1. ?Olsem wanem Baebol i diskraebem tru lav?

 “FAEA blong [lav] i olsem bigfala faea, hemia faea blong Jah. Wota we i ron bigwan i no save kilim lav ya i ded, mo ol reva oli no save wasemaot.” b (Sing. 8:6, 7) !Hemia wan naesfala pija tok blong diskraebem tru lav! Ol tok ya oli mekem ol kapol oli sua se: Lav we i stap bitwin olgeta i save stap blong olwe.

2. ?Wan kapol i mas mekem wanem blong lav blong tufala i no kam kolkol?

² Blong lav blong wan kapol i stap strong olwe, tufala i mas traehad. Eksampol, wan faea i save gohed blong laet nomo sipos man i gohed blong putum faea wud long hem, sipos no faea ya bambae i ded. Long sem fasin, lav bitwin wan hasban mo waef i save stap strong nomo, sipos tufala i gohed blong mekem frensip blong tufala i stap strong. Samtaem wan kapol i save harem se lav blong tufala i kam kolkol, speseli sipos tufala i fesem ol trabol long saed blong mane, helt, o tufala i faenem i had blong tijim ol pikinini. Taswe sipos yu yu mared, ?olsem wanem yu save gohed blong mekem “faea blong Jah” i laet insaed long mared blong yu? Long stadi ya, bambae yumi tokbaot tri rod we yu save folem blong mekem frensip blong yutufala i stap strong mo gat wan hapi mared. c

3. Taem wan kapol i fren gud wetem Jehova, ?olsem wanem hemia i save givhan long mared blong tufala? (Prija 4:12) (Yu luk pija tu.)

³ Blong mekem “faea blong Jah” i laet i stap, hasban mo  waef i mas wok had blong mekem frensip blong tufala wetem Jehova i kam strong. ?Olsem wanem hemia i save givhan long mared blong tufala? Taem wan kapol i tinghae long frensip blong tufala wetem Jehova, bambae tufala i folem ol advaes blong hem, mo hemia i save halpem tufala blong blokem o winim ol problem we i save mekem lav blong tufala i kam kolkol. (Ridim Prija 4:12.) Olgeta tu we oli bigman long spirit oli mas mekem bes blong olgeta blong folem ol fasin blong Jehova olsem blong kaen, gat longfala tingting mo fogif. (Efes. 4:32–5:1) Wan kapol we i soemaot ol fasin ya, bambae i isi blong tufala i mekem lav blong tufala i kam strong. Wan sista we nem blong hem Lena, mo we i mared blong bitim 25 yia, i talem se: “I isi blong lavem mo respektem wan man we i bigman long spirit.”

4. ?From wanem Jehova i jusum Josef mo Meri blong kam perens blong fiuja Mesaea?

⁴ Traem tingbaot wan eksampol long Baebol. Taem Jehova i mas jusum wan kapol long laen blong Deved blong i kam perens blong fiuja Mesaea, hem i jusum Josef mo Meri. ?From wanem? From we tufala wanwan i fren gud wetem Jehova, mo Jehova i save se bambae tufala i putum hem fas ples long mared blong tufala. ?Ol kapol, yufala i save lanem wanem long eksampol blong Josef mo Meri?

5. ?Ol hasban oli save lanem wanem long eksampol blong Josef?

⁵ Josef i folem gud ol daereksen blong Jehova mo hemia i mekem se hem i kam wan gudfala hasban. Long tri defren taem, hem i kasem instraksen long God long saed blong famle blong hem. Long trifala taem ya, hem i obei nating se hem i mas mekem sam bigfala jenis. (Mat. 1:20, 24; 2:13-15, 19-21) Taem Josef i folem ol daereksen blong God, hem i protektem Meri, i sapotem hem, mo i lukaot gud long hem. !I sua se ol aksen blong Josef i mekem se Meri i lavem mo i respektem hem moa! Ol hasban, yufala i save folem eksampol blong Josef, taem yufala i folem ol advaes blong Baebol blong lukaot gud long famle blong yufala. d Taem yufala i folem advaes ya nating se i yufala i mas mekem sam bigfala jenis, yufala i soemaot se yufala i lavem ol waef blong yufala mo yufala i mekem mared blong yufala i kam strong. Wan sista long Vanuatu we i mared bitim 20 yia, i talem se: “Taem hasban blong mi i lukaot ol advaes blong Jehova, mi respektem hem moa, mi haremsave se mi sef, mo mi trastem ol desisen blong hem.”

6. ?Ol waef oli save lanem wanem long eksampol blong Meri?

⁶ Meri i fren gud wetem Jehova mo hem i no dipen long Josef blong i mekem bilif blong hem i strong. Mo tu, hem i tekem taem blong tingting dip long ol samting we hem i lanem. (Luk 2:19, 51) I sua se Meri i fren gud  wetem Jehova mo hemia i mekem se hem i kam wan gudfala waef. Tede plante waef oli traehad blong mekem olsem Meri. Eksampol, wan sista we nem blong hem Emiko, i talem se: “Taem mi singel mi gat wan gudfala program blong stadi mi wan. Be afta we mi mared, hasban blong mi i prea long bihaf blong mifala mo i lidim famle wosip. Taswe mi makem se mi stap dipen nomo long hem. Mo mi luksave se mi wan mi mas gohed blong fren gud wetem Jehova. Ale naoia mi makemaot taem blong mi save spenem blong prea Jehova, ridim Baebol, mo tingting dip long tok blong hem.” (Gal. 6:5) Ol waef, taem yufala i gohed blong mekem frensip blong yufala wetem Jehova i kam strong, ol hasban blong yufala bambae i gat plante moa risen blong leftemap yufala mo lavem yufala.—Prov. 31:30.

7. ?Ol kapol oli save lanem wanem long stori blong Josef mo Meri blong wosipim Jehova tugeta?

⁷ Josef mo Meri i wok had tugeta blong mekem frensip blong tufala wetem Jehova i kam strong. Tufala i kasemsave se i impoten blong wosipim Jehova tugeta olsem wan famle. (Luk 2:22-24, 41; 4:16) Be maet i had blong mekem olsem speseli sipos tufala i gat plante pikinini, be tufala i naf blong mekem. !Hemia i wan gudfala eksampol long ol kapol tede! Olsem Josef mo Meri, sipos yu gat ol pikinini, maet i had blong go long ol miting o makemaot taem blong famle wosip. Mo tu, maet i had moa blong yutufala i faenem taem blong stadi mo prea tugeta. Be tingbaot se taem yutufala i wosipim Jehova tugeta, yutufala i kam klosap moa long hem mo long yutufala. Taswe i gud blong putum wosip blong Jehova fasples.

8. ?Wan kapol we i gat problem long mared i save mekem wanem blong laekem moa famle wosip?

⁸ Sipos yutufala i gat problem long mared, maet hemia i save mekem i had blong yutufala i mekem famle wosip tugeta. ?Long taem olsem yutufala i save mekem wanem? Maet i gud yutufala i tokbaot wan sot topik we yutufala i laekem, mo we yutufala i agri blong tokbaot. Hemia i save givhan long yutufala blong lavlavem yutufala, mo pulum yutufala blong wantem wosipim Jehova tugeta.

9. ?From wanem wan hasban mo waef i mas spenem taem tugeta?

⁹ Ol kapol, yufala i save gohed blong lavlavem yufala, taem yufala i spenem taem tugeta. Taem yu mekem olsem, hemia bambae i halpem yu blong save gud ol tingting mo filing blong hasban o waef blong yu. (Jen. 2:24) Makem samting we Lilia mo Ruslan i faenemaot afta we tufala i bin mared bitim 15 yia. Lilia i talem se: “Mitufala i luksave se bambae mitufala i no gat naf taem blong spenem tugeta olsem we mitufala i bin tingbaot. Mitufala i bisi long wok, ol wok long haos, mo biaen long ol pikinini. Mitufala i luksave se sipos mitufala i no makemaot taem blong spenem tugeta, sloslo bambae mitufala i no moa fren gud.”

10. ?Olsem wanem ol kapol oli save folem advaes ya long Efesas 5:15, 16?

¹⁰ ?Ol kapol oli save mekem wanem blong oli gat taem blong spenem tugeta? Yufala i mas makemaot taem o mekem wan program blong yufala i save spenem taem tugeta. (Ridim Efesas 5:15, 16.) Wan brata blong Nigeria we nem blong hem Uzondu, i talem se: “Taem mi mekem program blong ol wok blong mi, mi inkludum taem we mi mo waef blong mi i save sapenem tugeta mo mi meksua se mi folem program ya.” (Fil. 1:10) Traem tingbaot olsem wanem Anastasia, waef blong wan eria elda long Moldova, i yusum gud taem blong hem. Hem i talem se: “Mi traem blong mekem ol wok we mi mas mekem long taem we hasban  blong mi i bisi long ol narafala wok blong hem. Olsem nao, biaen mitufala i save spenem taem tugeta.” ?Be olsem wanem sipos program blong yutufala i mekem i had blong yutufala i faenem taem blong spenem tugeta?

11. ?Wanem ol wok we Akwila mo Prisila i joen tugeta blong mekem?

¹¹ Ol kapol oli save lanem samting long eksampol blong Akwila mo Prisila, we plante Kristin bifo oli lavem tufala. (Rom 16:3, 4) Nating se Baebol i no tokbaot plante samting long saed blong mared blong tufala, be hem i soemaot se tufala i joen tugeta long wok prij mo halpem ol narafala. (Wok 18:2, 3, 24-26) Taem Baebol i tokbaot Akwila mo Prisila, plante taem hem i tokbaot tufala tugeta.

12. ?Wan hasban mo waef i save mekem wanem blong spenem moa taem tugeta? (Yu luk pija tu.)

¹² ?Olsem wanem ol kapol oli save folem eksampol blong Akwila mo Prisila? Tingbaot ol wok we yu mo hasban blong yu i mas mekem. ?Olsem wanem? ?Yutufala i save joen tugeta blong mekem ol wok ya i bitim we wan nomo i mekem hem wan? Eksampol, Akwila mo Prisila i prij tugeta. ?Yutufala i plan blong mekem sem mak? Akwila mo Prisila i wok tugeta. Maet yu mo hasban o waef blong yu i no mekem sem wok, ?be yutufala i save joen tugeta blong mekem ol wok long haos? (Pri. 4:9) Taem yutufala i givgivhan long yutufala blong mekem wan wok, yutufala i save harem se yutufala i olsem wan tim mo yutufala i gat janis blong storian. Robert mo Linda i bin mared blong bitim 50 yia. Robert i talem se: “Blong talem stret, mitufala i no gat plante taem blong spenem tugeta blong spel mo pleplei. Be taem mi wasem ol plet mo waef blong mi i kam waepem olgeta, o taem mi klinim garen mo hem i kam givhan long mi, mi harem gud tumas. Taem mitufala i mekem ol samting tugeta, mitufala i joen gud moa, mo lav we mitufala i gat long mitufala i kam strong moa.”

13. Blong wan hasban mo waef i rili joen gud, ?tufala i mas mekem wanem?

¹³ Plis tingbaot se nomata we wan hasban mo waef i stap tugeta oltaem, hemia i no min se tufala i fren gud tugeta. Wan waef long Brazil i talem se: “Tede laef blong yumi i bisi tumas, i mekem se i isi nomo blong yumi gat tingting ya se yumi stap tugeta from yumi stap long wan haos nomo. Mi lanem se yumi mas mekem moa samting i bitim we yumi jes stap tugeta nomo. Mo mi lanem tu se mi mas givim samting we hasban blong mi i nidim.” Makem olsem wanem Bruno mo waef blong hem Tays, i meksua se tufala i givim samting we wanwan long tufala i nidim. Bruno i talem se: “Long ol fri taem blong mitufala, mitufala i lego ol fon blong mitufala mo mitufala i enjoem taem we mitufala i gat tugeta.”

14. Sipos wan kapol i no glad blong spenem taem tugeta ?tufala i save mekem wanem?

¹⁴ ?Be olsem wanem sipos yu mo hasban o waef blong yu i no glad blong spenem taem  tugeta? Maet hemia from we yutufala i no intres long sem samting, o maet wanwan long yutufala i mekem narawan i kros. ?Long taem olsem yutufala i save mekem wanem? Tingbaot pijatok blong faea we yumi bin tokbaot long stat. Hem i no laet bigwan wantaem nomo taem man i jes laetem, man i mas gohed sloslo blong putum faea wud long hem. Long sem fasin, i gud yutufala i stat blong spenem smol taem tugeta evri dei. Long taem olsem, yutufala i save mekem samting we yutufala tugeta i laekem, be i no samting we i save mekem rao i kamaot. (Jem. 3:18) Sipos yutufala i mekem olsem, yutufala i save gohed blong mekem lav blong yutufala i kam strong bakegen.

15. ?From wanem i impoten we hasban mo waef i respektem tufala?

¹⁵ Respek i impoten long mared. Hem i olsem oksijen we i mekem faea i laet bigwan. Sipos i no gat oksijen, kwiktaem nomo faea ya bambae i ded. Long sem fasin, sipos i no gat respek, lav we wan kapol i gat i save kam kolkol. Be sipos wan hasban mo waef i traehad blong soemaot respek long tufala, tufala i save mekem se lav blong tufala i save stap strong. Be yu mas tingbaot se i no yu we yu harem se yu soemaot respek, be hasban o waef blong yu nao i mas haremsave se yu respektem hem. Penny mo Aret i bin mared blong bitim 25 yia finis. Penny i talem se: “From we mitufala i respektem mitufala, mitufala i haremsave se i gat lav long haos. Mitufala i fri blong talemaot ol tingting blong mitufala from mitufala i save se narawan i tinghae long tingting blong narawan.” Taswe, ?yu save mekem wanem blong hasban o waef blong yu i haremsave se yu rili respektem hem? Tingbaot eksampol blong Ebraham mo Sera.

16. ?Ol hasban oli save lanem wanem long eksampol blong Ebraham? (1 Pita 3:7) (Yu luk pija tu.)

¹⁶ Ebraham i tritim Sera wetem respek. Hem i lesin gud taem Sera i talemaot ol tingting blong hem mo hem i respektem ol filing blong hem. Wan taem, Sera i harem nogud tumas, mo hem i talemaot filing blong hem long Ebraham, antap long hemia hem i blemem Ebraham from problem ya. ?Long taem ya Ebraham i kros mo i talem ol tok we i no kaen? Nogat. Hem i save se Sera i tingbaot hem olsem hed blong famle, mo se i respektem ol desisen blong hem. Ebraham lesen gud long ol tingting blong Sera mo i traem blong stretem problem ya. (Jen. 16:5, 6) ?Yumi lanem wanem? Ol hasban, yufala i gat otoriti ya blong mekem ol desisen long famle. (1 Kor. 11:3) Be yet, i gud we yufala i askem tingting blong ol waef blong yufala, bifo we yufala i mekem ol desisen, speseli sipos desisen ya bambae i afektem hem. (1 Kor. 13:4, 5) Sam samtaem, maet waef blong yufala i wari mo i wantem talemaot ol filing blong hem. Long taem olsem, ?yufala i respektem ol filing blong hem mo lesin  gud long hem? (Ridim 1 Pita 3:7.) Angela mo Dmitry i bin mared blong klosap 30 yia. Angela i eksplenem olsem wanem hasban blong hem i mekem hem i haremsave se hem i respektem hem. Hem i talem se: “Oltaem Dmitry i rere blong lesin long mi taem mi harem nogud o mi wantem toktok. Hem i gat longfala tingting long mi nating se mi no toktok kaen.”

17. ?Ol waef oli save lanem wanem long eksampol blong Sera? (1 Pita 3:5, 6)

¹⁷ Sera i respektem Ebraham taem i sapotem ol desisen blong hem. (Jen. 12:5) Wan taem, Ebraham i wantem invaetem sam visita we oli no ekspektem olgeta. Ale hem askem long Sera blong i stop blong mekem samting we hem i stap mekem mo i go miksim sam bred mo kukum. (Jen. 18:6) Kwiktaem nomo Sera i lego wok blong hem mo i mekem samting we Ebraham i askem. Ol waef, yufala i save folem eksampol blong Sera taem yufala i sapotem ol desisen blong ol hasban blong yufala. Taem yufala i mekem olsem, yufala i stap mekem mared blong yufala i stap strong. (Ridim 1 Pita 3:5, 6.) Dmitry we yumi tokbaot hem finis, i eksplenem olsem wanem waef blong hem i mekem hem i haremsave se hem i respektem hem. Hem i talem se: “Mi mi glad tumas long traehad we Angela i mekem blong sapotem ol desisen blong mi, nating se sipos hem i no agri long desisen ya. Mo sipos ol samting oli no rongud hem i no daonem mi. !Yes i isi blong lavem wan man we i respektem yu!

18. ?Wanem i save kamaot taem wan kapol i gohed blong mekem lav blong tufala i stap strong?

¹⁸ Tede, Setan i wantem se ol Kristin kapol oli stop blong lavlavem olgeta. Hem i save se sipos wan kapol i no moa lavlavem tufala, bambae tufala i stat blong gowe long Jehova. !Be tru lav i no save lus samtaem! Taswe i gud yu mekem lav insaed long mared blong yu i kam olsem lav ya we Sing Blong Solomon i tokbaot. Yu mas gat strong tingting blong putum Jehova fasples long mared blong yu, makemaot taem blong spenem tugeta, respektem filing blong narawan, mo givim samting we hem i nidim. Sipos yu mekem olsem, mared blong yu bambae i givim ona long Jehova we i stamba blong tru lav, mo olsem wan faea we i laet strong, lav blong yutufala bambae i stap strong mo i no save lus samtaem.