1. ?Plante long yumi ol man blong Jehova, yumi harem olsem wanem?

APOSOL POL i talem se: “!Mi mi no glad nating!” (Rom 7:24) Tede, plante long yumi ol man blong God, yumi harem nogud olsem Pol mo tingting blong yumi i foldaon. ?From wanem? From we yumi wantem mekem Jehova i glad, be yumi stap mestem plante taem. Maet yumi harem nogud taem yumi mekem samting we Jehova i no glad long hem. Sam Kristin we oli mekem bigfala sin, oli ting se Jehova i no save fogivim olgeta.

2. (1) ?Olsem wanem Ol Sam 34:22 i soemaot se ol man blong God oli no nid blong sem? (2) ?Bambae yumi lanem wanem long stadi ya? (Yu luk bokis ya  “?I Tijim Wan Lesen No i Pija Blong Wan Samting?”)

² Baebol i talem se sipos yumi go haed long Jehova, yumi no nid blong sem long fes blong hem. (Ridim Ol Sam 34:22.) ?I minim wanem se yumi go haed long Jehova? ?Yumi mas mekem wanem sipos yumi wantem se Jehova i sore long yumi mo i fogivim yumi? Blong ansa long tufala kwestin ya, yumi mas kasem save fastaem long ol taon blong haed long Isrel bifo. Oli joen wetem Loa blong Moses, we wan narafala samting i tekem ples blong hem long lafet blong Pentekos long  yia 33. Loa ya i kamaot long Jehova, taswe sipos yumi stadi long ol taon blong haed, bambae yumi kasem save tingting blong Jehova long sin, long ol man we oli mekem bigfala sin, mo long olgeta we oli tanem tingting. Be fastaem, i gud yumi faenemaot from wanem i gat ol taon blong haed long Isrel, mo wanem wok blong olgeta.

3. ?Ol man Isrel oli mas mekem wanem long man we i kilim narafala i ded?

³ Jehova i tinghevi long laef blong man. Taswe, long Isrel bifo, sipos wan man i kilim narafala i ded, wan famle blong dedman ya i save kilim man ya i ded. (Namba 35:19) Long fasin ya, man ya i givim laef blong hem blong pemaot laef blong dedman ya. Sipos oli no kilim hem i ded kwiktaem, Promes Lan i no moa tabu, be bambae i kam doti long fes blong God. Jehova i talem se: ‘Sipos yufala i letem man olsem i go fri, bambae yufala i mekem ples ya i kam doti long fes blong mi,’ from we man ya i mekem blad blong narafala i ron, i tekemaot laef blong hem.—Namba 35:33, 34.

4. ?Olsem wanem sipos wan man Isrel i no minim blong kilim narafala i ded?

⁴ ?Olsem wanem sipos wan man Isrel i no minim blong kilim narafala i ded? I tru se i wan aksiden, be hem i tekemaot laef blong wan man yet. (Jenesis 9:5) Nating se i olsem, Jehova i talem se i no nid blong hem i ded. Hem i save ronwe i go long wan long ol sikis taon blong haed, bifo we famle blong dedman ya i kasem hem. Mo blong stap sef, hem i mas stap long taon ya oltaem gogo kasem we hae pris i ded.—Namba 35:15, 28.

5. ?From wanem ol taon blong haed oli givhan long yumi, blong yumi kasem save moa long Jehova?

⁵ Tingting ya long saed blong ol taon blong haed i no kamaot long man, be i kamaot long Jehova. Hem nao i talem long Josua mo ol man Isrel se: “Yufala i mas jusumaot ol taon blong haed.” (Josua 20:1, 2, 7, 8) Jehova i jusumaot ol taon ya from wan spesel risen. Taswe oli tijim yumi long plante samting long saed blong hem. Wan samting se, yumi kasem save moa long fasin sore blong hem. Mo tu, oli tijim yumi olsem wanem blong go haed long hem.

6, 7. (1) ?Ol elda oli mekem wanem long man ya we i no minim blong kilim narafala i ded? (Yu luk pija long stat blong stadi.) (2) ?From wanem man ya i mas go luk ol elda?

⁶ Sipos wan man Isrel i no minim blong kilim narafala i ded, hem i mas resis i go long wan taon blong haed, mo ‘talemaot bisnes ya’ long ol elda long get blong taon ya. Ol elda oli mas welkamem hem. (Josua 20:4) Samtaem biaen, bambae oli sanem hem i gobak long ol elda long taon ya we aksiden i hapen, blong oli faenemaot sipos man ya i minim blong kilim narafala i ded no i wan aksiden nomo. (Ridim Namba 35:24, 25.) * Sipos i wan aksiden, bambae oli sanem hem i gobak long taon blong haed.

⁷ ?From wanem man ya i mas go luk ol elda? Ol elda oli meksua se kongregesen blong Isrel i stap klin, mo tu, oli save givhan long man ya blong i kasem sore blong Jehova. Wan man we i stadi dip long Baebol i talem se sipos man ya i no go luk ol elda, hem i save lusum laef blong hem, mo bambae i fol blong hem nomo, from we hem i no mekem samting we God i talem. Blong stap laef, hem i mas askem long ol elda blong oli givhan long hem, mo i mas glad long help we oli givim. Sipos hem i no go long wan taon blong haed, famle blong dedman i save kilim hem i ded.

8, 9. ?From wanem wan Kristin we i mekem bigfala sin i mas go luk ol elda?

⁸ Tede, taem wan Kristin we i mekem bigfala sin i wantem fren gud bakegen wetem Jehova, hem i mas go luk ol elda blong oli save givhan long hem. ?From wanem hemia i impoten? Fas samting: Jehova nao i mekem plan se ol elda bambae oli stretem ol bisnes ya blong ol bigfala sin. (Jemes 5:14-16) Seken samting: Ol elda oli save givhan long man we i tanem tingting blong hem, blong God i glad long hem bakegen, mo i no moa mekem sin ya bakegen. (Galesia 6:1; Hibrus 12:11) Namba tri samting: Ol elda oli kasem trening, mo i wok blong olgeta blong oli givhan long ol man we oli tanem tingting blong olgeta, blong oli no moa harem nogud mo tingting i no moa stikim olgeta. Jehova i talem se ol elda oli olsem wan ples we “man i save go haed long hem blong ronwe long big ren.” (Aesea 32:1, 2) Jehova i mekem plan ya blong soemaot sore long yumi.

⁹ Plante man blong God we oli go luk ol elda blong kasem help, oli harem gud mo oli gat pis long tingting blong olgeta. Traem tingbaot Brata Daniel we i mekem wan bigfala sin, be i haedem. Hem i se: “Taem ol manis oli stap pas, mi harem se i blong nating nomo blong go luk ol elda, from we oli no save mekem wan samting blong givhan long mi.” Be hem i fraet yet se wan man bambae i faenemaot hem. Mo hem i harem se i mas talem sore long Jehova long stat blong evri prea. Afta we plante manis i pas, hem i askem long ol elda blong oli givhan long hem. Naoia hem i tingting bak, mo i talem se: “Fastaem mi fraet blong go luk ol elda. Be afta we mi toktok wetem olgeta, i olsem we oli tekemaot wan bigfala hevi samting long solda blong mi.” Nao Daniel i no moa sem blong toktok long Jehova. Tingting blong hem i no moa stikim hem, mo i no longtaem i pas, hem i kam wan man blong givhan.

10. Blong kasem sore blong God, ?man we i no minim blong kilim narafala i ded i mas mekem wanem?

¹⁰ Sipos man ya we i no minim blong kilim narafala i ded i wantem kasem sore blong God, i impoten tumas we hem i ronwe kwiktaem i go long wan taon blong haed. (Ridim Josua 20:4.) * Laef blong hem i dipen long samting ya. Mo hem i mas stap long taon ya gogo kasem we hae pris i ded. Hemia i min se hem i mas lego plante samting, olsem wok mo gudfala haos blong hem, mo tu, hem i no moa fri blong wokbaot olsem hem i wantem. * (Namba 35:25) Hem i mas obei. Sipos hem i aot long taon ya, hem i soemaot se i no tinghevi long laef blong dedman ya, nao hem i save lusum laef blong hem.

11. ?Olsem wanem Kristin we i tanem tingting blong hem, i soemaot se hem i glad we God i sore long hem?

¹¹ Tede tu, wan Kristin we i tanem tingting blong hem i mas mekem sam samting blong God i sore long hem. Hem i mas lego ol fasin we oli no stret, i min se, hem i blokem ol samting we oli save lidim hem blong i mekem bigfala sin bakegen. Aposol Pol i tokbaot sam Kristin long Korin we oli tanem tingting blong olgeta, i se: ‘Yufala i harem nogud olsem we God i wantem, taswe yufala i traehad blong mekem samting we i stret. Yufala i mekem laef blong yufala i klin, harem nogud from rong blong yufala, fraet gud long God, tanem tingting, wok strong blong givhan long ol narafala, mo stretem rong we i stap.’ (2 Korin 7:10, 11) Taswe sipos yumi mekem evri samting we yumi naf blong mekem blong lego ol sin, bambae yumi soemaot long Jehova se yumi harem nogud from sin we yumi mekem, mo yumi luksave se yumi mas mekem sam samting blong Jehova i sore long yumi.

12. ?Wan Kristin i mas mekem wanem blong i gohed blong kasem sore blong Jehova?

¹² ?Wan Kristin i mas mekem wanem blong i gohed blong kasem sore blong Jehova? Hem i mas rere blong lego sam samting we hem i laekem, we oli save mekem hem i foldaon long sin. (Matiu 18:8, 9) Olsem nao, sipos ol fren blong yu oli traem pulum yu blong mekem samting we Jehova i no laekem, ?bambae yu lego olgeta? Sipos dring i wan problem long yu, ?bambae yu no joen long eni samting we i save pulum yu blong dring tumas? Sipos i had blong blokem ol nogud tingting long saed blong seks, ?bambae yu lukaot gud blong no wajem ol muvi mo Intenet, mo ol narafala samting we oli save givim ol tingting ya long yu? Tingbaot se, i no blong nating nomo we yumi lego sam samting blong obei long loa blong Jehova. Taem yumi harem se Jehova ‘i lavem yumi gogo i no save finis,’ hemia i gud bitim mak. Be taem yumi harem se Jehova i lego yumi, hemia i nogud we i nogud tumas.—Aesea 54:7, 8.

13. ?From wanem man i save harem se hem i sef mo i glad insaed long taon blong haed?

¹³ Taem man i kasem wan taon blong haed, hem i sef. Jehova i talem se: ‘Man ya i save haed long wan long ol  taon ya.’ (Josua 20:2, 3) Jehova i no talem se oli mas mekem kot long hem bakegen, nogat. Mo tu, famle blong dedman i no save kam insaed long taon ya blong kilim hem i ded. Hem i sef from we Jehova i protektem hem. Hem i no olsem wan presina, be hem i save wok, givhan long ol narafala, mo wosipim Jehova. !Hem i save gat wan gudfala laef we i glad mo i gat pis!

14. ?Wan Kristin we i tanem tingting blong hem, i save sua long wanem samting?

¹⁴ Sam man blong God we oli tanem tingting finis from wan bigfala sin, oli harem nogud yet. Oli harem se Jehova i no save fogetem samting we oli mekem. Sipos yu yu harem olsem, yu mas tingbaot se taem Jehova i fogivim wan man, hem i fogivim hem fulwan. Taswe, i no nid blong yu gohed blong harem nogud. Daniel, we yumi tokbaot finis, i harem gud afta we ol elda oli stretem hem mo givhan long hem blong i gat pis bakegen long tingting blong hem. Hem i se: “Tingting blong mi i no moa stikim mi. Taem sin ya i finis, hem i finis fulwan. Olsem Jehova i talem, hem i stap karemaot ol hevi samting ya mo i tekem i go longwe. Yumi no moa nid blong tingbaot bakegen.” Taem wan man Isrel i stap insaed long taon blong haed, hem i no nid blong fraet se famle blong dedman bambae i kam kilim hem i ded. Sem mak taem Jehova i fogivim sin blong yumi, yumi no nid blong fraet se bambae hem i tingbaot sin ya bakegen, mo panisim yumi from.—Ridim Ol Sam 103:8-12.

15, 16. ?Olsem wanem save ya se Jisas i givim ransom mo i Hae Pris, i mekem se yu trastem moa sore blong God?

 ¹⁵ Blong talem stret, yumi gat plante moa risen bitim ol man Isrel, blong trastem sore blong Jehova. Afta we Pol i talem se hem i “no glad nating” from we i no save obei long Jehova long fasin we i stret gud olgeta, hem i se: “!Mi mi talem tangkiu long God from we bambae hem i yusum Masta blong yumi Jisas Kraes blong sevem mi!” (Rom 7:25) ?Tok ya i minim wanem? Pol i mekem plante sin finis mo i stap faet agensem sin, be hem i tanem tingting blong hem. Taswe, hem i trastem Jehova blong i fogivim hem, tru long ransom sakrefaes blong Jisas. From we Jisas i ded blong pemaot yumi, yumi save gat wan tingting we i klin long fes blong God, mo yumi gat pis. (Hibrus 9:13, 14) Jisas we i Hae Pris, “hem i naf gud blong sevem olgeta we oli prea long God long nem blong hem, from we hem i laef oltaem blong askem long God blong i givhan long olgeta.” (Hibrus 7:24, 25) Long taem bifo, hae pris i givhan long ol man Isrel blong oli gat strong tingting se Jehova bambae i fogivim olgeta. Jisas i Hae Pris blong yumi, taswe tingting blong yumi i strong moa se God “i save sore long yumi mo i kaen long yumi long stret taem we yumi nidim help.”—Hibrus 4:15, 16.

¹⁶ Taswe, blong go haed long Jehova, yu mas bilif strong long sakrefaes blong Jisas. Yu no mas ting se i blong ol narafala man nomo. Yu mas bilif se yu yu save kasem blesing from sakrefaes ya. (Galesia 2:20, 21) Yu mas bilif se Jehova i save yusum ransom ya blong fogivim ol sin blong yu, mo blong givim janis long yu blong yu laef olwe. !Hemia wan presen we Jehova i givim long yu!

17. ?From wanem yu yu wantem haed long Jehova?

¹⁷ Ol taon blong haed ya oli givhan long yumi blong yumi kasem save long fasin sore blong Jehova. Oli tijim yumi se laef i tabu, oli soemaot olsem wanem ol elda oli save givhan long yumi, mining blong tanem tingting, mo from wanem yumi save sua se Jehova i fogivim yumi. ?Yu yu stap haed long Jehova? !I no gat wan ples we i sef moa! (Ol Sam 91:1, 2) Long nekis stadi, bambae yumi luk olsem wanem ol taon blong haed oli givhan long yumi, blong yumi folem nambawan fasin blong Jehova blong jajem man long stret fasin, mo blong gat sore.