wan, i se: “I nogud yumi tinghae tumas long yumi wan gogo yumi kam flas. Be i nogud tu sipos yumi daonem yumi wan mo yumi ting se yumi nating nomo. Yumi mas gat stret tingting long yumi wan. I min se yumi mas luksave samting we yumi gat gudhan blong mekem, mo samting we yumi no naf blong mekem. Wan Kristin woman i talem olsem: ‘Mi mi no wan woman we i stretgud, be mi no wan woman we i rabis tu. Mi gat gudfala fasin mo slak fasin, sem mak olsem ol narafala man.’” * ?Yu yu makem gudfala samting we i kamaot, taem yumi gat stret tingting long yumi wan?

16. ?From wanem Jehova i givim ol waes advaes long yumi?

¹⁶ Jehova i yusum Baebol blong givim ol waes advaes long yumi. Hem i lavem yumi mo i wantem se yumi hapi. (Aes. 48:17, 18) Beswan samting we i givim trufala glad long yumi, hemia blong mekem ol samting we i mekem Jehova i glad. Taem yumi mekem olsem, bambae yumi blokem plante problem we ol narafala oli stap fesem, from oli tingbaot mane tumas, wok, o olgeta wan. !I gud yumi wanwan i gat strong tingting blong kam waes mo mekem Jehova i glad!—Prov. 23:15.