1. ?Ol singsing blong yumi oli mekem wanem?

WAN bigman blong wokem ol singsing i talem se: “Taem yu harem ol tok, yu kasem wan tingting. Taem yu harem miusik, yu kasem wan filing. Be taem yu harem wan singsing, yu kasem wan tingting mo wan filing tu.” Ol singsing blong yumi oli presem Papa blong yumi long heven, Jehova, mo oli soemaot se yumi lavem hem. Yumi harem se yumi kam klosap moa long hem. Taswe, i isi blong kasem save from wanem singsing i wan impoten haf blong tru wosip, nating se yu singsing yu wan nomo, no yu singsing wetem ol brata mo sista.

2, 3. (1) ?Wanem tingting blong samfala taem oli singsing long kongregesen? (2) ?Wanem ol kwestin we bambae yumi tokbaot long stadi ya?

² ?Yu yu glad blong joen wetem kongregesen blong singsing strong, no yu fraet? Long sam kantri, ol man oli sem blong singsing long fored blong ol narafala. Samting ya i save spolem singsing blong ful kongregesen, antap moa sipos ol elda oli fraet blong singsing, no oli bisi long wan narafala wok long taem blong singsing.—Ol Sam 30:12.

 ³ Singsing i wan haf blong wosip we yumi mekem long Jehova. Taswe i no stret blong go afsaed long taem blong singsing, o mestem haf ya blong miting. Yumi evriwan i mas tingbaot se: ‘?Mi mi glad blong singsing long ol miting? ?Mi save mekem wanem sipos mi stap fraet blong singsing long fored blong ol narafala? ?Olsem wanem mi save singsing wetem filing?’

4, 5. ?Olsem wanem singsing i joen wetem wosip blong ol man Isrel bifo?

⁴ Long olgeta yia we oli pas finis, ol man blong Jehova oli mekem miusik blong presem hem. Taem ol man Isrel oli obei long Jehova, singsing i wan impoten haf blong wosip blong olgeta. Long taem ya we Deved i rerem ol samting blong bildim haos tempol, hem i jusumaot 4,000 Livaet blong oli plei miusik blong presem Jehova. Long olgeta ya, 288 “oli savegud ol fasin blong singsing, mo . . . oli tren gud.”—1 Kronikel 23:5; 25:7.

⁵ Taem oli openem haos tempol, miusik mo singsing i wan impoten haf blong program ya. Baebol i talem se: “Ol man ya blong singsing oli stap sing, mo ol pris ya oli stap blu long trampet, mo ol narafala man ya oli stap kilim simbol mo gita, we i mekem singsing blong olgeta i gud we i gud tumas. Olgeta oli stap sing blong presem Hae God . . . [nao] klaod we i saen we i saen i kam fulap long haos ya, i soemaot we Hae God i stap.” !Traem tingbaot olsem wanem samting ya i mekem bilif blong ol man Isrel i kam strong moa!—2 Kronikel 5:13, 14; 7:6.

6. ?Nehemaea i mekem wanem blong ol man oli singsing presem Jehova?

⁶ Taem Nehemaea i lidim ol man Isrel blong oli wokem bakegen stonwol blong Jerusalem, hem i singaot ol Livaet tu blong oli mekem wan grup blong singsing mo plei miusik. Taem stonwol i finis, ol miusik mo singsing blong olgeta i mekem ol man oli glad tumas. Long taem ya, i gat “tu bigfala grup blong ol man blong mekem kwaea.” Fas grup i wokbaot antap long stonwol ya, i pas long raetsaed, mo seken grup i pas long lefsaed, nao tufala i mit klosap long tempol. Ol man we oli stap longwe oli save harem bigfala noes we oli mekem. (Nehemaea 12:27, 28, 31, 38, 40, 43) Yumi save se Jehova i glad blong harem ol man blong hem oli singsing strong blong presem hem.

7. ?Olsem wanem Jisas i soemaot se singsing i wan impoten haf blong wosip blong ol Kristin?

⁷ Long taem blong Jisas tu, miusik i wan impoten haf blong tru wosip. Traem tingbaot samting we i hapen long naet we i moa impoten i bitim ol narafala naet long histri blong man. Jisas i mekem Kakae blong Masta wetem ol disaepol blong hem, mo biaen, oli singsing presem Jehova.—Ridim Matiu 26:30.

8. ?Olsem wanem ol fas Kristin oli soemaot gudfala eksampol blong singsing?

⁸ Ol fas Kristin oli soemaot wan gudfala eksampol blong singsing. Oli no go long tempol blong wosipim Jehova, olsem ol man Isrel, be oli joen long haos blong ol Kristin nomo. Ol haos ya oli no bigwan mo oli no flas olsem tempol, be nating, ol Kristin ya oli singsing yet wetem fulhat blong olgeta. Aposol Pol i  talem se: “Yufala i mas gohed blong tijim yufala mo blong leftemap tingting blong yufala wetem ol sam, mo ol tok blong presem God, mo ol singsing blong presem hem we yufala i singsing wetem tingting ya blong talem tangkiu long hem, mo yufala i mas singsing i go long Jehova long fulhat blong yufala.” (Kolosi 3:16) Ol sing long singbuk blong yumi, yumi mas singim “wetem tingting ya blong talem tangkiu” long Jehova. Oli haf blong ol “kakae” we “gudfala slef we i waes” i givim long yumi “long stret taem.”—Matiu 24:45.

9. (1) ?From wanem samfala oli fraet blong singsing long ol miting mo asembli? (2) ?Yu mas singsing olsem wanem blong presem Jehova, mo hu i mas lidim kongregesen? (Yu luk pija long stat blong stadi.)

⁹ ?Wanem i save mekem se yu fraet blong singsing? Maet long kantri blong yu no long famle, ol man oli no stap singsing. Maet yu skelem voes blong yu wetem ol gudfala man blong singsing long radio mo TV, nao yu harem se yu sem blong singsing. Be yumi evriwan i gat wok ya blong singsing presem Jehova. !Taswe, i gud yu holem singbuk blong yu i go antap, yu leftemap hed blong yu, mo yu singsing wetem glad! (Esra 3:11; ridim Ol Sam 147:1.) Long plante Haos Kingdom, ol tok blong ol singsing i kamaot long skrin. Hemia i givhan long yumi blong yumi singsing strong. Mo tu, naoia ol elda oli stap singsing taem oli mekem Kingdom Ministri Skul. Hemia i makem long tingting blong olgeta se i impoten we oli lidim ol narafala blong singsing long ol miting blong kongregesen.

10. Sipos yumi fraet blong singsing long bigfala voes, ?yumi mas tingbaot wanem?

¹⁰ Plante oli fraet blong singsing  wetem bigfala voes from we oli ting se oli no gat wan gudfala voes blong singsing. Be traem tingbaot: “Yumi evriwan i mekem mastik plante taem” long ol toktok blong yumi, be hemia i no min se yumi no moa toktok. (Jemes 3:2) Taswe, nating se voes blong yumi i no wan gudfala voes blong singsing, be yumi no mas stop, yumi mas gohed nomo blong singsing presem Jehova.

11, 12. ?Olsem wanem blong kam gud moa blong singsing?

¹¹ Maet yumi fraet blong singsing from we yumi no save olsem wanem blong singsing gud. I gat sam isi samting we yumi save mekem blong kam gud moa. *

¹² Yu save singsing wetem bigfala voes sipos yu lanem blong pulum gud win. Olsem we paoa blong lektrik i mekem wan laet i wok, long sem fasin, win blong yu i givim paoa long voes taem yu toktok mo singsing. Yu mas singsing long sem voes olsem yu toktok no maet voes we i bigwan moa. (Yu luk ol advaes long buk ya Tiokratik Skul i Save Givhan Long Yu Long Wok Blong God, pej 181 kasem 184, long haf ya “Yu Pulum Gud Win.”) Baebol i talem se ol man blong Jehova oli mas ‘singsingaot blong soemaot we oli glad,’ taem oli presem hem.—Ol Sam 33:1-3.

13. Eksplenem olsem wanem blong singsing wetem strong tingting.

¹³ Taem yufala i mekem famle wosip, mo taem yu stap yu wan, yu traem mekem olsem: Jusum wan singsing long singbuk blong yumi we yu laekem tumas. Ridim ol tok blong hem long bigfala voes we i soemaot strong tingting. Nao pulum gud win, mo long sem strong voes ya, ridim wan ful toktok bifo we win ya i finis. Nao singim ol tok ya long semfala voes. (Aesea 24:14) I no longtaem bambae yu putum moa paoa long voes blong yu taem yu singsing. Hemia wan gudfala samting. !Yu no mas sem o fraet!

14. (1) ?From wanem yu mas openem gud maot blong yu taem yu singsing? (Yu luk bokis ya  “?Olsem Wanem Blong Kam Gud Moa?”) (2) ?Wanem advaes i save givhan blong winim trabol long voes?

¹⁴ Sipos yu wantem putum paoa long  voes blong yu taem yu singsing, i mas gat spes long maot blong yu. Taswe, yu mas openem gud maot blong yu, i bitim taem yu toktok. ?Be olsem wanem sipos voes blong yu i slak o maet i antap tumas? I gat sam gudfala advaes long buk ya Tiokratik Skul i Save Givhan Long Yu Long Wok Blong God, pej 184, long bokis ya “Trabol Long Voes We Man i Mas Winim.”

15. (1) ?Long bigfala miting long Amerika long 2016, ?oli talemaot wanem? (2) ?From wanem oli wokem niufala singbuk ya?

¹⁵ Long bigfala miting long Amerika long 2016, evriwan oli glad tumas taem Brata Stephen Lett blong Hed Kampani i talemaot wan niufala singbuk, we nem blong hem “Singsing Long Jehova Wetem Glad.” Brata Lett i eksplenem se, from we oli wokem bakegen Baebol ya Niu Wol Translesen, naoia yumi nidim wan niufala singbuk. Oli jenisim plante tok long niufala singbuk ya blong mekem i laenap wetem niufala Niu Wol Translesen. I gat sam niufala singsing tu we oli tokbaot wok blong prij mo ransom. Mo tu, from we singsing i wan impoten haf blong wosip, Hed Kampani i wantem wokem wan singbuk we i naes. Taswe kava blong hem i sem mak olsem Niu Wol Translesen.

16, 17. ?Wanem sam narafala jenis long niufala singbuk?

 ¹⁶ Blong mekem i isi blong yusum singbuk ya, oli seraotem ol singsing long ol grup we oli tokbaot ol defdefren samting. Taswe, singsing 1 kasem 12 i tokbaot Jehova, 13 kasem 20 i tokbaot Jisas mo ransom, mo i gohed long ol grup olsem. Long stat blong singbuk, i gat wan lis blong olgeta topik we ol singsing oli tokbaot. Hemia i save givhan long ol brata taem oli wantem jusum wan singsing we i stret long pablik tok blong olgeta.

¹⁷ Blong givhan long evriwan blong oli singsing wetem fulhat, oli jenisim toktok long sam singsing, blong mekem bigfala tingting i kamaot klia. Mo tu, oli tekemaot sam singsing we yumi no yusum tumas, mo oli putum ol narawan we oli tokbaot ol miting mo wok blong prij. Wan eksampol: Yumi no yusum tumas singsing ya “Yu Stap Glad Long Ol Presen Blong God,” ale oli tekemaot mo putum narafala singsing ya, “Tijim Ol Man Long Tok Blong God.”

18. ?From wanem yumi mas lanem ol singsing long niufala singbuk?

¹⁸ Plante singsing long singbuk blong yumi, oli olsem ol prea. Ol sing ya oli save givhan long yu blong yu talemaot ol filing blong yu long Jehova. Sam narafala singsing oli givhan long yumi, ‘blong yumi lavem ol narafala, mo mekem ol gudfala wok.’ (Hibrus 10:24) Yumi mas save ol wod mo tiun blong ol singsing ya. Yumi save lanem olgeta sipos yumi lesin oltaem long ol rikoding blong ol brata mo sista we oli singsing. Ol rikoding ya oli stap long Websaet ya jw.org. Taem yu lanem ol singsing long haos, traem singsing wetem strong tingting mo filing. *

19. ?Olsem wanem evriwan long kongregesen oli save joen blong wosipim Jehova?

¹⁹ Yumi no mas fogetem se singsing i wan impoten haf blong wosip blong yumi. Hem i wan gudfala rod blong soemaot long Jehova se yumi lavem hem, mo blong talem tangkiu long hem from ol samting we hem i mekem blong yumi. (Ridim Aesea 12:5.) Taem yu singsing wetem glad, yu pulum ol narafala tu blong oli mekem sem mak. Long fasin ya, evriwan long kongregesen, ol yangfala, ol olfala, mo ol niuwan, oli joen blong wosipim Jehova. Taswe, yu no mas fraet blong singsing wetem fulhat blong yu. Yu mas obei long Sam ya, se: ‘!Yumi sing long Jehova!’ !Yes, singsing wetem glad!—Ol Sam 96:1.