1. ?Plante long yumi oli faenem i had blong mekem wanem?

 ?YU BIN putum sam mak long saed blong spirit mo yu faenem i had blong kasem? b Sipos i olsem, i no yu wan nomo. Eksampol, Philip i wantem kam gud moa long fasin ya blong prea oltaem, be i had blong hem i faenem taem blong prea. Erika i putum mak ya blong go long ol miting blong prij long stret taem, be hem i stil kam let long ol miting. Tomáš i traem plante taem blong ridim ful Baebol. Hem i se: “Mi no glad long Baebol riding blong mi. Mi traehad tri taem, be oltaem mi stop nomo long Levitikas.”

2. ?From wanem tingting blong yumi i no mas foldaon sipos yumi putum wan mak be yumi no kasem yet?

² Sipos yu jes putum wan mak we yu no kasem yet, plis yu no letem tingting blong yu i foldaon. Samtaem, blong kasem wan smol mak we yumi putum, hemia tu i nidim taem mo traehad. Taem yu stap traehad blong kasem mak blong yu, hemia i soemaot se yu tinghae long frensip blong yu wetem Jehova, mo yu wantem mekem bes blong yu long wok blong hem. Jehova i tinghae long traehad blong yu, mo hem i no ekspektem blong yu mekem moa long wanem yu no naf blong mekem. (Sam 103:14; Maeka 6:8) Taem yu putum wan mak, meksua se yu save kasem. Afta we yu putum wan mak, ?yu save mekem wanem blong kasem? Bambae yumi luk sam samting we i save givhan long yumi.

3. ?From wanem strong tingting i impoten?

³ I rili impoten blong gat strong tingting blong yu save kasem  mak blong yu. Wan man we i gat strong tingting i wantem tumas blong kasem mak blong hem. Yumi save talem se strong tingting i olsem win we i stap pusum wan seling bot i go long ples we hem i wantem go long hem. Sipos win i stap gohed blong blu, man ya blong seling bot bambae i kasem ples we hem i wantem go long hem, mo sipos i gat strong win bambae hem i kasem ples ya kwiktaem. Long sem fasin, taem yumi gat strong tingting bambae yumi naf blong kasem mak blong yumi. David, wan brata long El Salvador, i talem se: “Taem yu gat strong tingting bambae yu traehad moa. Yu no letem eni samting i stopem yu blong kasem mak blong yu.” ?Be yu save mekem wanem blong gat strong tingting?

4. ?Yumi save prea from wanem? (Filipae 2:13) (Yu luk pija tu.)

⁴ Prea blong gat strong tingting. Jehova i save yusum tabu spirit blong hem, blong mekem yu gat strong tingting blong kasem mak blong yu. (Ridim Filipae 2:13.) Samtaem yumi putum wan mak from yumi save se yumi mas mekem, mo hemia i wan gudfala samting. Be maet yumi no rili wantem traehad blong kasem. Hemia nao samting we i hapen long wan sista long Uganda we nem blong hem Norina. Hem i putum mak blong statem wan Baebol stadi, be hem i no gat strong tingting from we hem i ting se hem i no wan gudfala tija. ?Wanem i halpem hem? Hem i talem se: “Evri dei mi stat blong askem strong long Jehova blong i givim strong tingting long mi blong statem wan Baebol stadi. Mo long sem taem, mi traehad blong kam gud moa long fasin blong mi blong tij. Afta long sam manis, mi luksave se tingting blong mi i kam strong moa blong mekem Baebol stadi. Mo long sem yia ya, mi statem tu Baebol stadi.”

5. ?Yumi save mekem wanem blong gat strong tingting?

⁵ Tingting dip long samting we Jehova i bin mekem blong yu. (Sam 143:5) Aposol Pol i tingting dip long fasin blong Jehova blong kaen long hem, mo hemia i mekem se hem i gat strong tingting blong traehad long wok blong Jehova. (1 Kor. 15:9, 10; 1 Tim. 1:12-14) Long sem fasin, taem yu tingting dip long samting we Jehova i mekem blong yu, hemia bambae i givim strong tingting long yu blong kasem mak blong yu. (Sam 116:12) Traem tingbaot samting we i halpem wan sista long Honduras blong kasem mak ya blong kam wan fultaem paenia. Hem i talem se: “Mi tingbaot olsem wanem Jehova i lavem mi. Hem i halpem mi blong faenem ol man blong hem. Hem i kea long mi mo i protektem mi. Taem mi tingbaot ol samting ya, mi lavem Jehova moa, mo mi gat strong tingting blong mi stat paenia.”

6. ?Wanem moa i save halpem yumi blong gat strong tingting?

⁶ Tingbaot ol blesing we bambae yu kasem taem yu kasem mak blong yu. Tingbaot wanem i halpem Erika we yumi tokbaot hem finis, blong i kasem mak blong hem blong kam long stret taem. Hem i talem se: “Mi luksave se taem mi kam let long miting blong prij, mi mestem plante gudfala samting. Be taem mi  kam eli, mi save talem halo long ol brata mo sista, mo spenem taem wetem olgeta. Mo tu, mi save lesin long ol gudfala tingting we i save halpem mi blong stap glad, mo kam gud moa long wok blong prij.” Taem Erika i tingbaot gudfala samting ya, hemia i halpem hem blong kasem mak blong hem. ?Wanem ol blesing we yu mas tingbaot? Sipos mak blong yu hemia blong kam gud moa long Baebol riding o prea, tingbaot olsem wanem samting ya i save mekem frensip blong yu wetem Jehova i kam strong moa. (Sam 145:18, 19) Sipos mak blong yu i blong wokem wan Kristin fasin, tingbaot olsem wanem hemia i save mekem se yu fren gud moa wetem ol narafala. (Kol. 3:14) I gud yu mekem wan lis blong ol risen from wanem yu wantem kasem mak blong yu. Wanwan taem i gud yu jekem lis ya. Tomáš, we yumi tokbaot hem finis, i talem se: “Taem mi gat moa risen blong kasem wan mak, bambae mi traehad moa blong kasem.”

7. ?Wanem i halpem Julio mo waef blong hem blong kasem mak blong tufala?

⁷ Spenem taem wetem ol man we bambae oli givhan long yu blong kasem mak blong yu. (Prov. 13:20) Tingbaot samting we i halpem Julio mo waef blong hem blong kasem mak blong tufala blong mekem moa long wok blong prij. Julio i talem se: “Mitufala i jusum ol fren we oli leftemap tingting blong mitufala blong kasem mak blong mitufala mo mitufala i tokbaot mak blong mitufala long olgeta. Plante long olgeta oli bin kasem finis ol semfala mak ya, taswe oli naf blong givim ol gudfala tingting. Mo tu, oli askem mitufala sipos ol plan blong mitufala i stap gohed gud, mo oli lefte-map tingting taem mitufala i nidim.”

8. ?Wanem i save hapen sipos yumi traehad blong kasem mak blong yumi long taem ya nomo we yumi gat strong tingting? (Yu luk pija tu.)

⁸ I tru, i gat sam taem we yumi harem se yumi no gat strong tingting. ?Be hemia i min se yumi no save wok had blong kasem mak blong yumi? Nogat. Tingbaot eksampol ya: Wan strong win i save pusum wan seling bot i go long ples we hem i wantem go long hem. Nating se i olsem, win i save jenis, samtaem i gat strong win mo samtaem i no gat win nating. ?Be hemia i min se bot ya i no save muv nating? Si i save muv. Sam seling bot oli gat enjin mo sam narafala oli gat parel. Wan sela i save yusum wan long tufala samting ya blong gohed blong travel i go long ples we hem i wantem. Strong tingting blong yumi i olsem win, samtaem yumi save gat strong tingting be samtaem nogat. Sipos yumi traehad blong kasem mak blong yumi nomo long taem we yumi gat strong tingting, bambae yumi neva kasem. Olsem wan sela we i yusum ol defren rod blong kasem ples we hem i wantem, yumi tu yumi save wok had blong kasem mak blong yumi, nating se yumi no gat strong tingting. I tru se hemia i no isi, be bambae yu glad taem yu kasem mak blong yu. Bifo yumi tokbaot samting we yumi save mekem, i gud yumi tokbaot wan kwestin we maet plante long yumi i gat.

9. Sipos yumi no gat strong tingting, ?bambae yumi gohed nomo blong traehad blong kasem mak blong yumi? Yu eksplenem.

 ⁹ Jehova i wantem se yumi glad nomo blong mekem wok blong hem mo yumi hapi. (Sam 100:2; 2 Kor. 9:7) Sipos yumi no gat strong tingting ?bambae yumi gohed nomo blong traehad blong kasem mak blong yumi? Tingbaot eksampol blong aposol Pol. Hem i se: “Mi kilim bodi blong mi mo mi fosem hem olsem wan slef.” (1 Kor. 9:25-27) Pol i fosem hem wan blong mekem samting we i stret, nating se hem i no wantem mekem. ?Olsem wanem? ?Jehova i glad long samting we Pol i mekem? !Yes! Mo Jehova i blesem hem from ol traehad blong hem.—2 Tim. 4:7, 8.

10. ?Wanem i save kamaot taem yumi traehad blong kasem wan mak nating se yumi no gat strong tingting?

¹⁰ Long sem fasin, Jehova i glad taem hem i luk se yumi traehad blong kasem mak blong yumi, nating se yumi no gat strong tingting. Nomata se yumi no glad blong mekem wan wok, be Jehova i glad from we hem i save se yumi mekem wok ya from yumi lavem hem. Jehova bambae i blesem ol traehad blong yumi olsem we hem i blesem aposol Pol. (Sam 126:5) Taem yumi luk we Jehova i blesem yumi, bambae yumi stat blong gat strong tingting. Wan sista long Polan we nem blong hem Lucyna, i talem se: “Samtaem, mi no wantem go prij, speseli taem mi taed. Nating se i olsem, afta we mi kambak long wok blong prij mi glad tumas, mo hemia i wan nambawan samting.” Taswe naoia, bambae yumi luk samting we yumi save mekem, taem yumi no gat strong tingting.

11. ?Olsem wanem Jehova i save halpem yumi blong bos long tingting?

¹¹ Prea blong yu save bos long tingting. Bos long tingting i save halpem man blong i kontrolem ol filing mo aksen blong hem. Plante taem tok ya i givim tingting ya se man i blokem hem wan blong i no mekem samting we i no stret. Be strong tingting i save givhan long yumi blong mekem samting we i gud, speseli sipos yumi mekem wan wok we i had, o yumi no gat strong tingting blong mekem. Tingbaot se bos long tingting i wan long ol frut blong tabu spirit, taswe i gud yu askem Jehova blong i givim tabu spirit long yu, blong yu save wokem impoten fasin ya. (Luk 11:13; Gal. 5:22, 23) David we yumi tokbaot hem finis, i tokbaot olsem wanem prea i givhan long hem. Hem i wantem tumas blong gohed long pesnel stadi blong hem. Hem i talem se: “Mi askem long Jehova blong i halpem mi blong mi wokem fasin ya blong bos long tingting. Mo wetem help blong hem, mi naf blong statem wan gudfala program blong stadi mo mi folem oltaem.”

12. ?Olsem wanem Prija 11:4 i save halpem yumi blong kasem mak blong yumi?

¹² Yu no mas wet se evri samting i stret. Long rabis wol ya, bambae i neva gat wan taem we evri samting i stret. Sipos yumi stap wet long wan taem olsem, bambae yumi neva kasem mak blong yumi. (Ridim Prija 11:4.) Wan brata we nem blong hem Dayniel, i talem se: “I neva gat wan taem we evri samting i stret gud. Taswe yumi no mas wet long wan stret taem, be yumi stat nomo.” Wan brata long Uganda we nem blong hem Paul, i tokbaot wan narafala risen from wanem yumi no mas letem wok i stap fastaem blong mekem biaen, hem i se: “Taem yumi statem wan wok, nating se i had, Jehova i save halpem yumi.”—Mal. 3:10.

13. ?From wanem i gud blong stat wetem ol smosmol mak?

¹³ Yu stat smol. Maet samtaem yumi no gat strong tingting from we mak we yumi putum i had tumas blong kasem. Sipos hemia nao situesen blong yu, i gud yu seraotem mak blong yu i go long ol smosmol haf. Sipos mak blong yu hemia blong wokem wan gudfala fasin, maet yu save stat blong mekem sam smosmol  samting we i pulum yu blong soemaot fasin ya. Sipos mak blong yu hemia blong ridim ful Baebol, yu save stat taem yu tekem smoltaem blong ridim Baebol. Tomáš we yumi tokbaot hem finis long stat, i faenem i had blong kasem mak ya blong ridim Baebol long wan yia. Hem i talem se: “Mi luksave se mi putum wan mak we i bigwan tumas. So mi disaed blong traem bakegen, be naoia mi plan blong ridim sam vas nomo evri dei mo tingting dip long olgeta. Samting we i kamaot from, hemia se naoia mi stat blong laekem moa blong rid.” Taem Tomáš’ i laekem moa long ridim Baebol, hem i stat blong rid longtaem moa. Mo biaen hem i ridim ful Baebol. c

14. ?Wanem sam samting we i save mekem i had blong yumi kasem mak blong yumi?

¹⁴ Blong talem stret, nating se yumi gat strong tingting o yumi naf blong bos long tingting, be i save gat sam samting i hapen nao i mekem se yumi no kasem mak blong yumi. Eksampol, “samting we i hapen we man i no tingbaot” i save blokem yumi mo yumi no moa gat taem blong traehad blong kasem mak blong yumi. (Pri. 9:11) Maet yumi fesem wan hadtaem we i mekem tingting blong yumi i foldaon mo yumi harem se yumi no moa gat paoa. (Pro. 24:10) From we yumi sinman, yumi save mekem sam mastik we i mekem i had blong yumi kasem mak blong yumi. (Rom 7:23) O maet yumi harem se yumi taed. (Mat. 26:43) ?Wanem i save halpem yumi blong winim ol samting we oli traem blokem yumi blong kasem mak blong yumi?

15. ?From wanem yu no mas givap sipos wan samting i blokem yu blong kasem mak blong yu? Yu eksplenem. (Ol Sam 145:14)

¹⁵ Tingbaot se sipos wan samting i hapen we i blokem yu blong kasem mak blong yu, hemia i no min se bambae yu stop blong traehad. Baebol i talem se bambae yumi gohed blong kasem ol problem mo ol hadtaem. Be hem i talem tu se wetem help blong Jehova, yumi save kasem mak blong yumi. (Ridim Ol Sam 145:14.) Brata  ya Philip we yumi tokbaot hem finis, i talem se: “Mi no stap kaontem hamas taem mi no kasem mak blong mi. Be mi tingbaot moa ol taem ya we mi traehad bakegen blong kasem mak blong mi.” David we yumi tokbaot hem finis, i talem se: “Taem wan samting i hapen we i blokem mi blong kasem mak blong mi, mi no letem ol samting ya oli stopem mi, be mi luk olgeta olsem wanem janis blong soemaot long Jehova se mi lavem hem.” Yes, taem yu gohed blong traehad blong kasem mak blong yu nating se yu fesem ol hadtaem, yu stap pruvum long Jehova se yu wantem mekem hem i glad. !I sua se Jehova i glad tumas taem hem i luk we yu gohed blong traehad blong kasem mak blong yu!

16. ?Yu save lanem wanem long ol samting we i blokem yu blong kasem mak blong yu?

¹⁶ Lanem lesen long samting we i blokem yu blong kasem mak blong yu. I gud blong tingbaot from wanem samting ya i hapen, mo askem yu wan se: ‘?Mi save mekem wanem blong samting ya i no hapen bakegen?’ (Prov. 27:12) Samtaem sipos yu luk se i had blong kasem mak blong yu, hemia i soem se mak we yu putum i no stret long yu. Sipos hemia situesen blong yu, i gud yu jekem bakegen mak ya, mo luk sipos i stret yet long yu. d Jehova bambae i neva luklukdaon long yu, sipos yu no kasem mak ya we i had tumas blong kasem.—2 Kor. 8:12.

17. ?From wanem oltaem yumi mas tingbaot ol mak we yumi kasem finis?

¹⁷ Tingbaot oltaem mak we yu kasem finis. Baebol i talem se: “Oltaem God i stap mekem i stret nomo. Hem i no save fogetem ol wok ya we yufala i mekem.” (Hib. 6:10) Taswe, yu tu yu no mas fogetem ol mak ya we yu kasem finis. Traem tingbaot ol mak we yu kasem finis, olsem yu fren gud wetem Jehova, yu tokbaot hem long ol narafala, o yu tekem baptaes. Yu yu bin wok had from ol mak ya mo yu kasem olgeta finis, taswe i gud yu gohed blong wok had from niufala mak ya we yu putum.—Fil. 3:16.

18. ?Yu mas tingbaot wanem taem yu stap wok had blong kasem mak blong yu? (Yu luk pija tu.)

¹⁸ Wetem help blong Jehova, yu save kasem mak blong yu, sem mak olsem wan sela we i glad tumas taem hem i kasem ples we hem i wantem go long hem. Be tingbaot tu se plante sela oli enjoem trip blong olgeta. Long sem fasin, taem yu stap traehad blong kasem mak blong yu, i gud yu luk olsem wanem Jehova i halpem mo i blesem yu. (2 Kor. 4:7) Sipos yu no givap, bambae yu kasem plante blesing.—Gal. 6:9.